1 Sɛ baalɛ wʋrʋ baa yagɛ ɩ sɛ Ananiyasi na wʋ alʋ Safira gba yaa ba tibi garɛ. 2 Ananiyasi alʋ gba jiŋ gʋ wʋ lɩsɛ aterembie ŋii ŋarɛ, sɛ wʋ mʋ ŋii ŋɩ kakaa na, kɔna kpirida baa.

3 Sɛ Petero tasɛ ɩ sɛ, <<Ananiyasi be n yɩɛ sɛ nya yela sɛ Sɩtanɩ su n digela sɛ nyaa yɩɛ akarɩɛ nyaa fa Ɩsʋɔ Feliŋ, sɛ nya lɩsɛ aterembie ŋii nya yaa n tibi na ŋarɛ? 4 Tibi gaa ba yɩɛ n teri bɛ pɔɩ sɛ nya yaa? Gʋ nya yaa wʋrʋgbɩɛ na, aterembie ŋii ba yɩɛ n teri bɛ? Be n yɩɛ sɛ nya fa nfɩɛrɛ sɛ nyaa yɩɛ ŋina? Nya n yɩɛ akarɩɛ fa wʋkpa a, ama Ɩsʋɔ.>>

5 Gʋ Ananiyasi nyii ŋina na, wʋ lɩɩ sala sɛ wʋ sɩŋ. Sɛ nyɩŋtɩɛ fɔɩ chaŋ baa ba nyii ŋii ŋɩ tibi na. 6 Sɛ yalaŋbie kɔŋ gaa mʋ dukuru pɔgʋ wʋ gɩtatɛ sɛ ba silɛ ɩ lɩɩ dɩmaŋ ga wuu.

7 Aja yɩɛ karafɩɛ atoro wʋrʋgbɩɛ na, wʋ alʋ jʋʋ kɔŋ, wʋ ba jiŋ bʋrʋ gaa ga tibi na a. 8 Sɛ Petero tasɛ ɩ sɛ, <<Tawɩ maŋ, ŋina n nyina aterembie ŋii nyaŋ na Ananiyasi ɩ yu lɩɩ tibi gaa dʋɔ?>>

Sɛ wʋ lɩsɛ nʋɔ sɛ, <<Ɛɛŋ, ga aterembie mɩnaŋ.>>

9 Sɛ Petero tawɩ ɩ sɛ, <<Be n yɩɛ sɛ nyaŋ na ɩ kpa na ɩ yɩɛ Ɩsʋɔ Feliŋ ŋii lɔ tɩba? Kɩɛ, baa ba wuu n baalɛ na wɩɛ buonɔ, sɛ baa aaŋ ja baa sɩlɛ nyaŋ gba.>>

10 Gabʋanaŋ sɛ wʋ lɩɩ sala Petero asanaŋ sɛ wʋ sɩŋ. Gʋ yalaŋbie baa kɔŋ gaa na ɩ gʋ wʋ sɩŋ na, ba sɩlɛ wʋ gɩtatɛ lɩɩ dɩmaŋ mʋ ɩ ga wuu wʋ baalɛ jaŋ. 11 Sɛ nyɩŋtɩɛ fɔɩ chaŋ lɩɛdɩra dikpeŋ gaa na baa ba nyii wɩɛ ŋii na kpiniŋ.

12 Sɛ kpirida baa yɩɛ adaŋgana daasɛ na mamachi fɔɩ bakpa baa tɩba. Sɛ lɩɛdɩra baa kpiniŋ cha baa sɩla baa bʋga Solomoŋ diko naŋ. 13 Ŋɩ wɩɛ tɩba takɩɛ bakpa baa tawɩ ba wʋsɛ dʋɔ wɩɛ abama bɩrɛ, ama wʋrʋ n dɩlɛ yu digela na wʋ a kpi ba dʋɔ ɔ. 14 Ama baala na ala fɔɩ lɩɛ Kpaŋjuo wʋŋ di, sɛ ba mʋ ba gaa kpi lɩɛdɩra baa dʋɔ. 15 Ŋina dʋɔ, bakpa kɔna lʋmɩɛtina dɩɛ naŋ gbɩɛsɛ bisi naŋ, sɛ ba duosi ba mpa na akalaŋ dʋɔ ganaŋkʋ Petero a lam na, na wʋ dikuiwu a sala ba barɛ dʋɔ. 16 Sɛ bakpa galaga baa ba lɩɩ dɩɛsɛ ŋii ŋɛ logo Yerusalem gba jaŋi, sɛ ba kɔna ba lʋmɩɛtina na baa feliŋ sʋbʋ a nyala ba, sɛ ba chɔ ba kpiniŋ.

