1 ମାଦୀୟ ବଂସ‍ଅରିଆ ଜନମ୍‌ ଡିଂକ୍ନେ ଅକ୍ଷଶ୍ୱେରଶନେ ଉଙ୍ଗ୍‌ଡେ ଜେ ଦାରୀୟାବସ୍‌ କଲଦୀୟନେ ରାଜି ଆଡ଼ାତ୍ରା ଇଃସାଙ୍ଗ୍‌ ଡିଂଲେଃଗେ, ମେଁନେ ପର୍‌ତୁମ୍‌ ମୁଆଁ ବେଲା । 2 ମେଁନେ ସାସନ୍‌ନେ ପର୍‌ତୁମ୍‌ ମୁଆଁ ବେଲା ନିଂ ଦାନିଏଲ୍‌ ସାସ୍ତର୍‌ବାନ୍‌ ବରସ୍‌ନେ ସଂକ୍ୟା, ଡାଗ୍‌ଲା, ଯିରୂଶାଲମ୍‌ନେ ପାକ୍‌ଚିନେ ବେଲା ସତୁରି ମୁଆଁ ଡିଂନେ ବିସ‍ଏରେ ମାପ୍‌ରୁନେ ମୁଃଡ଼ି ସାମୁଆଁ ଯିରିମୀୟ ବବିସତ୍‌ ବକ୍ତାନେ ଡାଗ୍ରା ୱେଚାଲେଃଗେ, ଆତେନ୍‌ ନିଂ ମ୍ୱୁଜେକେ । 3 ଏନ୍‌ସାଃ ନେଙ୍ଗ୍‌ ଉପାସ୍‌ ଡିଂଚେ, ବାସ୍ତା ସଃଚେ ଆରି ଉକ୍‌ସ ଲାଗେଚେ ପାର୍‌ତନା ଆରି ଗୁଆରି ଡିଂଚେଃ ମାପ୍‌ରୁ ପର୍‌ମେସର୍‌କେ ତୁତୁର୍‌ନେ ନ୍‌ସାଃ ମେଁ ପାକା ଙ୍କେକେ । 4 ବାରି, ନିଂ ମାପ୍‌ରୁ ନିଂନେ ପର୍‌ମେସର୍‌ନେ ଡାଗ୍ରା ପାର୍‌ତନା ଣ୍ଡିଂକେ ଆରି ପାପ୍‌ ସ୍ୱୀକାର୍‌ ଡିଂଚେ ମ୍ବାସଙ୍ଗ୍‌କେ, ଅ ମାପ୍‌ରୁ, ନାଁ ମ୍ନାଃ ଆରି ବୟଙ୍କାର୍‌ ପର୍‌ମେସର୍‌, ଜାଣ୍ଡେଃଇଂ ଆନାକେ ଆଲାଦ୍‌ ଡିଂଆର୍‌ଏ ଆରି ନାନେ ଆଦେସ୍‌ ମାନେଃଆର୍‌ଏ, ନାଁ ମେଇଂନେ ଆଡ଼ାତ୍ରା ନିଅମ୍‌ ଆରି ଦୟା ରକ୍ୟା ଡିଂନାମ୍ୟାଃ ।

5 ନେ ପାପ୍‌ ଆରି କୁଟ୍‌ କାମ୍‌ ଡିଂନେବକେ ଆରି କରାପ୍‌ କାମ୍‌ ଡିଂଚେ ବିରଦି ଡିଂନେଲେଃକେ, ଆରି ନାଁନେ ନିଅମ୍‌ ଆରି ସାସନ୍‌ ଡିଂନେ ଗାଲିକେ ଆନ୍ତାର୍‌ ନେବକେ । 