1 Gʋ siŋii ŋii nʋɔ kɔŋ tie na, Pɔɔlʋ kpiri yagɛ kpalɛnara baa. Gʋ wʋ tawɩ dʋ ba taŋ na, wʋ kali ba sɛ wʋ lɩɩ dɩmaŋ ju Masidoniya. 2 Wʋ pala tibi gaa dɩɛsɛ dʋɔ yela wʋ a tawɩ tawɩ dʋ wɩɛ fɔɩ wʋ a fa bakpa baa. Dɩtamtɩŋ na wʋ gaa tala Girisi, 3 dɩmaŋ sɛ wʋ cha gafɩtasɛ sɩ toro. Gʋ wʋ a ja wʋ a mʋna lɩŋ dʋɔ ju Siriya na, Yudatina baa jɔ wʋ dʋɔ dɩkɔŋ, dɩmʋŋ dʋɔ wʋ yɩɛ wʋ nfɩɛrɛ sɛ wʋ a bɔrɛ ga mʋna Masidoniya. 4 Baa ba kpaŋ ɩ na n nyina Sopata Piro bu wʋŋ wʋ lɩɩ Beriya, Arisitakosi na Sekondosi baa ba lɩɩ Tesalonika, Gayosi wʋŋ wʋ lɩɩ Dɛbɩ, Timoti, Tikiko na Tirofimo baa ba lɩɩ Asiya tibi dʋɔ. 5 Baala bana pala asanaŋ ga daa daa Tʋrasɩ dɩɛ naŋ. 6 Gʋ ba di Bodobodo gaa ga Tana Yiisi Asadi Adiya di taŋ na, dɩ pala lɩŋ dʋɔ lɩɩ Filipo. Gɩyɩɛnɩŋ anʋŋ wʋrʋgbɩɛ na, dɩ ga mɩɛna ba Tʋrasɩ, dɩmaŋ sɛ dɩ cha gɩyɩɛnɩŋ lɩkarɛ.

7 Wɩɩ gaa ga dɔŋ Soji asanaŋ na, dɩ gaa jaŋi na dɩɩ di adiya. Sɛ Pɔɔlʋ tawɩ fa bakpa baa, akala takɩɛ tɩɛna wʋ a lɩɩ ba jaŋ dʋɔ, wʋ ju dʋɔ tawɩ ga tala tɩɛ tɩtɩba. 8 Fitila aba bɔlɩɛɩ abaŋsʋrʋ danɛ gaa naŋ diele gaa dɩɩ jaŋi na. 9 Yeleŋbu wʋrʋ baa yagɛ ɩ sɛ Iwutukosi wʋ chaɩ nfaŋsʋrʋ jaŋ wʋ a doliewu gʋ Pɔɔlʋ a tawɩ wʋ a ju wʋ a kɔnɛ na. Gʋ wʋ duo asoroŋ ga laŋ na, wʋ lɩɩ abaŋsʋrʋ danɛ atorotɛ naŋ gaa sala tibi, gʋ ba mʋ ɩ na, wʋ sɩŋ. 10 Sɛ Pɔɔlʋ tibi kɔŋ sɛ wʋ fu yeleŋbu wʋŋ dʋɔ sɛ wʋ puga ɩ tawɩ sɛ, <<N baa yɩyɩɛ, wʋ chaɩ nkpa naŋ.>> 11 Dɩmaŋ sɛ Pɔɔlʋ ti bɔrɛ jiŋ abaŋsʋrʋ danɛ gaa ga jaɩ bodobodo tawʋ. Sɛ wʋ ju dʋɔ tawɩ Ɩsʋɔ wɩɛ hali tɩɛ naa, sɛ wʋ lɩɩ dɩmaŋ. 12 Sɛ bakpa baa mʋ asadi mʋ yeleŋbu wʋŋ wʋ chaɩ nkpa naŋ na ju dɩɛ.

