ଦାନିଏଲ୍‌ 2

ନବୂଖଦ୍‌ନିତ୍ସର୍‌ନେ ମୁସୁଡ଼ିଙ୍ଗ୍‌

1 ଇଡ଼ିଂ ନବୂଖଦ୍‌ନିତ୍ସର୍‌ନେ ସାସନ୍‌ନେ ବାର୍‌ ମୁଆଁ ବେଲା ନବୂଖଦ୍‌ନିତ୍ସର୍‌ ମୁସୁଡ଼ିଙ୍ଗ୍‌ କେକେ; ତେଲା ମେଁନେ ଆତ୍ମା ଇରିୟାତୁଗ୍‌ ୱେକେ ଆରି ମେଁନେ ଲିଲେମୁଆଁ ଲାଗ୍‌ଡକେ । 2 ତେସାଃ ଇଃସାଙ୍ଗ୍‌କେ ମେଁନେ ମୁସୁଡ଼ିଙ୍ଗ୍‌ ଆମ୍ୟାନ୍‌ସାଃ ଇଃସାଙ୍ଗ୍‌ ଡିସାରି, ପାଞ୍ଜି କିକେଣ୍ଡ୍ରେ, ଜାଦୁ ଡିଂଣ୍ଡ୍ରେ ଆରି କଲ୍‌ଦୀୟ‍ଇଂକେ ୱାନ୍‌ସାଃ ଆଦେସ୍‌ ବିକେ । ଅକେନ୍‌ରେ ମେଇଂ ପାଙ୍ଗ୍‌ଚେ ଇଃସାଙ୍ଗ୍‌ନେ ସେଃମଁ ତୁଆଁ ଆର୍‌କେ । 3 ବାରି, ଇଃସାଙ୍ଗ୍‌ ଆମେଇଂକେ ବାସଙ୍ଗ୍‌କେ, ନିଂ ମୁଇଂ ମୁସୁଡ଼ିଙ୍ଗ୍‌ କେମ୍ବକେ, ଆରି ଆତେନ୍‌ ମୁସୁଡ଼ିଙ୍ଗ୍‌ ବୁଜେ ନ୍‌ସାଃ ନିଂନେ ଆତ୍ମା ଇକ୍‌ଚା ଡିଂଡିଂକେ ।

4 ତେଲା କଲ୍‌ଦୀୟ‍ଇଂ ଅରାମୀୟ ବ୍ନାସାରେ ଇଃସାଙ୍ଗ୍‌କେ ବାସଙ୍ଗ୍‌ଆର୍‌କେ, ଅ ମ୍ନାଇଃସାଙ୍ଗ୍‌, କାଲାଆଃ ମ୍ବ୍ର ଲେଃଲେ; ନାନେ ଦାସ୍‌ଇଂକେ ମୁସୁଡ଼ିଙ୍ଗ୍‌ ବାସଙ୍ଗ୍‌, ନେ ଆତ୍‌ନେ ଅର୍‌ତ ନେବାସଙ୍ଗ୍‌ଏ ।

5 ଇଃସାଙ୍ଗ୍‌ କଲଦୀୟଇଂକେ ଉତର୍‌ ବିଚେ ବାସଙ୍ଗ୍‌କେ, ନିଂବାନ୍‌ ସାମୁଆଁ ତାର୍‌ୱେଲେଃକେ; ପେଇଂ ଅଃନା ଆତେନ୍‌ ମୁସୁଡ଼ିଙ୍ଗ୍‌ ଆରି ଆତ୍‌ନେ ଅର୍‌ତ ଆନିଂ ପେବାସଙ୍ଗ୍‌, ତେଲା ପେଇଂ ବାଗ୍‌ ବାଗ୍‌ ଆଡିଂଚେ ଙ୍ଗୁଆତଗ୍‌ଏ ଆରି ପେଇଂନେ ଡୁଆ କତ୍‌ଗାଦି ଣ୍ଡ୍ରାଃଡିଂଏ । 6 ମାତର୍‌ ଅଃନା ପେଇଂ ମୁସୁଡ଼ିଙ୍ଗ୍‌ ଆରି ଆତ୍‌ନେ ଅର୍‌ତ ପେବାସଙ୍ଗ୍‌ଏ, ତେଲା ପେଇଂ ନିଂବାନ୍‌ ଦାନ୍‌, ପୁରୁସ୍‌କାର୍‌ ଆରି ମ୍ନା ସନ୍‌ମାନ୍‌ ପେବାଏ; ଆକେନ୍‌ସାଃ ଆତେନ୍‌ ମୁସୁଡ଼ିଙ୍ଗ୍‌ ଆରି ଆତ୍‌ନେ ଅର୍‌ତ ନିଂ ଡାଗ୍ରା ବାସଙ୍ଗ୍‌ପା ।

