1 ଆତେନ୍‌ ବେଲା ନାନେ ରେମୁଆଁନେ ଗଡ଼େଇଂ ସାଆଜ୍ୟ ଡିଂଣ୍ଡ୍ରେ ମୀଖାୟେଲ୍‌ ମ୍ନା ନେତା ତୁଆଁଏ ଆରି ରେମୁଆଁ ଜାତିନେ ଲେଃକ୍ନେ ଜୁଗ୍‌ବାନ୍‌ ଆତେନ୍‌ ବେଲା ଜାକ ଆଣ୍ଡିନେ ରକମ୍‌ କସ୍ଟନେ ଜୁଗ୍‌ ଅଃନା ଡିଂ ଆଲେଃକେ ଣ୍ଡୁ, ଦେକ୍‌ରକମ୍‌ କସ୍ଟନେ ଜୁଗ୍‌ ପିଙ୍ଗ୍‌ଚାଏ, ଆରି, ନାନେ ଜାତିନେ ଜେ ସାପାରେନେ ମ୍ନି ବ‍ଇଅରିଆ ଗ୍ନୁଆର୍‌ ବକେ, ମେଇଂ ସାପାରେ ଆତେନ୍‌ ବେଲା ରକ୍ୟା ବାଆର୍‌ଏ । 2 ବାରି, ଦର୍‌ତନିନେ ତୁବଃଅରିଆ ଜାଣ୍ଡେଇଂ ଡୁଲେଗ୍‌ ଲେଃଆର୍‌କେ, ମେଇଂନେ ବାନ୍‌ ଗୁଲୁଏ ରୁଆ ଜାଗ୍ରତ୍‌ ଡିଂଆର୍‌ଏ; ଉଃଡ଼ିରୁଆ ମାଡାନେ ଜିବନ୍‌ ଆରି ଉଃଡ଼ିରୁଆ ଗିଆସଃ ଆରି ମାଡାନେ; ଆଦେସ୍‌ ମାନେନ୍‌ସାଃ ତୁଆଁଆର୍‌ଏ । 3 ଆରି, ଜାଣ୍ଡେଇଂ ବୁଦିମାନ୍‌, ମେଇଂ କିତଂଇନିନେ ତାର୍କିଗ୍‌ନେ ରକମ୍‌ ଆରି ଜାଣ୍ଡେଇଂ ଗୁଲେ ରୁଆକେ ଦର୍ମନେ ପାକା ଆଃଆଣ୍ଡେ ଡୁଙ୍ଗ୍‌ପାଙ୍ଗ୍‌ଆର୍‌ଏ, ମେଇଂ ଚାଙ୍କୁଆଇଂନେ ରକମ୍‌ ମାଡାନେ; ଜୁଗ୍‌ ଜାକ ତାର୍କିଗ୍‌ ଡିଂଆର୍‌ଏ ।

4 ମାତର୍‌ ଅ ଦାନିଏଲ୍‌, ନାଁ ସାରାସାରି ଜୁଗ୍‌ ଜାକ ଆକେନ୍‌ ସାମୁଆଁଇଂ ବନ୍ଦ୍‌ ଆଡିଂଚେ ଆରି ଆକେନ୍‌ ବଇକେ ସିଲ୍‌ ବଗ୍‌ଚେ ବ । ଗୁଲୁଏ ରୁଆ ଆଙ୍କ୍‌ଆନ୍ତ୍‌ ୱିର୍‌ ଅଲେଙ୍ଗ୍‌ ଆର୍‌ଏ ଆରି ବୁଦି ବାନେ ମ୍ନାଃଏ ।

5 ଅଃତେନ୍‌ବେଲା ନିଂ ଦାନିଏଲ୍‌ ଙ୍କେକେ, ଆରି କେଲା, ବିନ୍‌ ମ୍ବାୟା ତୁଆଁଲେଃ ଆର୍‌କେ, ମୁଇଂଡା ଲଣ୍ଡିଆଃ ଆଃଡ଼ାନେ ଇଙ୍କ୍‌ପାକା ଆରି ବିନ୍‌ ମୁଇଂଡା ଲଣ୍ଡିଆଃ ଆଃଡ଼ାନେ ଇନ୍ତ୍‌ ପାକା । 6 ବାରି, ତୁଲୁଏ ସକା ସଃକ୍ନେ ଆରି ଲଣ୍ଡିଆଃନେ ଣ୍ଡିଆଃ ଆଡ଼ାତ୍ରା ଲେଃକ୍ନେ ଆଣ୍ଡିନେ ରେମୁଆଁ, ଆମେକେ ମୁଇଂଡା ବାସଙ୍ଗ୍‌କେ, ଆକେନ୍‌ ସାପା କାବା ସାମୁଆଁନେ ସାରାସାରି ଜାକ ଉଃଡ଼ି ମୁଆଁ ଲାଗେଏ ?

