ଦାନିଏଲ୍‌ 6

ସିଂହ ପାର୍‌ନିଆ ଦାନିଏଲ୍‌

1 ଦାରୀୟାବସ୍‌ କ୍ଲିଗ୍‌ ରାଜିଅରିଆ ମୁଇଂସ ସାଲ୍‌ଗା ରୁଆ ସର୍‌କାର୍‌ ରାଜି ଆଡ଼ାତ୍ରା ସ୍ରିକେ । 2 ଆରି ଆତେନ୍‌ ସର୍‌କାର୍‌ଇଂ ଡିରକମ୍‌ ଇସାବ୍‌ ବିଃଆର୍‌ଏ ଆରି ଇଃସାଙ୍ଗ୍‌ନେ ଡିରକମ୍‌ ମେଃଡିଗ୍‌ କେତି ଆଡିଂ ଣ୍ଡୁ, ଆକେନ୍‌ସାଃ ମେଇଂନେ ଆଡ଼ାତ୍ରା ଞ୍ଜିରୁଆ ନେତା ଅଦିକାର୍‌ ଆଃଡିଂନ୍‌ସାଃ ଡିଂକ୍ନେ ବୁଜେକେ; ଆକେନ୍‌ ଞ୍ଜି ରୁଆ ବିତ୍ରେ ଦାନିଏଲ୍‌ ମୁଇଂଡା ଲେଃଗେ । 3 ଆକେନ୍‌ ଦାନିଏଲ୍‌ନେ ମନ୍‌ଅରିଆ ମ୍ନା ଆତ୍ମା ଲେଃକେସାଃ ଆତେନ୍‌ ନେତାଇଂ ଆରି ରାଜ୍ୟପାଲ୍‌ଇଂନେ ବିତ୍‌ରେ ବାନ୍‌ ଡାକ୍‌ପୁଟା ଡିଂଲେଃଗେ । ଆରି, ଇଃସାଙ୍ଗ୍‌ ଆମେକେ ଗୁଲେ ରାଜି ଆଡ଼ାତ୍ରା ଅଦିକାର୍‌ ଆଃଡିଂନ୍‌ସାଃ ଇକ୍‌ଚା ଡିଂକେ । 4 ତେଲା ଅଧକ୍ଷ ଆରି ରାଜ୍ୟପାଲ୍‌ଇଂ ଇଃସାଙ୍ଗ୍‌ କାମ୍‌ ବିସ‍ଏରେ ଦାନିଏଲ୍‌ନେ ବୁଲ୍‌ ତୁର୍‌ଆର୍‌କେ; ମାତର୍‌ ମେଇଂ ମେଃଡିଗ୍‌ ବୁଲ୍‌ କି ଅପରାଦ୍‌ ଆବାଆର୍‌କେ ଣ୍ଡୁ, ମାତର୍‌ ମେଁ ବିଶ୍ୱସ୍ତ ଲେଃଗେ ଆରି ମେଁନେ ମେଃଡିଗ୍‌ ଡାଉଟ୍‌ କି ଅପରାଦ୍‌ ଆତ୍ନାକେ ଣ୍ଡୁ । 5 ତେସାଃ ଆତେନ୍‌ ରେମୁଆଁଇଂ ବାସଙ୍ଗ୍‌ଆର୍‌କେ, ନେ ଦାନିଏଲ୍‌ନେ ପର୍‌ମେସର୍‌ନେ ନିଅମ୍‌ ବିସ‍ଏରେ, ମେଁନେ ବୁଲ୍‌ ଆସାଃଲା ଆରି ମେଃଡିଗ୍‌ ବିସ‍ଏରେ ବୁଲ୍‌ ନେଃବା ଣ୍ଡୁ । 6 ଅଃକେନ୍‌ରେ ନେତାଇଂ ଆରି ସର୍‌କାର୍‌ଇଂ ଇଃସାଙ୍ଗ୍‌ ଡାଗ୍ରା ମୁଇଂ ଡାଗ୍ରା ଡିଂଚେ ଆମେକେ ଦେକ୍‌ ରକମ୍‌ ବାସଙ୍ଗ୍‌ଆର୍‌କେ, ମ୍ନାଇଃସାଙ୍ଗ୍‌ ଦାରୀୟାବସ୍‌, କାଲାଆଃ ମ୍ବ୍ର ଲେଃଲେ । 