1 ସାପା ଦର୍‌ତନିଅରିଆ ବାସା ଲେଃକ୍ନେ ରେମୁଆଁଇଂ ସାପା ଜାତିନେ ରେମୁଆଁଇଂ, ଦେଶ୍‌ନେ ରେମୁଆଁଇଂ ଆରି ବିନ୍‌ ବିନ୍‌ ବାସାବାଦିନେ ଆରାତ୍ରା ନବୂଖଦ୍‌ନିତ୍ସର୍‌ ଇଃସାଙ୍ଗ୍‌ନେ ସାମୁଆଁ; ଆପେକେ ଜାବର୍‌ ବାବ୍‌ରେ ସାନ୍ତି ଡିଂଲେଃ । 2 ସାପା‍ନେ ପର୍‌ମେସର୍‌ ନିଂନେ ପାକା ମେଃ ମେଃ ଚିନା ବାରି କାବା କାମ୍‌ ଡିଂବକେ, ଆତେନ୍‌ ସାପା ବାସଙ୍ଗ୍‌ ନ୍‌ସାଃ ନିଂନେ ଜାବର୍‌ ଇକ୍‌ଚା ଲାଗେକେ ।

3 ମେଁନେ ଚିନ୍‌ ସାପା ଡିରକମ୍‌ ମ୍ନାଡିଂକେ !

ଆରି ମେଁନେ କାବା କାମ୍‌ ସାପା ଡିରକମ୍‌ ମ୍ନା ରକମ୍‌ ଡିଂକେ !

ମେଁନେ ରାଜି ଜୁଗ୍‌ ଜୁଗ୍‌ କାଲ୍‌ନେ ରାଜି ଆରି ମେଁନେ ସାସନ୍‌ ଜୁଗ୍‌ ଜୁଗ୍‌ ଜାକ ଲେଃଏ ।

4 ନିଂ ନବୂଖଦ୍‌ନିତ୍ସର୍‌ ନେଙ୍ଗ୍‌ନେ ଡୁଆ‍ଅରିଆ ସାନ୍ତିରେ ନ୍ଲେଃଗେ ଆରି ନେଙ୍ଗ୍‌ନେ ରାଜାମହଲ୍‌ନିଆ ସାର୍‌ଦାରେ ନ୍ଲେଗେ । 5 ନିଂ ମୁଇଂ ମୁସୁଡ଼ିଙ୍ଗ୍‌ ଙ୍କେକେ, ଆତେନ୍‌ ଆନିଂକେ ବାଃଟକେ ଆରି ଡୁଲେଗ୍‌ ଲେଃବେଲା ନିଂନେ ଚିନ୍ତା ଆରି ମନ୍‌ନେ ଦର୍ସନ୍‌ ଆନିଂକେ ତେରେପେତେ ଆଡିଂକେ । 6 ଏନ୍‌ସାଃ ମୁସୁଡ଼ିଙ୍ଗ୍‌ନେ ଅର୍‌ତ ଆନିଂକେ ଆମ୍ୟା ନ୍‌ସାଃ ନିଂ ବାବିଲ୍‌ନେ ସାପା ବିଦ୍ୟା ସିକେ ଲେକ୍ନେ ରେମୁଆଁଇଂକେ ନିଂ ଡାଗ୍ରା ଡୁଙ୍ଗ୍‌ପାଙ୍ଗ୍‌ ନ୍‌ସାଃ ଆଦେସ୍‌ ମ୍ୱିକେ; 7 ତେଲା ମନ୍ତର୍‌ ପଡ଼େଣ୍ଡ୍ରେ, ପାଞ୍ଜି କିକେଣ୍ଡ୍ରେ, କଲଦୀୟ ଆରି ପଣ୍ଡିତ୍‌ଇଂ ନିଂ ଡାଗ୍ରା ପାଙ୍ଗ୍‌ଆର୍‌କେ; ବାରି, ନିଂ ଆମେଇଂକେ ମୁସୁଡ଼ିଙ୍ଗ୍‌ ଣ୍ଡ୍ରାଃମ୍ୟାକେ; ମାତର୍‌ ମେଇଂ ଆତ୍‌ନେ ଅର୍‌ତ ଆନିଂକେ ବାସଙ୍ଗ୍‌ ଆୟାଆର୍‌କେ ଣ୍ଡୁ । 8 ମାତର୍‌ ସାରାସାରି ବେଲା ନିଂ ଦେବ୍‌ତାନେ ମ୍ନି ଅନୁସାରେ ବେଲ୍‌ଟଶତ୍ସର୍‌ ମ୍ନି ୱାବକ୍ନେ ଦାନିଏଲ୍‌ ନିଂ ଡାଗ୍ରା ପାଙ୍ଗ୍‌କେ, ମେଁନେ ଜିବନ୍‌ଅରିଆ ପବିତ୍ର ଦେବ୍‌ତାଇଂନେ ଆତ୍ମା ଲେଃକେ । ବାରି, ନିଂ ଆମେକେ ମୁସୁଡ଼ିଙ୍ଗ୍‌ ଆଃମ୍ୟାଚେ ମ୍ବାସଙ୍ଗ୍‌କେ, 9 ଅ ଜଗ୍‌କ୍ନେ ରେମୁଆଁଇଂନେ ନେତା ବେଲ୍‌ଟଶତ୍ସର୍‌, ନିଂ ମ୍ୟାଃନ୍ଲେକେ, ପବିତ୍ର ଦେବ୍‌ତାଇଂନେ ଆତ୍ମା ନାନେ ଜିବନ୍‌ଅରିଆ ଲେଃକେ ଆରି ମେଃଡିଗ୍‌ ବୁଡ଼ିକ୍ନେ ସାମୁଆଁ ନା ନିଆ ମେଃଡିଗ୍‌ କସ୍‌ଟ ରକମ୍‌ ଣ୍ଡୁ, ଆକେନ୍‌ସାଃ ନିଂ ମୁସୁଡ଼ିଙ୍ଗ୍‌ଅରିଆ ମେଃ ମେଃ ଦର୍ସନ୍‌ ବାନ୍ଲେଃକେ, ଆତେନ୍‌ ଆରି ଆତ୍‌ନେ ଅର୍‌ତ ଆନିଂକେ ବାସଙ୍ଗ୍‌ପା ।

10 ଡୁଲେଗ୍‌ ଲେଃବେଲା ନିଂ ମନ୍‌ନେ ଦର୍ସନ୍‌ ଦେକ୍‌ରକମ୍‌ ଲେଃଗେ; ନିଂ ଙ୍କେକେ, ଆରି କେଲା, ଦର୍‌ତନିନେ ମଜେ ମୁଇଂ ସ୍ଲାଃ ଆରି ଆତେନ୍‌ ଜାବର୍‌ ତିଆର୍‌ ଡିଂକେ । 11 ଆତେନ୍‌ ସ୍ଲାଃ ମ୍ନାଃକେ ଆରି ଡାଟ୍‌ ଡିଂକେ ଆରି ଆତ୍‌ନେ ତିଆର୍‌ କିତଂଇନିକେ ଲିଗ୍‌କେ, ବାରି ସାପା ଦର୍‌ତନିନେ କନେ କନେ ଜାକ ଆତେନ୍‌ ତ୍ନା କେ । 12 ତେଲା ଉଲିଆଃଇଂ ସୁନ୍ଦର୍‌ ଆରି ଆତ୍‌ନେ ଚୁଚୁ ଗୁଲୁଏ ଲେଃଗେ, ଆରି ଇଡ଼ିଂ ସାପାରେନେ ନ୍‌ସାଃ କାଦି ଲେଃଗେ । କଣ୍ଡାନେ ପସୁଇଂ ଆତ୍‌ନେ ଆଲ ନ୍ଲୁଡ଼ିଆଃ ବାଆର୍‌କେ ଆରି କିତଂଇନି ଲେଃକ୍ନେ ପ୍ଲିଗ୍‌ଇଂ ଆତ୍‌ନେ କେନ୍ଦାଇଂଅରିଆ ବାସାଆର୍‌କେ ଆରି ସାପା ପ୍ରାନି ଆତ୍‌ବାନ୍‌ କାଦି ବାଆର୍‌କେ ।

