1 ଆତେନ୍‌ ଦିନା ମେଇଂ ରେମୁଆଁଇଂନେ ସାମ୍‌ନାରେ ମୋଶାନେ ବଇବାନ୍‌ ପଡ଼େ ଆର୍‌କେ । ବାରି, ଆତ୍‌ ବିତ୍‌ରେ ଗୁଆର୍‌ବକ୍ନେ ଆକେନ୍‌ ସାମୁଆଁ ମିଲେକେ ଜେ, ଅମ୍ମୋନୀୟ ବାରି ମୋୟାବୀୟ ରେମୁଆଁଇଂ ଡିଡା ଜାକ ପର୍‌ମେସର୍‌ନେ ସମାଜ୍‌ନିଆ ଆଗାଆର୍‌ ଣ୍ଡୁ, 2 ମାତର୍‌ ମେଇଂ କାଦି ବାରି ଣ୍ଡିଆ ଡୁଂୱେଚେ ଇସ୍ରାଏଲ୍‌ ଉଂଡେଇଂକେ ଆଅବାଆର୍‌କେ, ମାତର୍‌ ଆମେଇଂକେ ଅବିସାପ୍‌ ବିନ୍‌ସା ମେଙ୍ଗ୍‌ନେ ବିରଦ୍‌ରେ ବିଲୀୟମ୍‌କେ ଆଜ୍ରି ବିଃକେ । ଏଲେଡିଗ୍‌ ନେନେ ପର୍‌ମେସର୍‌ ଆତେନ୍‌ ଅବିସାପ୍‌କେ ଆସିର୍ବାଦ୍‌ ଆଃଡିଂକେ । 3 ଆତେନ୍‌ ବେଲା ମେଇଂ ଆକେନ୍‌ ନିଅମ୍‌ ଅଁଚେ ଇସ୍ରାଏଲ୍‌ବାନ୍‌ ସାପାରେ ମିସୁଲେକ୍ନେ ରେମୁଆଁଇଂକେ ଅଲ୍‌ଗା ଆଃଡିଂକେ ।

4 ଆତ୍‌ବା ଇଲୀୟାଶୀବ୍‌ ପୁଜାରି ନେନେ ପର୍‌ମେସର୍‌ନେ ଡୁଆ ଡାଗ୍ରା ଲେକ୍ନେ ସାପା ବାକ୍ରାନେ ଅଦିକାରି ବାବ୍‌ରେ ନିଯୁକ୍ତି ଡିଂକେ ବାରି ମେଁ ଟୋବୀୟନେ କୁଟୁମ୍‌ ଲେଃଗେ, 5 ଇଲୀୟାଶୀବ୍‌ ଟୋବୀୟ ଆତ୍‌ଲା ମୁଇଂ ମ୍ନା ବାକ୍ରା ତିଆର୍‌ ଆଃଡିଂବକେ, ମାତର୍‌ ଅଃସେ ରେମୁଆଁଇଂ ଆତେନ୍‌ ଜାଗାନ୍ନିଆ କାଦି ବଲି, ଦୁପ୍‌ ଆରି ତାଲିମୁତା ଆରି ଆଦେସ୍‌ ଇସାବ୍‌ରେ ଲେବୀୟ ବାରି ଅସ୍‌ମାର୍‌ ସାର୍‌ଣ୍ଡ୍ରେଇଂ ବାରି ଜାଗୁଆଲ୍‌ଇଂ ଆତ୍‌ଲା ବିଃନେ କାଦି, ତ୍ମିକ୍ନେ ଅଙ୍ଗୁର୍‌ରସ୍‌ ବାରି ଞ୍ଚୁନେ ଗୁଆବାଗ୍‌ ବାନ୍‌ ମୁଇଂ ବାଗ୍‌ । ବାରି, ପୁଜାରିଇଂନେ ଆତ୍‌ଲା ଆଃଗୁବନ୍‌ସା ଇନାମ୍‌ ବଆର୍‌ଡିଂଗେ । 