1 Sɛ Ɩsʋɔ sei bɩnɩɛ naŋ bɩnɛ wʋŋ tasɛ Sitifiŋ sɛ, <<Wɩɛ ŋii ba mʋ pʋɩ nyaŋ na yɩɛ Gasiŋteŋ?>>

2 Sɛ wʋ lɩsɛ ɩ nʋɔ sɛ, <<Majuo aba na ma dɔŋa Isiralitina, n nyii ma jaŋ! Ɩsʋɔ jilima-tɛ wʋŋ lɩsɛ wʋ wʋsɛ kalaa daa duluŋ Abiraham gʋ wʋ saŋ wʋ wɩɛ Mesopotamiya tibi dʋɔ na, pɔɩ sɛ wʋ kʋlʋ gaa cha Haraŋ. 3 Ɩsʋɔ tawɩ ɩ sɛ, kʋlʋ lɩɩ n tibi dʋɔ na n lʋŋtina tɩba na nyaa ju tibi gaa maa kalaa nyaŋ na dʋɔ.>>✝

4 Dɩmʋŋ dʋɔ wʋ lɩɩ Chalidiyatina tibi dʋɔ sɛ wʋ ga cha Haraŋ. Wʋjuo sɩŋ wʋrʋgbɩɛ na, sɛ Ɩsʋɔ yela sɛ wʋ ju ga cha tibi gana dʋɔ diele gaa ɩ chaɩ dɩtɩɛna na. 5 Ɩsʋɔ n mʋ tibi fa ɩ hali nafarɛ taŋtaŋ gba takɩɛ akpaŋta jɩna a. Ama Ɩsʋɔ tawɩ si sɛ tibi gaa aja yɩɛ wʋ na wʋ gananabisi baa baa kɔŋ wʋ wʋrʋgbɩɛ na teri bɛ. Ŋɩ wɩɛ tɩba takɩɛ dɩmʋŋ saga gana naŋ na, Abiraham tana bu u. 6 N na sɛ Ɩsʋɔ tawɩ fa ɩ sɛ, <<N gananabisi aja yɩɛ mʋɔra wʋrʋ dɩɛ naŋ, baa yɩɛ ba gbeŋa na baa nyala ba bɩŋsɛ gafisi sɩ nara (400). 7 Ama Ɩsʋɔ tawɩ sɛ maa fɔŋɩ bakpa baa baa tʋŋ ba takɩɛ gbeŋa na dɩla. Sɛ ŋina wʋrʋgbɩɛ na, baa lɩɩ dɩmʋŋ tibi gana dʋɔ na baa gaa tʋŋ maŋ jɩna gana.>>✝ 8 Sɛ Ɩsʋɔ na Abiraham jɔ baŋlɛ karɩŋ dɩkɔŋ. Gʋ Abiraham lʋrʋ Isaki na, wʋ kara wʋ baŋlɛ wɩɛ jiŋinara wʋrʋgbɩɛ. Wʋrʋgbɩɛ na, Isaki lʋrʋ Yakubu sɛ Yakubu lʋrʋ daa duluŋ gifi bala baa.

9 Daa duluŋ dɩsɛchɛ ba ŋmɩɛtɩ Yosefu dʋɔ, dɩmʋŋ dʋɔ ba yaa ɩ sɛ ba mʋ ɩ ju Ijipiti takɩɛ gbeŋi. Ama Ɩsʋɔ kpi wʋ dʋɔ 10 sɛ wʋ lɩsɛ ɩ lɩɩ wʋ awʋrʋfʋɔ kpiniŋ naŋ. Sɛ wʋ fa Yosefu kpiŋjim sɛ wʋ yela sɛ wʋ yu wʋ wɩɩ Ijipiti Juo Faro asanaŋ, dɩmʋŋ dʋɔ Juo Faro mʋ Ijipiti tibi kpiniŋ na wʋ juorigbɩɛ fa ɩ sɛ wʋ n di dʋɔ.

