1 ବାରି, ମାଦୀୟ ଦାରୀୟାବସ୍‌ନେ ଅଦିକାର୍‌ନେ ପର୍‌ତୁମ୍‌ ମୁଆଁ ବେଲା ନିଂ ଆମେକେ ସାନ୍ତି ଆରି ବପୁ ଆଃଡିଂନ୍‌ସାଃ ନ୍ତୁଆଁକେ ।

2 ଏବେ, ନିଂ ଆନାକେ ସତ୍‌ ସାମୁଆଁ ମ୍ବାସଙ୍ଗ୍‌ଏ । କେଲା, ପାରସ୍ୟ‍ଅରିଆ ଆରି ଞ୍ଜିକ୍ଲିଗ୍‌ ଇଃସାଙ୍ଗ୍‌ ତାର୍‌ଆର୍‌ଏ ଆରି ଚତୁର୍ତ ଇଃସାଙ୍ଗ୍‌ ମେଇଂ ସାପାନେ ବାନ୍‌ ଜାବର୍‌ ଦନି ଡିଂଏ; ଆରି, ମେଁ ନିଜେନେ ଦନ୍‌ଅରିଆ ବପୁ ଡିଂଲା ଗ୍ରୀସ୍‌ ରାଜି ବିରୁଦ୍‌ରେ ସାପାରେକେ ଜିତ୍‌ ଆଃଡିଂଏ ।

3 ତେସାଃ ମୁଇଂ ସକ୍ତିସାଲି ରାଜା ତାର୍‌ଏ, ମେଁ ମ୍ନା ଅଦିକାର୍‌ରେ ସାସନ୍‌ ଡିଂଏ ଆରି ନିଜର୍‌ ଇକ୍‌ଚାରେ କାମ୍‌ ଡିଂଏ । 4 ଆରି, ମେଁ ତାର୍‌ଲା ମେଁନେ ରାଜି ପାକ୍‌ଚିଃଏ ଆରି କିତଙ୍ଗ୍‌ନେ ଅଁ ଦିଗ୍‌ରେ ବାଗ୍‌ ଡିଂଏ; ମାତର୍‌ ମେଁନେ ବଂସ ନ୍‌ସାଃ କି ମେଁନେ କାମ୍‌ ଅନୁସାରେ ସାସନ୍‌ ନ୍‌ସାଃ ଆଡିଂ ଣ୍ଡୁ; ମେଃଡାଗ୍‌ଲା ମେଇଂନେ ନ୍‌ସାଃ ଣ୍ଡୁ, ମାତର୍‌ ବିନ୍‌ଣ୍ଡ୍ରେ ନ୍‌ସାଃ ମେଁନେ ରାଜି ଲପ୍‌ ଡିଂଏ ।

5 ବାରି, ଦକିନ୍‌ ଦେସ୍‌ନେ ଇଃସାଙ୍ଗ୍‌ ଆରି ମେଁନେ ନେତାଇଂନେ ବିତ୍ରେବାନ୍‌ ମୁଇଂଡା ବପୁ ଡିଂଏ; ଆରି, ଆକ୍‌ମେ ମେଁ ବାନ୍‌ ବପୁ ଡିଂଚେ ଅଦିକାର୍‌ ଡିଂଏ; ମେଁନେ ରାଜି ମୁଇଂ ମ୍ନା ରାଜି ଡିଂଏ । 6 ମାତର୍‌ ଉଃଡ଼ି ମୁଆଁନେ ଇଡ଼ିଂ ମେଇଂ ନିଜେ ନିଜେ ମିସୁଃଆର୍‌ଏ ଆରି ଦକିନ୍‌ ଦେସ୍‌ ଲେଃକ୍ନେ ଇଃସାଙ୍ଗ୍‌ନେ ସେଲାମ୍ବଃଅ ନିଅମ୍‌ ଆଃରେ ନ୍‌ସାଃ ଉତର୍‌ ଦେସ୍‌ ଲେଃକ୍ନେ ଇଃସାଙ୍ଗ୍‌ନେ ଡାଗ୍ରା ପାଙ୍ଗ୍‌ଏ; ମାତର୍‌ ସେଲାମ୍ବଃଅ ନିଜେନେ ନ୍ତିନେ ବପୁ ରକ୍ୟା ଆଃଡିଂ ଆୟା ଣ୍ଡୁ; କି ଇଃସାଙ୍ଗ୍‌ ଆରି ମେଁନେ ନ୍ତି ଆଲେଃ ଣ୍ଡୁ; ମାତର୍‌ ଆତେନ୍‌ ସେଲା ଆରି ଜାଣ୍ଡେଃଇଂ ଆମେକେ ଡୁଙ୍ଗ୍‌ପାଙ୍ଗ୍‌ଆର୍‌କେ ଆରି ଜା ଆମେକେ ଜନମ୍‌ ବିଃକେ, ଆରି ତେନ୍‌ ବେଲା ଜେ ଆମେକେ ବପୁ ବିଃକେ, ସାପାରେ ଅପେଃଆର୍‌ଏ । 