1 ଯିହୁଦାନେ ଇଃସାଙ୍ଗ୍‌ ଯିହୋୟାକୀମ୍‌ନେ ସାସନ୍‌ନେ ଞ୍ଜି ମୁଆଁ ବେଲା ବାବିଲ୍‌ନେ ଇଃସାଙ୍ଗ୍‌ ନବୂଖଦ୍‌ନିତ୍ସର୍‌ ଯିରୂଶାଲମଅରିଆ ପାଙ୍ଗ୍‌ଚେ ଇନିକେ ଗେରେଆର୍‌କେ । 2 * ବାରି ମାପ୍‌ରୁ ଯିହୁଦାନେ ଇଃସାଙ୍ଗ୍‌ ଯିହୋୟାକୀମ୍‌ ଆରି ପର୍‌ମେସର୍‌ନେ ଡୁଆନେ ଉଃଡ଼ିକ୍ଲିଗ୍‌ ମୁତା ମେଁନେ ନ୍ତିଅରିଆ ଅପେଃ ବିକେ; ଆତ୍‌ବା ମେଁ ଶିନୀୟର ଦେସ୍‌ଅରିଆ ଲେଃକ୍ନେ ନିଜେନେ ଦେବ୍‌ ମନ୍ଦିର୍‌କେ ତେନ୍‌ ସାପା ଡୁଙ୍ଗ୍‌ୱେକେ ଆରି ମୁତାଇଂ ସାପା ମେଁ ଦେବ୍‌ତାନେ ଭଣ୍ଡାର ଡୁଆନ୍ୟା ବକେ ।

3 ବାରି, ଇଃସାଙ୍ଗ୍‌ ଇସ୍ରାଏଲ୍‌ନେ ରେମୁଆଁଇଂ ବିତ୍ରେବାନ୍‌, ଆରି, ରାଜାଇଂନେ ବଂସ ଆରି ନେତା ବଂସବାନ୍‌ 4 ମାଚିନାକ୍ନେ, ସୁନ୍ଦର୍‌ ଆରି ସାପା ବୁଦିଅରିଆ ବପୁ, ବିଦ୍ୟା‍ଅରିଆ ବୟ୍‌ଙ୍କାର୍‌, ବୁଦିଅରିଆ ଜ୍ଞାନି ଆରି ଇଃସାଙ୍ଗ୍‌ ଡୁଆ‍ଅରିଆ ତୁଆଁନ୍‌ସା ସୁନ୍ଦର୍‌ ଉଃଡ଼ିକ୍ଲିଗ୍‌ ଙ୍ଗିରେ ରେମୁଆଁଇଂକେ ଡୁଙ୍ଗ୍‌ପାଙ୍ଗ୍‌ ନ୍‌ସାଃ ଆରି କଲଦୀୟ ବିଦ୍ୟା ଆରି ବ୍ନାଲିର୍‌ ଆସିକେ ନ୍‌ସାଃ ନିଜେନେ ଆଣ୍ଡାରେଇଂନେ ନେତା ଅସ୍ପନସ୍‌କେ ବାସଙ୍ଗ୍‌କେ । 5 ଆରି, ମେଇଂ ଡିରକମ୍‌ ଞ୍ଜି ମୁଆଁନେ ସାରାସାରି ବେଲା ଇଃସାଙ୍ଗ୍‌ନେ ଡାଗ୍ରା ତୁଆଁ ଆର୍‌ଏ, ଆକେନ୍‌ସାଃ ଇଃସାଙ୍ଗ୍‌ ମେଇଂନେ ନ୍‌ସାଃ ଇଃସାଙ୍ଗ୍‌ନେ କାଦି ଜିନିସ୍‌ବାନ୍‌ ଆରି ଉଗ୍‌ନେ ଦ୍ରାକ୍ୟା ରସ୍‌ବାନ୍‌ କାଲାଆଃ ବାଗ୍‌ ବିଃନ୍‌ସା ଆରି ଞ୍ଜି ମୁଆଁ ଜାକ ଆମେଇଂକେ ବିଃଚଙ୍ଗ୍‌ ନ୍‌ସାଃ ଜଜନା ଡିଂକେ । 6 ଆକ୍‌ମେଇଂନେ ବିତ୍ରେ ଯିହୁଦା ବଂସନେ ଦାନିଏଲ୍‌, ହନାନିୟ, ମୀଶାୟେଲ୍‌ ଆରି ଅସରୀୟ ଲେଃଆର୍‌ଗେ । 7 ବାରି, ଆଣ୍ଡାରିଇଂନେ ନେତା ଆମେଇଂକେ ମ୍ନି ବିକେ, ମେଁ ଦାନିଏଲ୍‌କେ ବେଲ୍‌ଟଶତ୍ସର୍‌, ହନାନିୟକେ ଶଦ୍ରକ୍‌, ମୀଶାୟେଲ୍‌କେ ମୈଶକ ଆରି ଅସରୀୟକେ ଅବେଦ୍‌ନଗୋ ମ୍ନି ବିଃକେ ।