13 Dɩ mʋ pantuu janɛ pala lɩŋ dʋɔ ju Asosi, diele gaa dɩɩ ga mʋ Pɔɔlʋ. Wʋ fɩla yɩɛ dɩmʋŋ gbɩɛsɛ nfɩɛrɛ ŋina si, akala takɩɛ wʋ a pala bɛ ju dɩmaŋ. 14 Gʋ wʋ jaŋina daa Asosi na, dɩ mʋ ɩ sɛ daa na ɩ dɩ ju Mitileni. 15 Gʋ tɩɛ naa na, dɩ lɩɩ dɩmaŋ mʋna lɩŋ dʋɔ gaa tala Kiyosi. Gʋ tɩɛ ti naa na, dɩ tɩɛsɛ ju Samosi, go tɩɛ ti naa na, sɛ dɩ ga tala Militusi. 16 Pɔɔlʋ yɩɛ wʋ nfɩɛrɛ takɩɛ wʋ a mʋna lɩŋ dʋɔ laŋ Efiso na wʋ n baa taŋgɩlɛ Asiya tibi dʋɔ. Akala takɩɛ wʋ a ja bileŋ na wʋ a tala Yerusalem pɔɩ na Pentikosi asadi adiya wɩɩ gaa a tala.

17 Gʋ Pɔɔlʋ wɩɛ Militusi na, wʋ kpiri yagɛ Efisotina lɩɛdɩra dikpeŋ gaa bɩnɩɛ. 18 Gʋ ba kɔnɛ na, wʋ tawɩ ba sɛ, <<Ɩ jiŋ ganaŋkʋ maŋ na amɩɛ dɩ cha saŋa kpiniŋ lɩɩ gɩyɩɛ gaa ga dɔŋ asanaŋ gʋ ma kɔŋ Asiya tibi dʋɔ na. 19 Ma kɔna ma wʋsɛ tie na dieli sɛ ma mʋ asa lɩŋ tʋŋ Kpaŋjuo wʋŋ, ŋɩ wɩɛ tɩba takɩɛ Yudatina baa jɔ ma dʋɔ dɩkɔŋ mʋ yɩɛ maŋ lɔ tɩba fɔɩ. 20 Ɩ jiŋ gʋ bʋrʋ gaa gaa chɔna amɩɛ na, ma n mʋ wɩsɛ amɩɛ ɛ, ama ma kalaa amɩɛ bakpa naŋ na waa garɛ dʋɔ mʋ ju garɛ dʋɔ. 21 Ma jɔ Yudatina na Girikitina nyienaŋ sɛ ŋɩ tiri gʋ ba n biliŋi lɩɩ ba dɩsʋbʋ naŋ kɔŋ Ɩsʋɔ jaŋ na baa yu lɩɛdi daa Kpaŋjuo Yesu naŋ.>>

22 Sɛ wʋ ju dʋɔ tawɩ sɛ, <<Dɩtɩɛna Ɩsʋɔ Feliŋ dʋ maŋ sɛ ma n ju Yerusalem, sɛ ma ba jiŋ bʋrʋ gaa gaa tibi ma dʋɔ dɩmaŋ ŋ. 23 Ma jiŋ gʋ dɩɛ janɛ kʋma naŋ na, Ɩsʋɔ Feliŋ ŋii jɔ ma nyinaŋ sɛ danɛ tʋɔ na awʋrʋfʋɔ dana maŋ. 24 Ama ma na gʋ ma nkpa yɩɛ kpakpuo bɛ fa maŋ. Ŋii maa jawʋ na n nyina sɛ maa taŋ ma dɩtʋm na dɩtʋm gaa Kpaŋjuo Yesu mʋ fa maŋ na kʋrʋkʋrʋ. Dɩtʋm gaa n nyina sɛ maa di wɩɛ abama dʋɔ seriya lɩɩna Ɩsʋɔ wɩɩ dʋɔ.>>

