1 ସାପା ବିସ‍ଏନେ ଆତ୍‌ଲା ମୁଇଂ ବେଲା ଲେଃକେ ଆରି କିତଂ ଆଲ ସାପା ଜଜନା ଟିକ୍‌ ବେଲା ଗଟେଏ । 2 ଜନମ୍‌ ଡିଙ୍ଗ୍‌ନେ ବେଲା ଆରି ଗୁଏନେ ବେଲା, ସ୍ଲାଃ ଉଂନ୍‌ସା ବେଲା ଲେଃକେ, ସ୍ଲାଃକେ ତାଗ୍‌ନେ ମୁଇଂ ବେଲା ଡିଗ୍‌ ଲେଃକେ । 3 ବାଗୁଏନେ ବେଲା ଲେଃକେ ଆରି ନିମାଣ୍ଡା ଆଡିଙ୍ଗ୍‌ସା ମୁଇଂ ବେଲା ଲେଃକେ, ପାକ୍‌ଚିନେ ବେଲା ଲେଃକେ ଆରି ଆଃରେନେ ଡିଗ୍‌ ବେଲା ଲେଃକେ । 4 ଅଃନେ ଡିଗ୍‌ ବେଲା ଲେଃକେ ଆରି ଲୁଆଃନେ ଡିଗ୍‌ ବେଲା ଲେଃକେ । ଗ୍ରି ବଗ୍‌ଚେ ଅଃନେ ଡିଗ୍‌ ବେଲା ଲେଃକେ ଆରି ୱାଃଡ଼େଙ୍ଗ୍‌ନେ ଡିଗ୍‌ ବେଲା ଲେଃକେ । 5 ବ୍ରି ତ୍ଲାଗ୍‌ନେ ବେଲା ଲେଃକେ ଆରି ବ୍ରି ରାଃସିଙ୍ଗ୍‌ନେ ଡିଗ୍‌ ବେଲା ଲେଃକେ । ଆରି କଣ୍ଡନେ ଡିଗ୍‌ ବେଲା ଲେଃକେ ବାରି କଣ୍ଡମ୍ଲିଃନେବାନ୍‌ ସ୍ଲ ଲେଃନ୍‌ସା ଡିଗ୍‌ ସମୟ୍‌ ଲେଃକେ । 6 ତୁର୍‌ନେ ସମୟ୍‌ ଲେଃକେ ଆରି ଆଃବନେ ଡିଗ୍‌ ସମୟ୍‌ ଲେଃକେ । ବନେ ଡିଗ୍‌ ସମୟ୍‌ ଲେଃକେ ଆରି ଆଃଲଃବିଃନେ ଡିଗ୍‌ ସମୟ୍‌ ଲେଃକେ । 7 ସ୍ୟାଃନେ ସମୟ୍‌ ଲେଃକେ ଆରି ତଗ୍‌ନେ ସମୟ୍ ଲେଃକେ । ବୁଙ୍ଗ୍‌ ଲେଃନେ ସମୟ୍ ଲେଃକେ ଆରି ସାମୁଆଁ ବାସଙ୍ଗ୍‌ନେ ସମୟ୍‌ ଲେଃକେ । 8 ଆଲାଦ୍‌ ଡିଙ୍ଗ୍‌ନେ ସମୟ୍‌ ଲେଃକେ ଆରି ଗୁର୍‌ନା ଡିଙ୍ଗ୍‌ନେ ସମୟ୍‌ ଲେଃକେ । ଯୁଦ୍‌ ଡିଙ୍ଗ୍‌ନେ ସମୟ୍‌ ଲେଃକେ ଆରି ସାନ୍ତି ଡିଙ୍ଗ୍‌ନେ ଡିଗ୍‌ ସମୟ୍‌ ଲେଃକେ ।

