1 Baala barɛ lɩɩ Yudiya tibi dʋɔ kɔŋ Antiyokiya baa kalaa lɩɛdɩra baa sɛ, <<Ba n kara amɩɛ baŋlɛ takɩɛ ganaŋkʋ Mosesi mbara a kalaa na, ɩ ɩɩ dɩlɛ yu mɔlɔgɩ ɩ.>> 2 Ŋina yela sɛ ba na Pɔɔlʋ na Banabasi di noro gaa ga nʋɔ wɩɛ doŋ. Dɩmʋŋ dʋɔ ba lɩsɛ Pɔɔlʋ na Banabasi na lɩɛdɩra barɛ sɛ ba n ju Yerusalem ga na kpirida na lɩɛdɩra dikpeŋ bɩnɩɛ lɩɩna wɩɛ tasɛ ŋina dʋɔ. 3 Lɩɛdɩra dikpeŋ gaa lɩsɛ ba gbɩɛ. Gʋ baa ju na ba mʋna Fonisiya na Samariya sɛ ba tawɩ ganaŋkʋ baa ba ba yɩɛ Yudatina biliŋi kɔŋ Ɩsʋɔ jaŋ. Wɩɛ ŋina yela sɛ dɩ yɩɛ lɩɛdɩra baa jʋŋ fɔɩ. 4 Gʋ ba tala Yerusalem na, lɩɛdɩra dikpeŋ gaa, kpirida na lɩɛdɩra dikpeŋ bɩnɩɛ baa lɩɛ ba sɛ ba tawɩ bʋrʋkʋma gaa Ɩsʋɔ pala na ba dʋɔ yɩɛ na.

5 Dɩmaŋ sɛ lɩɛdɩra barɛ baa ba kpi Farasitina dikpeŋ gaa dʋɔ na kʋlʋ sɩŋ tawɩ sɛ, <<Ŋɩ tiri gʋ baa ba ba yɩɛ Yudatina a kara ba baŋlɛ na dɩɩ dʋ ba sɛ ba n kpaŋ Mosesi mbara ŋii dʋɔ.>>

6 Sɛ kpirida na lɩɛdɩra dikpeŋ bɩnɩɛ baa sɩla na baa kɩɛ wɩɛ tasɛ ŋina tɩba. 7 Gʋ ba tawɩ-tawɩ wɩɛ ŋii dʋɔ taŋgɩlɛ wʋrʋgbɩɛ na, Petero kʋlʋ sɩŋ tawɩ ba sɛ, <<Ma dɔŋa lɩɛdɩra, ɩ jiŋ gʋ saŋa gaa ga lam na, Ɩsʋɔ lɩsɛ maŋ lɩɩ amɩɛ tɩba sɛ ma n tawɩ wɩɛ abama ŋii fa baa ba ba yɩɛ Yudatina, na baa nyii na baa lɩɛ di. 8 Ɩsʋɔ wʋŋ wʋ jiŋ digela naŋ na, fa ba wʋ Feliŋ takɩɛ ganaŋkʋ wʋ fa daa na, na ŋii kalaa sɛ wʋ lɩɛ ba dʋ. 9 Ɩsʋɔ n yɩɛ daa na ba ngoriŋ-ngoriŋ ŋ, akala takɩɛ ba lɩɛdi dʋɔ wʋ yɩɛ ba agela dɩchɩrɩchɩrɩ. 10 Dɩmʋŋ dʋɔ, dɩtɩɛna be n yɩɛ sɛ ɩ ja sɛ ɩ yɩɛ Ɩsʋɔ lɔ tɩba, takɩɛ ɩɩ mʋ gasʋlasɛ ayuntina ŋii daa yaa daa duluŋ n dɩlɛ sɩlɛ na ɩɩ sɩlɛ kpalɛnara baa? 11 Aye! Dɩ lɩɛ di gʋ ŋɩ pala na Kpaŋjuo Yesu Ɩsʋɔ wɩɩ dʋɔ sɛ dɩ yu mɔlɔgɩ, takɩɛ baa.>>

