ଦାନିଏଲ୍ନେ ଦର୍ସନ୍ ମେଣ୍ଡା ଆରି ଗିମିଃ
1 ବେଲ୍ଶତ୍ସର୍ ଇଃସାଙ୍ଗ୍ନେ ସାସନ୍ନେ ତୁର୍ତିୟ ମୁଆଁ ବେଲା ନିଂ ଦାନିଏଲ୍ ପର୍ତୁମ୍ ଦର୍ସନ୍ କେକ୍ନେ ଇଡ଼ିଂ ଆରି ମୁଇଂ ଦର୍ସନ୍ ମ୍ବାକେ । 2 ବାରି, ନିଂ ଦର୍ସନ୍ ରକମ୍ ଙ୍କେକେ; ନିଂ କେ କେଚେ ଙ୍କେକେ ଜେ, ନିଂ ଏଲମ୍ ଦେସ୍ ଲେଃକ୍ନେ ଶୂଶନ୍ ଇଃସାଙ୍ଗ୍ ଡୁଆଅରିଆ ଲେଃକେ; ଆରି, ଆତାନ୍ ଦର୍ସନ୍ନ୍ୟା ନିଂ ଙ୍କେକେ ଜେ, ନିଂ ଉଳୟ ଲଣ୍ଡିଆଃ ଡାଗ୍ରା ଲେଃକେ । 3 ତେଲା ନିଂ ମ୍ମୁଁଆଃ କେଚେ ଙ୍କେକେ ଜେ, କେଲା, ଲଣ୍ଡିଆଃ ସେଃମଁ ମୁଇଂ ମେଣ୍ଡା ତୁଆଁ ଲେଃକେ, ମେଁନେ ମ୍ବାକ୍ଲିଗ୍ ଡିରଙ୍ଗ୍ ଆରି ଆତେନ୍ ମ୍ବାକ୍ଲିଗ୍ ଡିରଙ୍ଗ୍ ଚ୍ଲେ; ମାତର୍ ମୁଇଂ ଡିରଙ୍ଗ୍ ବିନ୍ ବାନ୍ ଚ୍ଲେ ଆରି ମେଃନେ ଚ୍ଲେ, ଆତେନ୍ ପରେ ତାର୍କେ । 4 ନିଂ ଆତେନ୍ ମେଣ୍ଡାକେ ପଶ୍ଚିମ୍, ଉତର୍ ଆରି ଦକିନ୍ ଦିଗ୍କେ ଟମେଗ୍ନେ ଙ୍କେକେ; ଆରି, ମେଃଡିଗ୍ ପସୁ ଆତେନ୍ ସେଃମଁ ତୁଆଁନେ ଆୟାଆର୍କେ ଣ୍ଡୁ, କି ମେଁନେ ନ୍ତିବାନ୍ ଆଃମ୍ବ୍ରନେ ଜାଡିଗ୍ ଆଲେଃଗେ; ମାତର୍ ମେଁ ନିଜେନେ ଇକ୍ଚାରେ କାମ୍ ଡିଂଚେ ନିଜେକେ ଆମ୍ନାଚେ ବାସଙ୍ଗ୍କେ ।
5 ବାରି, ନିଂ ଆକେନ୍ ସାମୁଆଁ ଚିନ୍ତା ଡିଂ ଡିଂଚେ ଙ୍କେକେ ଜେ, କେଲା, ମୁଇଂ ଗିମିଃ ପଶ୍ଚିମ୍ ଦିଗ୍ବାନ୍ କ୍ଲିଗ୍ ଦର୍ତନି ଚିଣ୍ଡେଙ୍ଗ୍ଚେ ପାଙ୍ଗ୍କେ ଆରି ମେଁ ତୁବଃ ଆଲିଗ୍କେ ଣ୍ଡୁ; ଆରି, ଆତେନ୍ ଗିମିଃନେ ମ୍ବାକ୍ଲିଗ୍ ମ୍ମୁଁଆଃ ବିତ୍ରେ ମୁଇଂ କିକେ ୟାନେ ଡିରଙ୍ଗ୍ ଲେଃଗେ । 6 ଆରି, ନିଂ ମୁଃଡ଼ି ମ୍ବାକ୍ଲିଗ୍ ଡିରଙ୍ଗ୍ ଲେଃକ୍ନେ ମେଣ୍ଡାକେ ଲଣ୍ଡିଆଃ ସେଃମଁ ତୁଆଁନେ ଙ୍କେକେ, ମେଁ ପାକା ମେଁ ପାଙ୍ଗ୍ଚେ ନିଜେ ବପୁ ବାନ୍ ଆତେନ୍ ଆଡ଼ାତ୍ରା ୱିର୍କେ । 