7 ମାତର୍‌ ସେଲାନେ ମୁଲ୍‌ନେ ମୁଇଂ କେନ୍ଦାବାନ୍‌ ମୁଇଂଡା ନିଜେନେ ଜାଗା‍ଅରିଆ ତାର୍‌ଏ, ମେଁ ସନ୍ୟ‍ଇଂ ଡାଗ୍ରା ପାଙ୍ଗ୍‌ଚେ ଉତର୍‌ ଦେସ୍‌ନେ ଇଃସାଙ୍ଗ୍‌ନେ ତିଆର୍ ଡୁଆନ୍ନିଆ ଗାଏ ଆରି ମେଇଂନେ ବିରଦ୍‌ ଡିଂଚେ ଜିତେଏ । 8 ଆରି, ମେଁ ମେଇଂନେ ଆଃରେକ୍ନେ ମୁର୍ତି ଏଃତେ ମେଇଂନେ ଦେବ୍‌ତାଇଂକେ ବନ୍ଦି ଆଃଡିଂଚେ ରୁପା ଆରି ସୁନାନେ ସବାକ୍ନେ ମୁତା ଏଃତେ ମିସର୍‌ ପାକା ଡୁଙ୍ଗ୍‌ୱେଏ ଆରି ମେଁ ଉଃଡ଼ି ମୁଆଁ ଜାକ ଉତର୍‌ ଦେସ୍‌ନେ ଇଃସାଙ୍ଗ୍‌ନେ ବିରଦ୍‌ରେ ଆନ୍ତାର୍‌ ବିଏ । 9 ବାରି, ମେଁ ମିସର୍‌ ଦେସ୍‌ନେ ଇଃସାଙ୍ଗ୍‌ନେ ରାଜିଅରିଆ ପାଙ୍ଗ୍‌ଏ, ମାତର୍‌ ନିଜେନେ ଦେସ୍‌ଅରିଆ ମେଁ ଆଣ୍ଡେ ୱେଏ ।

10 ଆରି, ମେଁନେ ଉଙ୍ଗ୍‌ଡେଇଂ ଜୁଜ୍‌ ଡିଂଆର୍‌ଏ ଆରି ମ୍ନା ସନ୍ୟ‍ଇଂ ରାଃସିଙ୍ଗ୍‌ଏ, ମେଇଂ ପାଙ୍ଗ୍‌ଚେ ୱେଡ଼ିଆ ଗୁରିଆ ରକମ୍‌ ଡିଂଚେ ଲାଗ୍‌ଡ ଆର୍‌ଏ । ଆରି, ମେଇଂ ଆଣ୍ଡେଚେ ମେଁନେ ତିଆର୍ ଡୁଆ ଜାକ ଜୁଜ୍‌ ଡିଂଆର୍‌ଏ । 11 ଆତାନ୍‌ ବେଲା ମିସର୍‌ ଦେସ୍‌ନେ ଇଃସାଙ୍ଗ୍‌ ରିସା ଡିଙ୍ଗ୍‌ଚେ ସିରିୟା ଦେସ୍‌ନେ ଇଃସାଙ୍ଗ୍‌ ବିରଦ୍‌ରେ ଜୁଦ୍‌ ଡିଙ୍ଗ୍‌ଏ । ଆତ୍‌ବା ଉତର୍‌ ଦେସ୍‌ନେ ଇଃସାଙ୍ଗ୍‌ ଗୁଲୁଏ ସନ୍ୟବାଇନି ରାଃସିଙ୍ଗ୍‌ଏ, ଏଲେଡିଗ୍‌ ମେଁ ଜୁଦ୍‌ନ୍ୟା ଆରେଏ । 12 ସିରିୟାନେ ଇଃସାଙ୍ଗ୍‌ ଆଃରେକ୍ନେ ଇଡ଼ିଙ୍ଗ୍‌ ମେଁନେ ସନ୍ୟଇଂକେ ବନ୍ଦି ଆଡିଙ୍ଗ୍‌ଚେ ରାଙ୍ଗ୍‌ୱେ ଆର୍‌ଏ ବାରି ମିସର୍‌ ଦେସ୍‌ନେ ଇଃସାଙ୍ଗ୍‌ ଗରବ୍‌ ଡିଙ୍ଗ୍‌ଚେ ଅଜାର୍‌ ଅଜାର୍‌ ସନ୍ୟକେ ବାଗୁଏଃ ବିଏ । ଏଲେଡିଗ୍‌ ମେଁ ଆଜିତେ ଆର୍‌ ଣ୍ଡୁ ।