6 ବାରି, ନାଁନେ ମୁଃଡ଼ି ଦାସ୍‌ ବବିସତ୍‌ ବକ୍ତାଇଂ ନେଇଂନେ ଇଃସାଙ୍ଗ୍‌ଇଂକେ, ନେଇଂନେ ନେତାଇଂକେ ଆରି ନେଇଂନେ ନ୍ତା ଞ୍ଜାଃଇଂକେ ଆରି ଦେସ୍‌ଅରିଆ ଲେଃକ୍ନେ ରେମୁଆଁ ସାପାକେ ନାଁ ମ୍ନିରେ ସାମୁଆଁ ବାସଙ୍ଗ୍‌ଆର୍‌କେ, ମେଇଂନେ ଆଡ଼ାତ୍ରା ନେଁ ନେଦ୍ରିଗ୍‌କେ ଣ୍ଡୁ । 7 ଅ ମାପ୍‌ରୁ ଦାର୍ମିକ୍ ସାମୁଆଁ ନାଁନେ, ମାତର୍‌ ଏଃକେନ୍‌ ନ୍ୟାୟ୍‌ ସାର୍ମୁଆଃନେ କାରାପ୍‌ ସାମୁଆଁ ନେଁନେ; ପେ ବିରୁଦ୍‌ରେ ଡିଂକ୍ନେ ସତ୍‌କେ ଅମାନି ଡିଂପେବଗେସାଃ ଯିହୁଦାନେ ରେମୁଆଁ ଆରି ଯିରୂଶାଲମ୍‌ନିଆ ବାସାଲେକ୍ନେଣ୍ଡ୍ରେ ଆରି ନାଁ ବାନ୍‌ ତାଡ଼ନା ଡିଂକ୍ନେ ସାପା ଦେସ୍‌ ଲେଃକ୍ନେ ଡାଗ୍ରାନେ ଆରି ସ୍ଲନେ ସାପା ଇସ୍ରାଏଲ୍‌ ରେମୁଆଁ କାରାପ୍‌ ସାମୁଆଁ ବାସଙ୍ଗ୍‌ନେ ଉଂଡେଇଂ । 8 ଅ ମାପ୍‌ରୁ, ସାର୍ମୁଆଃନେ କାରାପ୍‌ ସାମୁଆଁ ନେଁନେ, ନେଇଂନେ ଇଃସାଙ୍ଗ୍‌ଇଂନେ, ନେଇଂନେ ନେତାଇଂନେ ଆରି ନେଇଂନେ ନ୍ତା ଞ୍ଜାଃଇଂନେ, ମେଃଡାଗ୍‌ଲା ନେ ନାଁ ବିରୁଦ୍‌ରେ ପାପ୍‌ ଡିଂନେବକେ । 9 ଗୁଲେ ଦୟା ଆରି କେମା ନେବାନ୍‌ ମାପ୍‌ରୁ ପର୍‌ମେସର୍‌ନେ ଲେଃକେ; ମେଃଡାଗ୍‌ଲା ନେ ମେଁନେ ବିରଦ୍‌ରେ କରାପ୍‌ ବେପାର୍‌ ଡିଂନେବକେ । 10 ଆରି ମେଁ ନିଜେନେ ବବିସତ୍‌ ବକ୍ତାଇଂ ବାନ୍‌ ନିଜେନେ ମୁଃଡ଼ି ନିଅମ୍‌ ସାପା ନେଇଂନେ ସେଃମଁ ବଗେ, ତେନ୍‌ ଅନୁସାରେ ଅଲେଙ୍ଗ୍‌ନେସା ନେ ମାପ୍‌ରୁ ନେଁନେ ପର୍‌ମେସର୍‌ନେ ସାମୁଆଁକେ ମନ୍‌ ନେବିଃକେ ଣ୍ଡୁ । 