ବେଲ୍ଟଶତ୍ସର୍ ଆତ୍ଲା କୁଗ୍ଡାସାଃନିଆ ଗ୍ନୁଆର୍ନେ
1 ଇଃସାଙ୍ଗ୍ ବେଲ୍ଶତ୍ସର୍ ମେଁନେ ଅଜାର୍ଟା ଅମାତ୍ୟାବର୍ଗ ଆତ୍ଲା ମୁଇଂ ମ୍ନାଃ ବଜି ଆଃରେକେ ଆରି ଆତେନ୍ ଅଜାର୍ରେଇଂ ସାମ୍ନେ ଦ୍ରାକ୍ୟା ରସ୍ ଉଗ୍କେ । 2 ବାରି, ମେଁନେ ଆବା ନବୂଖଦ୍ନିତ୍ସର୍ ଯିରୂଶାଲମ୍ ଲେଃକ୍ନେ ମନ୍ଦିର୍ବାନ୍ ଆଣ୍ଡିନେ ସାପା ସୁନା ଆରି ରୁପାନେ ମୁତା ଡଙ୍ଗା ବଗେ, ତେଲା ଇଃସାଙ୍ଗ୍ ଆରି ମେଁନେ ଅମାତ୍ୟବର୍ଗ, ବାରି ମେଁନେ ସେଲାମ୍ବୁଏଃଇଂ ଆରି ବାର୍ଡିନିଆଃଇଂ ଡିରକମ୍ ଉଗ୍ଆର୍ଏ, ଆକେନ୍ସାଃ ବେଲ୍ଶତ୍ସର୍ ଦ୍ରାକ୍ୟା ରସ୍ ଆସ୍ୱାଦନ ଡିଂ ଡିଂଚେ ଆତେନ୍ ସାପା ମୁତା ଡୁଙ୍ଗ୍ପାଙ୍ଗ୍ ନ୍ସାଃ ଆଦେସ୍ ଡିଂକେ । 3 ତେଲା ଯିରୂଶାଲମ୍ ଲେଃକ୍ନେ ମନ୍ଦିର୍ବାନ୍, ଡାଗ୍ଲା, ପର୍ମେସର୍ନେ ଡୁଆବାନ୍ ଆଣ୍ଡିନେ ସାପା ସୁନା ମୁତା ଡଙ୍ଗା ଡିଂଲେଃଗେ, ଆତେନ୍ ରେମୁଆଁଇଂ ଡୁଙ୍ଗ୍ପାଙ୍ଗ୍ଆର୍କେ; ବାରି, ଇଃସାଙ୍ଗ୍ ଆରି ମେଁନେ ଅମାତ୍ୟବର୍ଗ, ମେଁନେ ସେଲାମ୍ବୁଏଃଇଂ ଆରି ବାର୍ଡିନିଆଃଇଂ ଆତେନ୍ ସାପାଅରିଆ ଉଗ୍ଆର୍କେ । 4 ମେଇଂ ଦ୍ରାକ୍ୟା ରସ୍ ଉଗ୍ ଉଗ୍ଚେ ସୁନା ଆରି ରୁପା, ପିତଲ୍, ଲୁଆ, ସୁଆ ଆରି ବ୍ରି ଏଃତେ ଆଃରେକ୍ନେ ଦେବ୍ତାଇଂନେ ପ୍ରସଂସା ଡିଂଆର୍କେ ।
5 ଆତେନ୍ ବେଲା ରେମୁଆଁ ନ୍ତିନେ ଆର୍ୱେତି ପାଙ୍ଗ୍ଚେ ଇଃସାଙ୍ଗ୍ ଡୁଆନେ କୁଗ୍ଡାସାଃନେ ରିଗ୍ତ୍ୟାକ୍ନେ ଆଡ଼ାତ୍ରା କୁପିସ ବୁବନେ ଡାଗ୍ରା ଗୁଆର୍କେ, ଆରି ନ୍ତିନେ ଆଣ୍ଡିନେ ବାଗ୍ ଗୁଆର୍କେ, ଇଃସାଙ୍ଗ୍ ଆତେନ୍ କେକେ । 