1 ପାରସ୍ୟନେ ଇଃସାଙ୍ଗ୍‌ କୋରସ୍‌ନେ ଅଦିକାର୍‌ନେ ତୁର୍‌ତିୟ ମୁଆଁ ବେଲା ବେଲ୍‌ଟଶତ୍ସର୍‌ ମ୍ନିରେ ସ୍ନାମୁଁଆଃ ଦାନିଏଲ୍‌ନେ ଆଡ଼ାତ୍ରା ମୁଇଂ ସାମୁଆଁ ତ୍ନାକେ ଆରି ଆତେନ୍‌ ସତ୍‌, ଆତେନ୍‌ ମୁଇଂ ମ୍ନାଃ ଜୁଜ୍‌ ସାମୁଆଁ; ବାରି, ମେଁ ଆତେନ୍‌ ବୁଜେକେ ଆରି ଆତେନ୍‌ ଦର୍ସନ୍‌ ସାମୁଆଁ ମେଁ ମ୍ୟାଃକେ ।

2 ଆତେନ୍‌ ବେଲା ନିଂ ଦାନିଏଲ୍‌ ପୁରୁନ୍‌ ଞ୍ଜି ସାନ୍ତା ଜାକ ଦୁକ୍‌ ଡିଂଣ୍ଡିଂଗେ । 3 ବାରି ଞ୍ଜି ସାନ୍ତା ଡିଡାନେ ଜାକ ନିଂ ମେଃଡିଗ୍‌ ମାଣ୍ଡା ମାଣ୍ଡାନେ କାଦି ନ୍ନାଚଙ୍ଗ୍‌କେ ଣ୍ଡୁ, କି ଚିଲି ଣ୍ଡୁଲା ଦ୍ରାକ୍ୟା ରସ୍‌ ନିଂ ନାଉଗ୍‌କେ ଣ୍ଡୁ, କି ନିଂ ମେଃଡିଗ୍‌ ଞ୍ଚୁ ନ୍ନାଲାଗେକେ ଣ୍ଡୁ ।

4 ବାରି, ପର୍‌ତୁମ୍‌ ଆର୍କେନେ ଚବିସ୍‌ ଦିନା ନିଂ ହିଦ୍ଦେକଲ୍‌ ମ୍ନିକ୍ନେ ମ୍ନାଃ ଲଣ୍ଡିଆଃ ଆଃଡ଼ାଃ ଲେଃକ୍ନେ ବେଲା, 5 ନିଂ ମ୍‌ମୁଁଆଃ ମେଲେଚେ ଙ୍କେକେ, ଆରି କେଲା, ତୁଲୁଏ ସକା ସଃକ୍ନେ ମୁଇଂ ରେମୁଆଁ, ମେଁନେ ନ୍ସାନିଆ ଉଫସନେ ଦେସ୍‌ନେ ନିମାଣ୍ଡାଃକ୍ନେ ସୁନା ଗ୍ନାଗ୍‌ସେଃଅରିଆ ଗାଗ୍‌ବଗେ; 6 ଆରି ମେଁନେ ଗାଗ୍‌ଡ଼େନ୍ନିଆ ବୈଦୂର୍ଯ୍ୟ ମଣୀ ରକମ୍‌ ଆରି ମେଁନେ ତୁମୁଁଆଃ କରେଣ୍ଟ୍‌ନେ ଉଆଲ୍‌ ରକମ୍‌ ଆରି ମେଁନେ ମ୍‌ମୁଁଆଃ ତାର୍କିଗ୍‌କ୍ନେ ଅଲାସ ରକମ୍‌, ଆରି ମେଁନେ ନ୍ତି ଆରି ଞ୍ଚ ନିମାଣ୍ଡାଃକ୍ନେ ପିତଲ୍‌ନେ ଉଆଲ୍‌ ରକମ୍‌ ଆରି ମେଁନେ ସାମୁଆଁନେ ସବ୍‌ଦ ରେମୁଆଁଇଂନେ ଗ‍ଅଲିନେ ସବ୍‌ଦ ରକମ୍‌ ।