11 Sɛ wʋ ju dʋɔ tawɩ sɛ, <<Dɩmʋŋ saŋa gana na, dusoŋ janɛ kɔŋ Ijipiti na Kana tibi kpiniŋ dʋɔ, sɛ ŋɩ kɔna dusoŋ janɛ. Sɛ daa duluŋ n yu adiya a. 12 Gʋ Yakubu nyii gʋ adiya wɩɛ Ijipiti na, wʋ kpiri daa duluŋ kpiri ŋii ŋɩ dɔŋ asanaŋ. 13 Kpiri bʋlatɛ na, Yosefu tawɩ wʋ ŋmɩɛtina wʋŋ wʋ yɩɛ na, sɛ Faro nyii gʋ ba yɩɛ Yosefu wʋ lʋŋtina bɛ. 14 Ŋina wʋrʋgbɩɛ na, Yosefu kpiri ga mʋ wʋjuo Yakubu na wʋ lʋŋtina kpiniŋ kɔŋ, ba kpiniŋ ba yɩɛ ŋitoro sala na anʋŋ (75). 15 Dɩmaŋ sɛ Yakubu ju Ijipiti, diele gaa wʋ na daa duluŋ cha sɩŋ na. 16 Sɛ ba mʋ ba gɩtatɛ bɔrɛ kɔŋ Sekem gaa wuu bʋɔ gaa Abiraham mʋ aterembie lɩɛ lɩɩ Hamɔ bie baala jaŋ Sekem dɩɛ naŋ na tɩba.>>

17 Sitifiŋ ti tawɩ sɛ, <<Gʋ saŋa tirina ŋii Ɩsʋɔ tawɩ si fa Abiraham a kɔŋ tɩba na, daa bakpa baa ba wɩɛ Ijipiti tibi dʋɔ na yɩɛ bɔlɩŋ fɔɩ. 18 Dɩmʋŋ saŋa gana sɛ Juo fɔlɛ wʋrʋ wʋŋ wʋ ba jiŋ bʋrʋ lɩɩ Yosefu dʋɔ na, kɔŋ gaa di juori Ijipiti tibi dʋɔ. 19 Sɛ wʋ mʋ dɩsɛ fulu pɩna daa bakpa sɛ wʋ nyala daa duluŋ, sɛ wʋ ŋɩrɛ ba sɛ ba n tʋsʋ ba bachaasɛ bafɔlɩɛ asʋŋ na baa sɩŋ.>>

20 Sɛ wʋ ju dʋɔ tawɩ sɛ, <<Saŋa gana naŋ sɛ ba lʋrʋ Mosesi, wʋ yɩɛ wʋchaa wʋŋ wʋ wɩɛ dieli Ɩsʋɔ asanaŋ. Ba kɩɛ wʋ dʋɔ gafɩtasɛ sɩ toro wʋ juo waa dʋɔ. 21 Gʋ ba lɩsɛ ɩ yela ɩ asʋŋ na, Juo Faro bu alʋ jaŋ mʋ ɩ ga bɩsɛ takɩɛ wʋ tɩŋtɩŋ wʋbu. 22 Sɛ ba kalaa Mosesi Ijipitina kpiŋjim wɩɛ kpiniŋ, sɛ wʋ dɩtawɩ na wʋ ayɩɛsa wɩɛ dieli.>>

23 Sɛ wʋ tawɩ sɛ, <<Gʋ Mosesi di bɩŋsɛ ŋɩla na, wʋ yɩɛ wʋ n nfɩɛrɛ sɛ wʋ a bʋɔ wʋ dɔŋa Isiralitina dʋɔ. 24 Gʋ wʋ tala dɩmaŋ na, wʋ na gʋ Ijipiti wʋkpa a tugu Isirali wʋkpa. Dɩmʋŋ dʋɔ wʋ ju ga chɔna ɩ sɛ wʋ kʋ Ijipiti wʋkpa wʋŋ tɔ kɩm. 25 Mosesi nfɩɛrɛ n nyina sɛ wʋ bakpa aja jiŋ gʋ Ɩsʋɔ aja pala wʋ dʋɔ mɔlɔgɩ ba, ama ba n jiŋ dɩmʋŋ ŋ. 26 Gʋ tɩɛna na, Mosesi na gʋ Isiralitina baala barɛ a yuo, sɛ wʋ chɩdɩsɛ wʋ a jɔ ba bʋga sɛ wʋ tawɩ ba sɛ baala, ɩ yɩɛ bakpa badʋŋdʋlʋŋ bɛ, be n yɩɛ sɛ ɩɩ pera dɔŋa?>>