13 ନିଂ ଡୁଲେଗ୍‌ ଲେଃବେଲା ନିଂ ମନ୍‌ ମୁଇଂ ଦର୍ସନ୍‌ ବାବ୍‌ରେ ଙ୍କେକେ, ଆରି କେଲା, ମୁଇଂ ଜାଗ୍‌ୱାଲ୍‌ ଆରି ପବିତ୍ର ଙ୍ଗିର୍‌ବୁଏଃ କିତଂବାନ୍‌ ଜାର୍‌ଚେ ପାଙ୍ଗ୍‌କେ । 14 ମେଁ ଜାବର୍‌ ୱାସାର୍‌ଚେ ଆକେନ୍‌ ସାମୁଆଁ ବାସଙ୍ଗ୍‌କେ, ଆକେନ୍‌ ସ୍ଲାଃକେ ଗୁଏ ବିଃ ଆରି ଆତ୍‌ନେ କେନ୍ଦା ସାପା ସିଃତଗ୍‌ ବିଃ, ଆତ୍‌ନେ ଉଲିଆଃ ସାପା ପା ବିଃ ଆରି ଚୁଚୁ ସାପା ବିଗ୍‌ଚାର୍‌ ବିଃ; ଆତ୍‌ନେ ଆଲବାନ୍‌ ପସୁଇଂ, ଆତ୍‌ନେ କେନ୍ଦାବାନ୍‌ ପ୍ଲିଗ୍‌ଇଂ ଡ ଆର୍‌ଲେଃ । 15 ଏଲେଡିଗ୍‌ ତୁବଃଅରିଆ ମେଁନେ ମୁଲ୍‌ ଗଣ୍ଡିକେ ଲୁଆ ଆରି ପିତଲ୍‌ନେ ଚିକ୍‌ଲି ଏତେ ଗାଗ୍‌ଚେ ଲିଜନେ କ‍ଅଁଲ୍‌ ଚେମୁଆଁନ୍ନିଆ ବପା ଆରି ଆତେନ୍‌ କିତଂଇନିନେ ଅଁସ୍‌ଡ଼ିଆଃ ଅରିଆ ଲୁବଙ୍ଗ୍‌ଲେ, ଆରି ପସୁଇଂ ଏଃତେ ଦର୍‌ତନିନେ ଚେଃମୁଆଁଅରିଆ ମେଁ ମିସୁଲେ । 16 ଆତେନ୍‌ ରେମୁଆଁନେ ମନ୍‌ ବଦ୍‌ଲେଲେଃ ଆରି ଆମେକେ ପସୁନେ ମନ୍‌ ବିଃଲେଃ; ଆରି, ମେଁ ଆଡ଼ାତ୍ରା ଗୁ ମୁଆଁ ଜାକ ବିତେୱେଲେଃ । 17 ଜା ସାପା‍ବାନ୍‌ ମ୍ନାଃ ଇସ୍‌ପର୍‌ ଜେ ମେଁ ରେମୁଆଁଇଂନେ ରାଜିଅରିଆ ସାସନ୍‌ ଡିଂଡିଂକେ ଆରି ଆଜାକେ ମେଁନେ ଇକ୍‌ଚା, ଆମେକେ ମେଁ ଆତେନ୍‌ ବିଃଏ, ବାରି ରେମୁଆଁଇଂନେ ବିତ୍ରେ ଡାଆଁ ରେମୁଆଁକେ ଆତେନ୍‌ ଆଡ଼ାତ୍ରା ଆଃକ‍ଏ, ମ୍ବ୍ରଲେକ୍ନେ ରେମୁଆଁଇଂ ଯେନ୍ତିକି ଆକେନ୍‌ ମ୍ୟାଃଆର୍‌ଏ, ଆତେନ୍‌ସାଃ ଆକେନ୍‌ ସାମୁଆଁ ଜାଗ୍‌ୱାଲ୍‌ଇଂନେ ଆଦେସ୍‌ରେ ଆରି ଆକେନ୍‌ ଦାବି ପବିତ୍ର ରେମୁଆଁଇଂନେ ବାଲିର୍‌ନେ ବାନ୍‌ ଡିଂଲେଃକେ ।