6 ମାତର୍‌ ନେଙ୍ଗ୍‌ ଆକେନ୍‌ ବେଲା ଯିରୂଶାଲମନିଆ ନାଲେଃଗେ ଣ୍ଡୁ, ମେଃଡାଗ୍‌ଲା ବାବିଲନ୍‌ନେ ଅର୍ତ୍ତକ୍ଷସ୍ତ ରାଜା ସାସନ୍‌ ଡିଂନେ ବତିଶ୍‌ ମୁଆଁ ବେଲା ନେଙ୍ଗ୍‌ ରାଜା ଡାଗ୍ରା ଉଁୱେକେ ବାରି ଉଡ଼ିଦିନା ଇଡ଼ିଂ ରାଜାକେ ବିଦାୟ୍‌ ଡିଂନ୍‌ସା ଆଦେସ୍‌ ନ୍‌ସାଲ୍ୟାଃକେ । 7 ଆତ୍‌ବାନ୍‌ ନେଙ୍ଗ୍‌ ଯିରୂଶାଲମନିଆ ପାଙ୍ଗ୍‌ଚେ ଇଲୀୟାଶୀବ୍‌, ଟୋବୀୟ ଆତ୍‌ଲା ପର୍‌ମେସର୍‌ ଡୁଆନେ ବାଜାର୍‌ନିଆ ମୁଇଂ ବାକ୍ରା ତିଆର୍‌ ଆଃଡିଂଚେ ଆଣ୍ଡିନେ ବୁଲ୍‌ ଡିଂମ୍ୱଗେ, ଆତେନ୍‌ ନେଙ୍ଗ୍‌ ମ୍ୱୁଜେକେ । 8 ଆତ୍‌ବା ନେଙ୍ଗ୍‌ ଜାବର୍‌ ରିସା ଡିଂଚେ ଆତେନ୍‌ ବାକ୍ରାବାନ୍‌ ଟୋବୀୟନେ ଡୁଆନେ ସାପା ଜିନିଷ୍‌କେ ବାଏରେ ଆତାର୍‌ଚେ ଜଗ୍‌ତ୍ଲାଗ୍‌ମ୍ୱିଃକେ । 9 ତେଲା ନେଙ୍ଗ୍‌ ଆଦେସ୍‌ ମ୍ୱିଲା, ମେଇଂ ସାପା ବାକ୍ରାକେ ପବିତ୍ର ଆଃଡିଂକେ । ଇଡ଼ିଂ ନେଙ୍ଗ୍‌ ଆତ୍‌ଅରିଆ ବାର୍‌ମୁଇଂତର୍‌ ପର୍‌ମେସର୍‌ ଡୁଆନେ ତାଲିମୁତାକେ ବାରି କାଦି ବଲି ଆରି ଦୁପ୍‌ ଡୁଙ୍ଗ୍‌ମ୍ପାଂକେ ।

10 ବାରି, ନେଙ୍ଗ୍‌ ଙ୍କେକେ ଯେ, ଲେବୀୟଇଂନେ ବାଟା ଆମେଇଂକେ ବିଃଆବଗେ ଣ୍ଡୁ । ଆତେନ୍‌ସା ସାପା କାମ୍‌ ଡିଂଣ୍ଡ୍ରେ ଲେବୀୟଇଂ ବାରି ଅସ୍‌ମାର୍‌ସାର୍‌ଣ୍ଡ୍ରେ ପାର୍‌ତନା ଡୁଆ ଆନ୍ତାର୍‌ଚେ ନିଜର୍‌ ନିଜର୍‌ନେ ଜାଗାନ୍ନିଆ ୱେଆର୍‌କେ । 11 ତେଲା ମେଁସା ପର୍‌ମେସର୍‌ନେ ଡୁଆକେ ଆନ୍ତାର୍‌ବଆର୍‌କେ ? ଆକେନ୍‌ ବାସଙ୍ଗ୍‌ଚେ ନେଙ୍ଗ୍‌ ଅଦିକାରି ରେମୁଆଁଇଂ ଏତେ ଅଡ଼୍‌କା ଅଡ଼୍‌କି ଣ୍ଡିଂକେ, ବାରି, ନେଙ୍ଗ୍‌ ଆମେଇଂକେ ମୁଇଂତୁଗ୍‌ ଆଃଡିଂଚେ ନିଜର୍‌ ନିଜର୍‌ନେ ପଦବିନିଆ ଆଃକ ବକେ । 