13 ବାରି ସିରିୟା ଦେସ୍‌ନେ ଇଃସାଙ୍ଗ୍‌ ଆଣ୍ଡେଚେ ମୁଇଂ ଗୁଲୁଏ ସନ୍ୟବାଇନି ରାସିଙ୍ଗ୍‌ଏ । ବାରି ଆତାନ୍‌ ମୁଆଁ ଇଡ଼ିଙ୍ଗ୍‌ ଅଃସେ ରକମ୍‌ ଗୁଲୁଏ ସନ୍ୟ ଆଣ୍ଡେଙ୍ଗ୍‌ ସାଚେ ମିସର୍‌ ଦେସ୍‌ନ୍ୟା ଜୁଦ୍‌ ଡିଙ୍ଗ୍‌ ନ୍‌ସା ୱେଏ । ଆତାନ୍‌ ସନ୍ୟଇଂନେ ନ୍ତିନ୍ୟା ଜାବର୍‌ ଅସ୍ତ୍ରସସ୍ତ୍ର ଲେଃଏ ବାରି ମେଇଂ ଜୁଦ୍‌ ନ୍‌ସା ତିଆର୍‌ ଡିଙ୍ଗ୍‌ଲେଃଏ । 14 ଆତାନ୍‌ ବେଲା ଗୁଲୁଏ ରେମୁଆଁ ମିସର୍‌ ଦେସ୍‌ ବିରଦ୍‌ରେ ତଡ଼୍ୟାଆର୍‌ଏ । ନାଁ ରେମୁଆଁଇଂନେ ବିତ୍ରେ ବିରଦ୍‌ଣ୍ଡ୍ରେଇଂ ସିରିୟା ଦେସ୍‌ ବିରଦ୍‌ରେ ଏନ୍‌ କେନ୍‌ସା ଜୁଦ୍‌ ଡିଙ୍ଗ୍‌ଆର୍‌ଏ । ମାତ୍ରମ୍‌ ମେଇଂ ଆଃସି ଆର୍‌ଏ । 15 ଦେକ୍‌ରକମ୍‌ ସିରିୟା ଦେସ୍‌ନେ ଇଃସାଙ୍ଗ୍‌ ପାଙ୍ଗ୍‌ଏ ବାରି ସାପାରେକେ ବନ୍ଦି ଆଡିଙ୍ଗ୍‌ଚେ ସାପା ସହର୍‌ନେ ନ୍ତି ମୁଟା ଆଡିଙ୍ଗ୍‌ଏ । ଆତାନ୍‌ ବେଲା ମିସର୍‌ ଦେସ୍‌ନେ ସନ୍ୟବାଇନି ବାରି ମନ୍‌ଡିଙ୍ଗ୍‌କ୍ନେ ରେମୁଆଁଇଂ ଆମେକେ ବିରଦ୍‌ ଡିଙ୍ଗ୍‌ଆୟାଆର୍‌ ଣ୍ଡୁ । ଦେକ୍‌ରକମ୍‌ କି ମ୍ନା ବପୁ ଲେଃକ୍ନେ ସନ୍ୟଇଂ ଡିଗ୍‌ ଆମେକେ ମେଃଡିଗ୍‌ ଡିଙ୍ଗ୍‌ ଆୟାଆର୍‌ ଣ୍ଡୁ । 16 ସୁନ୍ଦର୍‌ ଦେସ୍‌ନେ ଇଃସାଙ୍ଗ୍‌ ନିଜର୍‌ ଇକ୍‌ଚା ଅନୁସାରେ ମେଇଂନେ ବିରଦ୍‌ରେ କାମ୍‌ ଡିଙ୍ଗ୍‌ଏ । ମେଁନେ ବିରଦ୍‌ରେ ଜାଡିଗ୍‌ ଆତୁଆଁ ଆର୍‌ ଣ୍ଡୁ । ବାରି ମେଁ ଆତାନ୍‌ ପବିତ୍ର ଦେସ୍‌ନ୍ୟା ତୁଆଁଏ ବାରି ମେଁ ନ୍ତିନ୍ୟା ନସ୍ଟ ଆଡିଙ୍ଗ୍‌ନେ ବପୁ ଲେଃଏ ।

