1 ବାବିଲ୍‌ନେ ଇଃସାଙ୍ଗ୍‌ ବେଲ୍‌ଶତ୍ସର୍‌ ସାସନ୍‌ ବେଲା ପର୍‌ତୁମ୍‌ ମୁଆଁ ବେଲା ଦାନିଏଲ୍‌ ମେଁ ଡୁଲେଗ୍‌ ବେଲା ମୁସୁଡ଼ିଙ୍ଗ୍‌ ଆରି ମାନସିକ ଦର୍ସନ୍‌ ବାକେ; ତେସାଃ ମେଁ ଆତେନ୍‌ ମୁସୁଡ଼ିଙ୍ଗ୍‌ ଗୁଆର୍‌ଚେ ସାମୁଆଁନେ ଅର୍‌ତ ବାସଙ୍ଗ୍‌କେ । 2 ଦାନିଏଲ୍‌ ବାସଙ୍ଗ୍‌କେ, ନିଂ ମିଡିଗ୍‌ ବେଲା ଦର୍ସନ୍‌ଅରିଆ ଙ୍କେକେ ଜେ, କେଲାପା, ମ୍ନା କେଣ୍ଡିଆଃ ଆଡ଼ାତ୍ରା କିତଂନେ ସାପା ଦିଗ୍‌ବାନ୍‌ ୱେଡ଼ିଆଃ ଜାବର୍‌ ବାବ୍‌ରେ ପାଙ୍ଗ୍‌କେ । 3 ବାରି, ମୁଇଂଡା ମୁଇଂଡାବାନ୍‌ ବିନ୍‌ ଅଁକ୍ଲିଗ୍‌ ମ୍ନା ପସୁ କେଣ୍ଡିଆଃବାନ୍‌ ତାର୍‌ଚେ ପାଙ୍ଗ୍‌ଆର୍‌କେ । 4 ପର୍‌ତୁମ୍‌ ପସୁ ସିଂହ ରକମ୍‌ ଆରି ଚାଃଟିଆଁ ପ୍ଲିଗ୍‌ ରକମ୍‌ ମେଁନେ ଡେନା ଲେଃଗେ; ନିଂ କିକେନେ ବେଲା ମେଁନେ ଆତେନ୍‌ ଡେନା ଜଡ଼େୱେଗେ, ଆରି ମେଁ ଦର୍‌ତନିବାନ୍‌ ଆଃତଡ଼ିଆଃକେ ଆରି ରେମୁଆଁ ରକମ୍‌ ମ୍ବାର୍‌ ଞ୍ଚ‍ଅରିଆ ଆମେକେ ତାଃୱାଁକେ, ବାରି ଆମେକେ ରେମୁଆଁନେ ମନ୍‌ ବିଃକେ ।

5 ବାରି କେଲା, ଆରି ମୁଇଂ, ଡାଗ୍‌ଲା, ଦୁତିୟ ପସୁ ଗିବେନେ ରକମ୍‌ ଲେଃଗେ, ମେଁ ମୁଇଂ ପାକା ତଡ଼ିଆଃକେ ଆରି ମେଁନେ ତୁମୁଁଆଃଅରିଆ ଗ୍ନି ବିତ୍ରେ ଞ୍ଜି କ୍ଲିଗ୍‌ ପାଞ୍ଜ୍‌ରା ଲେଃଗେ; ଆରି, ଆମେକେ ଆକେନ୍‌ ସାମୁଆଁ ବାସଙ୍ଗ୍‌କେ, ତଃଡ଼ିଆ, ବାରି ଗୁଲେ ରେମୁଆଁନେ ଚିଲି ଚଙ୍ଗ୍‌ବି ।

6 ଏନ୍‌ଇଡ଼ିଂ ନିଂ ଙ୍କେକେ, କେଲା, ଚିତାବାଗ୍‌ ରକମ୍‌ ଆରି ମୁଇଂ ପସୁ, ମେଁନେ ଗୁଗ୍‌ଡ୍ୟା‍ଅରିଆ ପ୍ଲିଗ୍‌ନେ ଅଁକ୍ଲିଗ୍‌ ଡେନା ଲେଃଗେ; ଏଲେଡିଗ୍‌ ମେଁ ପସୁନେ ଅଁକ୍ଲିଗ୍‌ ବାଆଃ ଲେଃଗେ; ଆରି, ଆମେକେ ଅଦିକାର୍‌ ବିଃକେ ।

