1 Gʋ Pɔɔlʋ na Banabasi wɩɛ Ikoniyom dɩɛ naŋ na, ba ju Yudatina tʋm danɛ naŋ ganaŋkʋ ba cha baa yɩɛ na. Sɛ ba tawɩ Ɩsʋɔ wɩɛ sɛ Yudatina na baa ba ba yɩɛ Yudatina fɔɩ lɩɛ di. 2 Ama Yudatina baa ba n lɩɛ di na fuosi dʋ baa ba ba yɩɛ Yudatina tawɩ warɩɛ ba nfɩɛrɛ sɛ ba kʋlʋ sɩŋ lɩɛdɩra baa dʋɔ. 3 Dɩmʋŋ dʋɔ Pɔɔlʋ na Banabasi cha dɩmaŋ taŋgɩlɛ. Sɛ ba mʋ digela doŋ tawɩ Kpaŋjuo wʋsɛ dʋɔ wɩɛ. Sɛ wʋ yela sɛ ba yɩɛ adaŋgana daasɛ na mamachi wɩɛ mʋ kalaa sɛ wɩɛ ŋii ba tawɩ lɩɩna Ɩsʋɔ wɩɩ dʋɔ na yɩɛ gasiŋteŋ. 4 Sɛ dɩɛ janɛ gaa bakpa baa kpara tɩba, barɛ kpaŋ Yudatina sɛ barɛ dʋɔ kpaŋ kpirida baa. 5 Sɛ baa ba ba yɩɛ Yudatina, Yudatina na ba asanaŋtina fa nfɩɛrɛ jɔ dɩkɔŋ sɛ baa nyala ba na baa lɔ bʋɛ kʋ ba. 6 Ama gʋ kpalɛnara baa jiŋ ŋina na dʋɔ, ba se ju Lisitira na Dɛbɩ ŋii ŋɩ yɩɛ Likoniya dɩɛsɛ ajanɩɛ, na dɩɛsɛ ŋii ŋɩ logo, 7 dɩmaŋ sɛ ba ju dʋɔ tawɩ wɩɛ abama ŋii.

8 Baalɛ wʋrʋ cha wʋ wɩɛ Lisitira dɩɛ naŋ, wʋ yɩɛ buobi bɛ, sɛ ba lʋrʋ ɩ wʋ jaɩ-jaɩ sɛ wʋ n pala gɩyɩɛ gʋrʋ ʋ. 9 Wʋ nyii wɩɛ ŋii Pɔɔlʋ a tawɩ na. Sɛ Pɔɔlʋ kɩɛ ɩ kurum na gʋ wʋ wɩɛna lɩɛdi gʋ wʋ a dɩlɛ yu lʋm chʋɔ, 10 sɛ Pɔɔlʋ kuusi tawɩ sɛ, <<Kʋlʋ sɩŋ n nafara dʋɔ.>> Baalɛ wʋŋ nyii ŋina na, wʋ puli sɛ wʋ fara wʋ dɔŋ.

11 Gʋ jama baa na ŋii Pɔɔlʋ yɩɛ na, ba kuusi Likoniya dɩtawɩ naŋ sɛ, <<Panɩŋ baa kɔŋ daa jaŋ takɩɛ bakpa.>> 12 Sɛ ba fa Banabasi yɩrɛ sɛ Siyosi sɛ ba fa Pɔɔlʋ dʋɔ yɩrɛ sɛ Hemisi akala takɩɛ wʋŋ n nyina ba tawɩrɛ. 13 Sɛ panɛ Siyosi tʋm danɛ wɩɛ dɩɛ janɛ gaa laraŋ sɛ ga sei kɔna naa baalɛ na fʋagɩɛ dɩɛ janɛ gaa buonɔ, akala takɩɛ wʋ na jama baa a ja sɛ baa diesi gadiesa fa ba.