12 Sɛ bakpa baa ba sɩla dɩmaŋ na kpiniŋ yɩɛ surumm baa nyii Banabasi na Pɔɔlʋ jaŋ gʋ baa tawɩ ba adaŋgana daasɛ na mamachi ŋii Ɩsʋɔ pala na ba dʋɔ yɩɛ baa ba yɩɛ Yudatina tɩba na. 13 Gʋ ba tawɩ taŋ na, Jamesi lɩsɛ nʋɔ sɛ, <<Ma dɔŋa lɩɛdɩra, n nyii ma jaŋ. 14 Simoŋ tawɩ daa ganaŋkʋ Ɩsʋɔ chɩŋkpɩɛ kalaa baa ba ba yɩɛ Yudatina na sɛ ba wɩɛ tiri ɩ, sɛ wʋ lɩsɛ ba tɩba barɛ fa wʋ wʋsɛ. 15 Ŋii Ɩsʋɔ bajana baa tawɩ na dɩmʋŋ wɩɛ ŋina yɩɛ bʋdʋŋdʋlʋŋ ganaŋkʋ ba sabɩɛ sɛ,

16 <<Ŋina wʋrʋgbɩɛ na, maa ti bɔrɛ kɔŋ

na maa bɔrɛ ma Dawidi dukuru diko gaa ga warɩɛwʋ.

Maa bɔrɛ ma ŋii ŋɩ salɩɛ na,

na maa ti kʋna ga sɩŋ na dieli.

17 Sɛ bakpa baa ba kakaa na aja ja Kpaŋjuo

na baa ba ba yɩɛ Yudatina sɛ ma yɩrɛ jaga ɩ ba dʋɔ na kpiniŋ,

Kpaŋjuo wʋŋ wʋ yɩɛ ŋina,

18 sɛ wʋ lɩsɛ kalaa saŋa gaa ga lam taŋgɩlɛ na, n tawɩ dɩmʋŋ.>>

19 Sɛ Yakubu ju dʋɔ tawɩ sɛ, <<Ma nfɩɛrɛ n nyina sɛ n baa yela na dɩɩ yɩɛ ŋɛ wiliŋ fa baa ba ba yɩɛ Yudatina sɛ baa biliŋi baa kɔŋ Ɩsʋɔ jaŋ na. 20 Ama dɩ daga na dɩɩ sabɩɛ tanɛ ga fa ba tawɩ ba sɛ ba n baa di adiya ŋii ba mʋ diesi gadiesa fa panɩŋ, ba n lɩsɛ ba wʋsɛ lɩɩ danaŋburidi naŋ, ba n baa tawʋ namɩɛ baa ba ŋɩrɛ ba kʋ sɛ ba n baa di asima. 21 Akala takɩɛ ba tawɩ Mosesi mbara ŋii dɩɛ kʋma naŋ taŋgɩlɛ fɔɩ, sɛ ba karaŋ ŋɛ Yudatina tʋm danɩŋ naŋ Fɩɛsɛ wɩɩ kʋma.>>

22 Sɛ kpirida, lɩɛdɩra dikpeŋ bɩnɩɛ baa na lɩɛdɩra dikpeŋ gaa kpiniŋ fa nfɩɛrɛ sɛ ba n lɩsɛ ba tɩba barɛ na baa kpiri ba na Pɔɔlʋ na Banabasi ju Antiyokiya. Ba lɩsɛ Yudasi [wʋŋ baa yagɛ ɩ sɛ Basabasi] na Silasi. Baala bala baa ba yɩɛ lɩɛdɩra baa tɩba asanaŋtina. 23 Sɛ ba sabɩɛ wɩɛ ŋina dʋ tanɛ naŋ mʋ kpiri ba sɛ,

Dɩɩ yɩlɩ amɩɛ.

Kpirida na lɩɛdɩra dikpeŋ bɩnɩɛ baa na amɩɛ dɔŋa lɩɛdɩra kpiniŋ.

Dɩɩ sabɩɛ tanɛ gana dɩɩ fa amɩɛ baa ɩ ba yɩɛ Yudatina lɩɛdɩra baa ɩ wɩɛ Antiyokiya, Siriya na Kilikiya na kpiniŋ.