7 ମେଇଂ ଦୁତିୟ ତର୍‌ ଉତର୍‌ ବିଚେ ବାସଙ୍ଗ୍‌ଆର୍‌କେ, ମ୍ନାଃ ଇଃସାଙ୍ଗ୍‌, ନା ଦାସ୍‌ଇଂକେ ମୁସୁଡ଼ିଙ୍ଗ୍‌ ବାସଙ୍ଗ୍‌, ତେଲା ନେ ଅର୍‌ତ ନେବାସଙ୍ଗ୍‌ଏ ।

8 ଇଃସାଙ୍ଗ୍‌ ଉତର୍‌ ବିଚେ ବାସଙ୍ଗ୍‌କେ, ନିଂବାନ୍‌ ସାମୁଆଁ ତାର୍‌ୱେଲେଃକେ, ଆକେନ୍‌ କେଚେ ପେଇଂ ବେଲା ଆଃତଙ୍ଗାର୍‌ନେ ଇକ୍‌ଚା ଡିଂନାଡିଂକେ, ଆକେନ୍‌ ନିଂ ଡିଲାଡିଗ୍‌ ମ୍ୟାନ୍ଲେକେ । 9 ମାତର୍‌ ପେଇଂ ଅଃନା ଆତେନ୍‌ ମୁସୁଡ଼ିଙ୍ଗ୍‌ ଆନିଂ ପେରାଃମ୍ୟା; ତେଲା ପେଇଂନେ ନ୍‌ସାଃ ମୁଇଂ ମାତର୍‌ ନିଅମ୍‌ ଲେଃକେ; ମେଃଡାଗ୍‌ଲା ବେଲା ବଦ୍‌ଲେନେ ଜାକ ପେଇଂ ନିଂ ଡାଗ୍ରା ମିଚ୍‌ ଆରି ନାଲେନେ ସାମୁଆଁ ବାସଙ୍ଗ୍‌ ନ୍‌ସାଃ ଆର୍ମେ ପେବକେ; ଆକେନ୍‌ସା ପେଇଂ ମୁସୁଡ଼ିଙ୍ଗ୍‌ ଆନିଂ ବାସଙ୍ଗ୍‌ପା, ତେଲା ପେଇଂ ଜେ ଆତ୍‌ନେ ଅର୍‌ତ ନିଂ ଡାଗ୍ରା ବାସଙ୍ଗ୍‌ ପେୟାଏ, ଆକେନ୍‌ ନିଂ ମ୍‌ମ୍ୟାଃଏ ।

10 କଲଦୀୟଇଂ ଇଃସାଙ୍ଗ୍‌ନେ ଡାଗ୍ରା ଉତର୍‌ ବିଚେ ବାସଙ୍ଗ୍‌ଆର୍‌କେ, ମ୍ନାଃ ଇଃସାଙ୍ଗ୍‌ନେ ସାମୁଆଁ ଜେ ବାସଙ୍ଗ୍‌ ୟାଏ, ଦର୍‌ତନିଅରିଆ ଦେକ୍‌ରକମ୍‌ ମେଃଡିଗ୍‌ ରେମୁଆଁ ଣ୍ଡୁ; ମେଃଡାଗ୍‌ଲା ମେଃଡିଗ୍‌ ଇଃସାଙ୍ଗ୍‌, ମାପ୍‌ରୁ ଣ୍ଡୁଲା ସାସନ୍‌ କର୍ତା ମେଃଡିଗ୍‌ ତନ୍ତ୍ରମନ୍ତ୍ର ଡିଂଣ୍ଡ୍ରେକେ ଣ୍ଡୁଲା ପାଞ୍ଜି କିକେଣ୍ଡ୍ରେ ଣ୍ଡୁଲା କଲଦୀୟକେ ଦେକ୍‌ରକମ୍‌ ସାମୁଆଁ ଆସାଲ୍ୟାକୁଆର୍‌କେ । 11 ବାରି, ମ୍ନା ଇଃସାଙ୍ଗ୍‌ ମେଃନି ଇକ୍‌ଚା ଡିଂଏ, ଆତେନ୍‌ ଅସାଧାରଣ ସାମୁଆଁ ଣ୍ଡୁ ଆରି ଜାଣ୍ଡେ କି ତୁବଃ ଚଂନେ ଚିଲି ଲେକ୍ନେ ଗାଗ୍‌ଡ଼େ ଏତେ ଣ୍ଡୁ । ଆତେନ୍‌ ଦେବ୍‌ତାଇଂ ଆନ୍ତାର୍‌ଚେ ଆରି ଜାଡିଗ୍‌ ମ୍ନାଃ ଇଃସାଙ୍ଗ୍‌ନେ ଡାଗ୍ରା ଆତେନ୍‌ ବାସଙ୍ଗ୍‌ ଆୟା ଣ୍ଡୁ ।

