1 Gʋ Yudatina asadi adiya ŋii baa yagɛ sɛ Pentikosi wɩɩ gaa talɛ na, Kirisito lɩɛdɩra baa kpiniŋ sɩla dikulie. 2 Gabʋanaŋ sɛ galaŋba takɩɛ feliŋ adoŋtina jɔ lɩɩ Ɩsʋɔ adugbe jʋʋ waa gaa ba chaɩ ga tɩba na kpiniŋ naŋ. 3 Sɛ ba na bʋrʋ garɛ takɩɛ bʋala nʋɔ-bisi kpara tɩba kɔŋ gaa cha ba wʋkʋma dʋɔ. 4 Sɛ Ɩsʋɔ Feliŋ ŋii su ba kpiniŋ sɛ ba fara baa tawɩ atawɩ ngoriŋ-ngoriŋ ganaŋkʋ Ɩsʋɔ Feliŋ ŋii fa ba sɛ ba n tawɩ na.

5 Saŋa gana naŋ na, Yudatina baa baa se Ɩsʋɔ sɛ ba lɩɩ dulunya naŋ gapɩlɛkʋma sɛ ba chaɩ Yerusalem na. 6 Gʋ ba nyii dɩmʋŋ galaŋba gana na, bakpa fɔɩ kɔŋ gaa jaŋi sɛ dɩ yɩɛ ba doba akala takɩɛ ba wʋkʋma nyii gʋ baa tawɩ wʋ tɩŋtɩŋ wʋ dɩtawɩ bɛ. 7 Sɛ dɩ yɩɛ ba doba fɔɩ sɛ ba tasɛ sɛ, <<Baala bana baa baa tawɩ n na kpiniŋ ba yɩɛ Galaliyatina bɛ yaa? 8 Na sɩnɛ sɛ daa wʋkʋma nyii gʋ baa tawɩ wʋ tɩŋtɩŋ wʋ dɩtawɩ? 9 Daa tɩba barɛ yɩɛ Patiyatina, Midiyatina na Elamititina. Barɛ lɩɩ Mesopotamiya, Yudiya, Kapadokiya na Pontosi, Asiya, 10 Firigiya, Pamfiliya, Ijipiti na Libiya salɛ gaa ga tirina Kireni, na mʋɔra baa ba lɩɩ Roma na. 11 Ba barɛ [yɩɛ Yudatina na baa ba bɩrɩŋsɛ gaa tʋŋ Yudatina tʋm na], Kiretitina na Arabiyatina. Dɩ nyii gʋ baa tawɩ Ɩsʋɔ mamachi wɩɛ daa tɩŋtɩŋ daa dɩtawɩ naŋ.>> 12 Sɛ dɩ yɩɛ ba doba sɛ ba wuliti, sɛ ba tasɛ dɔŋa sɛ, <<Be sɛ ŋina tie a kalaa?>>

13 Ama barɛ jabi ba tawɩ sɛ, <<Ba nyʋɔ wayɩŋ sʋlʋŋ fɔɩ.>>

14 Sɛ Petero na kpirida gifi darɛ baa kʋlʋ sɩŋ, sɛ wʋ jiŋna wʋ lofu tawɩ fa jama baa sɛ, <<Ma dɔŋa Yudatina na wʋkʋma wʋŋ wʋ chaɩ Yerusalem na kpiniŋ, n nyii ŋii ma tawɩ na na dieli, n yela na maa lɩsɛ wɩɛ ŋii tie fa amɩɛ. 15 Baala bana n dɩɛsɛ ɛ takɩɛ ganaŋkʋ ɩ fa nfɩɛrɛ na. Ŋɩ yɩɛ nafo karafɩɛ saŋgʋ bɛ.>> 16 Ama ŋii ŋɩ tibi na yɩɛ ŋii Ɩsʋɔ cha pala na Ɔja Joweli dʋɔ tawɩ si na bɛ sɛ,

17 <<Ɩsʋɔ tawɩ sɛ gɩyɩɛnɩŋ dɩtamtɩŋ na,

maa chɩɛgɩ ma Feliŋ wʋrʋgɩ bakpa kpiniŋ dʋɔ.

Amɩɛ bie bala jaŋ na ala jaŋ aja gbala,

amɩɛ yalaŋbie aja yu Ɩsʋɔ lɩsɛ kalaa,

amɩɛ bɩnɩɛ aja dosi.

