ନବୂଖଦ୍ନିତ୍ସର୍ ସାପାରେକେ ମୁଇଂ ସୁନାନେ ମୁର୍ତି ପୁଜା ଡିଂ ନ୍ସା ଆଦେସ୍ ବିବକେ
1 ଇଃସାଙ୍ଗ୍ ନବୂଖଦ୍ନିତ୍ସର୍ ସାଟିଏ ନ୍ତି ତିଆର୍ ଆରି ତୁର୍ ନ୍ତି ଅସାର୍ ମୁଇଂ ସୁନାନେ ମୁର୍ତି ଆଃରେକେ; ବାବିଲ୍ ଦେସ୍ନେ ଦୂରା ମ୍ନିକ୍ନେ ପାଦାଅରିଆ ମେଁ ଆତେନ୍ ଆଃରେକେ । 2 ଆତେନ୍ ଇଃସାଙ୍ଗ୍ ନବୂଖଦ୍ନିତ୍ସର୍ ଆତ୍ଡାଗ୍ରା ଆଣ୍ଡିନେ ମୁର୍ତି ଆଃରେବଗେ, ଆତେନ୍ ଉଦ୍ଗାଟନ୍ ଡିଙ୍ଗ୍ନେ ପାଙ୍ଗ୍ନ୍ସା ଚାସ୍ଡିଙ୍ଗ୍ଣ୍ଡ୍ରେକେ, ରାଜାନେ ଡାଗ୍ରା କାମ୍ ଡିଙ୍ଗ୍ଣ୍ଡ୍ରେଇଂକେ ବାରି ଦେସ୍ନେ ଅଦିକାର୍ଣ୍ଡ୍ରେକେ, ବିଚାର୍ ଡିଙ୍ଗ୍ଣ୍ଡ୍ରେକେ, ନିଅମ୍ ତିଆର୍ଡିଙ୍ଗ୍ଣ୍ଡ୍ରେ, ବିସ୍ବାସ୍ ରେମୁଆଁଇଂକେ, ଆରି ଦେସ୍ନେ ସାପା ସାସନ୍ କର୍ତାଇଂକେ ମୁଇଂ ଡାଗ୍ରା ଆଡିଂ ନ୍ସାଃ ଇଃସାଙ୍ଗ୍ ନବୂଖଦ୍ନିତ୍ସର୍ ରେମୁଆଁ ବେକେ । 3 ଆତେନ୍ ରାଜ୍ୟପାଲ୍, ଏରିଆକେ ସାସନ୍ ଡିଂଣ୍ଡ୍ରେ, ଦେସ୍କେ ସାସନ୍ ଡିଂନେ ରେମୁଆଁଇଂ, ବିଚାର୍ ଡିଙ୍ଗ୍ନେ ରେମୁଆଁଇଂ, ଡାବୁ ବନେ ରେମୁଆଁଇଂ ବାରି ନିଅମ୍ ଆରେ ରେମୁଆଁଇଂ ଆରି ଉକୁମ୍ ବିନେ ରେମୁଆଁଇଂ ଆରି ସାପା ଦେସ୍କେ ସାସନ୍ ଡିଂଣ୍ଡ୍ରେକେ ମୁଇଂତୁଗ୍ ୱାନ୍ସା ରାଜା ନବୂଖଦ୍ନିତ୍ସର୍ନେ ଆଃରେକ୍ନେ ମୁର୍ତିକେ ଉଦ୍ଗାଟନ୍ ଡିଂନେସା ମୁଇଂତୁଗ୍ ରିସିଙ୍ଗ୍ ଆର୍କେ, ଆରି ମେଇଂ ନବୂଖଦ୍ନିତ୍ସର୍ନେ ଆଃରେକ୍ନେ ମୁର୍ତିନେ ସାମ୍ନା ତୁଆଁଆର୍କେ । 