7 ଏନ୍‌ଇଡ଼ିଂ ନିଂ ମିଡିଗ୍‌ କେଲାନେ ଦର୍ସନ୍‌ଅରିଆ ଙ୍କେକେ, କେଲା, ଚତୁର୍ତ ପସୁ, ମେଁ ବୟାଙ୍କାର୍‌, ଅଦିକାର୍‌ ବାକ୍ନେ ସକ୍ତିସାଲି ଆରି ଜାବର୍‌ ବପୁ ଆରି ମେଁନେ ମ୍ନା ମ୍ନା ଲୁଆନେ ଗ୍ନି ଲେଃଗେ । ମେଁ ସାପା ଚଙ୍ଗ୍‌କେ ଆରି ପାକ୍‌ଚିଚେ ଗୁଣ୍ଡ୍‌ଗୁଣ୍ଡା ଆଃଡିଙ୍ଗ୍‌କେ ଆରି ବାକି ମେଃନେ ଲେଃଗେ, ଆତେନ୍‌ ଞ୍ଚ ଆଲ ଟେଚାଃକେ । ଆରି, ମେଁ ମେଁନେ ସିସେନେ ସାପା ପସୁଇଂନେବାନ୍‌ ବିନ୍‌ । ବାରି ମେଁନେ ଗୁଆ ଡିରଙ୍ଗ୍‌ ଲେଃଗେ । 8 ନିଂ ଆତେନ୍‌ ଡିରଙ୍ଗ୍‌ଇଂନେ ସାମୁଆଁ ଏତେ କେଲା, ଆତେନ୍‌ ସାପାନେ ବିତ୍ରେ ଆରି ମୁଇଂ ଡିରଙ୍ଗ୍‌ ତାର୍‌କେ, ଆତେନ୍‌ ଡାଆଁ, ଆତେନ୍‌ ସେଃମଁ ପର୍‌ତୁମ୍‌ ଡିରଙ୍ଗ୍‌ଇଂନେ ବିତ୍ରେବାନ୍‌ ଞ୍ଜିକ୍ଲିଗ୍‌ ଡିରଙ୍ଗ୍‌ ବୁନ୍ଦେବାନ୍‌ ତାର୍‌କେ; ବାରି କେଲା, ଆକେନ୍‌ ଡିରଙ୍ଗ୍‌ଅରିଆ ରେମୁଆଁନେ ମ୍‌ମୁଁଆଃ ରକମ୍‌ ମ୍‌ମୁଁଆଃ ଆରି ଆକାର୍‌ ଡିଂନେ ବ୍ନାଲିର୍‌ ସାର୍ମୁଆଃ ନିଆ ଲେଃଗେ ।

9 ନିଂ କିକେନେ ବେଲା ଉଃଡ଼ିକ୍ଲିଗ୍‌ ସିଂହାସନ ତିଆର୍‌ ଡିଂକେ, ବାରି ଗୁଲୁଏ ମୁଆଁନେ ଡକ୍ରା ପାଙ୍ଗ୍‌ଚେ ତୁଆଁକେ, ମେଁନେ ସକା ଆରେଣ୍ଡ୍ୟାଃ ରକମ୍‌ ତୁଲୁଏ ବାନା ଆରି ମେଁନେ ବାଆଃନେ ଉଗ୍‌ବଃ ନିମାଣ୍ଡା ମେଣ୍ଡା ଉଗ୍‌ବଃ ରକମ୍‌ ଲେଃଗେ; ମେଁନେ ସିଂହାସନ ସୁଆନେ ସିକା ରକମ୍‌ ଆରି ଆତ୍‌ନେ ଚକ୍ର ସାପା ଡୁଆକ୍ନେ ସୁଆ ରକମ୍‌ ଲେଃଗେ । 10 ମେଁନେ ସେଃମଁବାନ୍‌ ସୁଆନେ ଲଣ୍ଡିଆ ତାର୍‌ଚେ ଜାର୍‌କେ; ଅଜାର୍‌ ଅଜାର୍‌ ମେଁନେ ଜତନ୍‌ ଡିଂଆର୍‌କେ ଆରି ଲକ୍ଷ ଲକ୍ଷ ମେଁନେ ସେଃମଁଅରିଆ ତୁଆଁଆର୍‌କେ । ବିଚାର୍‌ ଡିଂନେ କୁକପାର୍‌ କକେ ଆରି ବ‍ଇ‍ଇଂ ତଃଡ଼ାକେ ।