14 Ama gʋ kpirida baa Banabasi na Pɔɔlʋ nyii dɩmʋŋ na, ba chati ba abʋrɩ afuusa sɛ ba se jʋʋ jama baa tɩba kuusi sɛ, 15 <<Baala, be n yɩɛ sɛ ɩ yɩɛ ŋina? Daa gba dɩ yɩɛ bakpa bɛ takɩɛ amɩɛ. Dɩ chamɩna wɩɛ abama ŋii bɛ dɩɩ kɔna amɩɛ sɛ dɩɩ tawɩ amɩɛ sɛ n yela panɩŋ ŋii ŋɩ yɩɛ kpakpuo na tʋm, na ɩ kɔŋ Ɩsʋɔ wʋkɩɛnasa wʋŋ jaŋ, wʋŋ wʋ yɩɛ Ɩsʋɔ adugbe, tie, ɔpʋ na bʋrʋkʋma gaa ga wɩɛ ŋɩ tɩba. 16 Saŋa gaa ga lam na, Ɩsʋɔ yela sɛ atawɩ yɩrɩ kpiniŋ pala na ba tɩŋtɩŋ ba gbɩɛsɛ dʋɔ. 17 Ama Ɩsʋɔ yɩɛ bʋrʋ bam mʋ di wʋ wʋsɛ dʋɔ seriya. Wʋ yɩɛ wʋbam sɛ wʋ yela sɛ duoni nɩɛ lɩɩ Ɩsʋɔ adugbe sɛ adiya yɩɛ dieli ŋɩ saŋa dʋɔ kʋrʋkʋrʋ, wʋ fa amɩɛ adiya fɔɩ sɛ wʋ yela sɛ amɩɛ asadi.>> 18 Hali gʋ ba tawɩ wɩɛ ŋina na gba, dɩ yɩɛ wiliŋ fa ba sɛ ba n dɩlɛ gaa jama baa gbɩɛ na ba n baa diesi gadiesa fa ba.

19 Dɩmaŋ sɛ Yudatina barɛ baa ba lɩɩ Antiyokiya na Ikoniyom tawɩ biliŋi jama baa sɛ ba n kʋlʋ sɩŋ Pɔɔlʋ na Banabasi dʋɔ. Sɛ ba lɔ Pɔɔlʋ bʋɛ sɛ ba fɔŋɩ ɩ lɩɩ dɩɛ janɛ gaa laraŋ, sɛ ba nfɩɛrɛ yɩɛ ba takɩɛ wʋ sɩŋ. 20 Ama gʋ kpalɛnara baa sɩla logo ɩ wʋrʋgbɩɛ na, wʋ kʋlʋ sɩŋ sɛ wʋ bɔrɛ ju dɩɛ janɛ gaa naŋ. Gʋ tɩɛna na, wʋ na Banabasi lɩɩ dɩmaŋ ju Dɛbɩ.

21 Pɔɔlʋ na Banabasi tawɩ wɩɛ abama ŋii dɩmʋŋ dɩɛ janɛ gana naŋ sɛ ba yu kpalɛnara fɔɩ. Sɛ ba bɔrɛ kɔŋ Lisitira, Ikoniyom na Antiyokiya, 22 yela baa dʋ kpalɛnara baa doŋ, sɛ ba tawɩ dʋ ba sɛ ba n sɩŋ gasiŋteŋ ba lɩɛdi naŋ. Sɛ ba ti tawɩ ba sɛ, <<Ŋɩ tiri gʋ dɩɩ pala awʋrʋfʋɔ fɔɩ naŋ na dɩɩ jʋʋ Ɩsʋɔ juori gaa naŋ.>> 23 Sɛ Pɔɔlʋ na Banabasi lɩsɛ lɩɛdɩra dikpeŋ bɩnɩɛ fa lɩɛdɩra dikpeŋ kʋma. Ba pɔgʋ nʋɔ jɔ dɩga mʋ ba dʋ Kpaŋjuo wʋŋ ba mʋ ba wʋsɛ lɔ wʋ dʋɔ na pamɩɛ naŋ. 24 Gʋ ba mʋna Pisidiya tibi dʋɔ wʋrʋgbɩɛ na, ba kɔŋ Pamfiliya tibi dʋɔ. 25 Gʋ ba tawɩ Ɩsʋɔ wɩɛ ŋii Pɛgɩ dɩɛ naŋ na, ba ju dʋɔ ju Ataliya dɩɛ naŋ.

26 Ba lɩɩ Ataliya na, ba mʋna lɩŋ dʋɔ bɔrɛ kɔŋ Antiyokiya, dɩmaŋ sɛ ba mʋ dʋ Ɩsʋɔ pamɩɛ naŋ sɛ wʋ n fa ba wʋ wɩɩ sɛ ba taŋ dɩtʋm gaa kʋrʋkʋrʋ. 27 Gʋ ba tala dɩmaŋ na, ba yagɛ lɩɛdɩra dikpeŋ gaa sɩla dikulie, sɛ ba tawɩ bʋrʋ gaa Ɩsʋɔ pala na ba dʋɔ yɩɛ na kpiniŋ na ganaŋkʋ wʋ fulu lɩɛdi gbɩɛ fa baa ba ba yɩɛ Yudatina na. 28 Sɛ ba cha kpalɛnara baa jaŋ taŋgɩlɛ.