17 ସିରିୟା ଦେସ୍‌ନେ ଇଃସାଙ୍ଗ୍‌ ମେଁନେ ସାପା ବପୁ ମିସର୍‌ଦେସ୍‌ ବିରଦ୍‌ରେ ଲାଗେ ବିଏ । ମେଁ ମିସର୍‌ ଦେସ୍‌ନେ ଇଃସାଙ୍ଗ୍‌ ଏତେ ମୁଇଂ ସାନ୍ତି ନିଅମ୍‌ ଡିଙ୍ଗ୍‌ଏ ଏନ୍‌କେ ନସ୍ଟ ଆଡିଙ୍ଗ୍‌ ନ୍‌ସା, ନିଜର୍‌ ସେଲାଇଂନେ ବିତ୍ରେ ମୁଇଂଜାକେ ମିସର୍‌ନେ ଇଃସାଙ୍ଗ୍‌ ଏତେ ବିବା ଆଡିଙ୍ଗ୍‌ ବିଏ । ମେଁନେ ବିଚାର୍‌ ନିମାଣ୍ଡାଃ ଆଡିଙ୍ଗ୍‌ ଣ୍ଡୁ ବାରି ଆମେକେ ଜାଣ୍ଡେ ସାଇଜ ଆଡିଙ୍ଗ୍‌ ଆର୍‌ ଣ୍ଡୁ । 18 ଏନ୍‌ ଇଡ଼ିଙ୍ଗ୍‌ ମେଁ କେଣ୍ଡିଆ ଆଡ଼ାନେ ଏରିଆ ବିରଦ୍‌ରେ ୱେଚେ ଗୁଲୁଏ ରେମୁଆଁକେ ବକୁଆ ଆଡିଙ୍ଗ୍‌ଏ । ମାତ୍ରମ୍‌ ମୁଇଂଜା ଅଦିପତି ଆମେକେ ବାଗୁଏ ବିଏ । ମେଁ ମେଁନେ ବିରଦ୍‌ରେ ୱେଚେ ଆମେକେ ଅପମାନ୍‌ ଆଡିଙ୍ଗ୍ଏ । 19 ଏନ୍‌ ଇଡ଼ିଙ୍ଗ୍‌ ମେଁ ନିଜର୍‌ ଦେସ୍‌ନେ ତିଆର୍ ଡୁଆଇଂ ପାକା ୱେଏ ମାତ୍ରମ୍‌ ଆତ୍‌ଡାଗ୍ରା ମେଁ ଗୁଏଃ ୱେଏ ବାରି ମେଁନେ ସାସନ୍‌ ଡାୱେଏ ।

20 ମେଁ ଉତର୍‌ ଦେସ୍‌ନେ ଇଃସାଙ୍ଗ୍‌ ଡାଗ୍ରା ମୁଇଂଜା ତ୍ମି ଇଃସାଙ୍ଗ୍‌ ପାଙ୍ଗ୍‌ଏ । ମେଁ ଇଃସାଙ୍ଗ୍‌ ମୁଇଂଜା ଇଃସାଙ୍ଗ୍‌ନେ ପରିବାର୍‌ ବାନ୍‌ ଆପାଙ୍ଗ୍‌ ଣ୍ଡୁ । ନିଜର୍‌ ସୁକ୍‌ ଆମ୍ନା ନ୍‌ସା ଦନ୍‌ ଆର୍‌ଜେ ନ୍‌ସା ମୁଇଜା ସିସ୍ତୁ ସାଲ୍ୟାଃଣ୍ଡ୍ରେକେ ସ୍ରି ଆର୍‌ଏ । ମାତ୍ରମ୍‌ ଉଡ଼ି ଦିନ୍‌ ପରେ, ମେଁ ନସ୍ଟ ଡିଙ୍ଗ୍‌ଏ, ମାତ୍ରମ୍‌ ରିସାରେ ଣ୍ଡୁ କି ଜୁଦ୍‌ରେ ଣ୍ଡୁ ।

21 ବାରି, ଆଜାକେ ମେଇଂ ଇଃସାଙ୍ଗ୍‌ନେ ସନ୍‌ମାନ୍ ବିଃଆବଆର୍‌ଗେ, ଦେକ୍‌ରକମ୍ ମୁଇଂଡା ଗ୍ରୁନା ଡିଂନେ ରେମୁଆଁ ମେଁନେ ପଦ୍ ବାଏ; ମାତର୍ ମେଁ ଚିମିକ୍‌ଚିମ୍ରା ବେଲା ପାଙ୍ଗ୍‌ଏ ଆରି କୁଟ୍ ସାମୁଆଁ ବାସଙ୍ଗ୍‌ଚେଃ ଦେସ୍‌ ବାଏ । 22 ମେଁ ଜାବର୍‌ ବପୁଲେଃକ୍ନେ ସନ୍ୟଇଂକେ ପରାସ୍ତ ଆଡିଙ୍ଗ୍‌ଏ ବାରି ମେଁ ପର୍‌ମେସର୍‌ନେ ରେମୁଆଁଇଂନେବାନ୍‌ ମନ୍‌ଡିଙ୍ଗ୍‌କ୍ନେ ଅଦିପତିକେ ଦଂସ ଆଡିଙ୍ଗ୍‌ଏ । 23 ଗୁଲୁଏ ଦେସ୍‌ ମେଁ ଏତେ ରାଜିନାମା ଡିଂଆର୍‌ଏ, ମାତ୍ରମ୍‌ ଜାଣ୍ଡେ ନାଲେ ନାଲେଚେ କାମ୍‌ ଡିଙ୍ଗ୍‌ଏ । ଡାଗ୍ଲା ମେଁ ଗଣ୍ଡା ରେମୁଆଁ ଏତେ ଜିତେଏ । 