11 ଆଁ, କ୍ଲିଗ୍‌ ଇସ୍ରାଏଲ୍‌ ନାଁନେ ନିଅମ୍‌ ମାନେବଆର୍‌କେ, ନାଁନେ ସାମୁଆଁରେ ଡିରକମ୍‌ ମେଇଂ ଆୱାଆର୍‌, ଆକେନ୍‌ସାଃ ମେଇଂ ଗୁଏନେ ଗାଲିପାକା ୱେଲେଃଆର୍‌କେ, ଆକେନ୍‌ସାଃ ଅବିସାପ୍‌ ବାଲେଃ ଆର୍‌କେ ଆରି ପର୍‌ମେସର୍‌ନେ ସେବକ ମୋଶାନେ ନିଅମ୍‌ଅରିଆ ଗୁଆର୍‌କ୍ନେ ପାର୍‌ମାନ୍‌ ନେ ଆଡ଼ାତ୍ରା ବିବକେ; ମେଃଡାଗ୍‌ଲା ନେଁ ମେଁ ବିରୁଦ୍‌ରେ ପାପ୍‌ ଡିଂନେବକେ । 12 ବାରି, ମେଁ ନେ ଆଡ଼ାତ୍ରା ମ୍ନାନେ ଅମଙ୍ଗଲ୍‌ ଆଃଗଟେକ୍ନେ ବାନ୍‌ ନେଇଂନେ ବିରୁଦ୍‌ରେ ଆରି ମୁଃଡ଼ି ସାସନ୍‌ ଡିଂଣ୍ଡ୍ରେଇଂ ଆନେକେ ବିଚାର୍‌ ଡିଂଆର୍‌କେ, ମେଇଂନେ ବିରୁଦ୍‌ରେ ମେଃନେ ବାସଙ୍ଗ୍‌ବ‍ଆର୍‌ଗେ, ମେଁନେ ଆତେନ୍‌ ସାମୁଆଁ ମେଁ ପୁରନ୍‌ ଆଃଡିଂବକେ; ମେଃଡାଗ୍‌ଲା ଯିରୂଶାଲମ୍‌ ଆଡ଼ାତ୍ରା ମେଁ ଡିଂବକେ, କ୍ଲିଗ୍‌ କିତଂଇନି ଆଲ ଡେତ୍‌ରକମ୍‌ ଆଃଡିଂ ଆବକେ ଣ୍ଡୁ । 13 ମୋଶାନେ ନିଅମ୍‌ନେ ଗୁଆର୍‌କ୍ନେ ଅନୁସାରେ ଆକେନ୍‌ ସାପା ଅମଙ୍ଗଲ୍‌ ନେଁନେ ଆଡ଼ାତ୍ରା ଗଟେ ଲେଃକେ; ଏଲେଡିଗ୍‌ ନେଁ ନିଜେ ନିଜେ ପାପ୍‌ବାନ୍‌ ଆଣ୍ଡେ ନ୍‌ସାଃ ଆରି ନାଁନେ ସତ୍‌କେ ବୁଜେ ନ୍‌ସାଃ ମାପ୍‌ରୁ ନେନେ ପର୍‌ମେସର୍‌ନେ ଡାଗ୍ରା ଗୁଆରି ନେଡିଂକେ ଣ୍ଡୁ । 14 ଆକେନ୍‌ସାଃ ମାପ୍‌ରୁ ଅମଙ୍ଗଲ୍‌ ନ୍‌ସାଃ ତରକ୍‌ ଡିଂଚେ ନେଇଂନେ ଆଡ଼ାତ୍ରା ଆତେନ୍‌ ଆଃଗଟେବକେ; ମେଃଡାଗ୍‌ଲା ମାପ୍‌ରୁ ନେଇଂନେ ପର୍‌ମେସର୍‌ ମେଃ ମେଃନେ ଡିଙ୍ଗ୍‌ଏ, ମେଁନେ ଆତେନ୍‌ ସାପା କାମ୍‌ଅରିଆ ମେଁ ଦରମ୍‌ ଲେଃକେ, ମାତର୍‌ ନେଁ ମେଁନେ ସାମୁଆଁଅରିଆ ଦିଆନ୍‌ ନେବିକେ ଣ୍ଡୁ ।