11 ଆତେନ୍‌ ଡିରଙ୍ଗ୍‌ନ୍ନିଆ ଗୁଆର୍‌ବକ୍ନେ ଗରବ୍‌ ସାମୁଆଁ ବାସଙ୍ଗ୍‌ନେ ଅଁଚେ ଆତେନ୍‌ ବେଲା ନିଂ ଙ୍କେକେ; ନିଂ ଙ୍କେକେ ଜେ, ସାରାସାରି ତେନ୍‌ ପସୁ ଗୁଏଃକେ ଆରି ମେଁନେ ଗାଗ୍‌ଡ଼େ ବିନାସ୍‌ ଡିଂକେ ଆରି, ମେଁ ସୁଆ‍ଅରିଆ ଗିଃନେ ନ୍‌ସାଃ ଅପେଃକେ । 12 ବାରି, ବିନ୍‌ ପସୁଇଂନେବାନ୍‌ ମେଇଂନେ ଅଦିକାର୍‌ ଡୁଙ୍ଗ୍‌ଡକେ । ଏଲେଡିଗ୍‌ ଆମେକେ ଉଡ଼ି ଦିନା ନ୍‌ସା ଜାକ ମେଇଂନେ ମ୍ୱ୍ରନେ ଆୟୁସ୍‌ ଆମ୍ନାକେ ।

13 ନିଂ ମିଡିଗ୍‌ ବେଲା ଦର୍ସନ୍‌ଅରିଆ ଙ୍କେକେ, ଆରି କେଲା, ରେମୁଆଁ ଉଙ୍ଗ୍‌ଡେ ନ୍ୟାୟ୍‌ ମୁଇଂ ଙ୍ଗିର୍‌ବୁଏଃ କିତଂନେ ତ୍ରିଗ୍‌ଡିଆଃଅରିଆ ପାଙ୍ଗ୍‌କେ ଆରି ମେଁ ଗୁଲୁଏ ଜୁଗ୍‌ନେ ଆତେନ୍‌ ଡକ୍ରାନେ ଡାଗ୍ରା ପିଙ୍ଗ୍‌ଚାଲା, ମେଇଂ ମେଁନେ ଡାଗ୍ରା ଆମେକେ ଡୁଙ୍ଗ୍‌ପାଙ୍ଗ୍‌ଆର୍‌କେ । 14 ବାରି, କ୍ଲିଗ୍‌ ଜାତି, ଦେସ୍‌ବାସି ଆରି ବାସାବାଦିଣ୍ଡ୍ରେ ଡିରକମ୍‌ ମେଁନେ ସେବା ଡିଂଆର୍‌ଏ, ଆକେନ୍‌ସାଃ ଆମେକେ ଅଦିକାର୍‌, ମ‍ଇମା ଆରି ରାଜି ବିଃକେ; ମେଁନେ ଅଦିକାର୍‌ ମାଡାନେ କାଲ୍‌ନେ ଅଦିକାର୍‌, ଆତେନ୍‌ ଆବୁଡ଼େ ଣ୍ଡୁ, ଆରି ମେଁନେ ରାଜି ବିନାସ୍‌ ଆଡିଂ ଣ୍ଡୁ ।

15 ନିଂ ଦାନିଏଲ୍‌, ନିଂନେ ଆତ୍ମା ନିଂନେ ଗାଗ୍‌ଡ଼େ ବିତ୍ରେ ବିକଲ୍‌ ଡିଂୱେକେ ଆରି ନିଂନେ ମନ୍‌ନେ ଦର୍ସନ୍‌ ଆନିଂକେ ଗାବ୍‌ରା ଆଃଡିଂକେ ।

16 ନିଂନେ ଡାଗ୍ରା ଜାଣ୍ଡେଇଂ ତୁଆଁ ଲେଃଆର୍‌ଗେ, ମେଇଂନେ ବିତ୍ରେବାନ୍‌ ମୁଇଂଡାନେ ଡାଗ୍ରା ନିଂ ୱେଚେ ଏନ୍‌ ସାପାନେ ସାମୁଆଁ ନ୍‌ସାଲ୍ୟାକୁକେ । ତେଲା ମେଁ ଆନିଂକେ ଆତେନ୍‌ ସାପାନେ ଅର୍‌ତ ଆଃମ୍ୟାଚେ ବାସଙ୍ଗ୍‌କେ । 17 ଆତେନ୍‌ ଅଁକ୍ଲିଗ୍‌ ମ୍ନା ପସୁ ଅଁକ୍ଲିଗ୍‌ ଇଃସାଙ୍ଗ୍‌ ଲେଃଆର୍‌କେ, ମେଇଂ ଦର୍‌ତନିବାନ୍‌ ତାର୍‌ଆର୍‌ଏ । 18 ଆରି ସାପାବାନ୍‌ ମ୍ନା ପରମେସର୍‌ନେ ପବିତ୍ର ରେମୁଆଁଇଂନେ ରାଜ୍ୟ ବାଆର୍‌ଏ ଆରି ଆକ୍ମେକେ କାଲାଆଃ ନ୍‌ସା ବାରି ଜୁଗ୍‌ ଜୁଗ୍‌ କାଲ୍‌ ଜାକ ସାସନ୍‌ ଡିଂଆର୍‌ଏ ।