25 <<Dɩtɩɛna ma jiŋ gʋ amɩɛ baa ma pala amɩɛ tɩba tawɩ Ɩsʋɔ juori gaa dʋɔ wɩɛ fa na, tɩba wʋrʋ ba aa ti na maŋ ŋ. 26 Dɩmʋŋ dʋɔ maa tawɩ amɩɛ jaŋ sɛ, amɩɛ tɩba wʋkʋma wʋŋ wʋ tʋsʋ na, ŋɩ n lɩɩ ma jaŋ ŋ. 27 Akala takɩɛ ma n mʋ kpii na maa jɔ Ɩsʋɔ jawʋ kpiniŋ dawuta fa amɩɛ ɛ. 28 N kɩɛ amɩɛ wʋsɛ dʋɔ na dieli na ɩ kɩɛ feŋ dikpeŋ gaa Ɩsʋɔ Feliŋ ŋii yɩɛ amɩɛ asanaŋtina na dʋɔ. N yɩɛ Ɩsʋɔ* lɩɛdɩra dikpeŋ gaa wʋ mʋ wʋ tɩŋtɩŋ wʋ bu asima lɩɛ ba na feŋ kpara. 29 Ma jiŋ gʋ ma lam wʋrʋgbɩɛ na, gbogboo aba baa ba libi na aja jʋʋ amɩɛ tɩba, na baa chaŋ feŋ dikpeŋ gaa. 30 Hali amɩɛ tɩŋtɩŋ amɩɛ tɩba baala barɛ aja kʋlʋ na baa biliŋi gasiŋteŋ gaa, ganaŋkʋ baa fɔŋɩ lɩɛdɩra baa gaa kpaŋ ba wʋsɛ. 31 Dɩmʋŋ dʋɔ n kɩɛ amɩɛ wʋsɛ dʋɔ na dieli, na ɩ nyiŋi gʋ bɩŋsɛ sɩ toro mɩnaŋ gʋ ma n mʋ asa lɩŋ yela amɩɛ wʋkʋma nyinaŋ jʋɔ yuluma na wiita a.>>

32 Sɛ Pɔɔlʋ ju dʋɔ tawɩ sɛ, <<Dɩtɩɛna, ma chamɩna amɩɛ maa dʋ Ɩsʋɔ pam naŋ na wʋ wɩɩ wɩɛ naŋ. Ŋii aaŋ dɩlɛ yela na ɩ bɩɩ, na ŋii yela amɩɛ na baa Ɩsʋɔ yɩɛ ba dɩchɩrɩchɩrɩ na a yu gapatɩɛ. 33 Ma asa ba aa chɛ wʋrʋ diterembi fʋlʋm yaa diterembi sɩɛm yaa abʋrɩ afuusa a. 34 Amɩɛ tɩŋtɩŋ ɩ jiŋ gʋ ma pamɩɛ ŋina sɛ ma chamɩna maa yɩɛ dɩtʋm maa yu abʋrɩ ŋii ŋɩ tiri ma tɩŋtɩŋ na ma dɔŋa. 35 Bʋrʋkʋma gaa ma yɩɛ na, ma kalaa amɩɛ sɛ dɩ daga na ɩ yɩɛ dɩmʋŋ dɩtʋm doŋ-tɛ mʋ chɔna baa ba fʋʋ na. Na ɩ nyiŋi wɩɛ ŋii Kpaŋjuo Yesu tɩŋtɩŋ tawɩ na takɩɛ kusee wɩɛ fa naŋ kii lɩɛ.>>

36 Gʋ wʋ tawɩ ŋina na, wʋ na ba kpiniŋ luuŋ ba dʋna dʋɔ sɛ ba jɔ dɩga. 37 Sɛ ba kpiniŋ ba wii sɛ ba puga ɩ, sɛ ba kali ɩ. 38 Bʋrʋ gaa ga yela sɛ ba bɔtaa na n nyina gʋ wʋ tawɩ ba sɛ ba aa ti na ɩ ɩ. Dɩmaŋ sɛ ba kpaŋ ɩ ju pantuu janɛ gaa jaŋ.