Atos 3

Petero chɔ buobi sʋlʋdɛ wʋrʋ

1 Ga wɩɩ darɛ gʋ dɩ tala dɩga jɔ saŋa na, Petero na Yohane cha baa ju Ɩsʋɔ tʋm danɛ naŋ. Ŋɩ yɩɛ wiita karafɩɛ atoro saŋa bɛ. 2 Saŋa gana naŋ na, ba sɩlɛ baalɛ wʋŋ ba lʋrʋ ɩ buobi kɔŋ Ɩsʋɔ tʋm danɛ buonɔ gaa baa yagɛ sɛ Dieli, diele gaa baa mʋ ɩ baa si wɩɩ kʋma yela wʋ a sʋlʋ bakpa baa baa kɔŋ Ɩsʋɔ tʋm danɛ gaa naŋ na aterembie. 3 Gʋ wʋ na Petero na Yohane aja baa jʋʋ na, wʋ sʋlʋ ba aterembie. 4 Sɛ Petero na Yohane ba kɩɛ ɩ na dieli, sɛ Petero tawɩ ɩ sɛ, <<Kɩɛ daa!>> 5 Dɩmʋŋ dʋɔ baalɛ wʋŋ kɩɛ ba yela wʋ a kɩɛ gbɩɛ takɩɛ wʋ a yu bʋrʋ lɩɩ ba jaŋ.

6 Dɩmaŋ sɛ Petero tawɩ ɩ sɛ, <<Ma tana diterembi fʋlʋm yaa diterembi gasɩɛm m, ama maa fa nyaŋ bʋrʋ gaa ma wɩɛna. Yesu Kirisito Nasarati wʋkpa wʋŋ yɩrɛ naŋ, kʋlʋ pala.>> 7 Sɛ Petero chaŋ wʋ jɩsaŋ pam naŋ chɔna ɩ sɛ wʋ kʋlʋ. Gabʋanaŋ sɛ baalɛ wʋŋ nafara na nafara akɔnaŋ yɩɛ doŋ. 8 Sɛ wʋ puli sɩŋ, sɛ wʋ fara wʋ a palɛ. Sɛ wʋ na ba jʋʋ Ɩsʋɔ tʋm danɛ gaa naŋ, wʋ dɔŋ, wʋ a puli yela wʋ a kalɩɛ Ɩsʋɔ. 9 Gʋ bakpa baa kpiniŋ na gʋ wʋ dɔŋ yela wʋ a kalɩɛ Ɩsʋɔ na, 10 ba jiŋ gʋ wʋŋ n nyina baalɛ wʋdʋŋdʋlʋŋ wʋŋ nafʋɔ wʋ chaɩ Ɩsʋɔ tʋm danɛ buonɔ gaa baa yagɛ ga sɛ Dieli wʋ a sʋlʋ aterembie na. Ŋii ŋɩ tibi wʋ dʋɔ na yela sɛ dɩ yɩɛ ba mamachi na doba.

Petero dɩtawɩ Ɩsʋɔ tʋm danɛ naŋ

11 Gʋ sʋlʋdɛ wʋŋ chaŋ Petero na Yohane tɩba na, dɩ yɩɛ bakpa baa kpiniŋ doba sɛ ba se ju ba jaŋ diele gaa baa yagɛ sɛ Solomoŋ Diko naŋ. 12 Gʋ Petero na ŋina na, wʋ tawɩ ba sɛ, <<Ma dɔŋa Isiralitina, be n yɩɛ sɛ ŋina yɩɛ amɩɛ doba? Be n yɩɛ sɛ ɩɩ kɩɛ daa sɛ daa tɩŋtɩŋ daa doŋ yaa gʋ dɩɩ se Ɩsʋɔ na dʋɔ sɛ dɩ yela sɛ baalɛ wina kʋlʋ wʋ dɔŋ? 13 Abiraham, Isaki na Yakubu ba Ɩsʋɔ na daa duluŋ Ɩsʋɔ n fa wʋ tʋmɩrɛ Yesu jilima. Amɩɛ n mʋ ɩ fa sɛ ba n kʋ ɩ sɛ ɩ pɩɛ ɩ Pilato asanaŋ. Ŋɩ wɩɛ tɩba takɩɛ Pilato cha yɩɛ wʋ nfɩɛrɛ sɛ wʋ a yela ɩ. 14 Ɩ pɩɛ Dɩchɩrɩchɩrɩ na Wʋchirigisa Wʋŋ sɛ ɩ tasɛ sɛ ba n yela gatagapʋtɛ wʋŋ fa amɩɛ. 15 Sɛ ɩ kʋ wʋŋ wʋ a fa nkpa na, ama Ɩsʋɔ feŋsi ɩ kɔŋ nkpa naŋ. Dɩ yɩɛ ŋina dʋɔ seriyatina. 16 Yesu yɩrɛ naŋ lɩɛdi n yela sɛ baalɛ wina wʋŋ ɩ jiŋ ɩ, sɛ ɩ na ɩ n na yu doŋ. Yesu yɩrɛ naŋ na lɩɛdi gaa ga pala na wʋ dʋɔ kɔŋ n fa ɩ lʋm chʋɔ kʋrʋkʋrʋ takɩɛ ganaŋkʋ amɩɛ kpiniŋ ɩ na ɩ na.>>