19 ଅଃତେନ୍‌ବେଲା ଆଣ୍ଡିନେ ଚତୁର୍ତ ପସୁ, ଜା କି ସାପାରେବାନ୍‌ ବିନ୍‌, ବଡ଼େ ବୟାଙ୍କାର୍‌, ଜାନେ ଗ୍ନି ଲୁଆନେ ଆରି ଆର୍‌ୱେଃ ସାପା ପିତଲ୍‌ନେ ଲେଃଗେ, ଜା ସାପା ଚଙ୍ଗ୍‌କେ, ପାକ୍‌ଚିଚେ ଗୁଣ୍ଡ୍‌ଗୁଣ୍ଡା ଆଡିଂକେ ଆରି ବାକି ସାପାକେ ଞ୍ଚ ଆଲ ଟେଚାଃକେ, ମେଁନେ ବିସ‍ଏରେ ମ୍ୟାଃନ୍‌ସାଃ ନିଂ ଇକ୍‌ଚା ଣ୍ଡିଂକେ; 20 ବାରି, ମେଁନେ ବାଆଃଅରିଆ ମୁଃଡ଼ି ଗୁଆ ଡିରଙ୍ଗ୍‌ ଲେଃଗେ ଆରି ବିନ୍‌ ମୁଃଡ଼ି ଡିରଙ୍ଗ୍‌ ତାର୍‌କେ ଆରି ଜାନେ ଡାଗ୍ରା ଞ୍ଜିକ୍ଲିଗ୍‌ ଡିରଙ୍ଗ୍‌ ଲଃୱେଗେ; ଡାଗ୍‌ଲା, ମେଁ ମୁଃଡ଼ି ଡିରଙ୍ଗ୍‌ନେ ମ୍‌ମୁଁଆଃ ଆରି ଆକାର୍‌ ସାମୁଆଁ ବାସଙ୍ଗ୍‌ନେ ତୁମୁଁଆଃ ଲେଃଗେ, ଜାନେ ଆକାର୍‌ ମେଁ ସାଙ୍ଗ‍ଡ଼େଇଂନେ ବାନ୍‌ ବୟଙ୍କାର୍‌ ଲେଃଗେ, ମେଁନେ ବିସ‍ଏରେ ମ୍ୟାଃନ୍‌ସାଃ ନିଂ ଇକ୍‌ଚା ଣ୍ଡିଂକେ ।

21 ନିଂ ଙ୍କେକେ, ଆରି ଆତେନ୍‌ ଡିରଙ୍ଗ୍‌ ପବିତ୍ର‍ଇଂନେ ଏଃତେ ଜୁଜ୍‌ ଡିଂକେ ଆରି ଆମେଇଂକେ ଜୟ୍‌ ଡିଂକେ; 22 ସାରାସାରି ଆତେନ୍‌ ଗୁଲୁଏ କାଲ୍‌ନେ ଡକ୍ରା ପାଙ୍ଗ୍‌କେ ଆରି ସାପାବାନ୍‌ ବପୁ ଲେକ୍ନେ ପବିତ୍ର ରେମୁଆଁଇଂକେ ବିଚାର୍‌ ଡିଂନେ ଅଜନ୍‌ ବିଃକେ ଆରି ପବିତ୍ର‍ ରେମୁଆଁଇଂନେ ରାଜ୍ୟ ଅଦିକାର୍‌ ଡିଂନେ ବେଲା ପିଙ୍ଗ୍‌ଚାଃକେ ।