7 ବାରି, ନିଂ ଦାନିଏଲ୍‌ ମୁଇଂଡା ଆତେନ୍‌ ଦର୍ସନ୍‌ ଙ୍କେକେ; ମେଃଡାଗ୍‌ଲା ନିଂନେ ସାଙ୍ଗ ରେମୁଆଁଇଂ ଆତେନ୍‌ ଦର୍ସନ୍‌ ଆକେଆର୍‌କେ ଣ୍ଡୁ; ମାତର୍‌ ମେଇଂ ଜାବର୍‌ ଇରିଆଃତୁଗ୍‌ ୱେଆର୍‌କେ ଆରି ନିଜେ ନିଜେକେ ଆଃବୁଡ଼ି ନ୍‌ସାଃ ଡ‍ଆର୍‌କେ । 8 ତେଲା ନିଂ ମୁଇଂଡା ଲେଃଚେ ଆକେନ୍‌ ମ୍ନା ଦର୍ସନ୍‌ ଙ୍କେକେ ଆରି ନିଂ ଡାଗ୍ରା ମେଃଡିଗ୍‌ ବପୁ ଆଲେଃକେ ଣ୍ଡୁ; ମେଃଡାଗ୍‌ଲା ନିଂନେ ସାର୍ମୁଆଃ ବପୁ ଡାୱେଗେ ଆରି ନିଂ ମେଃଡିଗ୍‌ ବପୁ ବ ନ୍ନାୟାକେ ଣ୍ଡୁ । 9 ଏଲେଡିଗ୍‌ ନିଂ ମେଁନେ ସାମୁଆଁନେ ସବ୍‌ଦ ନ୍ଦ୍ରିଗ୍‌କେ; ଆରି, ଉଃଡ଼ିବେଲା ନିଂ ମେଁନେ ସାମୁଆଁନେ ସବ୍‌ଦ ନ୍ଦ୍ରିଗ୍‌କେ, ଆତାନ୍‌ ବେଲା ନିଂ ମୁକ୍‌ଚିଚେ ଜାବର୍‌ ଲିଲେମୁଁଆଃଚେ ଲଃନ୍ଲେଃଗେ । 10 ଅଃକେନ୍‌ରେ କେଲା, ମୁଇଂ ନ୍ତି ଲିଗ୍‌ଚେ ଆନିଂକେ ମାଣ୍ଡି ଆରି ନ୍ତିଅରିଆ ଆସା ଆଃଡିଂକେ ।

11 ବାରି, ମେଁ ଆନିଂକେ ବାସଙ୍ଗ୍‌କେ, ଅ ଦାନିଏଲ୍‌, ନିଂ ଆନାକେ ମେଃ ମେଃନେ ସାମୁଆଁ ମ୍ବାସଙ୍ଗ୍‌ଏ, ଆତେନ୍‌ ବୁଜେ ଆରି ସିଦା ଡିଂଚେ ତୁଆଁ; ମେଃଡାଗ୍‌ଲା ଏବେ ନିଂ ନାଁ ଡାଗ୍ରା ପାଙ୍ଗ୍‌ନ୍ଲେଃକେ; ମେଁ ଆନିଂକେ ଆକେନ୍‌ ସାମୁଆଁ ବାସଙ୍ଗ୍‌କେସାଃ ନିଂ ଜୁର୍‌ ଜୁର୍‌ଚେ ନ୍ତୁଆଁକେ ।

12 ଅଃକେନ୍‌ରେ ମେଁ ଆନିଂକେ ବାସଙ୍ଗ୍‌କେ, ଅ ଦାନିଏଲ୍‌, ଆବ୍‌ଟଗେ; ମେଃଡାଗ୍‌ଲା ନାଁ ମୁଃଡ଼ି ପର୍‌ତୁମ୍‌ ଦିନ୍‌ବାନ୍‌ ବୁଜେ ନ୍‌ସା ଆରି ନାଁନେ ପର୍‌ମେସର୍‌ନେ ଡାଗ୍ରା ନିଜେକେ ଦରମ୍‌ ଆଃଡିଂ ନ୍‌ସାଃ ନିଜେନେ ମନ୍‌ ନାବିଃକେ, ଆତେନ୍‌ ଦିନ୍‌ବାନ୍‌ ନାଁନେ ସାମୁଆଁ ନ୍ନାଙ୍ଗ୍‌କେ; ଆରି, ନାଁନେ ସାମୁଆଁ ନ୍‌ସାଃ ନିଂ ପାଙ୍ଗ୍‌ନ୍ଲେଃକେ । 13 ମାତର୍‌ ପାରସ୍ୟ ରାଜିନେ ନେତା ଏକୁଇସ୍‌ ଦିନ୍‌ ଜାକ ନିଂନେ ବିରଦ୍‌ ଡିଂକେ; ମାତର୍‌ କେଲା, ମ୍ନାଃ ନେତାଇଂନେ ବିତ୍ରେବାନ୍‌ ମୀଖାୟେଲ୍‌ ମ୍ନିରେ ମୁଇଂଡା ନିଂନେ ସାଆଜ୍ୟ ଡିଂନ୍‌ସାଃ ପାଙ୍ଗ୍‌କେ; ଆରି, ନିଂ ତେନ୍‌ ଜାଗା‍ଅରିଆ ପାରସ୍ୟନେ ଇଃସାଙ୍ଗ୍‌ଇଂନେ ଏଃତେ ନେଲେଃଗେ । 14 ଏଃକେ, ସାରାସାରି ବେଲା ନାଁନେ ରେମୁଆଁଇଂନେ ଆଡ଼ାତ୍ରା ମେଃନେ ଗଟେଏ, ଆତେନ୍‌ ଆନାକେ ଆଃବୁଜେ ବିଃନ୍‌ସାଃ ନିଂ ପାଙ୍ଗ୍‌ନ୍ଲେଃକେ; ମେଃଡାଗ୍‌ଲା ଦର୍ସନ୍‌ ଆରି ଗୁଲୁଏ କାଲ୍‌ ଜାକ ଲେଃକେ ।