24 Dɩ nyii gʋ daa tɩba barɛ baa dɩ n fa ba gbɩɛ kɔŋ amɩɛ jaŋ baa tawɩ wɩɛ ŋarɛ baa nyala amɩɛ yela baa warɩɛ amɩɛ nfɩɛrɛ. 25 Dɩmʋŋ dʋɔ daa kpiniŋ dɩ kpa gʋ dɩɩ lɩsɛ baala barɛ kpi daa dɩɛtina Banabasi na Pɔɔlʋ dʋɔ kpiri ba amɩɛ jaŋ. 26 Baa n nyina baa ba mʋ ba nkpa si fa daa Kpaŋjuo Yesu Kirisito yɩrɛ gaa. 27 Dɩmʋŋ dʋɔ dɩɩ kpiri Yudasi na Silasi amɩɛ jaŋ na ba tɩŋtɩŋ baa tawɩ amɩɛ wɩɛ adʋŋdʋlʋŋ ŋii dɩɩ sabɩɛ. 28 Ŋɩ wɩɛ dieli fa Ɩsʋɔ Feliŋ na daa takɩɛ dɩ n baa mʋ gasʋla yuŋtɛ sɩlɛ amɩɛ kpi mbara ŋina dʋɔ. 29 Ŋii n nyina sɛ n baa di adiya ŋii ba mʋ diesi gadiesa fa panɩŋ na asima, n baa tawʋ namɩɛ baa ba ŋɩrɛ na kʋ na ɩ lɩsɛ amɩɛ wʋsɛ lɩɩ danaŋburidi naŋ. Sɛ ɩŋ yɩɛ dɩmʋŋ wɩɛ ŋina na, aja yɩɛ dieli fa amɩɛ.

Dɩɩ kali amɩɛ.

30 Sɛ ba tii ba gbɩɛ sɛ ba ju Antiyokiya, dɩmaŋ sɛ ba yagɛ lɩɛdɩra dikpeŋ gaa sɩla sɛ ba mʋ tanɛ gaa fa ba. 31 Gʋ bakpa baa karaŋ tanɛ gaa na, dɩ yɩɛ ba jʋŋ lɩɩna tawɩ dʋ wɩɛ ŋii dʋɔ. 32 Yudasi na Silasi baa ba tɩŋtɩŋ ba yɩɛ Ɩsʋɔ bajana na, tawɩ wɩɛ fɔɩ mʋ tawɩ dʋ lɩɛdɩra baa sɛ ba dʋ ba doŋ naŋ. 33 Gʋ ba cha dɩmaŋ saŋa chonii na, lɩɛdɩra baa dʋɔ tii ba gbɩɛ wʋsɛfɩɛ naŋ na baa bɔrɛ kɔŋ baa ba kpiri ba na jaŋ. 34 Ama Silasi yɩɛ wʋ nfɩɛrɛ sɛ wʋ a dʋɔ dɩmaŋ.*15:34 Naa Ɩsʋɔ Sabɩɛwɩɛ kpiniŋ n wɩɛna dɩmʋŋ wɩɛ ŋina a. 35 Ama Pɔɔlʋ na Banabasi dʋɔ Antiyokiya, dɩmaŋ sɛ ba na fɔɩ barɛ kalaa sɛ ba tawɩ Kpaŋjuo wɩɛ ŋii.

36 Saŋa garɛ wʋrʋgbɩɛ na, Pɔɔlʋ tawɩ Banabasi sɛ, <<Yela dɩɩ bɔrɛ ju ga bʋɔ lɩɛdɩra baa ba wɩɛ dɩɛsɛ ŋii dɩ tawɩ Kpaŋjuo wɩɛ na kpiniŋ dʋɔ, na dɩɩ kɩɛ ganaŋkʋ ba chaɩ na.>> 37 Banabasi aja sɛ wʋ a mʋ Yohane, wʋŋ ba ti baa yagɛ ɩ sɛ Maakɩ na kpi ba dʋɔ. 38 Ama Pɔɔlʋ n kpa sɛ wʋ n kpaŋ ba a, akala takɩɛ wʋ yela ba sɛ wʋ n cha ba jaŋ na baa ju dʋɔ yɩɛ dɩtʋm gaa Pamfiliya dɩɛ naŋ ŋ. 39 Sɛ noro gaa ga nʋɔ wɩɛ doŋ kɔŋ ba tɩtɩba sɛ ba kpara tɩba. Sɛ Banabasi mʋ Maakɩ mʋna lɩŋ dʋɔ ju Kipurosi, 40 ama Pɔɔlʋ lɩsɛ Silasi sɛ wʋ na ɩ ba lam, sɛ lɩɛdɩra baa mʋ ba dʋ Ɩsʋɔ pamɩɛ naŋ takɩɛ wʋ n fa ba wʋ wɩɩ. 41 Sɛ wʋ mʋna Siriya na Kilikiya yela wʋ a dʋ lɩɛdɩra akpeŋ ŋii doŋ.