12 ଆକେନ୍‌ ନ୍‌ସା ଇଃସାଙ୍ଗ୍‌ ରିସା ଆରି ଜାବର୍‌ ଗିସେଚେ ବାବିଲ୍‌ନେ ସାପା ଜ୍ଞାନି ରେମୁଆଁଇଂକେ ବାଗୁଏ ନ୍‌ସାଃ ଆଦେସ୍‌ ବିକେ । 13 ତେଲା ଆତେନ୍‌ ଆଦେସ୍‌ ବାସଙ୍ଗ୍‌ଆର୍‌କେ ଜେ, ଜ୍ଞାନି ରେମୁଆଁଇଂ ଗୁଏଃଆର୍‌ଏ; ଆରି, ରେମୁଆଁଇଂ ଦାନିଏଲ୍‌ ଆରି ମେଁନେ ସାଙ୍ଗାଡ଼ି‍ଇଂକେ ବାଗୁଏନେ ନ୍‌ସା ତୁର୍‌ଆର୍‌କେ ।

ଦାନିଏଲ୍‌ନେ ମୁସୁଡ଼ିଙ୍ଗ୍‌ନେ ଅର୍ତ ବାସଙ୍ଗ୍‌ନେ

14 ଅରୀୟୋକ ମ୍ନିକ୍ନେ ମୁଃଡ଼ି ଇଃସାଙ୍ଗ୍‌ନେ ସେନାପତି ବାବିଲ୍‌ନେ ଜ୍ଞାନିଇଂକେ ବାଗୁଏନ୍‌ସାଃ ତାର୍‌ଲେଃଗେ, ଆମେକେ ଦାନିଏଲ୍‌ ଚିନ୍ତା‍ରେ ଆରି ବୁଦିରେ ଉତର୍‌ ବିଃକେ । 15 ମେଁ ଇଃସାଙ୍ଗ୍‌ନେ ସେନାପତି ଅରୀୟୋକକେ ଉତର୍‌ ବିଚେ ବାସଙ୍ଗ୍‌କେ, ଇଃସାଙ୍ଗ୍‌ନେ ଆଦେସ୍‌ ଅଃକେନ୍‌ ତାନ୍ଦ୍ରା ମେଃନ୍‌ସାଃ ? ତେଲା ଅରୀୟୋକ ଦାନିଏଲ୍‌କେ କବର୍‌ ବାସଙ୍ଗ୍‌କେ ।

16 ତେଲା ଦାନିଏଲ୍‌ ଇଃସାଙ୍ଗ୍‌ନେ ଡାଗ୍ରା ୱେଚେ ନିଜର୍‌ ଆତ୍‌ଲା ମୁଇଂ ବେଲା ଆଃତାର୍‌ନ୍‌ସାଃ ପାର୍‌ତନା ଡିଂକେ, ଆତେନ୍‌ ଡିଂଲା ମ୍ନାଃ ଇଃସାଙ୍ଗ୍‌ନେ ଡାଗ୍ରା ମୁସୁଡ଼ିଙ୍ଗ୍‌ନେ ଅର୍‌ତ ମ୍ବାସଙ୍ଗ୍‌ଏ ଡାଗ୍‌ଚେ ବାସଙ୍ଗ୍‌କେ । 17 ତେନ୍‌ଇଡ଼ିଂ ଦାନିଏଲ୍‌ ନିଜର୍‌ନେ ଡୁଆ ୱିଗ୍‌କେ, ଆରି ମେଁ ମେଁନେ ସାଙ୍ଗାଡ଼ି‍ଇଂ ଡିରକମ୍‌ ବାବିଲ୍‌ନେ ବିନ୍‌ବିନ୍‌ ଜ୍ଞାନିଇଂନେ ଏତେ ବିନାସ୍‌ ଆଡିଂଆର୍‌ ଣ୍ଡୁ, 18 ଏନ୍‌ସା ଆକେନ୍‌ ବୁଡ଼ିଲେକ୍ନେ ସତ୍‌ ସାମୁଆଁ ବିସ‍ଏରେ କିତଂଇନି ଲେଃକ୍ନେ ପର୍‌ମେସର୍‌ନେ ଅନୁଗ୍ରହ ପାର୍‌ତନା ଡିଂନେ ନ୍‌ସାଃ ନିଜେନେ ସାଙ୍ଗ ହନାନିୟ, ମୀଶାୟେଲ୍‌ ଆରି ଅସରୀୟକେ ଆତେନ୍‌ ଗଟ୍‌ନା ବାସଙ୍ଗ୍‌କେ । 19 ଇଡ଼ିଂ ମିଡିଗ୍‌ ବେଲା ଦର୍ସନ୍‌ଅରିଆ ଆତେନ୍‌ ବୁଡ଼ିଲେକ୍ନେ ସତ୍‌ ସାମୁଆଁକେ ଦାନିଏଲ୍‌ନେ ଆଡ଼ାତ୍ରା ଆଃସୁଏକେ । ତେଲା ଦାନିଏଲ୍‌ କିତଂଇନି ଲେଃକ୍ନେ ପର୍‌ମେସର୍‌ନେ ଦନ୍ୟବାଦ୍‌ ଡିଂକେ ।