9 ମୁଇଂ ସ୍ଲେରେ ନିଜର୍‌ କାମ୍‌ବାନ୍‌ ମେଁ ମେଃ ଲାବ୍‌ ବାଏ ? 10 ମାପ୍‌ରୁ ରେମୁଆଁ ଉଂଡେଇଂକେ ତାନ୍ଦ୍ରା ଡିଙ୍ଗ୍‌ ନ୍‌ସାଃ ଆଣ୍ଡିନେ କାମ୍‌ ବିଃବକେ, ଆତେନ୍‌ ନେଙ୍ଗ୍‌ କେନ୍ଲେକେ । 11 ମେଁ ସାପା ବିସ‍ଏକେ ମେଁନେ ସମୟ୍‌ରେ ସବା ଆଡିଙ୍ଗ୍‌ବକେ । ଏଲେଡିଗ୍‌ ମେଁ ମେଙ୍ଗ୍‌ନେ ରୁଦୟ୍‌ନିଆ କାଲାଆଃ ନ୍‌ସା ବକେ । ଏଲେଡିଗ୍‌ ମାପ୍‌ରୁ ପର୍‌ତୁମ୍‌ ବାନ୍‌ ସାରାସାରି ଜାକ ଆଣ୍ଡିନ୍‌ କାମ୍‌ ଡିଙ୍ଗ୍‌ବକେ । ରେମୁଆଁ ଆତ୍‌ନେ ବିସ‍ଏରେ ବୁଜେ ଆୟାକେ ଣ୍ଡୁ । 12 ନେଙ୍ଗ୍‌ ମ୍ୟାଃନ୍ଲେକେ ଜେ, ଜିବନ୍‌ ସାରା ଜାକ ସାର୍‌ଦା ଆରି ନିମାଣ୍ଡା କାମ୍‌ ଡିଙ୍ଗ୍‌ନେ ବାଦୁଲ୍‌ ମେଙ୍ଗ୍‌ନେ ଆରି ମେଃଡିଗ୍‌ ବଲ୍‌ ବିଷୟ୍‌ ଣ୍ଡୁ । 13 ଆରି, ସର୍‌ତେ ରେମୁଆଁ ଚଙ୍ଗ୍‌ ଉଗ୍‌ଚେ ନିଜର୍‌ନେ ସାପା କାମ୍‌ନ୍ନିଆ ସୁକ୍‌ ବାଆର୍‌ଏ, ଆକେନ୍‌ ମାପ୍‌ରୁନେ ଦାନ୍‌ । 14 ନେଙ୍ଗ୍‌ ମ୍ୟାଃନ୍ଲେକେ ଜେ, ମାପ୍‌ରୁ ଜା ସାପା ଡିଙ୍ଗ୍‌ମ୍ୟାକେ, ଆତେନ୍ ଜିବନ୍‌ ସାରା ଜାକ ଡିଙ୍ଗ୍‌ମ୍ୟାକେ । ଆତେନ୍‌ ଆଃମ୍ନାଃ ଆୟା ଣ୍ଡୁ କି ଗଣ୍ଡା ଆଃଡିଙ୍ଗ୍‌ ଆୟା ଣ୍ଡୁ । ଆରି ରେମୁଆଁଇଂ ମାପ୍‌ରୁନେ ସାମ୍‌ନାରେ ବୁଟନ୍‌ସାଃ ମେଁ ଆତେନ୍‌ ଡିଙ୍ଗ୍‌ବକେ । 15 ମେଃନେ ଲେଃକେ, ଆତେନ୍‌ ଲେଃଗେ । ବାରି ମେଃନେ ଡିଙ୍ଗ୍‌ଏ, ଆତେନ୍‌ ଆଃ ଲେଃଗେ । ଆରି ଆଣ୍ଡିନେ ସାମୁଆଁ ଗଟେୱେଲେଃଗେ, ମାପ୍‌ରୁ ଆତେନ୍‌ ସାମୁଆଁକେ ବାର୍‌ମୁଇଂତର୍‌ ତୁର୍‌ମ୍ୟାଃକେ ।

16 ଆରି, ନେଙ୍ଗ୍‌ ସ୍ନି ଆଲ ବିଚାର୍‌ ଡିଙ୍ଗ୍‌ନେ ଜାଗାନ୍ନିଆ ଙ୍କେକେ, ଆତ୍‌ଅରିଆ ଦୁସ୍‌ଟ ଡିଗ୍‌ ଲେଃକେ, ବାରି ଦର୍ମ ଡିଙ୍ଗ୍‌ନେ ଜାଗାନ୍ନିଆ ଙ୍କେକେ, ଆତ୍‌ଅରିଆ ଡିଗ୍ ଦୁସ୍‌ଟ ଡିଙ୍ଗ୍‌ନେ ଲେଃକେ । 