12 ତେଲା ସାପା ଯିହୁଦାନିଆ କିଆଉଁଆଃ ବାରି ଅଙ୍ଗୁର୍‌ରସ୍‌ ବାରି ଞ୍ଚୁନେ ଗୁଆବାଗ୍‌ ବାନ୍‌ ମୁଇଂ ବାଗ୍‌ ବନେ ଡୁଆନିଆ ଡୁଙ୍ଗ୍‌ପାଙ୍ଗ୍‌ ଆର୍‌କେ । 13 ତେଲା ନେଙ୍ଗ୍‌ ଶେଲିମୀୟ ପୁଜାରିକେ ବାରି ସାଦୋକ ଗ୍ରକେ ବାରି ଲେବୀୟଇଂନେ ବାନ୍‌ ପଦାୟକେ କିଆ ଗ୍ଲି ଲେଃକ୍ନେ ଡୁଆ ସାପାନେ ମୁକିଆ ନ୍ନାଡିଂକେ । ମେଙ୍ଗ୍‌ନେ ଆଲ ମତ୍ତନୀୟନେ ଏଗ୍‌ଲେଣ୍ଡେ ସକ୍‌କୂରନେ ଉଂଡେ ହାନନ୍‌ ଲେଃଗେ । ମେଃଡାଗ୍‌ଲା ମେଇଂ ବିସ୍‌ବାସ୍‌ରେ ଲେଃଗେ, ଆତେନ୍‌ସା ନାନେ ବୟାଁଇଂକେ ଡୁଏତୁଏଃନେ କାମ୍‌ ମେଙ୍ଗ୍‌ନେ ଡିଂକେ ।

14 ଏ ନେଙ୍ଗ୍‌ନେ ପର୍‌ମେସର୍‌, ଆକେନ୍‌ ବିସ‍ଏରେ ଆନେଙ୍ଗ୍‌କେ ମନେ ତ୍ଲାଗ୍‌, ବାରି, ନେଙ୍ଗ୍‌ ନେଙ୍ଗ୍‌ନେ ପର୍‌ମେସର୍‌ନେ ଡୁଆ ବାରି ଆତ୍‌ଅରିଆ ପାଲନ୍‌ ଡିଂନେ ବିସ‍ଏରେ ମେଃ ନିଅମ୍‌ ଡିଂବକେ, ନେଙ୍ଗ୍‌ ଡିଂମ୍ୱକ୍ନେ ଆତେନ୍‌ ନିମାଣ୍ଡାଃ କାମ୍‌ ସାପା ଆଆବଃଗେ

15 ଆତେନ୍‌ ବେଲା ନେଙ୍ଗ୍‌ ଯିହୁଦାଇଂନେ ବିତ୍‌ରେ ଉଡ଼ିରୁଆକେ ପୁଣ୍ଡେନେ ଦିନ୍‌ ଅଙ୍ଗୁର୍‌ ଆଃଲୁଏଃନେ ବାରି ଗ୍ନାଗ୍‌ ବିତ୍‌ରେ ଡୁଂପାଙ୍ଗ୍‌ନେ ବାରି ଗଦ ଆଡ଼ାତ୍ରା ଜିନିସ୍‌ ଆଃନିଗ୍‌ନେ, ବାରି ବିଶ୍ରାମ୍‌ ଦିନା ଅଙ୍ଗୁର୍‌ ରସ୍‌, ଅଙ୍ଗୁର୍‌ ଚୁଚୁ ବାରି ଲିୱା ଚୁଚୁ ବାରି ସାପା ରକମ୍‌ନେ ଅଜନ୍‌ ଯିରୂଶାଲମନିଆ ଡୁଙ୍ଗ୍‌ପାଙ୍ଗ୍‌ନେ ଙ୍କେକେ । ବାରି, ଆଣ୍ଡିନେ ଦିନା ମେଇଂ ଚଙ୍ଗ୍‌ନେ ଜିନିସ୍‌ ସଆର୍‌କେ, ଆତେନ୍‌ ଦିନା ନେଙ୍ଗ୍‌ ଆମେଇଂକେ ଆଃଚେତା ମ୍ୱିକେ 16 ବାରି ଇନିନିଆ ସୋରୀୟ ରେମୁଆଁଇଂ ବାସାଆର୍‌ଡିଂଗେ । ମେଇଂ ଆଃଡ଼ ବାରି ସାପା ରକମ୍‌ନେ ସଃନେ ଜିନିସ୍‌ ଡୁଙ୍ଗ୍‌ପାଙ୍ଗ୍‌ଚେ ପୁଣ୍ଡେନେ ଦିନା ଯିହୁଦାନେ ଉଙ୍ଗ୍‌ଡେଇଂ ଡାଗ୍ରା ବାରି ଯିରୂଶାଲମନିଆ ସଆର୍‌କେ । 