20 ଦାନିଏଲ୍‌ ଉତର୍‌ ବିଚେ ବାସଙ୍ଗ୍‌କେ, ପର୍‌ମେସର୍‌ନେ ମ୍ନି କାଲାଆଃ ଦନ୍ୟ ଡିଂଲେ;

ମେଃଡାଗ୍‌ଲା ବୁଦି ଆରି ବପୁ ମେଁନେ;

21 ଆରି ମେଁ ଜୁଗ୍‌ ଆରି କିଗ୍‌ ଆଃବଦ୍‌ଲେ ମ୍ୟାଃ;

ମେଁ ଇଃସାଙ୍ଗ୍‌ଇଂକେ ପଦ୍‌ବାନ୍‌ ଆଃଜାର୍‌ଏ ଆରି ଇଃସାଙ୍ଗ୍‌ଇଂକେ ପଦ୍‌ଅରିଆ ଆଃକ‍ଏ;

ମେଁ ଜ୍ଞାନି‍ଇଂକେ ଜ୍ଞାନ୍‌ ବିଃମ୍ୟାଃକେ ଆରି ବୁଦି ଲେଣ୍ଡ୍ରେଇଂ ବାବେନେ ବୁଦି ବିମ୍ୟାଃକେ;

22 ମେଁ ବିତ୍ରେନେ ଆରି ବୁଃଡ଼ିକ୍ନେ ସାମୁଆଁ ସାପା ବାସଙ୍ଗ୍‌ମ୍ୟାଃକେ;

ତାଙ୍ଗ୍‌କିଗ୍‌ଅରିଆ ମେଃନେ ଲେଃକେ,

ଆତେନ୍‌ ମେଁ ମ୍ୟାଃଲେଃକେ ଆରି ମେଁନେ ଡାଗ୍ରା ତାର୍କିଗ୍‌ ବାସା ଲେଃକେ ।

23 ଅ ନିଂନେ ନ୍ତାଇଂନେ ପର୍‌ମେସର୍‌,

ନିଂ ନାନେ ଦନ୍ୟବାଦ୍‌ ଆରି ପ୍ରଶଂସା ଡିଂଣ୍ଡିଂକେ,

ନାଁ ଆନିଂକେ ବୁଦି ଆରି ବପୁ ବିଃନାବକେ ଆରି ନା ଡାଗ୍ରା ନେଇଂନେ ଦର୍‌ତନି ସାମୁଆଁ ଏବେ ଆନିଂ ଆଃମ୍ୟାଃନାବକେ;

ମେଃଡାଗ୍‌ଲା ନାଁ ଇଃସାଙ୍ଗ୍‌ନେ ସାମୁଆଁ ଆନେକେ ଆଃମ୍ୟାଃନାବକେ ।

ମୁସୁଡ଼ିଙ୍ଗ୍‌ ଆରି ଅର୍‌ତ ଆମ୍ୟାଃକେ

24 ଏନ୍‌ସାଃ ବାବିଲ୍‌ନେ ଜ୍ଞାନିଇଂକେ ବିନାସ୍‌ ଆଃଡିଂ ନ୍‌ସାଃ ଇଃସାଙ୍ଗ୍‌ ସ୍ରିକ୍ନେ ଅରୀୟୋକ ଡାଗ୍ରା ଦାନିଏଲ୍‌ ୱେକେ; ମେଁ ୱେଚେ ଆମେକେ ଦେକ୍‌ରକମ୍‌ ବାସଙ୍ଗ୍‌କେ, "ବାବିଲ୍‌ନେ ଜ୍ଞାନିଇଂକେ ଆବାଗୁଏଃଲେ ।" ଇଃସାଙ୍ଗ୍‌ନେ ଡାଗ୍ରା ଆନିଂ ଡୁଙ୍ଗ୍‌ୱେଲା, ନିଂ ଇଃସାଙ୍ଗ୍‌ନେ ଡାଗ୍ରା ଅର୍‌ତ ମ୍ବାସଙ୍ଗ୍‌ଏ ।

25 ତେଲା ଅରୀୟୋକ ଦାନିଏଲ୍‌କେ ଦାପ୍ରେ ଇଃସାଙ୍ଗ୍‌ ଡାଗ୍ରା ଡୁଙ୍ଗ୍‌ୱେଚେ ଇଃସାଙ୍ଗ୍‌କେ ଦେକ୍‌ରକମ୍‌ ବାସଙ୍ଗ୍‌କେ, ସ୍ରିବକ୍ନେ ଯିହୁଦାନେ ରେମୁଆଁଇଂ ବିତ୍ରେ ନିଂ ମୁଇଂ ରେମୁଆଁ ବାନ୍ଲେଃକେ, ମେଁ ମ୍ନାଃ ଇଃସାଙ୍ଗ୍‌କେ ଅର୍‌ତ ଆଃମ୍ୟାଏ ।

26 ଇଃସାଙ୍ଗ୍‌ ଆତେନ୍‌ ଦାନିଏଲ୍‌, ଜାନେ ମ୍ନି ବେଲ୍‌ଟଶତ୍ସର୍‌ ଲେଃଗେ, ଆମେକେ ଉତର୍‌ ବିଃଚେ ବାସଙ୍ଗ୍‌କେ, ନିଂ ଆଣ୍ଡିନେ ମୁସୁଡ଼ିଙ୍ଗ୍‌ କେମ୍ବକେ, ନାଁ କି ଆତେନ୍‌ ଆରି ଆତ୍‌ନେ ଅର୍‌ତ ଆନିଂ ଆଃମ୍ୟା ନାୟାଏ ?