27 Ama baalɛ wʋŋ wʋ pera wʋ dʋɔ na ti Mosesi si laraŋ tawɩ sɛ, <<Mmʋɔ n lɩsɛ nyaŋ daa asanaŋtɛ na wɩɛ diri? 28 Nyaa ja sɛ nyaa kʋ maŋ takɩɛ ganaŋkʋ daŋda n kʋ Ijipiti wʋkpa wʋŋ naa?>>✝ 29 Gʋ Mosesi nyii dɩmʋŋ wɩɛ ŋina na, wʋ se ju Midiyaŋ tibi dʋɔ, dɩmaŋ sɛ wʋ ga cha takɩɛ mʋɔrɛ, sɛ wʋ lʋrʋ bie baala jaŋ bala.

30 Sɛ wʋ ju dʋɔ tawɩ sɛ, <<Bɩŋsɛ ŋɩla wʋrʋgbɩɛ na, Ɩsʋɔ gabʋɔ lɩsɛ wʋ wʋsɛ kalaa ɩ bʋala gaa gaa chaŋ dɩpʋnfa na nʋɔbɩsɩ naŋ ifuli dʋɔ tirina Sina Bʋrɔŋ. 31 Gʋ wʋ na ŋina na, dɩ yɩɛ ɩ doba. Gʋ wʋ tirina na wʋ a kɩɛ na dieli na, wʋ nyii Ɩsʋɔ lofu tawɩ sɛ, 32 Maŋ n nyina amɩɛ duluŋ Ɩsʋɔ, Abiraham, Isaki na Yakubu Ɩsʋɔ.>>✝ Sɛ nyɩŋtɩɛ chaŋ Mosesi yela wʋ a selesi sɛ wʋ n dɩlɛ kɩɛ ɛ.

33 Dɩmaŋ sɛ Ɩsʋɔ tawɩ ɩ sɛ, <<Lɩsɛ nya asibita akala takɩɛ diele gaa n sɩmɩɛɩ na yɩɛ tibi chɩrɩchɩrɩ bɛ. 34 Gasiŋteŋ ma na ganaŋkʋ baa nyala ma bakpa Ijipiti. Sɛ ma nyii ba kiŋii sɛ ma tibi kɔŋ maa gaa mɔlɔgɩ ba. Dɩtɩɛna kɔŋ, maa kpiri nyaŋ na nyaa bɔrɛ ju Ijipiti.>>✝

35 Sɛ Sitifiŋ ju dʋɔ tawɩ sɛ, <<Dɩmʋŋ Mosesi wʋdʋŋdʋlʋŋ wina wʋŋ ba pɩɛ ɩ tawɩ sɛ Mmʋɔ n yɩɛ nyaŋ asanaŋtɛ na wɩɛ diri?>> Ɩsʋɔ tɩŋtɩŋ pala na wʋ gabʋɔ dʋɔ lɩsɛ wʋ wʋsɛ kalaa ɩ dɩpʋnfa gaa naŋ. Wʋŋ n kpiri ɩ sɛ wʋ n yɩɛ ba asanaŋtɛ na Mɔlɔgɩrɛ. 36 Wʋ pala ba asanaŋ lɩsɛ ba lɩɩ Ijipiti tibi dʋɔ, sɛ wʋ yɩɛ mamachi na adaŋgana daasɛ Ijipiti Ɔpʋ Gasem* gaa jaŋ na bɩŋsɛ ŋɩla ifuli dʋɔ.