7 ରାଜିନେ ନେତାଇଂ, ଇଃସାଙ୍ଗ୍‌ ଡୁଆନେ ମ୍ନାଃରେଇଂ ଆରି ସର୍‌କାର୍‌ଇଂ, ମନ୍ତ୍ରି ଆରି ଦେସ୍‌ନେ ମ୍ନାରେଇଂ ସାପାରେ ମୁଇଂ ଚିନ୍ତା ଡିଂଚେ ଦେକ୍‌ରକମ୍‌ ମୁଇଂ ଇଃସାଙ୍ଗ୍‌ନେ ଆଦେସ୍‌ ଆରି ଡାଟ୍‌ ମନା ନିଅମ୍‌ ଆଃରେନ୍‌ସାଃ ବିଚାର୍‌ ଡିଂବକେ ଜେ, ଜଦି ଜାଡିଗ୍‌ ତିରିସ୍‌ ଦିନ୍‌ ଜାକ ମ୍ନାଃ ଇଃସାଙ୍ଗ୍‌ନେ ବିନା ମେଃଡିଗ୍‌ ଦେବ୍‌ତା କି ରେମୁଆଁନେ ଡାଗ୍ରା ପାର୍‌ତନା ଡିଂଏ, ମେଁ ସିଂହ‍ଇଂନେ କୁରୁଅରିଆ ଜକ୍‌ତ୍ଲାକ୍‌ ଆର୍‌ଏ । 8 ଏବେ ଅ ମ୍ନାଃ ଇଃସାଙ୍ଗ୍‌, ମାଦୀୟ ଆରି ପାରସିକ‍ଇଂନେ ଡାଟ୍‌ ନିଅମ୍‌ ଅନୁସାରେ ଆକେନ୍‌ ମନା ନିଅମ୍‌ ଡିରକମ୍‌ ଆବଦ୍‌ଲେ ଣ୍ଡୁ, ଆକେନ୍‌ସାଃ ଆତେନ୍‌ ଆର୍ମେ ଆରି ଆକେନ୍‌ ଗ୍ନୁଆର୍‌କ୍ନେଅରିଆ ମ୍ନି ଗୁଆର୍‌ । 9 ଏନ୍‌ସାଃ ଇଃସାଙ୍ଗ୍‌ ଦାରୀୟାବସ୍‌ ଆତେନ୍‌ ଗୁଆର୍‌କ୍ନେ ଆରି ମନା ନିଅମ୍‌ଅରିଆ ମ୍ନି ଗୁଆର୍‌ । 10 ଇଡ଼ିଂ ଆକେନ୍‌ ଗୁଆର୍‌କ୍ନେ ମ୍ନି ଗୁଆର୍‌ବ୍ନ ଡାଗ୍‌ଚେ ମ୍ୟାଃକ୍ନେ ଇଡ଼ିଂ ଦାନିଏଲ୍‌ ନିଜେନେ ଡୁଆ ୱିଗ୍‌କେ; ମେଁନେ ବାକ୍ରାନେ ଜର୍‌କା ଯିରୂଶାଲମ ପାକା ମେଲା ଲେଃଗେ; ବାରି, ମେଁ ଅଃସେ ଡିରକମ୍‌ ଡିଂଡିଂଗେ, ତେନ୍‌ ଅନୁସାରେ ମେଃସୁଆ ବିତ୍ରେ ଞ୍ଜି ତର୍‌ ଆଣ୍ଟୁମାଡ଼େଚେ ପାର୍‌ତନା ଡିଂକେ ଆରି ନିଜେନେ ପର୍‌ମେସର୍‌ନେ ଡାଗ୍ରା ଦନ୍ୟବାଦ୍‌ ବିଃକେ ।