27 ଦାନିଏଲ୍‌ ଇଃସାଙ୍ଗ୍‌ ଡାଗ୍ରା ଉତର୍‌ ବିଚେ ବାସଙ୍ଗ୍‌କେ, "ମ୍ନାଇଃସାଙ୍ଗ୍‌ ଆଣ୍ଡିନେ ବୁଃଡ଼ି ଲେଃକ୍ନେ ସତ୍‌ ସାମୁଆଁ ସାଲ୍ୟାକୁ ନାବକେ, ଆତେନ୍‌ ଜ୍ଞାନି ରେମୁଆଁ ଣ୍ଡୁଲା ପାଞ୍ଜିବାଲା ଣ୍ଡୁଲା ତନ୍ତ୍ର ମନ୍ତର୍‌ଡିଂଣ୍ଡ୍ରେ ଣ୍ଡୁଲା ପଣ୍ଡିତ୍‌ଇଂ ମ୍ନାଃ ଇଃସାଙ୍ଗ୍‌ନେ ଡାଗ୍ରା ବାସଙ୍ଗ୍‌ ଆୟାଆର୍‌କେ ଣ୍ଡୁ; 28 ମାତର୍‌ ଜା ବୁଡ଼ିଲେକ୍ନେ ସତ୍‌ ସାମୁଆଁକେ ବାସଙ୍ଗ୍‌ମ୍ୟାଃକେ, ଦେକ୍‌ରକମ୍‌ ମୁଇଂ ପର୍‌ମେସର୍‌ କିତଙ୍ଗ୍‌ନ୍ନିଆ ଲେଃକେ, ଆରି ସାରାସାରି ବେଲା ମେଃ ମେଃନେ ଗଟେଏ, ଆତେନ୍‌ ମେଁ ମ୍ନାଃ ଇଃସାଙ୍ଗ୍‌ ନବୂଖଦ୍‌ନିତ୍ସର୍‌କେ ଆମିଆବକେ । ନାଁନେ ମୁସୁଡ଼ିଙ୍ଗ୍‌ ଆରି ଡୁଲେଗ୍‌ ଲେଃବେଲା ନାନେ ମନ୍‌ନେ ଦର୍ସନ୍‌ ଦେକ୍‌ରକମ୍‌ ।"

29 ଅ ମ୍ନାଃ ଇଃସାଙ୍ଗ୍‌, ଡୁଲେଗ୍‌ ଲେଃବେଲା ନାଁନେ ମନ୍‌ଅରିଆ ଇଡ଼ିଂଡେ ଗଟେନେ ବିସ‍ଏଇଂ ଚିନ୍ତା ଡିଂନେ ପିଙ୍ଗ୍‌ଚାକେ; ଆରି ଜା ବୁଡ଼ିଲେକ୍ନେ ସତ୍‌ ସାମୁଆଁଇଂ ଆଃମ୍ୟାଃଏ ମିଆଁ, ମେଁ ମେଃନେ ଗଟେଏ, ଆତେନ୍‌ ନାଁ ଡାଗ୍ରା ବାସଙ୍ଗ୍‌ ବ‍କେ । 30 ମାତର୍‌ ମେଃଡିଗ୍‌ ମ୍ବ୍ରଲେକ୍ନେ ରେମୁଆଁନେ ଜ୍ଞାନ୍‌ ବାନ୍‌ ନିଂନେ ବୁଦି ଜବର୍‌ ଲେଃକେ ଡାଗ୍‌ଚେ ଜା ଆକେନ୍‌ ବୁଡ଼ିଲେକ୍ନେ ସାମୁଆଁ ବାସଙ୍ଗ୍‌ବକେ, ଆତେନ୍‌ ଣ୍ଡୁ, ମାତର୍‌ ମ୍ନାଃ ଇଃସାଙ୍ଗ୍‌କେ ଡିରକମ୍‌ ଅର୍‌ତ ଆଃମ୍ୟାଃଏ ଆରି ନାଁ ଡିରକମ୍‌ ନିଜର୍‌ ମନ୍‌ନେ ଚିନ୍ତା ନାମ୍ୟାଏ, ଆତେନ୍‌ସା ଆତାନ୍‌ ନେଙ୍ଗ୍‌ ଆଡ଼ାତ୍ରା ବାସଙ୍ଗ୍‌ବକେ ।