24 ଉଡ଼ିବେଲା ଦନ୍‌ ଲେଃକ୍ନେ ଦେସ୍‌ ଆଣ୍ଡେଙ୍ଗ୍‌ ସୁନ୍‌ସାନ୍‌ ଡିଙ୍ଗ୍‌ୱେଏ, ମେଁ ଆମେଇଂକେ ଆକ୍ରମନ୍‌ ଡିଙ୍ଗ୍‌ଏ । ଆଡିନେ ନ୍ତା ଞ୍ଜାଇଂ ଆଡିନେ ଡିଙ୍ଗ୍‌ ଆବକେ ମେଁ ଆତାନ୍‌ ଡିଙ୍ଗ୍‌ଏ । ମେଁ ଆମେକେ ବନ୍ଦୁଇଂନେ ବିତ୍ରେ ଡଙ୍ଗାକ୍ନେ ଜିନିସ୍‌, ଡଙ୍ଗାକ୍ନେ ପାଟାଇ ବାରି ଦନ୍‌ସମ୍ପତି ବାଟା ବିଏ । ମେଁ ଉଡ଼ି ମୁଆଁ ଜାକ ଜିତେଏ ।

25 ବାରି ମେଁ ମ୍ନା ସନ୍ୟଦଲ୍‌ ଏତେ ୱେଚେ ଦକିନ୍‌ ଦେସ୍‌ ବିରଦ୍‌ରେ ନିଜର୍‌ ବପୁ ବାରି ସାଆସ୍‌ ଆଃକେଆର୍‌ଏ । ତେସା ଦକିନ୍‌ ଦେସ୍‌ନେ ଇଃସାଙ୍ଗ୍‌ ଜାବର୍‌ ମ୍ନାନେ ବାରି ବପୁଲେଃକ୍ନେ ସନ୍ୟଦଲ୍‌ ସାଚେ ମେଁ ଏତେ ଜୁଦ୍‌ ଡିଙ୍ଗ୍‌ଏ, ମାତ୍ରମ୍‌ ମେଁ ବୁଙ୍ଗ୍‌ ଆଲେଃ ଣ୍ଡୁ, ଡାଗ୍ଲା ମେଇଂ ମେଁ ବିରଦ୍‌ରେ ମେଁ ମେଁନେ ସଡ଼ଜନ୍ତ୍ର ଚିନ୍ତା ଡିଙ୍ଗ୍‌ ଆର୍‌ଏ । 26 ଜାଣ୍ଡେଇଂ ମେଁନେ ପାକା ଲେଃଏ ମେଇଂ ଆମେକେ ବିନାସ୍‌ ଆଡିଙ୍ଗ୍‌ଏ, ମେଁନେ ସନ୍ୟଦଲ୍‌ଇଂ ପରାସ୍ତ ଡିଙ୍ଗ୍‌କ୍ନେ ଇଡ଼ିଙ୍ଗ୍‌ ଜାବର୍‌ ସନ୍ୟଇଂ ଗୁଏଃ ଆର୍‌ଏ । 27 ବାରି ମ୍ୱାକ୍ଲିଗ୍‌ ଇଃସାଙ୍ଗ୍‌ ନିଜର୍‌ ନିଜର୍‌ନେ ଅନିସ୍ଟ ଆଡିଙ୍ଗ୍‌ନେ ଚେସ୍ଟା ଡିଙ୍ଗ୍‌ଆର୍‌ଏ । ମେଇଂ ମୁଇଂ ମେଜଅରିଆ କଚେ ନିଜେ ନିଜେ ମିଚ୍‌ ସାମୁଆଁ ବାଲିର୍‌ ଆର୍‌ଏ । ମାତ୍ରମ୍‌ ମେଇଂ ସମାନ୍‌ ଆଡିଙ୍ଗ୍‌ ଆର୍‌ ଣ୍ଡୁ । ଡାଗ୍ଲା ପର୍‌ମେସର୍‌ ଆମେଇଂକେ ଆଃଗୁଏଃଏ ନ୍‌ସା ମୁଇଂ ନିମାଣ୍ଡା ବେଲା ତିଆର୍‌ ଡିଙ୍ଗ୍‌ଏ । 28 ଏନ୍‌ଇଡ଼ିଙ୍ଗ୍‌ ଉତର୍‌ନେ ଇଃସାଙ୍ଗ୍‌ ଗୁଲୁଏ ଦନ୍‌ସମ୍ପତି ରାଙ୍ଗ୍‌ୱେଚେ ନିଜର୍‌ ଦେସ୍‌ପାକା ୱେଏ । ମେଁନେ ଚିତ୍ତ ପବିତ୍ର ନିଅମ୍‌ରେ ନିଜର୍‌ ବଂସକୁଲ୍‌ନ୍ୟା ୱେଏ । ମେଁ ପର୍‌ମେସର୍‌ନେ ରେମୁଆଁଇଂକେ ଆକ୍ରମନ୍‌ ଡିଙ୍ଗ୍‌ଏ ବାରି ନିଜର୍‌ ଇକ୍‌ଚାରେ କାମ୍‌ ଡିଙ୍ଗ୍‌ଏ ।