11 ଅଃକେନ୍‌ରେ ଆତେନ୍‌ ରେମୁଆଁଇଂ ମୁଇଂଡାଗ୍ରା ଡିଂଚେ ଦାନିଏଲ୍‌କେ ମେଇଂନେ ପର୍‌ମେସର୍‌ନେ ଡାଗ୍ରା ପାର୍‌ତନା ଆରି ଗୁଆରେ ଡିଂନେ କେଆର୍‌କେ । 12 ଅଃତେନ୍‌ବେଲା ମେଇଂ ଇଃସାଙ୍ଗ୍‌ନେ ଡାଗ୍ରା ୱେଚେ ଇଃସାଙ୍ଗ୍‌ନେ ମନା ଡିଂନେ ନିଅମ୍‌ ବିସ‍ଏରେ ମେଁ ଡାଗ୍ରା ବାସଙ୍ଗ୍‌ଆର୍‌କେ, ଆତେନ୍‌ଇଂ; ଅ ମ୍ନାଇଃସାଙ୍ଗ୍‌, ମୁଃଡ଼ି ମେଃଡିଗ୍‌ ରେମୁଆଁ ତିରିସ୍‌ ଦିନ୍‌ ବିତ୍ରେ ନାଁ ମାଲେଃନେ ବେଲା ମେଃଡିଗ୍‌ ଦେବ୍‌ତା କି ରେମୁଆଁନେ ଡାଗ୍ରା ପାର୍‌ତନା ଡିଂଏ, ମେଁ ସିଂହ‍ଇଂନେ ପାର୍‌ ଅରିଆ ଲଃଆର୍‌ଏ, ଦେକ୍‌ରକମ୍‌ ମୁଇଂ ମନା ଉଲିଆଃନ୍ୟା କି ନାଁ ମ୍ନି ଗୁଆର୍‌ ନାବକେ ? ଇଃସାଙ୍ଗ୍‌ ଉତର୍‌ ଡିଂଚେ ବାସଙ୍ଗ୍‌କେ, ମାଦୀୟ ଆରି ପାରସିକ‍ଇଂନେ କାଲାଆଃ ନ୍‌ସା ଲେଃନେ ନିଅମ୍‌ ଅନୁସାରେ ଆତେନ୍‌ ଆରେବକେ । 13 ତେଲା ମେଇଂ ଇଃସାଙ୍ଗ୍‌ ଡାଗ୍ରା ଉତର୍‌ ଡିଂଚେ ବାସଙ୍ଗ୍‌କେ, ଅ ମ୍ନାଇଃସାଙ୍ଗ୍‌, ବନ୍ଦି ଡିଂଲେକ୍ନେ ଯିହୁଦି ରେମୁଆଁଇଂନେ ବିତ୍ରେ ମୁଇଂଡା ଜେ ଦାନିଏଲ୍‌, ମେଁ ଆନାକେ କି ନାଁନେ ମ୍ନି ଗୁଆର୍‌ନେ ମନା ଡିଂନେ ଉଲିଆଃକେ ମାନେଃ ଆମ୍ୟାଃକେ ଣ୍ଡୁ, ମାତର୍‌ ମେଃସୁଆ ବିତ୍ରେ ଞ୍ଜି ତର୍‌ ପାର୍‌ତନା ଡିଂଏ ।