17 ନେଙ୍ଗ୍‌ ମନେ ମ୍ୱାସଙ୍ଗ୍‌କେ, "ମାପ୍‌ରୁ ଦାର୍ମିକ୍‌କେ ଆରି ଦୁସ୍‌ଟ ଡିଙ୍ଗ୍‌ନେ ରେମୁଆଁକେ ବିଚାର୍‌ ଡିଙ୍ଗ୍‌ଏ । ମେଃଡାଗ୍‌ଲା ସାପା ମନ୍‌ନେ ବାବ୍‌ନା ଆରି ସାପା କାମ୍‌ ଡିଙ୍ଗ୍‌ନେ ସମୟ୍‌ ଲେଃକେ ।" 18 ନେଙ୍ଗ୍‌ ମନେ ମନେ ମ୍ୱାବେକେ, "ମାପ୍‌ରୁ ଡିରକମ୍‌ ରେମୁଆଁ ଜାତିକେ ଉଂଡେଇଂକେ ପରିକ୍ୟା ଡିଙ୍ଗ୍‌ଏ ଆରି ମେଇଂ ଜେ ନିଜେ ପଶୁ ରକମ୍‌, ଆକେନ୍‌ ଡିରକମ୍‌ ମେଇଂ କେଆର୍‌ଏ, ଆତେନ୍‌ସା ମେଇଂ ଆତ୍‌ଲା ଆକେନ୍‌ ଡିଙ୍ଗ୍‌ଡିଙ୍ଗ୍‌କେ ।" 19 ମେଃଡାଗ୍‌ଲା ରେମୁଆଁ ଜାତିନେ ଉଂଡେଇଂ ଆଡ଼ାତ୍ରା ମେଃ ଗଟେଏ, ପସୁଇଂନେ ଆଡ଼ାତ୍ରା ଡିଗ୍‌ ଆତେନ୍‌ ଗଟେଏ; ସାପାରେ ଆଡ଼ାତ୍ରା ଡିଗ୍‌ ମୁଇଂ ରକମ୍‌ ଗଟ୍‌ନା ଗଟେଏ; କିମେ ଡିରକମ୍‌ ଗୁଏଃଏ, ମେଁ ଡିଗ୍‌ ଦେତ୍‌ରକମ୍‌ ଗୁଏଃଏ; ବାରି, ସାପାରେନେ ଜିବନ୍‌ ମୁଇଂ । ଆରି, ପସୁବାନ୍‌ ରେମୁଆଁନେ ମେଃଡିଗ୍‌ ମ୍ନାଃ ଣ୍ଡୁ, ମେଃଡାଗ୍‌ଲା ସାପା ସରାଃ । 20 ସାପାରେ ମୁଇଂ ଜାଗାନ୍ନିଆ ୱେଆର୍‌ଏ; ସାପାରେ ଦୁଲିବାନ୍‌ ତିଆର୍‌ ଡିଙ୍ଗ୍‌ନେଃଲେକେ ଆରି ସାପାରେ ବାର୍‌ମୁଇଂତର୍‌ ଦୁଲିନିଆ ମିସୁଃ ୱେଆର୍‌ଏ । 21 ରେମୁଆଁନେ ଆତ୍ମା ଆଡ଼ାତ୍ରା ୱେଏ ଆରି ପସୁନେ ଆତ୍ମା ମଚ୍‌ପୁର୍‌ନେ ଆଲ ୱେଏ ଡାଗ୍‌ଚେ ଜା ମ୍ୟାଲେଃକେ ? 22 ଆତେନ୍‌ସା ରେମୁଆଁ ନିମାଣ୍ଡା କାମ୍‌ନ୍ନିଆ ସାର୍‌ଦା ଡିଙ୍ଗ୍‌ନେ ବାଦୁଲ୍‌ ଆରି ମେଁନେ ବାରି ବଲ୍‌ ବିଷୟ୍‌ ଣ୍ଡୁ ଡାଗ୍‌ଚେ ନେଙ୍ଗ୍‌ ଙ୍କେକେ । ମେଃଡାଗ୍‌ଲା ଆତେନ୍‌ ଆଃ ମେଁନେ ଅଦିକାର୍‌ । ମେଁ ଇଡ଼ିଙ୍ଗ୍‌ ଜା ଗଟେଏ, ଆତେନ୍‌ କେନ୍‌ସା ଜା ଆମେକେ ଆଆଁଣ୍ଡେ ଡୁଙ୍ଗ୍‌ପାଙ୍ଗ୍‌ଏ ?