18 Hali ma tʋmɩra bala jaŋ na ala jaŋ gba maa chɩɛgɩ ma Feliŋ wʋrʋgɩ ba dʋɔ gɩyɩɛnɩŋ ŋina naŋ,

na baa gbala.

19 Maa kalaa mamachi wɩɛ Ɩsʋɔ adugbe

na daasɛ tibi dʋɔ,

na maa kalaa asima, bʋala na nyɩŋfʋ asitasa.

20 Wiita aja bɩrɩŋsɛ giteŋteŋbiri,

na gafita a bɩrɩŋsɛ asima

pɔɩ na Kpaŋjuo jilima wɩɩ janɛ gaa a kɔŋ.

21 Na wʋkʋma wʋŋ wʋ yagɛ

Kpaŋjuo yɩrɛ na, aja yu mɔlɔgɩ.>>✝

22 Sɛ Petero ju dʋɔ tawɩ sɛ, <<Ma dɔŋa Isiralitina n nyii wɩɛ ŋina, Yesu Nasarati yɩɛ baalɛ wʋŋ Ɩsʋɔ lɩsɛ fa amɩɛ sɛ wʋ n yɩɛ adaŋgana, mamachi wɩɛ na daasɛ ŋii Ɩsʋɔ pala wʋ dʋɔ yɩɛ amɩɛ tɩba, takɩɛ ganaŋkʋ amɩɛ tɩŋtɩŋ ɩ jiŋ na. 23 Ɩsʋɔ wʋŋ wʋ fa ŋina gbɩɛsɛ nfɩɛrɛ sɛ wʋ fɩla wʋ jiŋ ŋina dʋɔ na, n lɩsɛ dɩmʋŋ baalɛ wina fa amɩɛ, sɛ ɩ yela sɛ bakpa sʋbʋɛ chɔna amɩɛ, sɛ ɩ jɔ ɩ daŋ gasagasa dʋɔ kʋ ɩ. 24 Ama Ɩsʋɔ feŋsi ɩ lɩɩ sɩŋ naŋ, sɛ wʋ lɩsɛ ɩ lɩɩ sɩŋ yowu naŋ, akala takɩɛ sɩŋ n dɩlɛ di wʋ dʋɔ ɔ.>> 25 Sɛ Dawidi fɩla tawɩ Yesu wʋsɛ dʋɔ wɩɛ sɛ,

<<Saŋa kʋma maa na Ɩsʋɔ ma asanaŋ.

Akala takɩɛ wʋ wɩɛ ma pam jɩsaŋ dʋɔ,

ma aa jigisi i.

26 Dɩmʋŋ dʋɔ ma yu asadi fɔɩ, sɛ ma yu jʋŋ fɔɩ ma dɩtawɩ naŋ,

maŋ gba maa cha tamaa naŋ,

27 akala takɩɛ nya aa yela ma feliŋ dʋ atatina diele e,

yaa nyaa yela n dɩchɩrɩchɩrɩtɛ wʋŋ wʋsɛ a dara.

28 Nya yela sɛ ma jiŋ nkpa gbɩɛ;

nya yela sɛ ma yu asadi na dieli nya asanaŋ.>>✝

29 Ma dɔŋa Yudatina, maa dɩlɛ jɔ ma digela naŋ tawɩ amɩɛ sɛ daa gɩnanaŋ Dawidi sɩŋ sɛ ba wuu ɩ sɛ wʋ bʋɔ duwei jɩna gaa tala jaŋ. 30 Ama wʋ cha wʋ yɩɛ Ɩsʋɔ Ɔja bɛ sɛ wʋ jiŋ gʋ Ɩsʋɔ ka ntaŋ tawɩ si fa Dawidi sɛ wʋ a mʋ wʋ gananabie wʋrʋ chasɛ wʋ juorigbeli dʋɔ. 31 Gʋ Dawidi jiŋ bʋrʋ gaa gaa kɔŋ na, wʋ tawɩ Kirisito feŋ lɩɩ sɩŋ naŋ dʋɔ wɩɛ takɩɛ ba n yela ɩ dʋ atatina diele ɩ yaa wʋ wʋsɛ n baa dara. 32 Ɩsʋɔ feŋsi dɩmʋŋ Yesu wina kɔŋ nkpa naŋ sɛ daa kpiniŋ dɩ yɩɛ ŋɩ dʋɔ seriya dira gasiŋteŋ. 33 Sɛ Ɩsʋɔ jiŋna ɩ ju ga chasɛ wʋ pam jɩsaŋ dʋɔ sɛ Juo wʋŋ fa ɩ Feliŋ ganaŋkʋ wʋ tawɩ si na. Sɛ wʋ chɩɛgɩ ŋii ɩ na sɛ ɩ nyii dɩtɩɛna na wʋrʋgɩ. 34 Dawidi n ju Ɩsʋɔ adugbe e, ama wʋ tawɩ sɛ,