6 ତେଲା ଇଃସାଙ୍ଗ୍ନେ ସାର୍ମୁଆଃ ବୁଟମେଗ୍ ୱେକେ ଆରି ମେଁନେ ଚିନ୍ତା ଆମେକେ ତେରେପେତେ ଆଃଡିଂବିକେ । ବାରି, ମେଁନେ ନ୍ସାଃନେ ବପୁ ସାପା ବୁନ୍ଦେ ଜାର୍କେ ଆରି ମେଁନେ ମାଣ୍ଡିଅରିଆ ମାଣ୍ଡି ବାକେ । 7 ଇଃସାଙ୍ଗ୍ ପାଞ୍ଜି କିକେଣ୍ଡ୍ରେକେ, କଲଦୀୟ ଆରି ବବିସତ୍ବାଦୀଇଂକେ ଡୁଙ୍ଗ୍ପାଙ୍ଗ୍ ନ୍ସାଃ ୱାସାର୍ଚେ ୱାକେ । ଇଃସାଙ୍ଗ୍ ବାବିଲ୍ନେ ଜ୍ଞାନିଇଂକେ ବାସଙ୍ଗ୍କେ, ଜାଡିଗ୍ ଆକେନ୍ ଗୁଆର୍କ୍ନେ ପଡ଼େଏ ଆରି ଆତ୍ନେ ଅର୍ତ ଆନିଂକେ ବାସଙ୍ଗ୍ଏ, ମେଁ କଃଡ଼େଆଁ ବାନା ପାଟାଇ ଏଃତେ ୱାଡ଼େଗ୍ଏ ଆରି ମେଁନେ ଲୁଗଃଅରିଆ ସୁନାନେ ସରା ତଗଃଏ, ଆରି ମେଁ ରାଜିଅରିଆ ତୁର୍ତିୟ ସାସନ୍କର୍ତା ଡିଂଏ । 8 ତେଲା ଇଃସାଙ୍ଗ୍ନେ ସାପା ଜ୍ଞାନି ରେମୁଆଁ ବିତ୍ରେ ଗାଆର୍କେ; ମାତର୍ ମେଇଂ ଗୁଆର୍କ୍ନେ ପଡ଼େ ଆୟାଆର୍କେ ଣ୍ଡୁ, କି ଇଃସାଙ୍ଗ୍କେ ଆତ୍ନେ ଅର୍ତ ବାସଙ୍ଗ୍ ଆୟାଆର୍କେ ଣ୍ଡୁ । 9 ତେସାଃ ଇଃସାଙ୍ଗ୍ ବେଲ୍ଶତ୍ସର୍ ଜାବର୍ ତେରେପେତେ ଡିଂୱେକେ ଆରି ମେଁନେ ସାର୍ମୁଆଃ ଡାଆଁ ଡିଂୱେକେ, ଆରି ମେଁ ଏଃତେ ଲେଃକ୍ନେ ମ୍ନା ରେମୁଆଁଇଂ ଡିଗ୍ ଇରିଆଃତୁଗ୍ ଆର୍କେ ।
10 ଆକେନ୍ ବେଲା ଇଃସାଙ୍ଗ୍ନେ ଆରି ମେଁ ସାଙ୍ଗେ ଏତେ ଲେକ୍ନେ ରେମୁଆଁଇଂନେ ସାମୁଆଁ ରାନି ଚୁଚଙ୍ଗ୍ନେ ଡୁଆଅରିଆ ପାଙ୍ଗ୍କେ; ରାନି ବାସଙ୍ଗ୍କେ, ଅ ମାପ୍ରୁ, ନାଁନେ ମ୍ନି ମ୍ନା ଡିଂଲେ; ନାଁନେ ଚିନ୍ତା ଆନାକେ ତେରେପେତେ ଆରାଃଡିଂଲେ, କି ନାନେ ସାର୍ମୁଆଃ ଆନାକେ ବୁଟମେଗ୍ ଆରାଃଡିଂଲେ । 