18 ନିଂ ଇଃସାଙ୍ଗ୍‌ ନବୂଖଦ୍‌ନିତ୍ସର୍‌ ଆକେନ୍‌ ମୁସୁଡ଼ିଙ୍ଗ୍‌ କେନ୍ଲେଃକେ; ଏବେ ଅ ବେଲ୍‌ଟଶତ୍ସର୍‌, ନାଁ ଅର୍‌ତ ବାସଙ୍ଗ୍‌, ମେଃଡାଗ୍‌ଲା ନିଂ ରାଜିଅରିଆ ଲେଃକ୍ନେ ସାପା ଜ୍ଞାନି ରେମୁଆଁ ଆତ୍‌ନେ ଅର୍‌ତ ଆନିଂକେ ବାସଙ୍ଗ୍‌ୟାଆଡିଂକେ ଣ୍ଡୁ । ମାତର୍‌ ନାଁ ନାୟାଏ, ମେଃଡାଗ୍‌ଲା ନାଁ ମନ୍‌ବିତ୍‌ରେ ପବିତ୍ର ଦେବ୍‌ତାଇଂନେ ଆତ୍ମା ଲେଃକେ ।

19 ତେନ୍‌ଇଡ଼ିଂ ବେଲ୍‌ଟଶତ୍ସର୍‌ ମ୍ନିକ୍ନେ ଦାନିଏଲ୍‌ ଉଃଡ଼ି ମୁଆଁ ଇରିଆଃତୁଗ୍‌ଚେ ଲେଃଗେ ଆରି ମେଁନେ ଚିନ୍ତା ଆମେକେ ତେରେପେତେ ଆଃଡିଂକେ । ଇଃସାଙ୍ଗ୍‌ ଉତର୍‌ ଡିଂଚେ ବାସଙ୍ଗ୍‌କେ, ଅ ବେଲ୍‌ଟତ୍ସର୍‌, ଆତେନ୍‌ ମୁସୁଡ଼ିଙ୍ଗ୍‌ ଣ୍ଡୁଲା ଆତ୍‌ନେ ଅର୍‌ତ ଆନାକେ ତେରେପେତେ ଆରାଃଡିଂଲେ । ବେଲ୍‌ଟତ୍ସର୍‌ ଉତର୍‌ ଡିଂଚେ ବାସଙ୍ଗ୍‌କେ, ଅ ନିଂନେ ମାପ୍‌ରୁ, ଜାଣ୍ଡେଇଂ ଆନାକେ ଗୁର୍‌ନା ଡିଂଆର୍‌ଏ, ମେଇଂନେ ନ୍‌ସାଃ ଆକେନ୍‌ ମୁସୁଡ଼ିଙ୍ଗ୍‌ ଡିଂଲେ ଆରି ନାନେ ସତ୍ରୁଇଂନେ ଆଡ଼ାତ୍ରା ଆତ୍‌ନେ ଅର୍‌ତ ଗଟେଲେ । 20 ନାଁ ଆଣ୍ଡିନେ ସ୍ଲାଃ ନାକେକେ, ଆଣ୍ଡିନେକି ମ୍ନାଚେ ବପୁ ଡିଂକେ, ମେଁନେ ତିଆର୍‌ କିତଂ ଲିଗ୍‌କେ ଆରି କ୍ଲିଗ୍‌ ଦର୍‌ତନିଅରିଆ ତ୍ନାକେ । 21 ଜାନେ ଉଲିଆଃ ସାପା ସୁନ୍ଦର୍‌ ଆରି ଚୁଚୁ ଗୁଲୁଏ ଲେଃଗେ ଆରି ଆଣ୍ଡିନେକି ସାପାରେନେ ନ୍‌ସାଃ କାଦି ଲେଃଗେ । ଜାନେ ଆଲ କଣ୍ଡାନେ ପସୁଇଂ ବାସା ଆର୍‌କେ, ଜାନେ କେନ୍ଦାଇଂନେ ଆଡ଼ାତ୍ରା କିତଂନେ ପ୍ଲିଗ୍‌ଇଂ ବାସାଲେ ଆର୍‌ଗେ ।