17 ଇଡ଼ିଂ ନେଙ୍ଗ୍‌ ଯିହୁଦାନେ ସାସନ୍‌ ଡିଂଣ୍ଡ୍ରେଇଂ ଏଃତେ ଅଡ଼୍‌କା ଅଡ଼୍‌କି ଡିଂଚେ ଆମେଇଂକେ ମ୍ୱାସଙ୍ଗ୍‌କେ, "ପେ ପୁଣ୍ଡେନେ ଦିନା ଅପବିତ୍ର ଆଃଡିଂଚେ ଆକେନ୍‌ ଡିରକମ୍‌ କରାପ୍‌ କାମ୍‌ ଡିଂପେଡିଂ ?" 18 ପେନି ନ୍ତାଇଂ ମେଃନେ ଦେକ୍‌ରକମ୍‌ କାମ୍‌ ଡିଂଆବଗେ ? ବାରି, ଆତେନ୍‌ସା ନେନେ ପର୍‌ମେସର୍‌ ନେ ଆଡ଼ାତ୍ରା ବାରି ଆକେନ୍‌ ଇନି ଆଡ଼ାତ୍ରା ଆକେନ୍‌ ସାପା ଅମଙ୍ଗଲ ଆଃଗଟେ ଆବକେ ? ଏଲେଡିଗ୍‌ ପେ ପୁଣ୍ଡେନେ ଦିନା ଅପବିତ୍ର ଆଃଡିଂଚେ ଇସ୍ରାଏଲ୍‌ ଆଡ଼ାତ୍ରା ବାରି ରିସା ଆଃଡିଂପେଡିଂକେ ।

19 ଏନ୍‌ଇଡ଼ିଂ ପୁଣ୍ଡେନେ ଦିନା ସିସେ ନୁଗ୍‌ ଯିରୂଶାଲମନେ କାପାଟ୍‌ ସାପା ତାଙ୍ଗ୍‌କିଗ୍‌ ଡିଙ୍ଗ୍‌ନେ ବେଲା ନେଙ୍ଗ୍‌ କାପାଟ୍‌ ସାପା ବନ୍ଦ୍‌ ଆଡିଙ୍ଗ୍‌ ନ୍‌ସା ଆଦେସ୍‌ ମ୍ୱିକେ, ବାରି ପୁଣ୍ଡେନେ ଦିନା ମାପାଙ୍ଗ୍‌ ଜାକ କାପାଟ୍‌ ମାରଃନ୍‌ସାଃ ଆଦେସ୍‌ ମ୍ୱିକେ । ବାରି, ପୁଣ୍ଡେନେ ଦିନା ମେଃଡିଗ୍‌ ଅଜନ୍‌ ବିତ୍‌ରେ ଡୁଙ୍ଗ୍‌ମାପାଙ୍ଗ୍‌ ନ୍‌ସା ନେଙ୍ଗ୍‌ ନେଙ୍ଗ୍‌ନେ ଚାକର୍‌ଇଂନେବାନ୍‌ ଉଡ଼ିରୁଆକେ କାପାଟ୍‌ ଡାଗ୍ରା ଉର୍‌ ନ୍‌ସା ସ୍ରିକେ । 20 ଇଡ଼ିଂ ବେପାରି ବାରି ସାପା ରକମ୍‌ନେ ଜିନିସ୍‌ ସଣ୍ଡ୍ରେ ଯିରୂଶାଲମ ବାଆରେ ମୁଇଂ ମ୍ବାର୍‌ତର୍‌ ଯିରୂଶାଲମ ବାଏରେ ଡୁଲେଗ୍‌ଆର୍‌କେ । 