4 ତେସାଃ ଚାଲାନ୍ ୱାସାର୍ଚେ ବାସଙ୍ଗ୍କେ, ଅ ରେମୁଆଁଇଂ, ଦେସ୍ ଦେସ୍ ଆରି ଜାତି ଜାତିନେ ରେମୁଆଁଇଂ ବିନ୍ ବିନ୍ ବାସାବାଦିନେ ରେମୁଆଁଇଂ, ଆପେକେ ଆକେନ୍ ଆଦେସ୍ ବିଃଣ୍ଡିଂକେ, 5 ଆଣ୍ଡିନେ ବେଲା ପେଇଂ ଡିରଙ୍ଗ୍, ବାଉଁସି, ଟଇଲା ବାଜା, ଚତୁସ୍ତନ୍ତ୍ରି ଆରି ନେବଲ, ମର୍ଦଲ୍ ଆରି ସାପା ରକମ୍ ବାଜା ପେଅଁଏ, ଅଃତେନ୍ବେଲା ପେଇଂ ଇଃସାଙ୍ଗ୍ ନବୂଖଦ୍ନିତ୍ସର୍ନେ ଆଃରେକ୍ନେ ସୁନା ମୁର୍ତି ସେଃମଁ ମୁକ୍ଚିଚେ ପେସାର୍ଲଏ । 6 ବାରି, ମୁଡ଼ି ରେମୁଆଁ ମୁଣ୍ଡିଆ ବଗ୍ଚେଃ ଆସାର୍ଲ ଣ୍ଡୁ, ମେଁ ଆତେନ୍ ଡଣ୍ଡ୍ରେ ସୁଆ ଡୁଆଲେକ୍ନେ କୁଣ୍ଡ୍ଅରିଆ ତ୍ଲାଗ୍ବିଆର୍ଏ । 7 ଏନ୍ସାଃ ଉଃଡ଼ିବେଲା ସାପା ରେମୁଆଁ ଡିରଙ୍ଗ୍, ବାଉଁସି, ଟଇଲା ବାଜା, ଚତୁସ୍ତନ୍ତ୍ରୀ, ନେବଲ ଆରି ସାପା ରକମ୍ନେ କାଣ୍ଡେଙ୍ଗ୍ ପେଦ୍ରିଗ୍ଏ, ଅଃତେନ୍ବେଲା ସାପା ରେମୁଆଁ, ଜାତି ରେମୁଆଁ ଆରି ବିନ୍ ବିନ୍ ବ୍ନାସାଣ୍ଡ୍ରେ ଇଃସାଙ୍ଗ୍ ନବୂଖଦ୍ନିତ୍ସର୍ନେ ଆଃରେକ୍ନେ ମୁର୍ତିକେ ମୁକ୍ଚିଚେ ସାର୍ଲଆର୍କେ ।
ସୁଆ ଡୁଆକ୍ନେ କୁଣ୍ଡ୍ଅରିଆ ଞ୍ଜିରୁଆ ଙ୍ଗିରେ
8 ଆକେନ୍ସା ଆତେନ୍ ବେଲା ଉଃଡ଼ିରୁଆ କଲଦୀୟ ରେମୁଆଁ ଡାଗ୍ରା ପାଙ୍ଗ୍ଆର୍ଚେ ଯିହୁଦୀ ରେମୁଆଁଇଂ ବିରୁଦ୍ରେ ନିନ୍ଦା ଡୁଂପାଂଆର୍କେ । 9 ମେଇଂ ନବୂଖଦ୍ନିତ୍ସର୍ ଇଃସାଙ୍ଗ୍କେ ଉତର୍ ବିଚେ ବାସଙ୍ଗ୍ଆର୍କେ, ଅ ମ୍ନାଇଃସାଙ୍ଗ୍, କାଲାଆଃ ମ୍ବ୍ର ଲାଃଲା । 10 ଅ ମ୍ନାଃ ଇଃସାଙ୍ଗ୍, ନାଁ ଆଦେସ୍ ଡିଂନାବକେ ଜେ, ଜାଡିଗ୍ ଡିରଙ୍ଗ୍, ବାଉଁସି, ବୀଣା, ଚତୁସ୍ତନ୍ତ୍ରୀ, ନେବଲ, ମର୍ଦଲ୍ ଆରି ସାପା ରକମ୍ ବାଜା ଦ୍ରିଗ୍ଏ, ମେଁ ମୁକ୍ଚିଚେ ସୁନାନେ ମୁର୍ତିକେ ସାର୍ଲଆର୍ଏ; 11 ବାରି, ମେଃଡିଗ୍ ରେମୁଆଁ ମୁକ୍ଚିଚେ ଆସାର୍ଲ ଣ୍ଡୁ, ମେଁ ତ୍ଲଃକ୍ନେ ସୁଆ କୁଣ୍ଡ୍ଅରିଆ ଆଃଗାଆର୍ଏ; 12 ଆକ୍ଅରିଆ ଶଦ୍ରକ୍, ମୈଶକ୍ ଆରି ଅବେଦ୍ନଗୋ ମ୍ନିକ୍ନେ ଉଃଡ଼ିରୁଆ ଯିହୁଦୀ ରେମୁଆଁ ଲେଃଆର୍କେ, ଆମେଇଂକେ ନାଁ ବାବିଲ୍ ଦେସ୍ନେ ଇଃସାଙ୍ଗ୍ କାମ୍ଅରିଆ ଆଃଗାବକେ; ଅ ମ୍ନାଇଃସାଙ୍ଗ୍, ଆତେନ୍ ରେମୁଆଁଇଂ ଆନାକେ ଆମାନେଃ ଆର୍କେ; ମେଇଂ ନାଁନେ ଦେବ୍ତାଇଂନେ ସେବା ଆଡିଂଆର୍ ଣ୍ଡୁ କି ନାଁନେ ଆଃରେକ୍ନେ ସୁନା ମୁର୍ତିକେ ଆସାର୍ଲଆର୍ ଣ୍ଡୁ ।
13 ଇଡ଼ିଂ ନବୂଖଦ୍ନିତ୍ସର୍ ଜାବର୍ ରିସା ଆରି ଗିସେଚେ ଶଦ୍ରକ୍, ମୈଶକ୍ ଆରି ଅବେଦ୍ନଗୋକେ ଡୁଙ୍ଗ୍ପାଙ୍ଗ୍ ନ୍ସାଃ ଆଦେସ୍ ବିଃକେ । ତେସାଃ ରେମୁଆଁଇଂ ଆମେଇଂକେ ଇଃସାଙ୍ଗ୍ନେ ଡାଗ୍ରା ଡୁଙ୍ଗ୍ପାଙ୍ଗ୍ଆର୍କେ । 14 ନବୂଖଦ୍ନିତ୍ସର୍ ଆମେଇଂକେ ଉତର୍ ବିଚେ ବାସଙ୍ଗ୍କେ, ଅ ଶଦ୍ରକ୍, ମୈଶକ୍ ଆରି ଅବେଦ୍ନଗୋ, ପେଇଂ କି ମନନିତ୍ ଡିଂଚେ ନିଂନେ ଦେବ୍ତାନେ ସେବା ପେଡିଂକେ ଣ୍ଡୁ, କି ନିଂ ଣ୍ଡ୍ରାଃରେକ୍ନେ ସୁନାନେ ମୁର୍ତିକେ ସାର୍ଲ ପେଡିଂକେ ଣ୍ଡୁ ? 15 ଏବେ ଡିରଙ୍ଗ୍, ବାଉଁସି, ବୀଣା, ଚତୁସ୍ତନ୍ତ୍ରୀ, ନେବଲ, ମର୍ଦଲ୍ ଆରି ସାପା ରକମ୍ ବଗ୍ଡେଙ୍ଗ୍ ପେଅଁଲା, ପେଇଂ ଅଃନା ନିଂ ଣ୍ଡ୍ରାଃରେକ୍ନେ ମୁର୍ତିକେ ମୁକ୍ଚିଚେ ସାର୍ଲ ନ୍ସାଃ ତିଆର୍ ପେଡିଂଏ, ତେଲା ନିମାଣ୍ଡା; ମାତର୍ ଅଃନା ପେଇଂ ପେସାର୍ଲ ଣ୍ଡୁ, ତେଲା ଆତେନ୍ ଡଣ୍ଡ୍ନ୍ନିଆ ପେଇଂ ତ୍ଲଃକ୍ନେ ସୁଆ କୁଣ୍ଡ୍ଅରିଆ ପେଗାଏ; ଆରି, ଜା ଆପେକେ ନିଂ ନ୍ତିବାନ୍ ଆଃମ୍ବ୍ରଏ, ଦେକ୍ରକମ୍ ଆଣ୍ଡିନେ ଦେବ୍ତା ଲେଃକେ ?