22 ଅ ମ୍ନାଃ ଇଃସାଙ୍ଗ୍‌, ଆତେନ୍‌ ସ୍ଲାଃ ନାଁ, ନାଁ ମ୍ନାଃଚେ ବପୁ ଡିଂନାଲେଃକେ । ମେଃଡାଗ୍‌ଲା ନାଁନେ ବୁଦି ମ୍ନାଃ ଡିଂଲେଃକେ ଆରି ଆତେନ୍‌ କିତଂ ଲିଗ୍‌ଡିଂକେ ଆରି ନାଁନେ ସାସନ୍‌ ଦର୍‌ତନିନେ କ୍ଲିଗ୍‌ ଜାକ ବେପ୍ରେ ଲେଃକେ । 23 ବାରି, ନାଁ ଜେ ନାକେକେ, କିତଂବାନ୍‌ ମୁଇଂ ଜାଗ୍‌ୱାଲ୍‌ ଆରି କିତଙ୍ଗ୍‌ନେ ଦୁତ୍‌ ଜାର୍‌ଚେ ବାସଙ୍ଗ୍‌କେ, ଏନ୍‌ ସ୍ଲାଃକେ ସିଃତଗ୍‌ଚେ ନସ୍‌ଟ ଆଃଡିଂ; ଏଲେଡିଗ୍‌ ତୁବଃଅରିଆ ଲେକ୍ନେ ଆତ୍‌ନେ ମୁଲ୍‌ ଗଣ୍ଡିକେ ଲୁଆ ଆରି ପିତଲ୍‌ ଚେନ୍‌ ଏତେ ଗାଗ୍‌ଚେ କଣ୍ଡା ଲେଃକ୍ନେ କ‍ଅଁଲ୍‌ ଚେଃମୁଆଁ ବିତ୍ରେ ବ; ଆରି, ଆତେନ୍‌ କିତଂନେ ଅଁସ୍‌ଡ଼ିଆଃ‍ଅରିଆ ଲୁବଙ୍ଗ୍‌ଲେଃ ଆରି ଆତେନ୍‌ ଆଡ଼ାତ୍ରା ଗୁ ମୁଆଁ ବିତେ ୱେ ଜାକ କଣ୍ଡାନେ ପସୁଇଂ ଏଃତେ ମେଁ ମିସୁୱେଲେ ।