7 ବାରି, ନିଂ ଙ୍କେକେ ଜେ, ମେଁ ଆତେନ୍ ମେଣ୍ଡା ଡାଗ୍ରା ପାଙ୍ଗ୍କେ ଆରି ଆତେନ୍ ଆଡ଼ାତ୍ରା ଜାବର୍ ରିସା ଡିଂଚେ ଆତେନ୍ ମେଣ୍ଡାକେ ବାଗୁଏଃକେ ଆରି ମେଁନେ ମ୍ବାକ୍ଲିଗ୍ ଡିରଙ୍ଗ୍ ପାକ୍ଚି ବିଃକେ ଆରି ଆତେନ୍ ସେଃମଁ ତୁଆଁ ନ୍ସାଃ ଆତେନ୍ ମେଣ୍ଡାନେ ଆରି ବପୁ ଆଲେଃଗେ ଣ୍ଡୁ; ମାତର୍ ଆତେନ୍ ଗିମିଃ ଆମେକେ ତୁବଃ ଆଃଲଃଚେ ଟେଚାଃକେ, ଆରି ମେଁନେ ନ୍ତିବାନ୍ ଆତେନ୍ ମେଣ୍ଡାକେ ରକ୍ୟା ଡିଂନ୍ସାଃ ଜାଡିଗ୍ ଆଲେଃଗେ ।
8 ଏନ୍ଇଡ଼ିଂ ଆତେନ୍ ଗିମିଃ ନିଜ୍କେ ଜାବର୍ ଆଃମ୍ନାଚେ ବାସଙ୍ଗ୍କେ ଆରି ମେଁ ବପୁ ଲେଃଗ୍ନେ ବେଲା ମେଁନେ ମ୍ନାଃ ଡିରଙ୍ଗ୍ ପାକ୍ଚି ୱେଗେ । ଆରି, ଆତ୍ନେ ବାଦୁଲ୍ କିତଙ୍ଗ୍ନେ କ୍ଲିଗ୍ ପାକା ଅଁକ୍ଲିଗ୍ କିକେ ୟାନେ ଡିରଙ୍ଗ୍ ତାର୍କେ । 9 ବାରି, ଆତେନ୍ ଡିରଙ୍ଗ୍ଇଂନେ ମୁଇଂନେ ବିତ୍ରେବାନ୍ ମୁଇଂ ଡାଆଁ ଡିରଙ୍ଗ୍ ତାର୍ଚେ ଦକିନ୍ ଆରି ପୁରୁବ୍ନେ ରମ୍ୟ ଦେସ୍ ପାକା ଜାବର୍ ମ୍ନା ଡିଂକେ । 10 ଆରି, ଆତେନ୍ କିତଙ୍ଗ୍ଇନିନେ ସନ୍ୟଇଂନେ ଜାକ ଆଚ୍ଲେକେ ଆରି ଆତେନ୍ ସନ୍ୟଦଲ୍ଇଂ ଆରି କିତଙ୍ଗ୍ଇନିନେ ଉଃଡ଼ିରୁଆକେ ତୁବଃଅରିଆ ଆଃଲଃଚେ ଆମେଇଂକେ ଞ୍ଚ ଆଲ ଟେଚାଃଟେଣ୍ଡୁର୍ ଡିଂବିଆର୍କେ । 11 ଆଁ, ଆତେନ୍ ସନ୍ୟଇଂନେ ନେତା ବିରୁଦ୍ରେ ମେଁ ଆମ୍ନାଚେ ମେଁନେବାନ୍ କାଲାଆଃ ହମ୍ ବଲି ଡଙ୍ଗାକେ ଆରି ମେଁନେ ପବିତ୍ର ଜାଗା ଆଃପାଗ୍ଚି ବିଃକେ । 12 ବାରି, ଆଦେସ୍ ଅମାନି ଡିଂକେସାଃ କାଲାଆଃ ସୁଆ ବଲି ଏଃତେ ସନ୍ୟଦଲ୍ଇଂ ମେଁନେ ନ୍ତିଅରିଆ ଅପେଃକେ ଆରି ଆତେନ୍ ଡିରଙ୍ଗ୍ ସତ୍କେ ତୁବଃଅରିଆ ବିନାସ୍ ଆଃଡିଂକେ, ଆରି ନିଜେନେ ଇକ୍ଚାରେ କାମ୍ ଡିଂଚେ ସପଲ୍ ବାକେ ।
13 ଏନ୍ଇଡ଼ିଂ ନିଂ ମୁଇଂ ପବିତ୍ର ରେମୁଆଁ ସାମୁଆଁ ବାସଙ୍ଗ୍ନେ ନ୍ଦ୍ରିଗ୍କେ; ଆରି, ଜା ସାମୁଆଁ ବାସଙ୍ଗ୍କେ, ଆମେକେ ବିନ୍ ମୁଇଂ ପବିତ୍ର ରେମୁଆଁ ସାଲ୍ୟାକୁକେ, କାଲାଆଃ ସୁଆ ବଲି ଆରି ବିନାସ୍ ଆଡିଂନେ ଆଦେସ୍ ମାମାନେନ୍ସା ଆରି ଟେଚାନ୍ସା ପବିତ୍ର ଜାଗାନେ ଆରି ସନ୍ୟଇଂନେ ଅପେଃନେ ସାମୁଆଁ ମୁଃଡ଼ିନେ ଦର୍ସନ୍, ଆତେନ୍ ଉଃଡ଼ି ମୁଆଁ ଜାକ ଡିଂଏ ?