7 ତେଲା ନିଂ ନ୍ଦ୍ରିଗ୍‌କେ, ତୁଲୁଏ ସକା ସଃକ୍ନେ ଆରି ଲଣ୍ଡିଆଃ ଣ୍ଡିଆଃ ଆଡ଼ାତ୍ରା ଲେଃକ୍ନେ ରେମୁଆଁ ନିଜେନେ ଇଞ୍ଚଙ୍ଗ୍‌ତି ଆରି ବେଃସ୍ୟା ନ୍ତି କିତଙ୍ଗ୍‌ ପାକା ଟେକେଚେ କାଲାଆଃ ନ୍‌ସାଃ ମ୍ବ୍ର ଲେଃକ୍ନେ ମ୍ନିରେ ପାର୍‌ମାନ୍‌ ଡିଂଚେ ବାସଙ୍ଗ୍‌କେ, ଆକେନ୍‌ ମୁଇଂ ଜୁଗ୍‌, ମ୍ବାର୍‌ ଜୁଗ୍‌ ଆରି ମେତାଃ ଜୁଗ୍‌ ଜାକ ଡିଂଏ; ବାରି, ମେଇଂ ପବିତ୍ର ରେମୁଆଁଇଂନେ ବପୁ ପାକ୍‌ଚିନେ ଆଡାଲା, ଆକେନ୍‌ ସାପା ସାମୁଆଁ ଗଟେଏ ।

8 ବାରି, ନିଂ ନ୍ଦ୍ରିଗ୍‌କେ, ମାତର୍‌ ନ୍ନାବୁଜେକେ ଣ୍ଡୁ; ତେସାଃ ନିଂ ମ୍ବାସଙ୍ଗ୍‌କେ, ଅ ନିଂନେ ମାପ୍‌ରୁ, ଆକେନ୍‌ ସାପାନେ ଇସାବ୍‌ ମେଃନେ ଡିଂଏ ?

9 ତେଲା ମେଁ ବାସଙ୍ଗ୍‌କେ, ଅ ଦାନିଏଲ୍‌, ନାଁ ନାନେ ଗାଲିଅରିଆ ଅଲେଙ୍ଗ୍‌; ମେଃଡାଗ୍‌ଲା ସାରାସାରି ଜୁଗ୍‌ ଜାକ ଆକେନ୍‌ ସାମୁଆଁ ସାପା ବନ୍ଦ୍‌ ଡିଂଲାଏକେ ଆରି ସିଲ୍‌ ବଗ୍‌ବକେ । 10 ଗୁଲେରୁଆ ନିଜେ ନିଜେକେ ପରିସ୍‌କାର୍‌ ଆରି ତୁଲୁଏ ଆଃଡିଂଆର୍‌ଏ ଆରି ପବିତ୍ର ଡିଂଆର୍‌ଏ; ମାତର୍‌ ଦୁସ୍‌ଟ‍ଇଂ ଦୁସ୍‌ଟ କାମ୍‌ ଡିଂଆର୍‌ଏ ଆରି ଦୁସ୍‌ଟ‍ଇଂନେ ବିତ୍ରେବାନ୍‌ ଜାଡିଗ୍‌ ଆବୁଜେ ଆର୍‌; ମାତର୍‌ ଜ୍ଞାନି ରେମୁଆଁଇଂ ବୁଜେଆର୍‌ଏ ।

11 ବାରି, ଆଣ୍ଡିନେ ବେଲା କାଲାଆଃ ସୁଆ ବଲି ତିଆର୍‌ ଡିଂଏ ଆରି ବିନାସ୍‌ ଆଡିଂନେ ଗିନ୍‌ ରକମ୍‌ ଜିନିସ୍‌ ତିଆର୍‌ ଡିଂଏ, ଆତେନ୍‌ ବେଲାବାନ୍‌ ମୁଇଂ ଅଜାର୍‌ ମ୍ବାର୍‌ସ‍ଅ ନବେ ଦିନ୍‌ ଡିଂଏ । 12 ଆଣ୍ଡିନେ ରେମୁଆଁ ଉର୍‌ଚେ ଲେଃଏ ଆରି ମୁଇଂ ଅଜାର୍‌ ଞ୍ଜି ସ‍ଅ ପଇଁତିରିସ୍‌ ଦିନ୍‌ ଜାକ ଲେଃଏ, ମେଁ ନିମାଣ୍ଡା ।

13 ମାତର୍‌ ସାରାସାରି ଜୁଗ୍‌ ଜାକ ପେ ନିଜେନେ ଗାଲିଅରିଆ ଅଲେଙ୍ଗ୍‌ପା; ମେଃଡାଗ୍‌ଲା ପେ ବିସ୍‌ରାମ୍‌ ପେବାଏ ଆରି ଜୁଗ୍‌ନେ ସାରାସାରି ବେଲା ନିଜେନେ ଅଦିକାର୍‌ଅରିଆ ପେତୁଆଁଏ ।