ମୁସୁଡ଼ିଙ୍ଗ୍‌ନେ ଅର୍‌ତ

31 ଅ ମ୍ନାଃ ଇଃସାଙ୍ଗ୍‌, ନାଁ କେ କେଲା ମୁଇଂ ମ୍ନା ମୁର୍ତି ନାକେକେ, ଜାବର୍‌ ମ୍ନା ଆରି ଜାବର୍‌ ତାର୍କିଗ୍‌କ୍ନେ ଆତେନ୍‌ ମୁର୍ତି ନାଁନେ ସାମ୍‌ନା ତୁଆଁକେ ଆରି ଆତ୍‌ନେ କିକେନେ ବୟଙ୍କାର୍‌ ଲେଃଗେ । 32 ଆତେନ୍‌ ମୁର୍ତିନେ ବାଆଃ ସୁନାନେ, ମେଁନେ ଗ୍ରି ଆରି ନ୍ତି ରୁପାନେ, ମେଁନେ ସୁଲୁଏଃ ଆରି ବୁଲୁ ପିତଲ୍‌ନେ ଲେଃଗେ, 33 ମେଁନେ ଞ୍ଚ ଲୁଆନେ ଆରି ମେଁନେ ଞ୍ଚନେ ଇଃତୁଡ଼ା ବାଗ୍‌ ଲୁଆନେ, ଇଃତୁଡ଼ା ତୁବଃ ଏତେ ଆରେବକ୍ନେ ଲେଃଗେ । 34 ନାଁ ମାଣ୍ଡା କେ କେଲା ସାରାସାରି ବେଲା ବିନା ନ୍ତିରେ ପାକ୍‌ଚିକ୍ନେ ମୁଇଂ ବ୍ରି ଆତେନ୍‌ ମୁର୍ତିନେ ଲୁଆ ଆରି ତୁବଃ ଏତେ ଆରେବକ୍ନେ ଞ୍ଚକେ ବଗ୍‌ଚେ ଗନ୍ଦା ଗନ୍ଦା ଆଡିଂଚେ ପାକ୍‌ଚି ବିଃକେ । 35 ଆକ୍‌ଅରିଆ ଲୁଆ, ତୁବଃ, ପିତଲ୍‌, ରୁପା ଆରି ସୁନା ମୁଇଂ ତର୍‌କେ ଗନ୍ଦା ଗନ୍ଦା ଡିଂଚେ ପାକ୍‌ଚି ୱେକେ, ଆରି ନ୍ନାସେଙ୍ଗ୍‌କିଗ୍‌ ବେଲାନେ ଗାବୁଜା ରକମ୍‌ ଡିଂକେ । ଆରି ୱେଡ଼ିଆଃ ଆତେନ୍‌ ସାପାକେ ଆୱାଲେ ରାଙ୍ଗ୍‌ଡକେ ଆରି ଆତେନ୍‌ ସାପା ଆତ୍‌ଲା ଆରି ଜାଗା ଆମିଲେକେ ଣ୍ଡୁ । ବାରି ଆତେନ୍‌ ମୁର୍ତିକେ ବଗ୍‌କେ ଆଣ୍ଡିନେ ବ୍ରି, ଆତେନ୍‌ ମ୍ନାଚେ ମୁଇଂ ମ୍ନା କଣ୍ଡା ଡିଂକେ, ଆରି ସାପା ଦର୍‌ତନିକେ ଆତ୍‌ଅରିଆ ବର୍ତି ଆଃଡିଂକେ ।