14 ତେଲା ମେଁ ଆନିଂକେ ବାସଙ୍ଗ୍କେ, ମ୍ବାର୍ ଅଜାର୍, ଞ୍ଜି ଶହ ଲମ୍ଡିଗ୍ ଆରି ଞ୍ଜିର୍ ଜାକ । ତେନ୍ ଦାପ୍ରେ ପବିତ୍ର ଜାଗା ପରିସ୍କାର୍ ଡିଂଏ ।
ଦର୍ସନ୍ନେ ଅର୍ତ ବାସଙ୍ଗ୍ନେ
15 ଇଡ଼ିଂ ନିଂ ଦାନିଏଲ୍ ଆକେନ୍ ଦର୍ସନ୍ ମ୍ବାକ୍ନେ ଇଡ଼ିଂ ଆତେନ୍ ବୁଜେନେ ନ୍ସାଃ ଚେସ୍ଟା ଣ୍ଡିଂକେ; ଆରି କେଲା, ରେମୁଆଁ ରକମ୍ ମୁଇଂ ରେମୁଆଁ ସେଃମଁ ତୁଆଁକେ । 16 ବାରି, ଉଳୟ ଲଣ୍ଡିଆଃ ବିତ୍ରେବାନ୍ ନିଂ ରେମୁଆଁନେ ଅଃନେ ନ୍ଦ୍ରିଗ୍କେ, ମେଁ ୱାଚେ ବାସଙ୍ଗ୍କେ, ଅ ଗାବ୍ରିଏଲ୍, ଆକେନ୍ ରେମୁଆଁକେ ଦର୍ସନ୍ନେ ଅର୍ତ ଆଃବୁଜେ ବିଃ । 17 ତେଲା ନିଂ ମୁଃଡ଼ି ଜାଗାଅରିଆ ତୁଆଁ ନ୍ଲେଃଗେ, ତେନ୍ ଜାଗାନେ ଡାଗ୍ରା ମେଁ ପାଙ୍ଗ୍କେ; ବାରି, ମେଁ ପାଙ୍ଗ୍ଲା, ନିଂ ବୁଟମେଗ୍ ଉଁୱେକେ ଆରି ମୁକ୍ଚିଚେ ନ୍ଲଃକେ; ମାତର୍ ମେଁ ଆନିଂକେ ବାସଙ୍ଗ୍କେ, ଅ ରେମୁଆଁ ଉଙ୍ଗ୍ଡେ, ବୁଜେ; ମେଃଡାଗ୍ଲା ଆକେନ୍ ଦର୍ସନ୍ ଜୁଗ୍ ଡାନେ ବେଲାନେ ସାମୁଆଁ । 18 ମେଁ ଆନିଂକେ ସାମୁଆଁ ବାସଙ୍ଗ୍ନେ ବେଲା ନିଂ ତୁବଃ ପାକା ଆଃସାର୍ମୁଆଃଚେ ଜାବର୍ ଲିଲେମୁଁଆଃ ମ୍ବିଃକେ; ମାତର୍ ମେଁ ଲିଗ୍ଚେ ଆନିଂକେ ଆଃତୁଆଁକେ । 19 ଆରି, ମେଁ ଆନିଂକେ ବାସଙ୍ଗ୍କେ, କେଲା, ରିସାନେ ଇସାବ୍ ବେଲା ମେଃନେ ଗଟେଏ, ଆତେନ୍ ନିଂ ଆନାକେ ମ୍ବାସଙ୍ଗ୍ଏ; ମେଃଡାଗ୍ଲା ଆକେନ୍ ଆଃରେବକ୍ନେ ସାରାସାରି ବେଲାନେ ସାମୁଆଁ ।
20 ନାଁ ମୁଃଡ଼ି ମେଣ୍ଡା ନାକେକେ, ମେଁନେ ମ୍ବାକ୍ଲିଗ୍ ଡିରଙ୍ଗ୍ ମାଦୀୟ ଆରି ପାରସିକ ରାଜାଇଂନେ । 21 ବାରି, ଆତେନ୍ ଚ୍ଲେ ଲାଏକ୍ନେ ଗିମିଃ ଯବନ ଦେସ୍ନେ ଇଃସାଙ୍ଗ୍ ଆରି ମେଁନେ ମ୍ବାର୍ ମ୍ମୁଁଆଃନେ ମଜେ ଲେଃକ୍ନେ ମ୍ନା ଡିରଙ୍ଗ୍ ପର୍ତୁମ୍ ଇଃସାଙ୍ଗ୍ । 22 ଆରି, ମୁଃଡ଼ି ଡିରଙ୍ଗ୍ ପାକ୍ଚିଚେ ଆତେନ୍ ଜାଗାଅରିଆ ଜେ ଅଁକ୍ଲିଗ୍ ଡିରଙ୍ଗ୍ ତାର୍କେ, ଅଃକେନ୍ରେ ଆତେନ୍ ଦେସ୍ଣ୍ଡ୍ରେ ବିତ୍ରେବାନ୍ ଅଁକ୍ଲିଗ୍ ରାଜି ତାର୍ନେ ନାମ୍ୟାଃଏ, ମାତର୍ ମେଁ ଜିତେକ୍ନେ ରକମ୍ ଜା ଡିଗ୍ ଆଡିଂଣ୍ଡୁ ।