17 Sɛ Ɩsʋɔ sei bɩnɩɛ naŋ bɩnɛ na baa ba kpi wʋ dʋɔ sɛ ba yɩɛ Sadukitina dikpeŋ gaa dɩsɛchɛ kpirida baa dʋɔ. 18 Ba chaŋ kpirida baa sɛ ba mʋ ba tɔ danɛ. 19 Ama yuluma gana, Ɩsʋɔ gabʋɔ kɔŋ gaa tʋlʋ danɛ dɩtʋɔtɩŋ bʋɔlɩɛ ŋii sɛ wʋ lɩsɛ ba. 20 Sɛ wʋ tawɩ ba sɛ, <<N pala ju ga sɩŋ Ɩsʋɔ tʋm danɛ gaa naŋ, na ɩ tawɩ nkpa gafɔlɛ gana dʋɔ wɩɛ ŋii kpiniŋ fa bakpa.>>

21 Gʋ tɩɛna na, ba jʋʋ Ɩsʋɔ tʋm danɛ naŋ sɛ ba fara baa kalaa bakpa takɩɛ ganaŋkʋ Ɩsʋɔ gabʋɔ wʋŋ cha tawɩ ba na.

Gʋ Ɩsʋɔ sei bɩnɩɛ naŋ bɩnɛ wʋŋ na baa ba kpi wʋ dʋɔ gaa talɛ na, ba yagɛ dɩɛnaŋ bɩnɩɛ naŋ bɩnɩɛ dikpeŋ baa ba yɩɛ Isirali bɩnɩɛ kpiniŋ gaa sɩla. Sɛ ba kpiri barɛ sɛ ba n ju danɛ dɩtʋɔtɩŋ gaa na baa ga lɩsɛ kpirida baa kɔŋ.

22 Ama gʋ gagbasɛ anyaŋnyaŋtina baa tala danɛ dɩtʋɔtɩŋ dɩmaŋ na, ba n na ba a. Dɩmʋŋ dʋɔ ba bɔrɛ gaa tawɩ bɩnɩɛ baa sɛ, 23 <<Dɩ na gʋ ba tɔ danɛ dɩtʋɔtɩŋ gaa na dieli yela kɩɛra baa sɩmɩɛɩ bʋɔlɩɛ ŋii nʋɔ, ama gʋ dɩ tʋlʋ ŋɛ na, dɩ n na wʋrʋ ŋɩ tɩba a.>> 24 Gʋ baa nyii wɩɛ ŋina na, Ɩsʋɔ tʋm danɛ kɩɛrɛ bɩnɛ wʋŋ na Ɩsʋɔ sei bɩnɩɛ baa wuliti, sɛ ba fa nfɩɛrɛ sɛ be wɩɛ n kɔŋ dɩmʋŋ.

25 Sɛ wʋrʋ kɔŋ gaa tawɩ ba sɛ, <<N kɩɛ, baala baa ɩ tɔ danɛ na, ba sɩmɩɛɩ Ɩsʋɔ tʋm danɛ naŋ baa kalaa bakpa baa.>> 26 Sɛ kɩɛrɛ bɩnɛ wʋŋ na wʋ gagbasɛ anyaŋnyaŋtina barɛ ju ga mʋ kpirida baa kɔŋ. Ba n mʋ ba doŋ dʋɔ ɔ, akala takɩɛ baa se nyɩŋtɩɛ takɩɛ bakpa baa aja lɔ ba bʋɛ.

27 Gʋ ba mʋ kpirida baa kɔŋ na, ba mʋ ba gaa sɩŋ dɩɛnaŋ bɩnɩɛ naŋ bɩnɩɛ baa asanaŋ, na Ɩsʋɔ sei bɩnɩɛ naŋ bɩnɛ wʋŋ a tasɛ ba wɩɛ. 28 Sɛ wʋ tawɩ ba sɛ, <<Dɩ dʋ amɩɛ na dieli sɛ n baa ti kalaa yɩrɛ gana naŋ. Ama ɩ kalaa-kalaa sɛ Yerusalem kpiniŋ nyii amɩɛ kalaa takɩɛ ɩɩ ja sɛ dɩɩ di baalɛ wina sɩŋ dʋɔ dɩpʋɛ.>>