29 "ନିମାଣ୍ଡା ବେଲା ମେଁ ବାରି ଦକିନ୍‌ ଦେସ୍‌ ବିରଦ୍‌ରେ ୱେଏ । ମାତ୍ରମ୍‌ ସିସେ ରକମ୍‌ ମେଁ ସପଲ୍‌ ଆଡିଙ୍ଗ୍‌ ଣ୍ଡୁ । 30 ଡାଗ୍ଲା କିତ୍ତୀମନେ ଜାହାଜ୍‌ ସାପା ମେଁନେ ବିରଦ୍‌ରେ ପାଙ୍ଗ୍‌ଏ । ଏନ୍‌ସା ମେଁ ଦୁକ୍‌ ଡିଙ୍ଗ୍‌ଚେ ଆଣ୍ଡେ ୱେଏ ବାରି ପବିତ୍ର ନିଅମ୍‌ ସେଃମଁ ରିସା ଡିଙ୍ଗ୍‌ଚେ ନିଜର୍‌ ଇକ୍‌ଚାରେ କାମ୍ ଡିଙ୍ଗ୍‌ଏ । ମେଁ ଆଣ୍ଡେ ୱେଚେ ପବିତ୍ର ନିଅମ୍‌ ବାଙ୍ଗେକ୍ନେ ରେମୁଆଁ ନ୍‌ସାଃ ଚିନ୍ତା ଡିଂଏ । 31 ଉତର୍‌ନେ ଇଃସାଙ୍ଗ୍‌ ଯିରୂଶାଲମ ପାକା ସନ୍ୟଦଲ୍‌ ବେକେ ବାରି ମନ୍ଦିର୍‌ ଆରେକେ ବାରି ତିଆର୍ ଡୁଆକେ ଅପବିତ୍ର ଆଡିଙ୍ଗ୍‌କେ । ମେଇଂ ଦିନ୍‌କେ ପୁଜା ଡିଙ୍ଗ୍‌ନେ ବନ୍ଦ୍‌ ଆଡିଙ୍ଗ୍‌ ଆର୍‌ଏ ବାରି ଜାବର୍‌ କରାପ୍‌ ଗିନ୍‌ ରକମ୍‌ନେ ମୁର୍ତି ତିଆର୍‌ ଡିଙ୍ଗ୍‌ଆର୍‌ଏ । 32 ମେଁ ଅବିସ୍‌ବାସି ଯିହୁଦିଇଂକେ ଚିକ୍‌ନା ଚିକ୍‌ନା ସାମୁଆଁ ବାସଙ୍ଗ୍‌ଚେ, କରାପ୍‌ ଆଡିଙ୍ଗ୍‌ଏ । ମାତ୍ରମ୍‌ ଆଣ୍ଡିନେ ଯିହୁଦିଇଂ ନିଜର୍‌ ପର୍‌ମେସର୍‌କେ ସକ୍ତିସାଲି ଡାଗ୍‌ଚେ ମ୍ୟାଲେଃକେ ଆର୍କେ ମେଇଂ ନିମାଣ୍ଡା କାମ୍‌ ଡିଙ୍ଗ୍‌ଆର୍‌ଏ । 33 ରେମୁଆଁଇଂନେ ବିତ୍ରେ ଜାଣ୍ଡେଇଂ ଜ୍ଞାନି, ମେଇଂ ଗୁଲୁଏ ରେମୁଆଁଇଂକେ ସିକ୍ୟା ବିଆର୍‌ଏ । ଏଲେଡିଗ୍‌ ଗୁଲୁଏ ଦିନ୍‌ ଜାକ ମେଇଂ କାଣ୍ଡାନ୍ୟା, ସୁଆ ଡୁଆକ୍ନେ ଡାଗ୍ରା, ବନ୍ଦି ଅବସ୍ତାନ୍ନିଆ ବାରି ଡଙ୍ଗାରେ ଡିଙ୍ଗ୍‌ଆର୍‌ଏ । 34 ଆତାନ୍‌ ବେଲା ମେଇଂ ଦୁକ୍‌ ବାଆର୍‌ଏ, ଆତାନ୍‌ ବେଲା ମେଇଂ ଇତୁଡ଼ା ସାଇଜ ବାୟାଆର୍‌ଏ । ମାତ୍ରମ୍‌ ଗୁଲୁଏ ଚିକ୍‌ନା ଚିକ୍‌ନା ସାମୁଆଁ ବାସଙ୍ଗ୍‌ନେ ରେମୁଆଁଇଂ ମେଇଙ୍ଗ୍‌ ଏତେ କୁଡ଼େ ଆର୍‌ଏ । 