23 ବାରି, ମେଇଂନେ ରାଜିନେ ଇସାବ୍ ବେଲା ଉଃଡ଼ିବେଲା ଆଦେସ୍ ଅମାନିଣ୍ଡ୍ରେଇଂନେ ଆଦେସ୍ ଅମାନି ଡିଂନେ ପୁରନ୍ ଡିଂଏ, ଅଃତେନ୍ବେଲା ବୟାଙ୍କାର୍ ତୁମୁଁଆଃ ଆରି ଡାଟାମ୍ ସାମୁଆଁ ଜ୍ଞାନି ମୁଇଂ ଇଃସାଙ୍ଗ୍ ତାର୍ଏ । 24 ମେଁ ବପୁଅରିଆ ଡାଟ୍ ଡିଂଏ, ମାତର୍ ମେଁନେ ନିଜର୍ ବପୁରେ ଣ୍ଡୁ; ଆରି, ମେଁ କାବା ବାବ୍ରେ ବିନାସ୍ ଆଃଡିଂଏ ଆରି ମ୍ନା ଡିଂଚେ ନିଜର୍ ଇକ୍ଚାରେ କାମ୍ ଡିଂଏ; ଆରି, ମେଁ ସକ୍ତିସାଲିଇଂକେ ଆରି ପବିତ୍ର ରେମୁଆଁଇଂକେ ବିନାସ୍ ଆଃଡିଂଏ । 25 ବାରି, ନିଜେନେ ଚାଲାକିବାନ୍ ମେଁନେ ନ୍ତିଅରିଆ ନାଲେନେ ପୁରନ୍ ଡିଂଏ ଆରି ମେଁ ନିଜେନେ ମନ୍ ପାରାନ୍ଅରିଆ ଆକାର୍ ଡିଂଚେ ଆରି ମେଇଂନେ ନିରାପଦ୍ ବେଲା ଗୁଲୁଏ ରୁଆକେ ବିନାସ୍ ଆଃଡିଂଏ; ଆରି, ନେତାଇଂନେ ନେତାନେ ବିରୁଦ୍ରେ ତୁଆଁଏ; ମାତର୍ ମେଁ ବିନା ନ୍ତିରେ ପାକ୍ଚି ୱେଏ । 26 ଆରି, ଲମ୍ଡିଗ୍ ଆରି ଞ୍ଜିର୍ ବିସଏରେ ବାସଙ୍ଗ୍ବକ୍ନେ ଦର୍ସନ୍ ସତ୍ । ମାତର୍ ନାଁ ଆକେନ୍ ଦର୍ସନ୍ ବୁଡ଼ିଚେ ବ । ମେଃଡାଗ୍ଲା ଆତେନ୍ ଇଡ଼ିଂଡେ ପାଂଡିଂକ୍ନେ ଗୁଲୁଏ ଦିନ୍ନେ ସାମୁଆଁ ।
27 ଇଡ଼ିଂ ନିଂ ଦାନିଏଲ୍ ଆଲିଆ ଣ୍ଡିଂକେ ଆରି ଗୁଲୁଏ ଦିନ୍ ଜାକ ଆଃସି ନ୍ଲେଃଗେ; ତେନ୍ ଇଡ଼ିଂ ନିଂ ତଃଡ଼ିଆଚେ ଇଃସାଙ୍ଗ୍ ବିବକ୍ନେ କାମ୍ ଣ୍ଡିଂକେ; ଆରି ନିଂ ଆତେନ୍ ଦର୍ସନ୍ଅରିଆ କାବା ଣ୍ଡିଂକେ, ମାତର୍ ଜାଡିଗ୍ ତେନ୍ ଦର୍ସନ୍ ଆବୁଜେ ଆର୍କେ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)