15 ମେଁ ଆନିଂକେ ଦେକ୍‌ରକମ୍‌ ସାମୁଆଁ ବାସଙ୍ଗ୍‌କ୍ନେ ଇଡ଼ିଂ ନିଂ ତୁବଃ ପାକା ସାର୍ମୁଁଆଃ ଆଃଡିଂଚେ ବୁଙ୍ଗ୍‌ ମ୍ବିଃକେ । 16 ଅଃକେନ୍‌ରେ କେଲା, ରେମୁଆଁ ଗଡ଼େଇଂନେ ରୁପ୍‌ ରକମ୍‌ ମୁଇଂ ରେମୁଆଁ ନିଂନେ ତୁମୁଁଆଃ ଲିଗ୍‌କେ; ତେସାଃ ନିଂ ନିଜେନେ ତୁମୁଁଆଃ ଆଃତର୍ସାଚେ ନିଂ ସେଃମଁ ତୁଆଁକ୍ନେ ରେମୁଆଁକେ ମ୍ବାସଙ୍ଗ୍‌କେ, ଅ ନିଂନେ ମାପ୍‌ରୁ, ଆକେନ୍‌ ଦର୍ସନ୍‌ ନ୍‌ସାଃ ନିଂନେ କସ୍‌ଟ ଆନିଂକେ ସାଃଲେଃକେ ଆରି ନିଂ ଇଃତୁଡ଼ା ଡିଗ୍‌ ବପୁ ରକ୍ୟା ଡିଂ ୟା ନ୍ନାଡିଂକେ ଣ୍ଡୁ । 17 ମେଃଡାଗ୍‌ଲା ନିଂନେ ଆକେନ୍‌ ମାପ୍‌ରୁନେ ଦାସ୍‌ ଡିରକମ୍‌ ଆକେନ୍‌ ନିଂ ମାପ୍‌ରୁନେ ଏଃତେ ବାଲିର୍‌ବାତା ଡିଂ ଇଁୟାଏ ? ଅଃତେନ୍‌ବେଲା ନିଂ ଡାଗ୍ରା ମେଃଡିଗ୍‌ ବପୁ କି ନିଂ ବିତ୍ରେ ପୁଣ୍ଡା ଆଲେଃଗେ ଣ୍ଡୁ ।

18 ଅଃତେନ୍‌ବେଲା ରେମୁଆଁନେ ରୁପ୍‌ ରକମ୍‌ ମୁଇଂଡା ରେମୁଆଁ ବାର୍‌ମୁଇଂତର୍‌ ଆନିଂକେ ଲିଗ୍‌ଚେ ବପୁ ଆଃଡିଂକେ । 19 ବାରି, ମେଁ ବାସଙ୍ଗ୍‌କେ, ଅ ଆଲାଦ୍‌ନେ ଗଡ଼େଅ, ଆବ୍‌ଟଗେ; ନାଁନେ ସାନ୍ତି ଡିଂଲେଃ, ଡାଟ୍‌ ଡିଂ, ଡାଟ୍‌ ଡିଂ । ମେଁ ଆନିଂକେ ଆକେନ୍‌ ବାସଙ୍ଗ୍‌କ୍ନେ ଇଡ଼ିଂ, ନିଂ ଡାଟ୍‌ ଡିଂଚେ ମ୍ବାସଙ୍ଗ୍‌କେ, ନିଂନେ ମାପ୍‌ରୁ ବାସଙ୍ଗ୍‌; ମେଃଡାଗ୍‌ଲା ନାଁ ଆନିଂକେ ଡାଟ୍‌ ଆଃଡିଂନାବକେ ।

20 ତେଲା ମେଁ ବାସଙ୍ଗ୍‌କେ, ନିଂ ମେଃ ନ୍‌ସାଃ ନାଁ ଡାଗ୍ରା ପାଙ୍ଗ୍‌ନ୍ଲେଃକେ, ଆତେନ୍‌ କି ନାଁ ମ୍ୟାଃନାଲେଃକେ ? ଏବେ ନିଂ ପାରସ୍ୟନେ ନେତା ଏଃତେ ଜୁଜ୍‌ ଡିଂ ନ୍‌ସାଃ ଆଣ୍ଡେ ନେୱେପା; ଆରି, ନିଂ ୱେଲା, କେଲା, ଗ୍ରୀସ୍‌ନେ ନେତା ପାଙ୍ଗ୍‌ଏ । 21 ମାତର୍‌ ସତ୍‌ ବ‍ଇଅରିଆ ମେଃନେ ଗ୍ନୁଆର୍‌ ଲେଃକେ, ଆତେନ୍‌ ନିଂ ଆନାକେ ଣ୍ଡ୍ରାଃମ୍ୟାଏ; ଆକ୍‌ମେଇଂନେ ନିଂନେ ସାଆଜ୍ୟ ଡିଂ ନ୍‌ସାଃ ପେଇଂନେ ନେତା ମୀଖାୟେଲ୍‌କେ ଆନ୍ତାର୍‌ଚେ ଆରି ଜାଡିଗ୍‌ ଣ୍ଡୁ ।