23 ମେଁ ଦେକ୍‌ରକମ୍‌ ବାସଙ୍ଗ୍‌କେ, ଚତୁର୍ତ ପସୁ ଦର୍‌ତନିନେ ଚତୁର୍ତ ରାଜି ଡିଂଏ, ଆତେନ୍‌ ବିନ୍‌ ସାପା ରାଜିବାନ୍‌ ବିନ୍‌ ଡିଂଏ ଆରି କ୍ଲିଗ୍‌ ଦର୍‌ତନିକେ ନାସ୍‌ ଆଃଡିଂବିଏ, ଆରି ଟେଚାଃଚେ ବାଗ୍‌ ବାଗ୍‌ ଆଡିଂଚେ ବାରି ଆତେନ୍‌ ପାକ୍‌ଚି ବିଃଏ । 24 ବାରି, ଆତେନ୍‌ ଗୁଆ ଡିରଙ୍ଗ୍‌ନେ ଅର୍‌ତ ଦେକ୍‌ରକମ୍‌ ଜେ, ଆତେନ୍‌ ରାଜିବାନ୍‌ ଗୁଆ ଇଃସାଙ୍ଗ୍‌ ତାର୍‌ଆର୍‌ଏ; ମେଇଂନେ ଇଡ଼ିଂ ଆରି ମୁଇଂଡା ତାର୍‌ଏ ଆରି ମେଁ ସିସେଣ୍ଡ୍ରେଇଂବାନ୍‌ ବିନ୍‌ ଡିଂଏ ଆରି ମେଁ ଞ୍ଜିକ୍ଲିଗ୍‌ ଇଃସାଙ୍ଗ୍‌ଇଂକେ ଆରେଚେ ନୁଆଁବିଏ । 25 ବାରି, ମେଁ ସାପାବାନ୍‌ ବପୁ ଲାଏକ୍ନେ ରେମୁଆଁ ବିରୁଦ୍‌ରେ ସାମୁଆଁ ବାସଙ୍ଗ୍‌ଏ ଆରି ସାପାବାନ୍‌ ବପୁ ଲାଏକ୍ନେ ରେମୁଆଁନେ ପବିତ୍ରରେକେ ନୁଆଁଏ । ଆରି, ମେଁ ଜୁଗ୍‌ ଆରି ନିଅମ୍‌ ଆଃବଦ୍‌ଲେ ନ୍‌ସାଃ ବିଚାର୍‌ ଡିଂଏ; ବାରି, ମୁଇଂ ଜୁଗ୍‌, ମ୍ବାର୍‌ ଜୁଗ୍‌ ଆରି ମେତାଃ ଜୁଗ୍‌ ଜାକ ମେଇଂ ଆତେନ୍‌ ନ୍ତିଅରିଆ ଅପେଃଆର୍‌ଏ । 26 ମାତର୍‌ ବିଚାର୍‌ ଡିଂନେ କୁକପାର୍‌ କ‍ଏ ଆରି ମେଇଂ ସାରାସାରି ଜାକ ମେଁନେ ଅଦିକାର୍‌ନେ ଡାନେ ଆରି ବିନାସ୍‌ ଆଃଡିଂ ନ୍‌ସାଃ ମେଁବାନ୍‌ ଆତେନ୍‌ ଡୁଙ୍ଗ୍‌ଡ‍ଆର୍‌ଏ । 27 ଆରି ସାସନ୍‌ କାଲ୍‌ ଆରି ସାସନ୍‌ ଡିଙ୍ଗ୍‌ନେ ବାରି କିତଂଇନିନେ ମଜେ ଲେଃକ୍ନେ ରାଜି ସାପାନେ ମ‍ଇମା, ସାପା‍ବାନ୍‌ ସକ୍ତିସାଲି ନିଆ ଲେକ୍ନେ ପବିତ୍ର ରେମୁଆଁଇଂକେ ବିଃଏ; ମେଁନେ ରାଜି ମାଡାନେ କାଲ୍‌ନେ ରାଜି ଆରି ଯାବତୀୟ ସାସନ୍‌ ଡିଂଣ୍ଡ୍ରେ ମେଁନେ ସେବା ଡିଂଆର୍‌ଏ ଆରି ମେଁନେ ଆଦେସ୍‌ ମାନେଃଆର୍‌ଏ ।

28 ଆକେନ୍‌ ଡିଂଡିଂକେ ସାମୁଆନେ ସାରାସାରି ନିଂ ଦାନିଏଲ୍‌, ନିଂନେ ଚିନ୍ତା ଆନିଂକେ ଗାବ୍‌ରା ଆଃଡିଂକେ ନିଂନେ ସାର୍ମୁଆଃ ଡାଆଁ ଡିଂୱେକେ, ମାତର୍‌ ନିଂ ଆତେନ୍‌ ସାମୁଆଁ ନେଙ୍ଗ୍‌ନେ ମନ୍‌ଅରିଆ ମ୍ବଗେ ।