11 ନାଁନେ ରାଜି ବିତ୍ରେ ମୁଇଂ ରେମୁଆଁ ଲେଃକେ, ମେଁନେ ମନ୍ଅରିଆ ପବିତ୍ର ଦେବ୍ତାଇଂନେ ଆତ୍ମା ଲେଃକେ; ବାରି, ନାଁନେ ଆବାନେ ବେଲା ଦେବ୍ତାଇଂନେ ଜ୍ଞାନ୍ ରକମ୍ ଜ୍ଞାନଦୀପ୍ତି ଆରି ବୁଦି ଆରି ଜ୍ଞାନ୍ ମେଁଅରିଆ ତ୍ନା ଡିଂଗେ । ଆରି, ନାଁନେ ଆବା ଇଃସାଙ୍ଗ୍ ନବୂଖଦ୍ନିତ୍ସର୍, ଆଁ, ନାଁନେ ଆବା ଇଃସାଙ୍ଗ୍, ଆମେକେ ମନ୍ତର୍ଡିଂଣ୍ଡ୍ରେ, ପାଞ୍ଜି କିକେଣ୍ଡ୍ରେ, କଲଦୀୟ ଆରି ବବିସତ୍ଣ୍ଡ୍ରେଇଂନେ ଆଡ଼ାତ୍ରା ମ୍ନା ଆଃଡିଂଚେ ବାଚେ ବଗେ । 12 ମେଃଡାଗ୍ଲା ଆତେନ୍ ଦାନିଏଲ୍ନେ ମନ୍ଅରିଆ ମ୍ନା ଆତ୍ମା, ଜ୍ଞାନ୍ ଆରି ବୁଦି, ମୁସୁଡ଼ିଙ୍ଗ୍ ଅର୍ତ ଆଃଡିଂନେ ଆରି ବୁଡ଼ିଲେକ୍ନେ ସାମୁଆଁ ବାସଙ୍ଗ୍ନେ ଆରି ଡାଉଟ୍ ଡିଂନେ ବପୁ ତ୍ନା ଲେଃଗେ, ଇଃସାଙ୍ଗ୍ ଆମେକେ ବେଲ୍ଟଶତ୍ସର୍ ମ୍ନି ବିଃବଆର୍ଗେ । ଏବେ ଦାନିଏଲ୍କେ ୱାଆର୍ଲେ, ମେଁ ଅର୍ତ ବାସଙ୍ଗ୍ଏ ।
ଦାନିଏଲ୍ନେ ଗୁଆର୍କ୍ନେ ଅର୍ତ ବାସଙ୍ଗ୍ନେ
13 ତେସାଃ ଦାନିଏଲ୍କେ ଇଃସାଙ୍ଗ୍ନେ ଡାଗ୍ରା ଡୁଙ୍ଗ୍ପାଙ୍ଗ୍ଆର୍କେ । ଇଃସାଙ୍ଗ୍ ଦାନିଏଲ୍କେ ବାସଙ୍ଗ୍କେ, ନିଂନେ ଆବା ମ୍ନାଇଃସାଙ୍ଗ୍ ଯିହୁଦା ଦେସ୍ବାନ୍ ଆଜାକେ ଡୁଙ୍ଗ୍ପାଙ୍ଗ୍ ବଗେ, ଆତେନ୍ ଡୁଙ୍ଗ୍ପାଙ୍ଗ୍କ୍ନେ ଯିହୁଦି ରେମୁଆଁଇଂନେ ବିତ୍ରେ ଆଣ୍ଡିନେ ଦାନିଏଲ୍ ଲେଃଗେ, ମେଁ କି ନାଁ ? 14 ନିଂ ନାଁ ବିସଏରେ ଦ୍ରିଗ୍ନ୍ଲେଃକେ ଜେ, ନାଁନେ ମନ୍ଅରିଆ ପବିତ୍ର ଦେବ୍ତାଇଂନେ ଆତ୍ମା ଲେଃକେ, ଆରି ଜ୍ଞାନ୍ ଆରି ତାର୍କିଗ୍, ବୁଦି ଆରି ମ୍ନାଃ ଜ୍ଞାନ୍ ନାଁନେ ଡାଗ୍ରା ତ୍ନାଏ । 