15 ଆତେନ୍‌ସା ଏବେ ଅ ମାପ୍‌ରୁ, ନେନେ ପର୍‌ମେସର୍‌, ନାଁ ବପୁକ୍ନେ ନ୍ତିବାନ୍‌ ମିସର୍‌ ଦେସ୍‌ବାନ୍‌ ନାଁନେ ରେମୁଆଁଇଂକେ ଆଃତାର୍‌ ଡୁଙ୍ଗ୍‌ପାଙ୍ଗ୍‌ଚେ ଆଜିକାଲିନେ ନ୍ୟାୟ୍‌ ଅର୍ଜନ ଲାବ୍‌ ଡିଂନାବକେ; ନେଁ ପାପ୍‌ ଡିଂନେବକେ, ନେଁ କରାପ୍‌ କାମ୍‌ ଡିଂନେବକେ । 16 ଅ ମାପ୍‌ରୁ, ଗୁଆରେ ଡିଂଣ୍ଡିଂକେ, ନାଁନେ ସାପା ଦରମ୍‌ ସାମୁଆଁ ଅନୁସାରେ, ନାଁନେ ଇନି ଯିରୂଶାଲମ୍‌, ନାଁନେ ପବିତ୍ର କଣ୍ଡା ଆଡ଼ାତ୍ରା ନାଁନେ ରିସା ଆରି ଗିସେଃ ଗଣ୍ଡାଃଲେ; ମେଃଡାଗ୍‌ଲା ନେଇଂନେ ପାପ୍‌ ଆରି ନେଇଂନେ ନ୍ତା ଞ୍ଜାଃଇଂନେ ଅଦରମ୍‌ ନ୍‌ସାଃ ଯିରୂଶାଲମ୍‌ ଆରି ନାଁନେ ରେମୁଆଁଇଂ ନେଇଂନେ ଚାର୍‌ବେଡ଼୍‌ତି ଲେଃକ୍ନେ ରେମୁଆଁଇଂନେ ନିନ୍ଦାନେ ରେମୁଆଁ ଡିଂଲେଃଆର୍‌କେ । 17 ଏନ୍‌ସାଃ ଅ ନେଇଂନେ ପର୍‌ମେସର୍‌, ଏବେ ନାଁନେ ଦାସ୍‌ନେ ପାର୍‌ତନା ଆରି ଗୁଆରିନେ ସାମୁଆଁରେ ଦିଆନ୍‌ ବିଃ ଆରି ନାଁନେ ଆକେନ୍‌ ମୁଃଡ଼ି ପବିତ୍ର ଜାଗା ଦଂସ ଡିଂଲେଃକେ, ତେନ୍‌ ଆଡ଼ାତ୍ରା ମାପ୍‌ରୁ ଆତ୍‌ଲା ନାନେ ସାର୍ମୁଆଃ ଆଃସୁଏଃ । 18 ଅ ନିଂନେ ପର୍‌ମେସର୍‌, ନ୍ଲୁଗ୍‌ ଡେରେଚେ ଦ୍ରିଗ୍‌; ନାନେ ମ୍‌ମୁଁଆଃ ମେଲେଚେ ନେନେ ଚିନ୍‌ଚତର୍‌ ଡିଂଲେକ୍ନେ ବାନ୍‌ ଆରି ନାଁ ମ୍ନିରେ ଉଡ୍ରାଡିଂକ୍ନେ ଆକେନ୍‌ ସହର୍‌ ଆଡ଼ାତ୍ରା ମ୍‌ମୁଁଆଃ କେଲା; ମେଃଡାଗ୍‌ଲା ନେ ନିଜେନେ ଦରମ୍‌ ସାମୁଆଁ ନ୍‌ସାଃ ଣ୍ଡୁ, ମାତର୍‌ ନାଁନେ ମ୍ନାଃ ଦୟା ନ୍‌ସାଃ ନାଁ ଡାଗ୍ରା ନେ ଗୁଆରି ଡିଂନେଡିଂକେ । 19 ଅ ମାପ୍‌ରୁ, ଦ୍ରିଗ୍‌; ଅ ମାପ୍‌ରୁ, କେମା ଡିଂ; ଅ ମାପ୍‌ରୁ, ମନ୍‌ ବିଃଚେ କାମ୍‌ ଡିଂ; ଆରାଃତଙ୍ଗାର୍‌ଗେ; ଅ ନିଂନେ ପର୍‌ମେସର୍‌, ନାଁ ନ୍‌ସା କାମ୍‌ ଡିଂ, ମେଃଡାଗ୍‌ଲା ନାଁନେ ଇନି ଆରି ନାଁନେ ରେମୁଆଁଇଂ ନାଁ ମ୍ନିରେ ଡାକ୍‌ପୁଟା ଡିଂଲାଏକେ ।