8 ମାତର୍‌ ଇଃସାଙ୍ଗ୍‌ନେ କାଦି ଜିନିସ୍‌ଅରିଆ ଆରି ମେଁନେ ଉଗ୍‌ନେ ଦ୍ରାକ୍ୟା ରସ୍‌ଅରିଆ ନିଜେକେ ଅସୁଚି ମାରାଃଡିଂ ନ୍‌ସାଃ ଦାନିଏଲ୍‌ ନିଜେନେ ମନ୍‌ଅରିଆ ଆଃରେକେ; ଏନ୍‌ସାଃ ମେଁ ଡିରକମ୍‌ ନିଜେକେ ଆବୁଲେଃ ଆରାଡିଙ୍ଗ୍‌, ଏନ୍‌ସା ମେଁ ଆଣ୍ଡାରିଇଂନେ ନେତାକେ ଗୁଆରି ଡିଙ୍ଗ୍‌କେ । 9 ଅଃତେନ୍‌ବେଲା ପର୍‌ମେସର୍‌ ଆତେନ୍‌ ଆଣ୍ଡାରି‍ଇଂନେ ନେତାନେ ସାମ୍‌ନାରେ ଦାନିଏଲ୍‌କେ ଅନୁଗ୍ରହନେ ଆରି ଦୟାନେ ଉଂଡେ ଆଃଡିଂକେ । 10 ତେଲା ଆଣ୍ଡାରି‍ଇଂନେ ନେତା ଦାନିଏଲ୍‌କେ ବାସଙ୍ଗ୍‌କେ ଜେ, ପେଇଂନେ କାଦି ଆରି ଉଗ୍‌ନେ ଜିନିସ୍‌ ଆଃରେବକେ, ନିଂ ନେଙ୍ଗ୍‌ନେ ମାପ୍‌ରୁ ଆତେନ୍‌ ମ୍ନାଃ ଇଃସାଙ୍ଗ୍‌କେ ବୁଟ ଣ୍ଡିଂକେ; ମେଃଡାଗ୍‌ଲା ମେଁ ପେଇଂନେ ସମାନ୍‌ ବଏସ୍‌ନେ ଙ୍ଗିରେଇଂନେ ସାର୍ମୁଆଃବାନ୍‌ ପେଇଂନେ ସାର୍ମୁଆଃ ମେଃନ୍‌ସା ନ୍‌ସୁଆର୍ୟାଃକ୍ନେ କେଆର୍‌ଏ ? ତେଲା, ପେଇଂନେ ଇଃସାଙ୍ଗ୍‌ ଡାଗ୍ରା ନିଂନେ ବାଆଃକେ ନାସିତଗ୍‌ଏ ।

11 ତେଲା ଆଣ୍ଡାରି‍ଇଂନେ ନେତା ଦାନିଏଲ୍‌, ହନାନିୟ, ମୀଶାୟେଲ୍‌ ଆରି ଅସରୀୟ‍ଇଂନେ ଆଡ଼ାତ୍ରା ମୁଃଡ଼ି ଡୁଆ ସାକାର୍‌କେ ସ୍ରି ବଗେ, ଆମେକେ ଦାନିଏଲ୍‌ ବାସଙ୍ଗ୍‌କେ; 12 ଅନୁଗ୍ରହ ଡିଂଚେ ନିଜେନେ ଦାସ୍‌ଇଂକେ ଗୁଆ ଦିନ୍‌ ପରିକ୍ୟା ଡିଂଲେଃ; ଆନେକେ ଚୁଚଙ୍ଗ୍‌ନେ ନ୍‌ସାଃ ମ୍‌ମାଃଇଲିଃ ଆରି ଉଗ୍‌ନେ ନ୍‌ସାଃ ଣ୍ଡିଆଃ ବିଃଲେ । 13 ତେନ୍‌ ଇଡ଼ିଂ ନାନେ ସେଃମଁ ନେନେ ସାର୍ମୁଆଃ ଆରି ରାଜା ଡୁଆନେ କାଦି ଚୁଚଙ୍ଗ୍‌ଣ୍ଡ୍ରେ ଙ୍ଗିରେଇଂନେ ସାର୍ମୁଆଃ ତ୍ନାଲେଃ; ତେଲା ନା ଡିରକମ୍‌ ନାକେଏ, ତେନ୍‌ ଅନୁସାରେ ନାନେ ଦାସ୍‌ଇଂନେ ଆଡ଼ାତ୍ରା ବେବ‍ଆର୍‌ ଡିଂ ।

14 ତେଲା ମେଁ ଏନ୍‌ ବିସ‍ଏରେ ମେଇଂନେ ସାମୁଆଁ ମାନେଚେ ଗୁଆ ଦିନ୍‌ ଜାକ ମେଇଂନେ ପରିକ୍ୟା ଡିଂକେ । 15 ବାରି, ଗୁଆ ଦିନ୍‌ନେ ସାରାସାରି ବେଲା ରାଜା ଡୁଆନେ କାଦି ଚୁଚଙ୍ଗ୍‌ଣ୍ଡ୍ରେ ସାପା ଙ୍ଗିରେନେ ସାର୍ମୁଆଃବାନ୍‌ ମେଇଂନେ ସାର୍ମୁଆଃ ସୁନ୍ଦର୍‌ ତ୍ନାକେ ଆରି ମେଇଂ ଜାବର୍‌ ଗାଗ୍‌ଡ଼େ ତ୍ନାଆର୍‌କେ । 16 ଇଡ଼ିଂ ଉର୍‌ସାଙ୍ଗ୍‌ଣ୍ଡ୍ରେ ମେଇଂନେ ଆତେନ୍‌ ଚଙ୍ଗ୍‌ନେ ଜିନିସ୍‌ ଆରି ଉଗ୍‌ନେ ଦ୍ରାକ୍ୟା ରସ୍‌ ବନ୍ଦ୍‌ ଆଡିଂଚେ ଆମେଇଂକେ ମ୍‌ମାଃଇଲିଃ ବିଃକେ ।

17 ଆରି, ପର୍‌ମେସର୍‌ ଆତେନ୍‌ ଅଁଣ୍ଡ୍ରୁଆ ଙ୍ଗିରେଇଂକେ ସାପା ବିଦ୍ୟା ଆରି ଜ୍ଞାନ୍‌ଅରିଆ ବୁଦି ଆରି ବପୁ ବିଃକେ; ବାରି, ଦାନିଏଲ୍‌ ମେଃମେଃ ଦର୍ସନ୍‌ ଆରି ମୁଃସୁଡ଼ିଙ୍ଗ୍‌ ବିସ‍ଏରେ ବୁଦିମାନ୍‌ ଡିଂକେ ।

18 ଆରି, ଇଃସାଙ୍ଗ୍‌ ଆମେଇଂକେ ଡାଗ୍ରା ଡୁଙ୍ଗ୍‌ପାଙ୍ଗ୍‌ ନ୍‌ସାଃ ଆଣ୍ଡିନେ ବେଲା ଆଃରେବଗେ, ଆତେନ୍‌ ଡାଲା, ଆଣ୍ଡାରି‍ଇଂନେ ନେତା ଆମେଇଂକେ ନବୂଖଦ୍‌ନିତ୍ସର୍‌ ଡାଗ୍ରା ଡୁଙ୍ଗ୍‌ପାଙ୍ଗ୍‌କେ । 19 ବାରି, ଇଃସାଙ୍ଗ୍‌ ମେଇଂନେ ଏତେ ବାଲିର୍‌ବାତାକେ; ଆରି, ତେନ୍‌ ସାପାରେନେ ବିତ୍ରେ ଦାନିଏଲ୍‌, ହନାନିୟ, ମୀଶାୟେଲ୍‌ ଆରି ଅସରୀୟ ସମାନ୍‌ ଜାଡିଗ୍‌ ଆତ୍ନାଆର୍‌କେ ଣ୍ଡୁ; ଏନ୍‌ସାଃ ଆକ୍‌ମେଇଂ ଇଃସାଙ୍ଗ୍‌ନେ ସେଃମଁ ସ୍ଲେନ୍‌ସା ୱାଆର୍‌କେ । 20 ଆରି, ଜ୍ଞାନ୍‌ ଆରି ବୁଦି ବିସ‍ଏରେ ଆଣ୍ଡିନେ ସାପା ସାମୁଆଁ ଇଃସାଙ୍ଗ୍‌ ଆମେଇଂକେ ସାଲ୍ୟାକୁକେ, ଆତେନ୍‌ ସାପା ବିସ‍ଏରେ ମେଁ ନିଜେନେ କ୍ଲିଗ୍‌ ରାଜ୍ୟ ଲେଃକ୍ନେ ବିନ୍ ବିନ୍‌ ଡିସାରି ଆରି ପାଞ୍ଜି କିକେଣ୍ଡ୍ରେ ବାନ୍‌ ମେଇଂନେ ବୁଦି ଗୁଆ ଗୁନ୍‌ ଜାବର୍‌ କେକେ । 21 ବାରି, ଦାନିଏଲ୍‌ କୋରସ୍‌ ଇଃସାଙ୍ଗ୍‌ନେ ପର୍‌ତୁମ୍‌ ମୁଆଁ ଜାକ ଲେଃୱେକେ ।