37 Sɛ wʋ tawɩ sɛ, <<Dɩmʋŋ Mosesi wina n tawɩ Isiralitina sɛ Ɩsʋɔ aja lɩsɛ Ɩsʋɔ ɔja takɩɛ maŋ lɩɩ amɩɛ tɩŋtɩŋ amɩɛ bakpa naŋ. 38 Mosesi cha kpi Isiralitina baa ba jaŋi ifuli dʋɔ na dʋɔ, wʋ kpi daa duluŋ na Ɩsʋɔ gabʋɔ wʋŋ wʋ cha tawɩ fa ɩ Sina Bʋrɔŋ gaa dʋɔ na dʋɔ dɩmaŋ. Sɛ wʋ yu nkpa wɩɛ ŋii wʋ mʋ fa daa na.>>

39 Sɛ wʋ ju dʋɔ tawɩ sɛ, <<Ama daa duluŋ n nyii wʋ jaŋ ŋ sɛ ba pɩɛ ɩ, sɛ ba yɩɛ ba nfɩɛrɛ takɩɛ ba yu na, baa bɔrɛ ju Ijipiti. 40 Sɛ ba tawɩ Arɔŋ sɛ yɩɛ panɩŋ fa daa baa baa pala daa asanaŋ. Dɩmʋŋ Mosesi wina wʋŋ wʋ lɩsɛ daa lɩɩ Ijipiti na, dɩ ba jiŋ bʋrʋ gaa ga tibi wʋ dʋɔ ɔ.>>✝ 41 Dɩmʋŋ saŋa gana sɛ ba yɩɛ panɛ takɩɛ naa baalie. Sɛ ba mʋ gadiesa kɔna ga, sɛ ba di ba asa lɩɩ bʋrʋ gaa ba mʋ ba pamɩɛ yɩɛ na dʋɔ. 42 Ama Ɩsʋɔ lɩsɛ wʋ asa lɩɩ ba dʋɔ sɛ wʋ mʋ ba fa sɛ ba n tʋŋ wiita, gafita na gachikpebisɛ. Takɩɛ ganaŋkʋ ba cha sabɩɛ dʋ Ɩsʋɔ bajana tanɩɛ naŋ sɛ,

<<O Isiralitina, ɩ kɔna maŋ gadiesa na faa ifuli dʋɔ

bɩŋsɛ ŋɩla bɛ?

43 Ɩ sɩlɛ Moleki panɛ danɛ

na amɩɛ panɛ Refaŋ gachikpebi,

panɩŋ ŋii ɩ yɩɛ na ɩ tʋŋ.

Dɩmʋŋ dʋɔ maa yela na baa yuo chaŋ amɩɛ mʋ ju ga chasɛ wʋrʋ tibi dʋɔ.>>✝ Babiloŋ wʋrʋgbɩɛ.

44 Sɛ wʋ tawɩ sɛ, <<Daa duluŋ cha ba wɩɛna Seriya dukuru diko ba jaŋ ifuli dʋɔ. Ba yɩɛ ga bɛ takɩɛ ganaŋkʋ Ɩsʋɔ cha tawɩ Mosesi sɛ wʋ n yɩɛ na. 45 Daa duluŋ cha yu dukuru diko gaa lɩɩ ba duluŋ jaŋ bɛ. Yosuwa saŋa na, ba mʋ ga kɔŋ tibi gaa Ɩsʋɔ geŋ atawɩ yɩrɩ lɩɩ ga dʋɔ sɛ wʋ mʋ fa ba na dʋɔ. Sɛ ga dʋɔ tibi gaa dʋɔ ga tala Dawidi saŋa, 46 wʋŋ wʋ yu Ɩsʋɔ wɩɩ na, sʋlʋ Ɩsʋɔ sɛ wʋ n yela na wʋ a ma Ɩsʋɔ tʋm danɛ fa Yakubu Ɩsʋɔ.* 47 Ama Solomoŋ n nyina wʋŋ wʋ cha ma Ɩsʋɔ waa gaa fa ɩ.>>

48 Sɛ Sitifiŋ ju dʋɔ tawɩ sɛ, <<Ama Ɩsʋɔ Wʋjanɛ wʋŋ ba aa cha waasɛ ŋii wʋkpa ma ŋɛ na tɩba a. Takɩɛ ganaŋkʋ Ɩsʋɔ ɔja tawɩ sɛ,

49 <<Ɩsʋɔ tawɩ sɛ

Ɩsʋɔ Adugbe n nyina ma juorigbeli,

sɛ tibi n nyina ma nafara dɩjagatɩŋ.