20 ଦେକ୍‌ରକମ୍‌ ନିଂ ଗୁଆରି ଆରି ପାର୍‌ତନା ଡିଂଣ୍ଡିଂଗେ, ବାରି ନିଂନେ ପାପ୍‌ ଆରି ନିଂନେ ଇସ୍ରାଏଲ୍‌ ରେମୁଆଁଇଂନେ ପାପ୍‌ ସ୍ୱୀକାର୍‌ ଡିଂଣ୍ଡିଂଗେ, ଆରି ନିଂନେ ପର୍‌ମେସର୍‌ନେ ପବିତ୍ର କଣ୍ଡା ନ୍‌ସାଃ ମାପ୍‌ରୁ ନିଂନେ ପର୍‌ମେସର୍‌ନେ ଡାଗ୍ରା ନେଙ୍ଗ୍‌ନେ ଗୁଆରି ନାଅରିଆ ବାସଙ୍ଗ୍‌ଣ୍ଡିଂକେ । 21 ଦେକ୍‌ରକମ୍‌ ନିଂ ପାର୍‌ତନା ଡିଂଚେ ସାମୁଆଁ ତେଃବାସଙ୍ଗ୍‌ନେ ସିସେ ଦର୍ସନ୍‌ ରକମ୍‌ ନିଂ ଆଜାକେ କେନ୍ଲେଃଗେ, ଆତେନ୍‌ ଙ୍ଗିର୍‌ବୁଏଃ ଗାବ୍ରିଏଲ୍‌ ଦାପ୍ରେ ୱାଲେଃନ୍‌ସାଃ ତିଆର୍‌ ଡିଂଚେ ଲମ୍‌ଡିଗ୍‌ ବେଲା ବଲି ବିନେ ବେଲା ପାଙ୍ଗ୍‌ଚେ ଆନେଙ୍ଗ୍‌କେ ଲିଗ୍‌କେ । 22 ବାରି, ମେଁ ଆନିଂକେ ସିକ୍ୟା ବିଃକେ ଆରି ନିଂ ଏଃତେ ବାଲିର୍‌ବାତାଚେ ବାସଙ୍ଗ୍‌କେ, ଅ ଦାନିଏଲ୍‌, ନିଂ ଏଃକେ ଆନାକେ ବୁଦିରେ ବାଲିର୍‌ନେ ବୁଦି ବିବିଃନ୍‌ସାଃ ମ୍ପାଙ୍ଗ୍‌କେ । 23 ନାଁନେ ଗୁଆରି ଡିଂକେଲା ଆଦେସ୍‌ ତାର୍‌କେ, ଆରି ଆନାକେ ଆଃମ୍ୟା ନ୍‌ସାଃ ନିଂ ପାଙ୍ଗ୍‌ନ୍ଲେଃକେ, ମେଃଡାଗ୍‌ଲା ନାଁ ନେଙ୍ଗ୍‌ନେ ନିଜର୍‌ ଉଂ । ଆକେନ୍‌ସାଃ ଏନ୍‌ ସାମୁଆଁ ଚିନ୍ତା ଡିଂ ଆରି ଦର୍ସନ୍‌ ବୁଜେ ।