36 ମୁସୁଡ଼ିଙ୍ଗ୍‌ ଆକେନ୍‌; ଏବେ ନେ ମ୍ନାଃ ଇଃସାଙ୍ଗ୍‌ ଡାଗ୍ରା ଆତେନ୍‌ ଅର୍‌ତ ନେବାସଙ୍ଗ୍‌ଏ । 37 ଅ ମ୍ନାଇଃସାଙ୍ଗ୍‌, ନାଁ ଇଃସାଙ୍ଗ୍‌ଇଂନେ ଇଃସାଙ୍ଗ୍‌; କିତଂଇନି ଲେଃକ୍ନେ ପର୍‌ମେସର୍‌ ଆନାକେ ରାଜ୍ୟ, ବପୁ, ଅଦିକାର୍‌ ଆରି ମ‍ଇମା ବିବକେ । 38 ଆରି, ମେଃଡିଗ୍‌ ଜାଗା‍ଅରିଆ ରେମୁଆଁନେ ଉଂଡେଇଂ ବାସା ଆର୍‌ଏ, ଆତେନ୍‌ ଜାଗା‍ଅରିଆ ଲେଃକ୍ନେ ତୁବଃ ଅଲେଙ୍ଗ୍‌କ୍ନେ ପସୁଇଂ ଆରି କିତଂନେ ପ୍ଲିଗ୍‌ଇଂକେ ମେଁ ନାଁନେ ନ୍ତିଅରିଆ ଅପେଃ ବିଃବକେ ଆରି ଆତେନ୍‌ ସାପାନେ ଆଡ଼ାତ୍ରା ଆନାକେ ଅଦିକାର୍‌ ବିଃବକେ; ନାଁ ଆଃ ଆତେନ୍‌ ସୁନାନେ ବାଆଃ । 39 ବାରି, ନାଁନେ ଇଡ଼ିଂ ନାଁନେବାନ୍‌ ଡାଆଁ ଆରି ମୁଇଂ ରାଜ୍ୟ ତଃଡ଼ିଆଃଏ ଆରି ତେନ୍‌ ଇଡ଼ିଂ ପିତଲ୍‌ନେ ତୁର୍ତିୟ ମୁଇଂ ରାଜ୍ୟ ତଃଡ଼ିଆଃଏ, ଆତେନ୍‌ ସାପା ଦର୍‌ତନି ଆଡ଼ାତ୍ରା ସାସନ୍‌ ଡିଂଏ । 40 ବାରି, ଚତୁର୍ତ ରାଜ୍ୟ ଲୁଆ ରକମ୍‌ ଡାଟ୍‌ ଡିଂଏ; ମେଃଡାଗ୍‌ଲା ଲୁଆ ଡିରକମ୍‌ ସାପା ଜିନିସ୍‌ ଗନ୍ଦା ଗନ୍ଦା ଆଡିଂଚେ ଅଦିକାର୍‌ ଡିଂଏ ଆରି ଲୁଆ ଡିରକମ୍‌ ଆକେନ୍‌ ସାପାକେ ଗୁଣ୍ଡ୍‌ ଆଃଡିଂଏ, ଦେତ୍‌ରକମ୍‌ ଆତେନ୍‌ ରାଜ୍ୟ ଗନ୍ଦା ଗନ୍ଦାଆଡିଂଚେ ପାକ୍‌ଚିଚେ ସାପା ଗୁଣ୍ଡ୍‌ ଆଃଡିଂଏ । 41 ଆରି, ନାଁ ଡିରକମ୍‌ ନାକେକେ ଜେ, ଞ୍ଚ ଆରି ଞ୍ଚନେ ଆର୍‌ୱେଚ ଇଃତୁଡ଼ା କୁମ୍ବାର୍‌ନେ ତୁବଃ ରକମ୍‌ ଆରି ଇଃତୁଡ଼ା ଲୁଆନେ ଲେଃଗେ, ଦେତ୍‌ରକମ୍‌ ତେନ୍‌ ରାଜ୍ୟ ବାଗ୍‌ ବାଗ୍‌ ଡିଂକ୍ନେ ରାଜ୍ୟ ଡିଂଏ; ମାତର୍‌ ଆତ୍‌ନେ ଲୁଆ ଡାଟ୍‌ ଲେଃଏ, ମେଃଡାଗ୍‌ଲା ବୁର୍‌ଦାନ୍ନିଆ ଲୁଆ ମିସୁଃ ଲେଃକ୍ନେ ନାଁ ନାକେକେ । 42 ବାରି, ଞ୍ଚନେ ଆର୍‌ୱେଚ ସାପା ଡିରକମ୍‌ ଇଃତୁଡ଼ା ଲୁଆନେ ଲେଃଗେ ଆରି ଇଃତୁଡ଼ା ତୁବଃନେ ଲେଃଗେ, ଦେତ୍‌ରକମ୍‌ ରାଜ୍ୟନେ ମୁଇଂ ବାଗ୍‌ ଡାଟ୍‌ ଆରି ମୁଇଂ ବାଗ୍‌ ପାକ୍‌ଚି ୱେଏ । 43 ଆରି, ନାଁ ଡିରକମ୍‌ ବୁର୍‌ଦା ଏଃତେ ଲୁଆ ମିସୁଃକ୍ନେ ଲେଃନେ ନାକେକେ, ଦେତ୍‌ରକମ୍‌ ମେଇଂ ରେମୁଆଁଇଂନେ ବଂସ ଏଃତେ ଲେଃଗା ମିସୁଃ ୱେଆର୍‌ଏ; ମାତର୍‌ ଲୁଆ ଡିରକମ୍‌ ତୁବଃନ୍ନିଆ ଆମିସୁଃ ଣ୍ଡୁ, ଦେତ୍‌ରକମ୍‌ ମେଇଂ ନିଜେ ନିଜେ ବିତ୍ରେ ମିସୁଃଚେ ଆଲେଃଆର୍‌ ଣ୍ଡୁ । 44 ବାରି, ଆତେନ୍‌ ଇଃସାଙ୍ଗ୍‌ଇଂନେ ବେଲା କିତଂ ଲେଃକ୍ନେ ପର୍‌ମେସର୍‌ ମୁଇଂ ରାଜ୍ୟ ଆଃରେଏ, ଆତେନ୍‌ ଅଃନାଡିଗ୍‌ ବିନାସ୍‌ ଆଡିଂ ଣ୍ଡୁ, କି ଆତ୍‌ନେ ସାସନ୍‌ ଡିଂଣ୍ଡ୍ରେ ବିନ୍‌ ଜାତିନେ ନ୍ତିଅରିଆ ଆଆନ୍ତାର୍‌ଚେ ଆୱେ ଣ୍ଡୁ । ମାତର୍‌ ଆତେନ୍‌ ଆକେନ୍‌ ସାପା ରାଜ୍ୟକେ ବାଗ୍‌ ବାଗ୍‌ ଆରି ନସ୍‌ଟ ଆଡିଂଚେ ମେଁ ନିଜେ କାଲାଆଃ ନ୍‌ସା ଲେଃଏ । 45 ମେଃଡାଗ୍‌ଲା କଣ୍ଡାବାନ୍‌ ବିନା ନ୍ତିରେ ପାକ୍‌ଚିକ୍ନେ ମୁଇଂ ବ୍ରି ଜେ ଆତେନ୍‌ ଲୁଆ, ପିତଲ୍‌, ତୁବଃ, ରୁପା ଆରି ସୁନାକେ ଗୁଣ୍ଡ୍‌ ଆଃଡିଂବିକେ, ଆକେନ୍‌ ନାଁ ନାକେକେ; ଆଣ୍ଡିନେକି ଆକେନ୍‌ ପରେ ଗଟେଏ, ଆତେନ୍‌ ମ୍ନା ପର୍‌ମେସର୍‌ ମ୍ନାଃ ଇଃସାଙ୍ଗ୍‌କେ ଆଃମ୍ୟାବିମ୍ୱକେ । ବାରି, ଆକେନ୍‌ ମୁସୁଡ଼ିଙ୍ଗ୍‌ ଗଟେଏ ଆରି ଆତ୍‌ନେ ଅର୍‌ତ ସତ୍‌ ଡିଂଏ ।