35 ଉଡ଼ିକ୍ଲିଗ୍‌ ଜ୍ଞାନି ରେମୁଆଁଇଂ ଟେପ୍‌ଲ ଆର୍‌ଏ ବାରି ମେଇଂ ବୁଲ୍‌ ଡିଙ୍ଗ୍‌ଆର୍‌ଏ । ମାତ୍ରମ୍‌ ଆତାନ୍‌ ଜ୍ଞାନିଇଂ ଆମେଇଂକେ ନିର୍ମଲ୍ ଆଡିଂଚେ ସପା ଆଡିଂଏ ବାରି ପବିତ୍ର ଆଡିଙ୍ଗ୍‌ନ୍‌ସା ଜୁଗ୍‌ ଡାନେ ବେଲା ଜାକ ଟେପ୍‌ଲ ଆର୍‌ଏ । ଉଡ଼ିବେଲା ଆତାନ୍‌ ବେଲା ପାଙ୍ଗ୍‌ଏ ଆତେନ୍‌ ବେଲା ପର୍‌ମେସର୍‌ ବିଚାର୍‌ ଡିଙ୍ଗ୍‌ଏ ।"

36 ଉତର୍‌ନେ ଇଃସାଙ୍ଗ୍‌ ନିଜର୍‌ ଇକ୍‌ଚା ଅନୁସାରେ କାମ୍‌ ଡିଙ୍ଗ୍‌ଏ । ସାପା ଦେବ୍‌ତା ବାନ୍‌ ନେଙ୍ଗ୍‌ ମ୍ନା ଡାଗ୍‌ଚେ ମେଁ ଗର୍ବ ଡିଙ୍ଗ୍‌ଏ । ବାରି ମେଁ ଇସ୍‌ପର୍‌ଇଂନେ ପର୍‌ମେସର୍‌ନେ ବିରଦ୍‌ରେ କାବା ରକମ୍‌ନେ ସାମୁଆଁ ବାସଙ୍ଗ୍‌ଏ । ମେଁନେ ରିସା ସପଲ୍‌ ଡିଙ୍ଗ୍‌ ଜାକ ମ୍ନା ମ୍ନାୱେଏ । ଡାଗ୍ଲା ମେଁନେ ପର୍‌ମେସର୍‌ନେ ଇକ୍‌ଚା ଡିଙ୍ଗ୍‌ବକେ ଆତାନ୍‌ ଡିଙ୍ଗ୍‌ଏ । 37 ମେଁ ନିଜର୍‌ ଆବାଇଂନେ ମୁର୍ତିଇଂକେ ଆମାନେଃ ଣ୍ଡୁ । ସେଲାମ୍ବୁଏଃଇଂନେ ମେଃଡିଗ୍‌ ଦେବ୍‌ତାକେ ଆମାନେଃ ଣ୍ଡୁ । ଡାଗ୍ଲା ମେଁ ସାପାରେନେ ବାନ୍‌ ନିଜେକେ ମ୍ନା ଡାଗ୍‌ଚେ ବାବେଏ । 38 ଆତାନ୍‌ ଇଃସାଙ୍ଗ୍‌ ମାତ୍ରମ୍‌ ମନ୍ଦିର୍‌ନେ ଦେବ୍‌ତାକେ ପୁଜା ଡିଙ୍ଗ୍‌ଏ । ମେଁ ବପୁ ବାରି ସନ୍‌ମାନ୍‌ ବିଃଚେ ପୁଜା ଡିଙ୍ଗ୍‌ଏ । ମେଁ ମେଁନେ ନ୍ତା ଞ୍ଜାଇଂନେ ଦେବ୍‌ତାକେ ପୁଜା ଆଡିଙ୍ଗ୍‌ ଣ୍ଡୁ । ମେଁ ବପୁକ୍ନେ ଦେବ୍‌ତାକେ ସୁନା, ରୁପା ବାରି ଜାବର୍‌ ଦାମ୍‌ନେ ବ୍ରି ବିଚେ ପୁଜା ଡିଙ୍ଗ୍‌ଏ । 39 ମେଁ ବିଦେସ୍‌ନେ ଦେବ୍‌ତାନେ ବପୁରେ ଡାଟ୍‌ ଲେଃକ୍ନେ ମନ୍ଦିର୍‌ଇଂନେ ସାମ୍‌ନେ କାମ୍‌ ଡିଂଏ । ଜା ଆମେକେ ଗ୍ରହନ୍‌ ଡିଙ୍ଗ୍‌ଏ ମେଁ ଆମେକେ ଗୌରବ୍‌କେ ଆମ୍ନାଏ ବାରି ଗୁଲୁଏ ଆଡ଼ାତ୍ରା ଆମେଇଂକେ ଅଦିକାର୍‌ ଡିଂନେ ପଦ୍‌ ବିଏ ବାରି ଡାବୁ ବାଦୁଲ୍‌ରେ ଲିଜ ବାଗ୍‌ ଆଡିଙ୍ଗ୍‌ଏ ।