24 ଆତେନ୍‌ ଆଦେସ୍‌ ମାନେନେ ଆଃଡାନ୍‌ସା ଆରି ପାପ୍‌ନେ ସାରାସାରି ଆଃଡିଂନ୍‌ସାଃ ଆରି ଅଦରମ୍‌ନେ ଅନୁତାପ୍‌ ଡିଂନ୍‌ସାଃ, ଆରି ମାଡାନେ କାଲ୍‌ ଜାକ ଲେଃକ୍ନେ ଦର୍ମ ଡୁଙ୍ଗ୍‌ପାଙ୍ଗ୍‌ ନ୍‌ସାଃ, ବାରି ଦର୍ସନ୍‌ ଆରି ବବିସତ୍‌ ସାମୁଆଁ ସିଲ୍‌ ଆଃଡିଂନ୍‌ସାଃ ଆରି ପବିତ୍ର ରେମୁଆଁଇଂକେ ଅଭିଷିକ୍ତ ଆଃଡିଂନ୍‌ସାଃ ନାଁନେ ରେମୁଆଁଇଂନେ ଆରି ନାଁନେ ପବିତ୍ର ଇନି ନ୍‌ସାଃ ସତୁରି ସାନ୍ତା ତିଆର୍‌ ଆଡିଂବକେ । 25 ଆକେନ୍‌ସାଃ ନାଁ ମ୍ୟାଃ ଆରି ବୁଜେ ଜେ, ଯିରୂଶାଲମ୍‌କେ ବାର୍‌ମୁଇଂ ଆରେନେ ଆରି ଆଃରେନେ ଆଦେସ୍‌ ତାର୍‌ନେ ବେଲାବାନ୍‌ ନେତା, ଅଭିଷିକ୍ତ ରେମୁଆଁନେ ଜାକ ଗୁ ସାନ୍ତା ଡିଂଏ; ବାରି, ବିପଦ୍‌ ବେଲା ଆଃ ଆତେନ୍‌ ଚକ୍‌ ଆରି କୁରୁ ଏଃତେ ଞ୍ଜି କୁଡ଼ି ମ୍ବାର୍‌ ସାନ୍ତା ବାର୍‌ମୁଇଂତର୍‌ ତିଆର୍‌ ଡିଂଏ । 26 ବାରି, ଞ୍ଜି କୁଡ଼ି ମ୍ବାର୍‌ ସାନ୍ତା ଇଡ଼ିଂ ଅଭିଷେକ୍‌ ଡିଂଲାଏକ୍ନେ ରେମୁଆଁ ଗୁଏୱେଗେ ଆରି ମେଁ ମନେ ତ୍ଲାଗ୍‌ଏ; ଆରି, ପାଙ୍ଗ୍‌ଡିଂକ୍ନେ ସାସନ୍‌ ଡିଂଡିଂକ୍ନେ ନେତାନେ ରେମୁଆଁଇଂ ଇନି ଆରି ପବିତ୍ର ଜାଗା ନସ୍‌ଟ ଆଃଡିଂଆର୍‌ଏ ଆରି ବୁରାଣ୍ଡିଆଃ ବାନ୍‌ ମେଁନେ ସାସନ୍‌ ଡାଏ, ବାରି ସାରାସାରି ଜାକ ଜୁଜ୍‌ ଡିଂଏ; ମେଃ ମେଇଙ୍ଗ୍‌ନେ ବିନାସ୍‌ ଡିଂନେ ବେଲା ତିଆର୍‌ ଆଡିଂବକେ । 27 ବାରି, ମେଁ ମୁଇଂ ସାନ୍ତା ଜାକ ଗୁଲୁଏରେ ଏତେ ଡାଟ୍‌ ନିଅମ୍‌ ଆଡିଂଏ ଆରି ସାନ୍ତାନେ ମେତାଃ କାଲ୍‌ ଯଜ୍ଞ ଆରି ବଲି ବନ୍ଦ୍‌ ଆଃଡିଂଏ; ଆରି, ଗିନ୍‌ ରକମ୍‌ ଜିନିସ୍‌ ସାପାନେ ଡେନା ଆଡ଼ାତ୍ରା ବିନାସ୍‌ ଆଃଡିଂଣ୍ଡ୍ରେ ମୁଇଂଡା ପାଙ୍ଗ୍‌ଏ; ବାରି, ଆଃରେକ୍ନେ ସିଦ୍ଧି ଜାକ ବିନାସ୍‌ ଆଃଡିଂଣ୍ଡ୍ରେନେ ଆଡ଼ାତ୍ରା ରିସା ଆଃକିଗ୍‌ଏ ।