24 ଅ ମ୍ନାଃ ଇଃସାଙ୍ଗ୍‌, ଆକେନ୍‌ ଅର୍‌ତ ଦେକ୍‌ରକମ୍‌, ଆରି ନିଂନେ ମାପ୍‌ରୁ ମ୍ନା ଇଃସାଙ୍ଗ୍‌ନେ ବିସ‍ଏରେ ସାପାବାନ୍‌ ମ୍ନା ଇସ୍‌ପର୍‌ନେ ସାମୁଆଁ ଦେକ୍‌ରକମ୍‌ । 25 ନାଁ ରେମୁଆଁଇଂନେ ବିତ୍ରେବାନ୍‌ ସ୍ଲ ନାଡିଂଏ ଆରି କଣ୍ଡାନେ ପସୁଇଂ ଏଃତେ ନାବାସାଏ, ଅରେଃନେ ନ୍ୟାୟ୍‌ ଆନାକେ ଚେଃମୁଆଁ ଆଃଚଙ୍ଗ୍‌ଆର୍‌ଏ, ଆରି ନାଁ କିତଂନେ ଅଁସ୍‌ଡ଼ିଆଃଅରିଆ ନାଲ୍‌ବଙ୍ଗ୍‌ଏ, ଦେକ୍‌ରକମ୍‌ ନାଁନେ ଆଡ଼ାତ୍ରା ଗୁ ମୁଆଁ ବିତେୱେଏ; ସାରାସାରି ବେଲା ଜା ସାପା‍ବାନ୍‌ ମ୍ନା ଇସ୍‌ପର୍‌, ମେଁ ଜେ ରେମୁଆଁଇଂନେ ରାଜିଅରିଆ ସାସନ୍‌ ଡିଂଆର୍‌ଏ ଆରି ଆଜାକେ ଆତେନ୍‌ ବିବିଃନ୍‌ସା ଇକ୍‌ଚା ଡିଂଆର୍‌ଏ, ଆମେକେ ମେଁ ଆତେନ୍‌ ବିଃଏ, ଆକେନ୍‌ ନାଁ ନାମ୍ୟାଃଏ । 26 ଆରି, ସ୍ଲାଃନେ ମୁଲ୍‌ ଗଟି ଆନ୍ତାର୍‌ ନ୍‌ସାଃ ଆଦେସ୍‌ ବିବିଃନେ ଅର୍‌ତ ଆକେନ୍‌; କିତଂ ଆଃ ସାସନ୍‌ ଡିଂଡିଂକେ, ଆକେନ୍‌ ନାଁ ନାମ୍ୟାଃକ୍ନେ ଇଡ଼ିଂ ନାଁନେ ରାଜି ନାଁନେ ଆଡ଼ାତ୍ରା ଡିଲାଡିଗ୍‌ ଡିଂଏ । 27 ଆକେନ୍‌ସାଃ ଅ ମ୍ନାଃ ଇଃସାଙ୍ଗ୍‌, ନିଂନେ ଆଦେସ୍‌ ନାଁନେ ଡାଗ୍ରା ଲେଲେ, ଆରି ନାଁ ଦାର୍‌ମିକ୍‌ ଏତେ ନାଁନେ ପାପ୍‌ ସାପା ଆରି ଗରିବ୍‌ଇଂନେ ଆଡ଼ାତ୍ରା ଦୟା ଆଃସୁଏନେ ବାନ୍‌ ନାନେ ଅଦରମ୍‌ ସାପା ସ୍ଲ ଆଃଡିଂ । ଦେତ୍‌ଲା ଡିଂୟାଏ, ନାଁନେ ସାନ୍ତିନେ ଜୁଗ୍‌ ମ୍ନାଏ ।

28 ଇଃସାଙ୍ଗ୍‌ ନବୂଖଦ୍‌ନିତ୍ସର୍‌ ଆଡ଼ାତ୍ରା ଆକେନ୍‌ ସାପା ଗଟେକେ । 29 ଗୋମ୍ବାର୍‌ ଆର୍କେ ତେଃଡାକ୍ନେ ବେଲା ମେଁ ବାବିଲ୍‌ନେ ଇଃସାଙ୍ଗ୍‌ ଡୁଆ‍ନେ ମହଲ୍‌ ଅରିଆ ଅଲେଙ୍ଗ୍‌ଡିଂଗେ । 30 ଇଃସାଙ୍ଗ୍‌ ଆକେନ୍‌ ସାମୁଆଁ ବାସଙ୍ଗ୍‌କେ, ନିଂ ନେଂନେ ବପୁନେ ବପୁରେ ଆରି ନେଂନେ ତାର୍କିଗ୍‌ନେ ମ‍ଇମା ନ୍‌ସାଃ ରାଜଧାନୀ ଆଡିଂନ୍‌ସାଃ ମେଃନେ ଆଃରେ ମ୍ବକେ, ଆକେନ୍‌ କି ଆତେନ୍‌ ମ୍ନା ବାବିଲ୍‌ ଣ୍ଡୁ ?