21 ଆତ୍‌ବା ନେଙ୍ଗ୍‌ ଆମେଇଂକେ ତରକ୍‌ ଆଃଡିଂଚେ ଆମେଇଂକେ ବାସଙ୍ଗ୍‌କେ, "ପେ ମେଁସା ଇନି ଡାଗ୍ରା ଡୁଲେଗ୍‌ ପେଡିଂକେ ? ପେ ବାରି ମୁଇଂତର୍‌ ଦେକ୍‌ରକମ୍‌ ଡିଂଲା ନେଙ୍ଗ୍‌ ଆପେକେ ନ୍‌ସାଃଏ ।" ଆତେନ୍‌ ଦିନାବାନ୍‌ ମେଇଂ ବାରି ପୁଣ୍ଡେନେ ଦିନାନିଆ ଆପାଙ୍ଗ୍‌ଆର୍‌କେ ଣ୍ଡୁ । 22 ଇଡ଼ିଂ ନେଙ୍ଗ୍‌ ଲେବୀୟଇଂକେ ପୁଣ୍ଡେନେ ଦିନା ପବିତ୍ର ଆଃଡିଂନ୍‌ସା ନିଜେ ନିଜେକେ ପବିତ୍ର ଆଃଡିଂନ୍‌ସା ବାରି ପାଙ୍ଗ୍‌ଚେ ସାପା କାପାଟ୍‌କେ ରକ୍ଷା ଆଃଡିଂନ୍‌ସା ଆଦେସ୍‌ ମ୍ୱିକେ । ଏ ନେଙ୍ଗ୍‌ନେ ପର୍‌ମେସର୍‌, ନେଙ୍ଗ୍‌ନେ ପାକା ଏନ୍‌ ଡିଗ୍‌ ମନେ ତ୍ଲାଗ୍‌ ବାରି ନାନେ ମ୍ନା ଦୟାରେ ଆନେଙ୍ଗ୍‌କେ ରକ୍ୟା ଡିଂ ।

23 ଆତେନ୍‌ ବେଲା ମୁଡ଼ି ଯିହୁଦି ରେମୁଆଁଇଂ ଅସ୍‌ଦୋଦ, ଅମ୍ମୋନ୍‌ ବାରି ମୋୟାବ ଦେଶ୍‌ନେ ସେଲାମ୍ବୁଏଃଇଂକେ ବିବା ଡିଂଲେଗେ, ଆମେଇଂକେ ନେଙ୍ଗ୍‌ ଙ୍କେକେ । 24 ବାରି, ମେଇଂନେ ଗଡ଼େଙ୍ଗ୍‌ଇଂ ଅଦା ଅସ୍‌ଦୋଦନେ ବ୍ନାସାରେ ବାଃଲିର୍‌ ବାତା ଆର୍‌କେ ବାରି ଯିହୁଦି ବ୍ନାସାରେ ବାଃଲିର୍‌ ବାତା ଡିଂଆୟା ଆର୍‌କେ ଣ୍ଡୁ, ମାତର୍‌ ସାପା ଜାତିନେ ବ୍ନାସା ଅନୁସାରେ ବାସଙ୍ଗ୍‌ଆର୍‌କେ । 25 ଆତେନ୍‌ସା ନେଙ୍ଗ୍‌ ମେଇଙ୍ଗ୍‌ ଏତେ ଅଡ଼କା ଅଡ଼କି ଣ୍ଡିଙ୍ଗ୍‌କେ ବାରି ଆମେଇଂକେ ଅବିସାପ୍‌ ମ୍ୱିକେ ବାରି ମେଙ୍ଗ୍‌ନେ ବିତ୍‌ରେ ଆଜା ଆଜାକେ ମ୍ୱଗ୍‌କେ ବାରି ମେଙ୍ଗ୍‌ନେ ଉଗ୍‌ବକେ ଗୁଃମ୍ୱିକେ, ବାରି ପର୍‌ମେସର୍‌ନେ ମିନିରେ ପାର୍‌ମାନ୍‌ ଆଃଡିଙ୍ଗ୍‌ଚେ ମ୍ୱାସଙ୍ଗ୍‌କେ, "ପେ ମେଙ୍ଗ୍‌ନେ ଉଂଡେଇଂକେ ପେନି ସେଲାକେ ଆବିଃଗେପା, ବାରି ପେନି ଉଂଡେଇଂ ଆତ୍‌ଲା ବାରି ପେ ଆତ୍‌ଲା ମେଙ୍ଗ୍‌ନେ ସେଲାଇଂକେ ଡୁଙ୍ଗ୍‌ଆପାଙ୍ଗ୍‌ପା ।" 