Lɩɛdɩra baa jɔ dɩga sʋlʋ digela doŋ
23 Gʋ ba yela Petero na Yohane na, ba bɔrɛ ju ba dɔŋa lɩɛdɩra baa jaŋ ga tawɩ ba bʋrʋkʋma gaa Ɩsʋɔ sei bɩnɩɛ na dɩɛ bɩnɩɛ tawɩ ba na kpiniŋ. 24 Gʋ ba nyii ŋina na, ba mʋ nʋɔ garɛ jɔ dɩga fa Ɩsʋɔ tawɩ sɛ, <<Kpaŋjuo Ɩsʋɔ, nyaŋ n lɔ Ɩsʋɔ adugbe na tie, ɔpʋ na ŋɩ tɩba bʋrʋkʋma. 25 Nya mʋna n Feliŋ ŋii dʋɔ yela sɛ daa duluŋ Dawidi, n tʋmɩrɛ gʋ wʋ tawɩ sɛ,
<<Be n yɩɛ sɛ atawɩ yɩrɩ a kara biŋbira?
Be n yɩɛ sɛ bakpa gbɩɛsɛ nfɩɛrɛ yɩɛ kpakpuo?
26 Tibi dʋɔ juoneŋ kʋlʋ sɩŋ kʋla ba wʋsɛ,
sɛ dɩɛ asanaŋtina sɩla bʋga
kʋlʋ sɩŋ Ɩsʋɔ
na wʋ Lɩsɛrɛ Wʋŋ dʋɔ.>>4:26 Num 2:1,2.
27 Gasiŋteŋ, Hɛrɔdɩ na Pontiyosi Pilato na baa ba ba yɩɛ Yudatina na Isiralitina baa ba wɩɛ dɩɛ janɛ gana naŋ sɩla sɛ ba kʋlʋ sɩŋ Yesu n tʋmɩrɛ dɩchɩrɩchɩrɩ wʋŋ nya lɩsɛ na dʋɔ. 28 Sɛ ba yɩɛ bʋrʋ gaa ga pala na n doŋ na n jawʋ naŋ ŋii nya cha fa ŋɩ dʋɔ nfɩɛrɛ takɩɛ ŋii tibi na. 29 Dɩtɩɛna Ɩsʋɔ, kɩɛ ba ŋaŋsɛ dʋɔ na nyaa yela n tʋmɩrɛ a dɩlɛ tawɩ n wɩɛ digela doŋ naŋ. 30 Tɩɛŋɩ n pam na nyaa pala na Yesu n tʋmɩrɛ dɩchɩrɩchɩrɩ wʋŋ yɩrɛ naŋ chɔ bakpa na nyaa yɩɛ adaŋgana daasɛ na mamachi wɩɛ.
31 Gʋ ba jɔ dɩga taŋ na, diele gaa ba jaŋi na jigisi. Sɛ Ɩsʋɔ Feliŋ su ba kpiniŋ sɛ ba mʋ digela doŋ tawɩ Ɩsʋɔ wɩɛ.