31 ଇଃସାଙ୍ଗ୍‌ନେ ମନ୍‌ଅରିଆ ଆକେନ୍‌ ସାମୁଆଁ ଲେଃଚେ ଆକେନ୍‌ କିତଂନେ ସାମୁଆଁ ଡିଂକେ, ଅ ଇଃସାଙ୍ଗ୍‌ ନବୂଖଦ୍‌ନିତ୍ସର୍‌, ଆନାକେ ଆକେନ୍‌ ସାମୁଆଁ ବାସଙ୍ଗ୍‌ନେଡିଂକେ, ନାଁ ବାନ୍‌ ରାଜି ଡଗେ । 32 ବାରି, ନାଁ ରେମୁଆଁଇଂନେ ବିତ୍ରେବାନ୍‌ ସ୍ଲ ନାଲେ ଆରି କଣ୍ଡାନେ ପସୁଇଂନେ ଏଃତେ ନାଁ ନାବାସାଏ । ଅରେଃନେ ନ୍ୟାୟ୍‌ ଆନାକେ ଚେଃମୁଆଁ ଚୁଚଙ୍ଗ୍‌ଣ୍ଡ୍ରେ ଣ୍ଡ୍ରାଃଡିଂଏ, ଦେକ୍‌ରକମ୍‌ ନାଁ ଆଡ଼ାତ୍ରା ଗୁ ମୁଆଁ ବିତେ ୱେଏ; ସାରାସାରି ଜା ସାପା‍ଅରିଆ ଲେଃକେ, ମେଁ ଜେ ରେମୁଆଁଇଂନେ ରାଜିଅରିଆ ସାସନ୍‌ ଡିଂଏ ଆରି ଆଜାକେ ମେଁନେ ଇକ୍‌ଚା, ଆମେକେ ମେଁ ଆତେନ୍‌ ବିଃଏ, ଆକେନ୍‌ ନାଁ ନାମ୍ୟାଃଏ ।

33 ଆତେନ୍‌ ଡଣ୍ଡ୍‌ଅରିଆ ନବୂଖଦ୍‌ନିତ୍ସର୍‌ ଆଡ଼ାତ୍ରା ଆତେନ୍‌ ସାମୁଆଁ ସପଲ୍‌ ଡିଂକେ; ଆରି ମେଁ ରେମୁଆଁଇଂନେ ବିତ୍ରେବାନ୍‌ ସ୍ଲ ଡିଂଚେ ଗ୍ଲେଃନେ ନ୍ୟାୟ୍‌ ଚେଃମୁଆଁ ଚଙ୍ଗ୍‌କେ, ଆରି ମେଁନେ ଗାଗ୍‌ଡ଼େ କିତଂନେ ଅଁସ୍‌ଡ଼ିଆଃଅରିଆ ଲୁବଙ୍ଗ୍‌କେ, ସାରାସାରି ମେଁନେ ଉଗ୍‌ବଃ ଚାଃଟିଆଁ ପ୍ଲିଗ୍‌ନେ ବ୍ଲେଃ ରକମ୍‌ ଆରି ମେଁନେ ଆର୍‌ୱେଃ ପ୍ଲିଗ୍‌ନେ ଆର୍‌ୱେଃ ରକମ୍‌ ମ୍ନାଃକେ