16 ଶଦ୍ରକ୍, ମୈଶକ୍ ଆରି ଅବେଦ୍ନଗୋ ଇଃସାଙ୍ଗ୍କେ ଉତର୍ ବିଃଚେ ବାସଙ୍ଗ୍କେ, "ଅ ନବୂଖଦ୍ନିତ୍ସର୍, ଏନ୍ ବିସଏରେ ଆନାକେ ଉତର୍ ବିଃନେ ନେନେ କିଚି ଦର୍କାର୍ ଣ୍ଡୁ । 17 ଜଦି ଦେତ୍ରକମ୍ ଡିଂଏ, ତେଲା ନେ ଜାନେ ସେବା ଡିଂନେଡିଂକେ, ନେନେ ଆତେନ୍ ପର୍ମେସର୍ ଆନେକେ ତ୍ଲଃକ୍ନେ ସୁଆ କୁଣ୍ଡ୍ବାନ୍ ଆମ୍ବ୍ର ନ୍ସାଃ ୟାଏ । ଆରି ଅ ମ୍ନାଃ ଇଃସାଙ୍ଗ୍, ମେଁ ନାନେ ନ୍ତିବାନ୍ ଆନେକେ ରକ୍ୟା ଡିଂଏ । 18 ମାତର୍ ଅଃନା ଆଡିଂ ଣ୍ଡୁ, ତେଲା ଅ ମ୍ନାଃ ଇଃସାଙ୍ଗ୍, ନେ ଜେ ନାନେ ଦେବ୍ତାଇଂନେ ସେବା ନେଡିଂ ଣ୍ଡୁ, କି ନାନେ ନାରାଃରେକ୍ନେ ସୁନା ମୁର୍ତିକେ ନେସାର୍ଲ ଣ୍ଡୁ, ଆକେନ୍ ନାଁ ମ୍ୟାଃ ଲାଃଲା ।"
ଦାନିଏଲ୍ନେ ବନ୍ଦୁଇଂକେ ଗୁଏନେ ଦଣ୍ଡ୍
19 ଅଃକେନ୍ରେ ନବୂଖଦ୍ନିତ୍ସର୍ ଜାବର୍ ଗିସେକେ ଆରି ଶଦ୍ରକ୍, ମୈଶକ୍ ଆରି ଅବେଦ୍ନଗୋନେ ବିରୁଦ୍ରେ ମେଁନେ ସାର୍ମୁଆଃ ଚିପ୍ଲେଗ୍ ୱେକେ । ଆକେନ୍ସାଃ ସୁଆ କୁଣ୍ଡ୍କେ ଗଣ୍ଡା ଡୁଆକ୍ନେବାନ୍ ଗୁ ଗୁନ୍ ଆଡୁଆନ୍ସାଃ ମେଁ ଆଦେସ୍ ବିଃକେ । 20 ବାରି, ମେଁ ନିଜେନେ ସନ୍ୟ ବାନ୍ ଉଃଡ଼ିରୁଆ ବପୁକ୍ନେ ରେମୁଆଁଇଂକେ ଶଦ୍ରକ୍, ମୈଶକ୍ ଆରି ଅବେଦ୍ନଗୋକେ ଗାଗ୍ଚେ ତ୍ଲଃକ୍ନେ ସୁଆ କୁଣ୍ଡ୍ଅରିଆ ତ୍ଲାଗ୍ ନ୍ସାଃ ଆଦେସ୍ ବିଃକେ । 21 ତେସାଃ ଆତେନ୍ ଙ୍ଗିର୍ବୁଏଃଇଂ ନିଜେ ନିଜେନେ ଚ୍ଲେକ୍ନେ କୁର୍ତା, ପାଟାଇ, ଟପି ଆରି ବିନ୍ବିନ୍ ସକାପାଟାଇ ଏଃତେ ଗାଗ୍ଚେ ଡୁଆକ୍ନେ ସୁଆ କୁଣ୍ଡ୍ ବିତ୍ରେ ଜଗ୍ତ୍ଲାଗ୍ ବିଃକେ । 