17 Ma dɔŋa Yudatina, dɩtɩɛna ma na gʋ ɩ yɩɛ gɩbajɩŋ wɩɛ, dɩmʋŋ sɛ amɩɛ asanaŋtina gba yɩɛ. 18 Ama ŋina sɛ Ɩsʋɔ yela sɛ ŋii wʋ fɩla tawɩ si lɩɩna na wʋ bajana dʋɔ sɛ wʋ Kirisito aja na awʋrʋfʋɔ na, a kɔŋ tɩba. 19 Dɩmʋŋ dʋɔ n biliŋi lɩɩ amɩɛ dɩsʋbʋ naŋ na ɩ kɔŋ Ɩsʋɔ jaŋ na wʋ a mʋ amɩɛ dɩsʋbʋ chɩɛ amɩɛ. Dɩmʋŋ saŋa gana na, ɩɩ yu fɩɛsɛ lɩɩ Ɩsʋɔ jaŋ, 20 na wʋ a kpiri Kirisito wʋŋ wʋ cha lɩsɛ ɩ fa amɩɛ na, wʋŋ n nyina Yesu. 21 Ŋɩ tiri gʋ wʋ a dʋɔ Ɩsʋɔ adugbe ga tala saŋa gaa Ɩsʋɔ aja desina bʋrʋkʋma si ga gbɩɛ dʋɔ takɩɛ ganaŋkʋ Ɩsʋɔ pala na wʋ bajana dɩchɩrɩchɩrɩ dʋɔ tawɩ si saŋa gaa ga lam na. 22 Akala takɩɛ Mosesi tawɩ sɛ, <<Kpaŋjuo amɩɛ Ɩsʋɔ wʋŋ aja lɩsɛ ɔja takɩɛ maŋ lɩɩ amɩɛ tɩŋtɩŋ amɩɛ bakpa naŋ. Ŋɩ tiri gʋ n nyii wɩɛ kʋma ŋii wʋ a tawɩ amɩɛ na. 23 Na wʋkʋma wʋŋ wʋ aa nyii wʋ jaŋ na, Ɩsʋɔ aja lɩsɛ ɩ lɩɩ wʋ bakpa naŋ.>>✝3:23 Ditiro 18:15,18,19.

24 Sɛ wʋ ju dʋɔ tawɩ sɛ, <<Gasiŋteŋ, Ɩsʋɔ bajana baa kpiniŋ lɩɩ Samuweli dʋɔ na baa ba kpaŋ ɩ na, ba fɔɩ baa ba cha tawɩ na, fɩla tawɩ si dɩmʋŋ gɩyɩɛnɩŋ ŋina dʋɔ wɩɛ. 25 Amɩɛ tɩŋtɩŋ ɩ yɩɛ Ɩsʋɔ bajana baa gananabisi bɛ na dɩkɔŋ gaa Ɩsʋɔ jʋɔ na daa duluŋ. Wʋ tawɩ Abiraham sɛ, <Maa pala na n gananabisi dʋɔ yɩɛ tibi dʋɔ bakpa kpiniŋ kusee.>✝3:25 Jene 22:18; 26:4. 26 Gʋ Ɩsʋɔ lɩsɛ wʋ tʋmɩrɛ na, wʋ chɩŋkpɩɛ kpiri ɩ amɩɛ jaŋ sɛ wʋ n gaa yɩɛ amɩɛ kusee wʋ a yela amɩɛ wʋkʋma a biliŋi lɩɩ wʋ dɩsʋbʋ gbɩɛsɛ naŋ.>>