। 34 ମାଡାନେ ବେଲା ଇଡ଼ିଂ ସାରାସାରି ବେଲା ନିଂ ନବୂଖଦ୍‌ନିତ୍ସର୍‌ କିତଂ ପାକା ଙ୍କେକେ, ତେଲା ନିଂନେ ବୁଦି ନିଂ ଡାଗ୍ରା ଆଣ୍ଡେ ପାଙ୍ଗ୍‌କେ, ଆତେନ୍‌ସାଃ ନିଂ ମାପ୍‌ରୁନେ ଦନ୍ୟବାଦ୍‌ ଣ୍ଡିଂକେ ଆରି ଜା ଜୁଗ୍‌ ଜାକ ମ୍ୱ୍ରଲେଃକେ, ମେଁନେ ପ୍ରସଂସା ଆରି ସନ୍‌ମାନ୍‌ ଣ୍ଡିଂକେ । ମେଃଡାଗ୍‌ଲା ମେଁନେ ସାସନ୍‌ ମାଡାନେ ଜୁଗ୍‌ ଜାକ ଆରି ମେଁନେ ରାଜି ଜୁଗ୍‌ ଜୁଗ୍‌ ଲେଃଏ ।

35 ବାରି, ଦର୍‌ତନିନ୍ନିଆ ବାସାନେ ସାପାରେ ମେଃଡିଗ୍‌ ଣ୍ଡୁ ।

ଆରି ମେଁ କିତଂନେ ସନ୍ୟ‍ଇଂ ବିତ୍ରେ ଆରି ଦର୍‌ତନିନେ ବାସାଣ୍ଡ୍ରେଇଂନେ ବିତ୍ରେ ମେଁନେ ଇକ୍‌ଚା ଅନୁସାରେ କାମ୍‌ ଆଡିଂଏ ।

ଆରି, ଜାଡିଗ୍‌ ମେଁନେ ନ୍ତି ବନ୍ଦ୍‌ ଆଃଡିଂ ଆୟା ଣ୍ଡୁ ଆରି ନାଁ ମେଃନେ ଡିଂନାଡିଂକେ,

ଆକେନ୍‌ ଆମେକେ ବାସଙ୍ଗ୍‌ ଆୟା ଣ୍ଡୁ ।

36 ଆତେନ୍‌ ବେଲା ନିଂ ବୁଦି ନିଂ ଡାଗ୍ରା ଆଣ୍ଡେ ପାଙ୍ଗ୍‌କେ ଆରି ନିଂ ରାଜିନେ ଗ‍ଉରବ୍‌ ନ୍‌ସାଃ ନିଂନେ ତାର୍କିଗ୍‌ ଆରି ତାର୍କିଗ୍‌ ନିଂ ଡାଗ୍ରା ଆଣ୍ଡେ ପାଙ୍ଗ୍‌କେ । ତେଲା ନିଂନେ ମନ୍ତ୍ରୀ ଆରି ଅମାତ୍ୟ‍ଇଂ ଆନିଂକେ ତୁର୍‌ଆର୍‌କେ । ବାରି, ନିଂ ନେଂନେ ରାଜିନ୍ନିଆ ଙ୍କକେ ଆରି ନିଂନେ ମ‍ଇମା ଜାବର୍‌ ମ୍ନାଃକେ ।

37 ଏନ୍‌ସାଃ ନିଂ ନବୂଖଦ୍‌ନିତ୍ସର୍‌ ଆତେନ୍‌ କିତଂ ଲେଃକ୍ନେ ଇଃସାଙ୍ଗ୍‌ନେ ପ୍ରସଂସା, ପୁଜା ଆରି ସନ୍‌ମାନ୍‌ ଡିଂଣ୍ଡିଂକେ; ମେଃଡାଗ୍‌ଲା ମେଁନେ ସାପା କାମ୍‌ ସତ୍‌ ଆରି ମେଁନେ ଗାଲି ସାପା ନ୍ୟାୟ୍‌; ବାରି, ଜାଣ୍ଡେଇଂ ଗର୍ବନେ କାମ୍‌ ଡିଂଆର୍‌ଏ, ଆମେଇଂକେ ବାଆ ଆଲ ଆଃଡିଂନ୍‌ସାଃ ମେଁନେ ଅଦିକାର୍‌ ଲେଃକେ ।