22 ଇଃସାଙ୍ଗ୍ନେ ଆଦେସ୍ ଜାବର୍ ମ୍ନା ଆରି ସୁଆ ଡୁଆକ୍ନେ କୁଣ୍ଡ୍ ଜାବର୍ ଗି ଲେଃଗେ, ଆତେନ୍ସାଃ ଆଣ୍ଡିନେ ରେମୁଆଁଇଂ ଶଦ୍ରକ୍, ମୈଶକ୍ ଆରି ଅବେଦ୍ନଗୋକେ ଲିଙ୍ଗ୍ଚେ ସାଃଲେଆର୍ଗେ, ମେଇଂ ଡୁଆକ୍ନେ ସୁଆଅରିଆ ଗୁଏୱେ ଆର୍କେ । 23 ବାରି ଶଦ୍ରକ୍, ମୈଶକ୍ ଆରି ଅବେଦ୍ନଗୋ, ଆକେନ୍ ଞ୍ଜି ରୁଆକେ ଗାଗ୍ଚେ ଡୁଆକ୍ନେ ସୁଆ କୁଣ୍ଡ୍ ବିତ୍ରେ ଗିଃୱେଆର୍କେ ।
24 ଏନ୍ଇଡ଼ିଙ୍ଗ୍ ଇଃସାଙ୍ଗ୍ ନବୂଖଦ୍ନିତ୍ସର୍ ଇରିଆଃତୁଗ୍ଚେ ଗିଆଃ ତଃଡ଼ିଆକେ । ମେଁ ନିଜେନେ ମନ୍ତ୍ରିଇଂକେ ବାସଙ୍ଗ୍କେ, ନେ କି ଞ୍ଜିକ୍ଲିଗ୍ ରେମୁଆଁକେ ଗାଗ୍ଚେ ସୁଆ ବିତ୍ରେ ତ୍ଲାଗ୍ ନେବଗେ ? ମେଇଂ ଇଃସାଙ୍ଗ୍କେ ଉତର୍ ବିଚେ ବାସଙ୍ଗ୍ଆର୍କେ, ସତ୍ ମ୍ନାଇଃସାଙ୍ଗ୍ ।
25 ଇଃସାଙ୍ଗ୍ ଉତର୍ ଡିଙ୍ଗ୍ଚେ ବାସଙ୍ଗ୍କେ, "କେଲାପା, ନିଂ ସୁଆ ବିତ୍ରେ ଅଲେଙ୍ଗ୍ନେ ଅଁକ୍ଲିଗ୍ ରକ୍ୟା ଡିଂକ୍ନେ ରେମୁଆଁକେ କେଣ୍ଡିଂକେ ଆରି ମେଇଂନେ ମେଃଡିଗ୍ ଅସ୍ବିଦା ଆଡିଂକେ ଣ୍ଡୁ; ବାରି, ଚତୁର୍ତ ରେମୁଆଁନେ ସାର୍ମୁଆଃ ପର୍ମେସର୍ନେ ଉଙ୍ଗ୍ଡେ ରକମ୍ ।"
ନବୂଖଦ୍ନିତ୍ସର୍ ବାନ୍ ଇସ୍ପର୍ନେ ପ୍ରଶଂସା ବାନେ
26 ଅଃତେନ୍ବେଲା ନବୂଖଦ୍ନିତ୍ସର୍ ଡୁଆକ୍ନେ ସୁଆ କୁଣ୍ଡ୍ନେ କାପାଟ୍ ସାମ୍ନା ୱେଚେ ବାସଙ୍ଗ୍କେ, ଅ ସାପାବାନ୍ ମ୍ନା ପର୍ମେସର୍ନେ ଦାସ୍, ଶଦ୍ରକ୍, ମୈଶକ୍ ଆରି ଅବେଦ୍ନଗୋ, ପେଇଂ ତାର୍ଚେ ଆକ୍ଅରିଆ ପାଙ୍ଗ୍ଲାପା । ତେନ୍ଇଡ଼ିଂ ଶଦ୍ରକ୍, ମୈଶକ୍ ଆରି ଅବେଦ୍ନଗୋ ସୁଆ ବିତ୍ରେବାନ୍ ତାର୍ଚେ ପାଙ୍ଗ୍ଆର୍କେ । 