<<Ɩsʋɔ wʋŋ tawɩ fa ma Kpaŋjuo sɛ,

Cha ma pam jɩsaŋ dʋɔ,

35 ga tala gʋ maa mʋ n badʋŋna mʋ yɩɛ n nafara dɩjagatɩŋ.>>✝

36 Sɛ wʋ ju dʋɔ tawɩ sɛ, <<Dɩmʋŋ dʋɔ n yela na Isiralitina kpiniŋ a nyii na dieli sɛ, Ɩsʋɔ yɩɛ Yesu wina wʋŋ ɩ jɔ ɩ daŋ gasagasa dʋɔ na Kpaŋjuo na Kirisito.>>

37 Gʋ bakpa baa nyii wɩɛ ŋina na, dɩ jʋʋ ba ba agela naŋ sɛ ba tasɛ Petero na kpirida ba baŋbaŋ baa sɛ, <<Ma dɔŋa Yudatina, be sɛ dɩɩ yɩɛ?>>

38 Sɛ Petero lɩsɛ ba nʋɔ sɛ, <<N biliŋi lɩɩ amɩɛ dɩsʋbʋ naŋ na baa sɔ amɩɛ tɩba wʋkʋma Yesu Kirisito yɩrɛ naŋ na wʋ a mʋ amɩɛ dɩsʋbʋ chɩɛ amɩɛ na ɩ yu gafaasa gaa ga yɩɛ Ɩsʋɔ Feliŋ ŋii. 39 Ɩsʋɔ tawɩ si sɛ wʋ a fa amɩɛ na amɩɛ bie na baa ba wɩɛ taŋasɛ. Ŋɩ yɩɛ baa Kpaŋjuo daa Ɩsʋɔ aja yagɛ ba na kpiniŋ teri bɛ.>>

40 Sɛ wʋ tawɩ wɩɛ fɔɩ jɔ ba nyienaŋ, sɛ wʋ sʋlʋ ba sɛ, <<N mɔlɔgɩ amɩɛ wʋsɛ lɩɩ gɩnanaŋ nyinaŋ doŋ gana naŋ.>> 41 Dɩmʋŋ dʋɔ baa ba lɩɛ wʋ wɩɛ ŋii di sɛ ba sɔ ba sɛ ba gaa kpi lɩɛdɩra baa dʋɔ wɩɩ gana na, aja yɩɛ bakpa kɔrʋɔsɛ sɩ toro.

42 Sɛ ba mʋ ba wʋsɛ fa kpirida baa kalaa ŋii, bʋga yɩɛ garɛ, ba jaɩ bodobodo kpara sɛ ba jɔ dɩga. 43 Sɛ wʋkʋma se ba lɩɩna mamachi wɩɛ na adaŋgana daasɛ fɔɩ ŋii Kpirida baa yɩɛ na dʋɔ. 44 Lɩɛdɩra baa kpiniŋ cha bʋga dikulie, sɛ ba bʋrʋkʋma cha ga yɩɛ ba kpiniŋ ba teri. 45 Sɛ baa yaa ba akpaŋta na ba abʋrɩ ba chamɩna aterembie ŋii baa fa wʋkʋma ganaŋkʋ dɩ cha tiri ɩ na. 46 Wɩɩ kʋma baa ju dʋɔ baa sɩla baa bʋga Ɩsʋɔ tʋm danɛ gaa naŋ. Baa jaɩ bodobodo ba wʋkʋma waasɛ dʋɔ sɛ baa mʋ asadi na digela fʋlʋŋsɛ baa di adiya, 47 baa kalɩɛ Ɩsʋɔ, sɛ baa yu bakpa baa kpiniŋ asanaŋ Ɩsʋɔ wɩɩ. Sɛ Kpaŋjuo wʋŋ mʋ baa wʋ mɔlɔgɩ ba na kpi lɩɛdɩra baa dʋɔ gɩyɩɛ kʋma.