26 ଇସ୍ରାଏଲ୍‌ନେ ରାଜା ଶଲୋମନ୍‌ କି ଆକେନ୍‌ କାମ୍‌ ଡିଂଚେ ପାପ୍‌ ଡିଂଆବଗେ ? ଗୁଲେ ଜାତି ବିତ୍‌ରେ ମେଁ ରକମ୍‌ ରାଜା ଜାଡିଗ୍‌ ଆଲେଗେ ଣ୍ଡୁ ବାରି ମେଁ ନିଜର୍‌ ପର୍‌ମେସର୍‌ନେ ଆଲାଦ୍‌ନେ ଉଂଡେ ଲେଃଗେ, ବାରି ପର୍‌ମେସର୍‌ ଆମେକେ ସାପା ଇସ୍ରାଏଲ୍‌ ଆଡ଼ାତ୍ରା ରାଜା ଆଃଡିଂକେ । ଏଲେଡିଗ୍‌ ବିଦେସ୍‌ନିଆ ଲେଃକ୍ନେ ସେଲାଇଂ ଆମେକେ ଆଃ ପାପ୍‌ ଆଃଡିଙ୍ଗ୍‌କେ । 27 ତେଲା ବିଦେଶ୍‌ନେ ସେଲାମ୍ବୁଏଃଇଂକେ ବିବା ଡିଂନେବାନ୍‌ ନେନେ ପର୍‌ମେସର୍‌ନେ ବିରୁଦ୍‌ରେ ସତ୍‌କେ ଅମାନି ଡିଂଚେ ଆକେନ୍‌ ସାପା ମ୍ନାଃ ପାପ୍‌ ଡିଂନ୍‌ସା କି ନେ ପେନି ସାମୁଆଁ ନେଦ୍ରିଗ୍‌ଏ ?

28 ଆତ୍‌ବା ଇଲୀୟାଶୀବ୍‌ ମ୍ନାଃ ପୁଜାରିନେ ଏଗ୍‌ଲେଣ୍ଡେ ଯିହୋୟାଦାନେ ମୁଇଂ ଉଂଡେ ହୋରୋଣୀୟ ସନ୍‌ବଲ୍ଲଟ୍‌ନେ ମାଚୁଆ ଲେଃଗେ । ଆତେନ୍‌ସା ନେଙ୍ଗ୍‌ ଆମେକେ ନେଙ୍ଗ୍‌ବାନ୍‌ ନୁଆଁମ୍ୱିଃକେ ।

29 ଏ ନେଙ୍ଗ୍‌ନେ ପର୍‌ମେସର୍‌, ଆମେଇଂକେ ନା ମନେ ତ୍ଲାଗ୍‌, ମେଃଡାଗ୍‌ଲା ମେଇଂ ପୁଜାରି ପଦ୍‌କେ, ବାରି ପୁଜାରି ପଦ୍‌ବାନ୍‌ ବାରି ଲେବୀୟଇଂନେ ନିଅମ୍‌କେ କଲଙ୍କ ଆଃଡିଂବକେ ।

30 ଦେକ୍‌ରକମ୍‌ ନେଙ୍ଗ୍‌ ଆମେଇଂକେ ବିଦେଶି ରେମୁଆଁଇଂନେବାନ୍‌ ପବିତ୍ର ନ୍ନାଡିଂକେ ବାରି ସାପାରେନେ କାମ୍‌ ଇସାବ୍‌ରେ ପୁଜାରିଇଂନେ ବାରି ଲେବୀୟଇଂନେ କାମ୍‌ ତିଆର୍‌ ନାଡିଂକେ । 31 ବାରି, ସମାନ୍‌ ବେଲା ସୁଆ ଆରି ପର୍‌ତୁମ୍‌ ଚୁକ୍ନେ ଚୁଚୁ ବିନ୍‌ସା ରେମୁଆଁ ନ୍‌ସ୍ରିକେ । ଏ ନେଙ୍ଗ୍‌ନେ ପର୍‌ମେସର୍‌, ନେଙ୍ଗ୍‌ ନିମାଣ୍ଡା ଲେଃନ୍‌ସା ଆନେଙ୍ଗ୍‌କେ ମନେ ତ୍ଲାଗ୍‌ ।