14 ତେସାଃ ଇଃସାଙ୍ଗ୍‌ ଏନ୍‌ ସାମୁଆଁ ଅଁଚେ ଜାବର୍‌ ଇକ୍‌ଚା ଆଡିଂକେ ଣ୍ଡୁ, ବାରି ଦାନିଏଲ୍‌କେ ଆଃମ୍ବ୍ର ନ୍‌ସାଃ ମେଁନେ ବିସ‍ଏରେ ଦିଆନ୍‌ ଡିଂକେ; ଆରି, ଆମେକେ ରକ୍ୟା ଡିଂନେ ନ୍‌ସାଃ ସ୍ନି ଲଗ୍‌ନେ ଜାକ ଚେସ୍‌ଟା ଡିଂକେ । 15 ଅଃକେନ୍‌ରେ ଆତେନ୍‌ ରେମୁଆଁଇଂ ଇଃସାଙ୍ଗ୍‌ନେ ଡାଗ୍ରା ରିସିଙ୍ଗ୍‌ଆର୍‌ଚେ ଇଃସାଙ୍ଗ୍‌କେ ବାସଙ୍ଗ୍‌ଆର୍‌କେ, ଅ ମ୍ନାଇଃସାଙ୍ଗ୍‌, ନାଁ ମ୍ୟାଃ, ଇଃସାଙ୍ଗ୍‌ ମେଃଡିଗ୍‌ ମନା ଡିଂକ୍ନେ ଆଦେସ୍‌ କି ନିଅମ୍‌ ତିଆର୍‌ ଡିଂଲା, ଆତେନ୍‌ ଜେ ବଦ୍‌ଲେ ଆୟା ଣ୍ଡୁ, ମାଦୀୟ ଆରି ପାରସିକ‍ଇଂନେ ଦେକ୍‌ରକମ୍‌ ମୁଇଂ ନିଅମ୍‌ ଲେଃକେ ।

16 ତେସାଃ ଇଃସାଙ୍ଗ୍‌ ଆଦେସ୍‌ ଡିଂକ୍ନେ ଇଡ଼ିଂ, ମେଇଂ ଦାନିଏଲ୍‌କେ ଡୁଙ୍ଗ୍‌ପାଙ୍ଗ୍‌ଚେ ସିଂହ‍ଇଂନେ ପାର୍‌ଅରିଆ ଆଃଗାଆର୍‌କେ । ବାରି, ଇଃସାଙ୍ଗ୍‌ ଦାନିଏଲ୍‌କେ ବାସଙ୍ଗ୍‌କେ, ନାଁ ସତ୍‌ ସତ୍‌ ମୁଃଡ଼ିନେ ପର୍‌ମେସର୍‌କେ ସେବା ଡିଂନାଡିଂକେ, ମେଁ ଆନାକେ ରକ୍ୟା ଡିଂଏ । 17 ବାରି, ମୁଇଂ ବ୍ରି ଡୁଙ୍ଗ୍‌ପାଙ୍ଗ୍‌ଚେ ପାର୍‌ନେ ସାର୍ମୁଆଃନ୍ୟା ଆଃଡାବିଃକେ; ଆରି, ଦାନିଏଲ୍‌ନେ ବିସ‍ଏରେ ଡିରକମ୍‌ ମେଃଡିଗ୍‌ ଆବଦ୍‌ଲେ ଣ୍ଡୁ, ଆକେନ୍‌ସାଃ ଇଃସାଙ୍ଗ୍‌ ନିଜେନେ ସିଲ୍‌ଅରିଆ ଆରି ମେଁନେ ଅମାତ୍ୟଇଂନେ ଡାବୁନିଆ ଆତେନ୍‌ ଚିତ୍ର ତିଆର୍‌ ଡିଂକେ । 18 ଏନ୍‌ଇଡ଼ିଂ ଇଃସାଙ୍ଗ୍‌ ନିଜେନେ ମହଲ୍‌ ୱିଗ୍‌ଚେ କିଡ଼େସଃ ଲେଃଚେ ମିଡିଗ୍‌ ଡୁଲେଗ୍‌କେ ଆରି ବାଜା ବାଇଦ୍‌ ମେଁନେ ଡାଗ୍ରା ଡୁଙ୍ଗ୍‌ଆପାଙ୍ଗ୍‌ଆର୍‌କେ ଣ୍ଡୁ; ଆରି, ମେଁନେ ଲିଲେମୁଁଆଃ ଆଡିଂକେ । 19 ଇଡ଼ିଂ ଇଃସାଙ୍ଗ୍‌ ଗିସେଙ୍ଗ୍‌ ତେଃସନେ ବେଲା ତଃଡ଼ିଆଚେ ଦାପ୍ରେ ସିଂହ‍ଇଂନେ ପାର୍‌ ଡାଗ୍ରା ୱେକେ । 20 ବାରି, ମେଁ ପାର୍‌ ଡାଗ୍ରା ଦାନିଏଲ୍‌ନେ ଡାଗ୍ରା ୱେଚାଚେ ଅଃଚେ ୱାକେ; ଇଃସାଙ୍ଗ୍‌ ଦାନିଏଲ୍‌କେ ବାସଙ୍ଗ୍‌କେ, ଅ ଜିବିତ୍‌ ପର୍‌ମେସର୍‌ନେ ସେବା ଡିଂଣ୍ଡ୍ରେ ଦାନିଏଲ୍‌, ନାଁ ସତ୍‌ ସତ୍‌ରେ ଜାନେ ସେବା ଡିଂନାଡିଂକେ, ନାଁନେ ଆତେନ୍‌ ପର୍‌ମେସର୍‌ ସିଂହ‍ଇଂନେବାନ୍‌ ଆନାକେ ରକ୍ୟା ଆଃଡିଂନ୍‌ସାଃ ରାଜି ଲେଃକେ କି ?