Waa gamʋɔ duluŋ sɛ nyaa ma fa maŋ?

yaa le aaŋ ja yɩɛ ma dɩfɩɛsɛtɩŋ?

50 Naa ma pamɩɛ n yɩɛ abʋrɩ ŋina kpiniŋ?>>✝

51 Sɛ wʋ tawɩ sɛ, <<Amɩɛ dɩla naŋ doŋtina, ɩ pɩɛ Ɩsʋɔ wɩɛ amɩɛ agela naŋ sɛ ɩ tɔ amɩɛ dɩla fa Ɩsʋɔ wɩɛ ŋii. Saŋa kʋma ɩ kʋlʋ ɩ sɩŋ Ɩsʋɔ Feliŋ ŋii dʋɔ, amɩɛ gba ɩ kɩɛna bɛ takɩɛ amɩɛ duluŋ. 52 Ɩsʋɔ ɔja wʋ Mmʋɔ n cha sɛ amɩɛ duluŋ n cha nyala ɩ? Ba kʋ Ɩsʋɔ bajana baa ba cha gbala Wʋchirigisa Wʋŋ wʋ a kɔnɛ na wɩɛ gba. Sɛ dɩtɩɛna ɩ lɩsɛ ɩ fa sɛ ɩ kʋ ɩ. 53 Ɩ yu mbara ŋii Ɩsʋɔ pala na wʋ gabʋɔsɛ dʋɔ mʋ fa amɩɛ na, ama ɩŋ kpaŋ ŋɩ dʋɔ ɔ.>>

54 Gʋ Yudatina bɩnɩɛ baa nyii wɩɛ ŋina na, ba kara biŋbira na dieli dʋ ɩ sɛ ba tawʋ ba kela naŋ dʋ ɩ. 55 Ama Sitifiŋ wʋŋ Ɩsʋɔ Feliŋ su wʋ tɩba na, kɩɛ Ɩsʋɔ adugbe sɛ wʋ na Ɩsʋɔ jilima yela Yesu sɩmɩɛɩ Ɩsʋɔ pam jɩsaŋ dʋɔ. 56 Sɛ Sitifiŋ tawɩ sɛ, <<Kɩɛ, ma na gʋ Ɩsʋɔ adugbe fulu yela Wʋkpa Bu wʋŋ sɩmɩɛɩ Ɩsʋɔ pam jɩsaŋ dʋɔ.>>

57 Gʋ ba nyii wɩɛ ŋina na, ba tɔ ba dɩla sɛ ba kuusi na doŋ, sɛ ba kpiniŋ ba se gaa fu wʋ dʋɔ, 58 fɔŋɩ ɩ lɩɩ dɩɛ janɛ gaa naŋ sɛ ba fara baa lɔ ɩ bʋɛ. Sɛ baa baa lɔ ɩ bʋɛ na, mʋ ba gagbasɛ si yeleŋbu wʋŋ baa yagɛ ɩ sɛ Sɔɔlʋ na asanaŋ.

59 Gʋ ba cha baa lɔ Sitifiŋ bʋɛ na, wʋ jɔ dɩga sɛ, <<Kpaŋjuo Yesu lɩɛ ma sʋbʋ.>> 60 Sɛ wʋ laŋ luuŋ wʋ dʋna dʋɔ sɛ wʋ kuusi sɛ, <<Kpaŋjuo Yesu mʋ dɩsʋbʋ gaa baa yɩɛ n na chɩɛ ba.>> Gʋ wʋ tawɩ dɩmʋŋ na, sɛ wʋ sɩŋ.