ଦାନିଏଲ୍‌ ଇଃସାଙ୍ଗ୍‌ ପଦ୍‌ ବାକେ

46 ଅଃତେନ୍‌ବେଲା ଇଃସାଙ୍ଗ୍‌ ନବୂଖଦ୍‌ନିତ୍ସର୍‌ ମୁଣ୍ଡିଆ ବଗ୍‌ଚେଃ ଦାନିଏଲ୍‌କେ ସାର୍ଲକେ ଆରି ରେମୁଆଁଇଂ ଡିରକମ୍‌ ମେଁନେ ମ୍ନିରେ ନୈବେଦ୍ୟ ଆରି ବାସ୍‌ନାକ୍ନେ ଦୁପ୍‌ ଆଃମଃଆର୍‌ଏ, ଆକେନ୍‌ ଆଦେସ୍‌ ବିଃକେ । 47 ଇଃସାଙ୍ଗ୍‌ ଦାନିଏଲ୍‌କେ ଉତର୍‌ ବିଚେ ବାସଙ୍ଗ୍‌କେ, ନାଁ ଆକେନ୍‌ ବୁଡ଼ିଲେକ୍ନେ ସାମୁଆଁ ବାସଙ୍ଗ୍‌ ନ୍‌ସାଃ ରାଜି ଡିଂନାଲେଃକେ, ଆକେନ୍‌ସାଃ ଡିଲାଡିଗ୍‌ ନାଁନେ ପର୍‌ମେସର୍‌ ଇସ୍‌ପର୍‌ଇଂନେ ଇସ୍‌ପର୍‌ ଆରି ଇଃସାଙ୍ଗ୍‌ଇଂନେ ମାପ୍‌ରୁ ଆରି ବୁଡ଼ିଲେକ୍ନେ ସାମୁଆଁଇଂ ବାସଙ୍ଗ୍‌କେ । 48 ତେସାଃ ଇଃସାଙ୍ଗ୍‌ ଦାନିଏଲ୍‌କେ ମ୍ନା ଆଃଡିଂଚେ ଗୁଲୁଏ ଦାମ୍‌ନେ ଜିନିସ୍‌ ବିଃକେ, ଆରି ବାବିଲ୍‌ନେ କ୍ଲିଗ୍‌ ଦେସ୍‌ ଆଡ଼ାତ୍ରା ସାସନ୍‌ ପଦ୍‌ ବିଃଚେ ବାବିଲ୍‌ ଲେଃକ୍ନେ ସାପା ବୁଦି ଲେଃକ୍ନେ ରେମୁଆଁଇଂ ଆଡ଼ାତ୍ରା ଆମେକେ ମ୍ନା ନେତା ଆଃଡିଂକେ । 49 ବାରି, ଦାନିଏଲ୍‌ ଇଃସାଙ୍ଗ୍‌ ଡାଗ୍ରା ଗୁଆରେକେ, ଇଃସାଙ୍ଗ୍‌ ଶଦ୍ରକ୍‌, ମୈଶକ୍‌ ଆରି ଅବେଦ୍‌ନଗୋଇଂକେ ବାବିଲ୍‌ ଦେସ୍‌ନେ କାମ୍‌ଅରିଆ ପଦ୍‌ ବିଃକେ; ମାତର୍‌ ଦାନିଏଲ୍‌ ରାଜାଡୁଆ ଅରିଆ ଲେଃୱେକେ ।