29 Sɛ Petero na kpirida ba baŋbaŋ baa lɩsɛ ba nʋɔ sɛ, <<Ŋɩ tiri gʋ dɩ n nyii Ɩsʋɔ jaŋ kii bakpa. 30 Daa duluŋ Ɩsʋɔ feŋsi Yesu wʋŋ ɩ jɔ ɩ daŋ gasagasa dʋɔ kʋ ɩ na lɩɩ sɩŋ naŋ. 31 Ɩsʋɔ jiŋna ɩ ju ga chasɛ wʋ tɩŋtɩŋ wʋ pam jɩsaŋ dʋɔ takɩɛ Asanaŋtɛ na Mɔlɔgɩrɛ ganaŋkʋ Isiralitina a biliŋi lɩɩ ba dɩsʋbʋ naŋ na wʋ a mʋ ba dɩsʋbʋ chɩɛ ba. 32 Daa na Ɩsʋɔ Feliŋ ŋii wʋŋ Ɩsʋɔ mʋ fa baa baa nyii wʋ wɩɛ na yɩɛ wɩɛ ŋina dʋɔ seriyatina bɛ.>>

33 Gʋ ba nyii wɩɛ ŋina na, ba kara biŋbira baa ja baa kʋ ba. 34 Ama Farasi wʋkpa wʋrʋ wʋŋ baa yagɛ ɩ sɛ Gamali, wʋ yɩɛ Mosesi mbara wʋkalaasa bɛ sɛ bakpa baa kpiniŋ a mʋ jilima baa fa ɩ na, kʋlʋ sɩŋ dɩɛnaŋ bɩnɩɛ naŋ bɩnɩɛ baa tɩba tawɩ sɛ, ba n yela na baala baa a lɩɩ asʋŋ chonii. 35 Dɩmaŋ sɛ wʋ tawɩ ba sɛ, <<Ma dɔŋa Isiralitina, n kɩɛ na dieli ŋii ɩ ja sɛ ɩ mʋ yɩɛ baala bana na dʋɔ. 36 Saŋa gaa ga lam na, Tiyodasi cha kɔŋ gaa tawɩ sɛ wʋ yɩɛ wʋkpa wʋjanɛ bɛ, sɛ bakpa aja yɩɛ takɩɛ gafisi sɩ nara (400) kpaŋ ɩ. Ba kʋ ɩ sɛ wʋ kpamɩra baa kpiniŋ puseŋ sɛ ŋɩ yɩɛ kpakpuo. 37 Wʋ wʋrʋgbɩɛ na, Yudasi wʋŋ wʋ yɩɛ Galaliya wʋkpa na kɔŋ bakpa kalɩŋ gɩyɩɛnɩŋ ŋii saŋa, sɛ wʋ yela sɛ bakpa kʋlʋ sɩŋ Romatina baa dʋɔ. Wʋŋ gba ba kʋ ɩ sɛ wʋ kpamɩra baa kpiniŋ puseŋ. 38 Dɩmʋŋ dʋɔ wɩɛ ŋii ŋɩ kɔŋ jaŋ na, maa tawɩ amɩɛ sɛ n yela baala bana nyiŋeŋ na baa pala. Akala takɩɛ ba gbɩɛsɛ nfɩɛrɛ yaa ba dɩtʋm lɩɩ wʋkpa jaŋ na, ŋii warɩɛ. 39 Ama sɛ ŋɩ lɩɩ Ɩsʋɔ jaŋ na, ɩ ɩɩ dɩlɛ gaa baala bana gbɩɛ ɛ. Ɩ na gʋ ɩɩ yuo na Ɩsʋɔ mɩnaŋ.>>

40 Sɛ ba lɩɛ wʋ nʋɔnaŋ dɩtawɩ gaa dʋ. Ba yagɛ kpirida baa jʋʋ kɔŋ sɛ ba taɩ ba achʋchʋɛ. Dɩmaŋ sɛ ba dʋ ba sɛ ba n baa ti tawɩ wɩɛ ŋarɛ Yesu yɩrɛ naŋ, sɛ ba yela ba sɛ ba lam.

41 Sɛ kpirida baa mʋ asadi lɩɩ dɩɛnaŋ bɩnɩɛ naŋ bɩnɩɛ baa asanaŋ, akala takɩɛ Yɩrɛ gaa dʋɔ ba kalaa ba takɩɛ ba daga awʋrʋfʋɔ asaju. 42 Wɩɩ kʋma ba dɔŋ Ɩsʋɔ tʋm danɛ naŋ na waasɛ dʋɔ. Sɛ ba ju dʋɔ kalaa yela baa jɔ Wɩɛ abama ŋii dʋɔ dawuta takɩɛ Yesu n nyina Kirisito wʋŋ.