40 ବାରି ଡାକ୍ନେ ବେଲା ଦକିନ୍‌ ଦେସ୍‌ନେ ଇଃସାଙ୍ଗ୍‌ ମେଁ ଏତେ ବିରଦ୍‌ ଡିଙ୍ଗ୍‌ଏ । ଉତର୍‌ ଦେସ୍‌ନେ ଇଃସାଙ୍ଗ୍‌ ରତ୍‌ ଗଡ଼ା ଚାଲେଣ୍ଡ୍ରେ ବାରି ଗୁଲୁଏ ଜାହାଜ୍‌ ରାଙ୍ଗ୍‌ୱେଚେ ମେଁ ବିରଦ୍‌ରେ ୱେଡ଼ିଆ ଗୁରିଆ ରକମ୍‌ ଡିଂଚେ ପାଙ୍ଗ୍‌ଏ । ମେଁ ଗୁଲୁଏ ଦେସ୍‌ ୱେଚେ ବୁରାଣ୍ଡ୍ୟାଃ ରକମ୍‌ ଡୁଙ୍ଗ୍‌ଡ଼୍ୟା ୱେଏ । 41 ଉତର୍‌ ଦେସ୍‌ନେ ଇଃସାଙ୍ଗ୍‌ ରମ୍ୟ ଦେସ୍‌ନ୍ୟା ୱେଚାଏ ଆତ୍‌ଅରିଆ ଗୁଲୁଏ ଦେସ୍‌କେ ଆଃଆରେଏ । ମାତ୍ରମ୍‌ ଇଦୋମ, ମୋୟାବ ବାରି ଅମ୍ମୋନ ବାରି ଗଗିସିଆଇଂନେ ଅଦିପତି ମେଁନେ ନ୍ତି ବାନ୍‌ ରକ୍ୟା ଡିଙ୍ଗ୍‌ଏ । 42 ବାରି ମେଁ ଗୁଲୁଏ ଦେସ୍‌ ଆଡ଼ାତ୍ରା ମେଁ ନ୍ତି ମୁଟା ଆଡିଙ୍ଗ୍‌ଏ ବାରି ମିସର୍‌ ଦେସ୍‌ ଡିଗ୍‌ ରକ୍ୟା ଆବା ଣ୍ଡୁ । 43 ମେଁ ମିସର୍‌ ଦେସ୍‌ନେ ସୁନା ବାରି ରୁପା ଲେଃକ୍ନେ ଡୁଆ ସାପା ବାରି ଜାବର୍‌ ଦାମ୍‌ନେ ଜିନିସ୍‌ ସାପା ମେଁନେ ନ୍ତିନ୍ୟା ଲେଃଏ । ବାରି ଲୁଦିୟ କୁସିୟଇଂ ମେଁନେ ସାମୁଆଁରେ ଅଲେଙ୍ଗ୍‌ ଆର୍‌ଏ । 44 ମାତ୍ରମ୍‌ ପୁର୍ବ ବାରି ଉତର୍‌ ଦେସ୍‌ବାନ୍‌ ପାଙ୍ଗ୍‌ଲେକ୍ନେ କବର୍‌ ଆମେକେ ତେରେପେତେ ଆଡିଙ୍ଗ୍‌ଏ । ଆତ୍‌ବା ମେଁ ଗୁଲେରେକେ ଚିନ୍‌ଚତର୍‌ ଆଃଡିଂଏ ବାରି ପୁରାପୁରି ବାବ୍‌ରେ ବିନାସ୍‌ ଆଡିଙ୍ଗ୍‌ନ୍‌ସା ମ୍ନା ରିସା ସାଚେ ୱେଏ । 45 ବାରି ମେଁ କେଣ୍ଡିଆଃ ବାରି ସବାକ୍ନେ ରମ୍ୟ ପବିତ୍ର କଣ୍ଡା ଡାଗ୍ରା ନାନେ ଇଃସାଙ୍ଗ୍‌ନେ କୁଡ଼ିଆ ଆରେଏ । ବାରି ମେଁନେ ତେଃଡାନେ ବେଲା ପିଙ୍ଗ୍‌ଚାଏ, ବାରି ଜାଣ୍ଡେ ଆମେକେ ସାଇଜ ଆଡିଙ୍ଗ୍‌ଆର୍‌ ଣ୍ଡୁ ।