15 ଏବେ ଆକେନ୍ ଗୁଆର୍କ୍ନେ ପଡ଼େ ନ୍ସାଃ ଆରି ଆତ୍ନେ ଅର୍ତ ଆନିଂକେ ବାସଙ୍ଗ୍ ନ୍ସାଃ ଜ୍ଞାନି ଆରି ଗଣକଇଂ ନିଂ ଡାଗ୍ରା ଡୁଙ୍ଗ୍ପାଙ୍ଗ୍ ବଆର୍କେ; ମାତର୍ ମେଇଂ ଆତ୍ନେ ଅର୍ତ ବାସଙ୍ଗ୍ନେ ଆୟାଆର୍କେ ଣ୍ଡୁ । 16 ମାତର୍ ନାଁ ବିସଏରେ ନିଂ ଦ୍ରିଗ୍ନ୍ଲେଃକେ ଜେ, ନାଁ ଅର୍ତ ବାସଙ୍ଗ୍ନେ ଆରି ଡାଉଟ୍କେ ଦୁର୍ ଆଡିଂନାୟାଏ, ଏବେ ନାଁ ଜଦି ଆକେନ୍ ଗୁଆର୍କ୍ନେ ପଡ଼େଚେ ଆତ୍ନେ ଅର୍ତ ଆନିଂକେ ବାସଙ୍ଗ୍ ପେୟାଏ, ତେଲା ନାଁ କଃଡ଼େଆଁ ବାନାନେ ପାଟାଇ ନାୱାଃଡେଗ୍ଏ, ନାଁନେ ଲୁଗଃଅରିଆ ସୁନାନେ ମାଲା ଆଃତଗଏ ଆରି ନାଁ ରାଜିଅରିଆ ତୁର୍ତିୟ ସାସନ୍କର୍ତା ନାଡିଂଏ ।
17 ଅଃତେନ୍ବେଲା ଦାନିଏଲ୍ ଇଃସାଙ୍ଗ୍ନେ ଡାଗ୍ରା ଉତର୍ ବିଃଚେ ବାସଙ୍ଗ୍କେ, ନାଁନେ ଦାନ୍ ନାଁଅରିଆ ଲେଃଲେ ଆରି ନାଁନେ ପୁରୁସ୍କାର୍ ବିନ୍ରେକେ ବିଃ । ଏଲେଡିଗ୍ ନିଂ ମ୍ନାଃ ଇଃସାଙ୍ଗ୍ନେ ଡାଗ୍ରା ଆକେନ୍ ଗୁଆର୍କ୍ନେ ମ୍ପଡ଼େଏ ଆରି ଅର୍ତ ଆମେକେ ମ୍ବାସଙ୍ଗ୍ଏ ।
18 ଅ ମ୍ନାଃ ଇଃସାଙ୍ଗ୍, ସାପାବାନ୍ ମ୍ନା ପର୍ମେସର୍ ମେଁନେ ଆବା ନବୂଖଦ୍ନିତ୍ସର୍କେ ରାଜି, ମଇମା, ଗଉରବ୍ ଆରି ବପୁ ବିଃକେ; 19 ଆରି, ମେଁ ଆମେକେ ଦେକ୍ରକମ୍ ମଇମା ବିଃକ୍ନେସାଃ ସାପା ଜାତି, ବିନ୍ବିନ୍ ଦେସ୍ନେ ଆରି ବ୍ନାସାନେ ରେମୁଆଁଇଂ ମେଁନେ ଡାଗ୍ରା ଇରିଆଃତୁଗ୍ଚେ ବୁଟମେଗ୍ ଆର୍କେ; ଆଜାକେ ମେଁନେ ଇକ୍ଚା, ଆମେକେ ମେଁ ବାଗୁଏଃକେ ଆରି ଆଜାକେ ମେଁନେ ଇକ୍ଚା, ଆମେକେ ମେଁ ଆମ୍ବ୍ରଚେ ବକେ; ବାରି, ଆଜାକେ ମେଁନେ ଇକ୍ଚା, ମେଁ ଆମେକେ ମ୍ନା ଆଃଡିଂକେ ଆରି ଆଜାକେ ମେଁନେ ଇକ୍ଚା ଆମେକେ ମେଁ ଆଲ ଆଃଡିଂକେ । 