27 ବାରି, ରାଜ୍କୁମାର୍, ରାଜ୍ୟ ସର୍କାର୍ ଆରି ଦେସ୍ନେ ନେତା ଆରି ଇଃସାଙ୍ଗ୍ନେ ମନ୍ତ୍ରିଇଂ ରିସିଙ୍ଗ୍ ଆର୍ଚେ ଆତେନ୍ ଞ୍ଜି ରୁଆକେ ତାଣ୍ଡେଚେ କେଆର୍କେ ଜେ, ସୁଆ ମେଇଂନେ ଗାଗ୍ଡ଼େ ଆଡ଼ାତ୍ରା ମେଃଡିଗ୍ କ୍ୟତି ଆରାଡିଂଆର୍କେ ଣ୍ଡୁ, କି ମେଇଂନେ ବାଆଃନେ ଉଗ୍ବଃ ଆଃ ମେଃଡିଗ୍ ଗିଃ ଆଲେଃଗେ ଣ୍ଡୁ, କି ମେଇଂନେ ସଃକ୍ନେ ସକାପାଟାଇ ଗି ଆଲେଃଗେ ଣ୍ଡୁ, କି ମେଇଂନେ ଗାଗ୍ଡ଼େଅରିଆ ସୁଆନେ ବାସ୍ନା ଡିଗ୍ ଆଲେଗେ ଣ୍ଡୁ ।
28 ନବୂଖଦ୍ନିତ୍ସର୍ ବାସଙ୍ଗ୍କେ, ଶଦ୍ରକ୍, ମୈଶକ୍ ଆରି ଅବେଦ୍ନଗୋନେ ପର୍ମେସର୍ ଦନ୍ୟ ଡିଂଲେ, ମେଃଡାଗ୍ଲା ମେଁ ନିଜେନେ ଦୁତ୍ ବେକେ ଆରି ମେଁନେ ମୁଡ଼ିନେ ଦାସ୍ଇଂ ମେଁଅରିଆ ବିସ୍ବାସ୍ ଡିଂଆର୍କେ ଆରି ନେନେ ପର୍ମେସର୍କେ ଆନ୍ତାର୍ଚେ ଯେନ୍ତିକି ବିନ୍ ମୁଡ଼ି ଦେବତା ଦେବ୍ତାକେ ସେବା କି ଆସାର୍ଲ ଆର୍ ଣ୍ଡୁ, ଆକେନ୍ସା ଇଃସାଙ୍ଗ୍ ସାମୁଆଁ ବିନେ ଆଡିଂଚେ ନିଜେ ନିଜେନେ ଗାଗ୍ଡ଼େ ଅପେଃ ଆର୍କେ, ମେଁ ଆମେଇଂକେ ରକ୍ୟା ଡିଂକେ ।
29 ଏନ୍ସା ନିଂ ଆକେନ୍ ଆଦେସ୍ ଡିଂଣ୍ଡିଂକେ ଜେ, ମୁଡ଼ି ସାପା ଜାତି, ଦେସ୍ଣ୍ଡ୍ରେ ଆରି ବିନ୍ ବିନ୍ ବାସାବାଦିଣ୍ଡ୍ରେ, ଶଦ୍ରକ୍, ମୈଶକ୍ ଆରି ଅବେଦ୍ନଗୋନେ ପର୍ମେସର୍ନେ ବିରୁଦ୍ରେ ମେଃଡିଗ୍ କାବାନେ ସାମୁଆଁ ବାସଙ୍ଗ୍ଆର୍ଏ, ମେଇଂ ଗନ୍ଦା ଗନ୍ଦା ଡିଂଚେ ଗ୍ୱାତଗ୍ ଆର୍ଏ ଆରି ମେଇଂନେ ଡୁଆ କତ୍ ଗାଦି ଡିଂଏ; ମେଃଡାଗ୍ଲା ଦେକ୍ରକମ୍ ରକ୍ୟା ଡିଂନ୍ସା ୟାନେ ଆରି ମେଃଡିଗ୍ ଦେବ୍ତା ଣ୍ଡୁ ।
30 ତେଲା ଇଃସାଙ୍ଗ୍ ଶଦ୍ରକ୍, ମୈଶକ୍ ଆରି ଅବେଦ୍ନଗୋନେ ବାବିଲ୍ ଦେସ୍ଅରିଆ ପଦ୍ ମ୍ନା ଆଡିଂକେ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)