21 ତେଲା ଦାନିଏଲ୍‌ ଇଃସାଙ୍ଗ୍‌କେ ବାସଙ୍ଗ୍‌କେ, ଅ ମ୍ନାଇଃସାଙ୍ଗ୍‌, କାଲାଆଃ ମ୍ବ୍ର ଲାଲା । 22 ନିଂନେ ପର୍‌ମେସର୍‌ ନିଜେନେ ଦୁତ୍‌ ବେଚେ ସିଂହ‍ଇଂନେ ତୁମୁଁଆଃ ବନ୍ଦ୍‌ ଆଃଡିଂବକେ ଆରି ମେଇଂ ଆନେଙ୍ଗ୍‌କେ ମେଃଡିଗ୍‌ ଆଡିଂଆର୍‌କେ ଣ୍ଡୁ; ମେଃଡାଗ୍‌ଲା ମେଁନେ ଡାଗ୍ରା ନିଂନେ ଦସ୍‌ ଆତ୍ନାକେ ଣ୍ଡୁ; ବାରି, ଅ ମ୍ନାଃ ଇଃସାଙ୍ଗ୍‌, ନିଂ ନାଁନେ ଡାଗ୍ରା ଆଃ ମେଃଡିଗ୍‌ କେତି ନ୍ନାଡିଂକେ ଣ୍ଡୁ ।