20 ମାତର୍ ମେଁନେ ମନ୍ ବିତ୍ରେ ଗର୍ବ ଡିଂଲା ଆରି ମେଁନେ ଆତ୍ମା ଡାଟ୍ ଡିଂଚେ, ମେଁ ଆଙ୍କାର୍ ରକମ୍ ବେବଆର୍ ଡିଂଲା, ମେଁ ନିଜେନେ ଇଃସାଙ୍ଗ୍ କୁର୍ଚିବାନ୍ ମେଁ ଆଲ ଜାର୍କେ ଆରି ମେଁନେ ଗଉରବ୍ ମେଁବାନ୍ ଆଃଆନ୍ତାର୍କେ, 21 ବାରି, ମେଁ ରେମୁଆଁନେ ଗଡ଼େଇଂ ବିତ୍ରେବାନ୍ ସ୍ଲ ଡିଂଆର୍କେ; ମେଁନେ ମନ୍ ବିତ୍ରେ ପସୁନେ ରକମ୍ ଡିଂକେ ଆରି କଣ୍ଡାନେ ଗଦ ଏଃତେ ମେଁ ବାସାକେ; ମେଁ ଅରେଃ ରକମ୍ ଚେଃମୁଆଁ ଚଙ୍ଗ୍କେ ଆରି ମେଁନେ ଗାଗ୍ଡ଼େ କିତଂନେ ଅଁସ୍ଡ଼ିଆଃଅରିଆ ଲୁବଙ୍ଗ୍କେ; ସାରାସାରି ମେଁ ମ୍ୟାଃକେ ଜେ, ସାପାବାନ୍ ମ୍ନା ପର୍ମେସର୍ ରେମୁଆଁଇଂନେ ରାଜିଅରିଆ ସାସନ୍ ଡିଂଏ ଆରି ଆତ୍ନେ ଆଡ଼ାତ୍ରା ଆଜାକେ ମେଁନେ ଇକ୍ଚା, ଆମେକେ ମେଁ ଅଦିକାର୍ ବିଏ ।
22 ଆରି ଅ ବେଲ୍ଶତ୍ସର୍, ମେଁନେ ଉଙ୍ଗ୍ଡେ ଜେ ନାଁ, ନାଁ ଏନ୍ସାପା ନାମ୍ୟାଃଲା ଡିଗ୍ ନାଁ ମନ୍ ଦରମ୍ ନାରାଡିଂକେ ଣ୍ଡୁ । 23 ମାତର୍ କିତଂନେ ସାସନ୍ ଡିଂଣ୍ଡ୍ରେନେ ବିରୁଦ୍ରେ ଆନାକେ ଆମ୍ନାବକେ ଆରି ମେଁନେ ଡୁଆନେ ତାଣ୍ଡେ ମୁତା ନାଁନେ ସେଃମଁ ଡୁଙ୍ଗ୍ପାଙ୍ଗ୍ଆର୍କେ, ନାଁ ଆରି ନାଁନେ ସାଙ୍ଗଡ଼େଇଂ, ନାଁନେ ସେଲାମ୍ବୁଏଃଇଂ ଆରି ନାଁନେ ଡାଆଁ କୁନୁଏଃଇଂ ଆତେନ୍ ସାପା ମୁତାଅରିଆ ଦ୍ରାକ୍ୟା ରସ୍ ଉଗ୍ ଲେଃଆର୍କେ; ବାରି ରୁପାନେ, ସୁନାନେ, ପିତଲ୍ନେ, ଲୁଆନେ, ସୁଆନେ ଆରି ବ୍ରିନେ ଆଣ୍ଡିନେ ଦେବ୍ତାଇଂ ଆକେଆର୍ ଣ୍ଡୁ, କି ଆଦ୍ରିଗ୍ଆର୍ ଣ୍ଡୁ, କି ଆମ୍ୟାଃ ଣ୍ଡୁ, ମେଇଂନେ ପ୍ରସଂସା ନାଁ ଡିଂନାବକେ; ବାରି, ନାଁନେ ପୁଣ୍ଡା ଜାନେ ଅପେଃନେ ଆରି ନାଁନେ ସାପା ଗାଲି ଜାନେ ନ୍ତିଅରିଆ, ନାଁ ଆତେନ୍ ପର୍ମେସର୍ନେ ଗଉରବ୍ ଡିଂନାବକେ ଣ୍ଡୁ । 24 ଏନ୍ ବେଲା ମେଁନେ ଡାଗ୍ରାବାନ୍ ନ୍ତିନେ ବାଗ୍ ବେକେ, ଆରି ଆକେନ୍ ଗୁଆର୍କ୍ନେ ଗ୍ନୁଆର୍ ଡିଂକେ ।
25 ବାରି, ମେଃନେ ଗ୍ନୁଆର୍ ଡିଂକେ, ଆତେନ୍ ଆକେନ୍, ମିନେ ମିନେ, ତକେଲ, ଉପାରସୀନ । 26 ଆକ୍ମେନେ ଅର୍ତ: ମିନେ; ପର୍ମେସର୍ ନାଁନେ ରାଜିକେ ଏଜା ବକେ ଆରି ଆତେନ୍ ଡିଂ ଆଡାବକେ । 27 ତକେଲ; ଆନାକେ କିଜିଅରିଆ ତୁଲେ ବକେ ଆରି କେଜି କମେ ୱେଲାଏଃକେ । 28 ପୀରସ୍; ନାଁନେ ରାଜି ବାଗ୍ ବାଗ୍ ଡିଂଲେଃକେ, ଆରି ମାଦୀୟ ଆରି ପାରସିକଇଂକେ ବିଃବକେ ।
29 ଅଃତେନ୍ବେଲା ବେଲ୍ଶତ୍ସର୍ ଆଦେସ୍ ଡିଂଲା, ରେମୁଆଁଇଂ ଦାନିଏଲ୍କେ କଃଡ଼େଆଁ ବାନାନେ ସକା ଆଃସଆର୍କେ ଆରି ମେଁନେ ଲୁଗଃଅରିଆ ସୁନାନେ ମାଲା ଆଃତଗଃଆର୍କେ ଆରି ମେଁ ଜେ ରାଜିନେ ତୁର୍ତିୟ ସାସନ୍କର୍ତା ଡିଂଏ, ମେଁ ବିସଏରେ ଆକେନ୍ ବାସଙ୍ଗ୍କେ । 30 ଆତେନ୍ ମିଡିଗ୍ କେଲା କଲଦୀୟଇଂନେ ଇଃସାଙ୍ଗ୍ ବେଲ୍ଶତ୍ସର୍କେ ବାଗୁଏଃଆର୍କେ । 31 ବାରି, ମାଦୀୟ ଦାରୀୟାବସ୍ ରାଜି ବାକେ, ଆତେନ୍ ବେଲା ମେଁନେ ବୟସ୍ ବାସଟି ମୁଆଁ ଡିଂଲେଃଗେ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)