23 ତେଲା ଇଃସାଙ୍ଗ୍‌ ଜାବର୍‌ ସାର୍ଦା ଡିଂଚେ ଦାନିଏଲ୍‌କେ କୁରୁବାନ୍‌ ଆଃତାର୍‌ ନ୍‌ସାଃ ଆଦେସ୍‌ ବିଃକେ । ତେସାଃ ଦାନିଏଲ୍‌ ପାର୍‌ବାନ୍‌ ତାର୍‌କେ ଆରି ମେଁନେ ଗାଗ୍‌ଡ଼େଅରିଆ ମେଃଡିଗ୍‌ ରକମ୍‌ ଚିନା ଆତ୍ନାକେ ଣ୍ଡୁ, ମେଃଡାଗ୍‌ଲା ମେଁ ନିଜେନେ ପର୍‌ମେସର୍‌ଅରିଆ ବିସ୍‌ବାସ୍‌ ଡିଂବଗେ । 24 ଇଡ଼ିଂ ଇଃସାଙ୍ଗ୍‌ ଆଦେସ୍‌ ଡିଂଲା, ରେମୁଆଁଇଂ ଦାନିଏଲ୍‌ନେ ନିନ୍ଦା ଡିଂଣ୍ଡ୍ରେଇଂକେ ଡୁଙ୍ଗ୍‌ପାଙ୍ଗ୍‌ଚେ, ଆମେଇଂକେ, ମେଇଂନେ ଗଡ଼େଇଂ ଆରି ମେଇଂନେ ସେଲାମ୍ବୁଏଃଇଂକେ ସିଂହ‍ଇଂନେ ପାର୍‌ଅରିଆ ତ୍ଲାଗ୍‌ଆର୍‌କେ; ବାରି, ମେଇଂ ପାର୍‌ନେ ଆଲ ମାଲଃ ଆଃ ସିଂହ‍ଇଂ ଆମେଇଂକେ ଆଃଚେ ମେଇଂନେ ଞ୍ଚ୍ୟା ସାପା ଚଙ୍ଗ୍‌ବି ଆର୍‌କେ ।

25 ଅଃତେନ୍‌ବେଲା ଦାରୀୟାବସ୍‌ କ୍ଲିଗ୍‌ ଦର୍‌ତନି ବାସାଣ୍ଡ୍ରେ, ସାପା ଜାତି, ଦେସ୍‌ବାସି ଆରି ବ୍ନାସାଣ୍ଡ୍ରେଇଂ ଡାଗ୍ରା ଉଲିଆଃ ଗୁଆର୍‌କେ । ପେଇଂନେ ଆଡ଼ାତ୍ରା ଜାବର୍‌ ବାବ୍‌ରେ ସାନ୍ତି ଡିଂଲେଃ ।

26 ନିଂ ଆକେନ୍‌ ଆଦେସ୍‌ ଡିଂଣ୍ଡିଂକେ ଜେ,

ନିଂନେ ରାଜି ଲେଃକ୍ନେ ସାପା ଦେସ୍‌ନେ ରେମୁଆଁଇଂ ଦାନିଏଲ୍‌ନେ ପର୍‌ମେସର୍‌ନେ ଡାଗ୍ରା ସନ୍‌ମାନ୍‌ ଆରି ବୁଟପା;

ମେଃଡାଗ୍‌ଲା ମେଁ ଜିବିତ୍‌ ପର୍‌ମେସର୍‌ ଆରି କାଲାଆଃ ଲେଃଣ୍ଡ୍ରେ ଆରି ମେଁନେ ରାଜି ବିନାସ୍‌ ଆଡିଂ ଣ୍ଡୁ,

ବାରି ମେଁନେ ସାସନ୍‌ ସାରାସାରି ଜାକ ଆଃ ଲେଃଏ;

27 ମେଁ ଆଃମ୍ବ୍ରଏ ଆରି ରକ୍ୟା ଡିଂଏ,

ବାରି ମେଁ କିତଂଅରିଆ ଆରି ଦର୍‌ତନିଅରିଆ ଚିନ୍‌ ଆରି କାବା କାମ୍‌ଇଂ ଆକେଏ;

ମେଁ ଦାନିଏଲ୍‌କେ ସିଂହ‍ଇଂନେ ବାନ୍‌ ରକ୍ୟା ଆଡିଂବକେ ।

28 ଦେକ୍‌ରକମ୍‌ ଦାନିଏଲ୍‌ ଦାରୀୟାବସ୍‌ନେ ସାସନ୍‌ ବେଲା ଆରି ପାରସୀକ କୋରସ୍‌ନେ ସାସନ୍‌ ବେଲା ଉନ୍ନତି ଲାବ୍‌ ଡିଂକେ ।