1 ତେଲା ଅର୍ତ୍ତକ୍ଷସ୍ତ ଇଃସାଙ୍ଗ୍‌ନେ ଅଦିକାର୍‌ନେ କୁଡ଼ିଏତମ ମୁଆଁ ବେଲା ନିସନ* ଆର୍କେ କେଲା ଦେକ୍‌ରକମ୍‌ ଗଟେକେ ଜେ, ରାଜାନେ ସାମ୍‌ନେ ଦ୍ରାକ୍ଷା ରସ୍‌ ଲେଃ କେଲା ନେଙ୍ଗ୍‌ ଆତେନ୍‌ ଦ୍ରାକ୍ଷା ରସ୍‌ ରାଙ୍ଗ୍‌ୱେଚେ ଇସାଙ୍ଗ୍‌କେ ମ୍ୱିକେ । ଆକେନ୍‌ ସିସେ ନେଙ୍ଗ୍‌ ମେଁ ସାମ୍‌ନେ ଦୁକ୍‌ ଡିଙ୍ଗ୍‌ନାଲେଃଗେ । 2 ଆତ୍‌ବାନ୍‌ ଇଃସାଙ୍ଗ୍‌ ଆନେଙ୍ଗ୍‌କେ ସାଲିଆକୁକେ, "ଆନାକେ ମେଃନେ ସାଃବା ? ନା ମେଁସା ଦୁକ୍‌ରେ ନାଲାଏକେ ସୁଗୁଆ ତ୍ନା ନାଡିଂକେ ? ନେଙ୍ଗ୍‌ ବାବେ ଣ୍ଡିଂକେ ନାନେ ମନ୍‌ ଦୁକ୍‌ରେ ଲାଏକେ ଡାଗ୍‌ଚେ ।" ଆକେନ୍‌ ଇଡ଼ିଂ ନେଙ୍ଗ୍‌ ମ୍ବ୍‌ଟକେ । 3 ଜଦି ମ୍ବ୍‌ଟକେ, ତେଲାଡିଗ୍‌ ନେଙ୍ଗ୍‌ ଇସାଙ୍ଗ୍‌କେ ମ୍ୱାସଙ୍ଗ୍‌କେ, "ମ୍ନାଃ ଇଃସାଙ୍ଗ୍‌ ଚିରଜୀବୀ ଡିଂ । ଆଣ୍ଡିନେ ଇନି ନେଙ୍ଗ୍‌ନେ ନ୍ତାଇଂନେ ମଡ଼ା ଆତିନେ ଜାଗା ଆତେନ୍‌ ଅଃନାବେଲା ରଃଡ଼ାଚେଃ ଲଃଲେକେ ଆରି ଆତ୍‌ ଅରିଆନେ କାପାଟ୍‌ ସାପା ଗିଃଚାର୍‌ଚେ ଲଃଲେକେ ଆତେନ୍‌ ବେଲା ମେଁସା ନେଙ୍ଗ୍‌ନେ ସାର୍ମୁଆଃ ଦୁକ୍‌ ଆଡିଂ ।" 4 ଆକେନ୍‌ ପରେ ଇଃସାଙ୍ଗ୍‌ ଆନେଙ୍ଗ୍‌କେ ବାସଙ୍ଗ୍‌କେ, "ନେଙ୍ଗ୍‌ ବା ନା ମେଃନେ ସାଇଜ ଚାଏଁ ନାଡିଂକେ ।" ନେଙ୍ଗ୍‌ ଉତର୍‌ ବିଃନେ ସିସେ ସର୍‌ଗନେ ପର୍‌ମେସର୍‌କେ ପାର୍‌ତନା ଣ୍ଡିଂକେ । 5 ଆକେନ୍‌ ଇଡ଼ିଂ ନେଙ୍ଗ୍‌ ଇସାଙ୍ଗ୍‌କେ ଉତର୍‌ ମ୍ୱିକେ, "ଜଦି ମ୍ନାଃ ଇଃସାଙ୍ଗ୍‌ ସାନ୍ତି ଡିଂଏ ଆରି ନାନେ ଦାସ ଜଦି ନା ସାମ୍‌ନାରେ ଅନୁଗ୍ରହ ବାଏ । ତେଲା ଯିହୁଦା ଦେସ୍‌ନିଆ, ନେଙ୍ଗ୍‌ନେ ନ୍ତାଇଂନେ ମଡ଼ାକେ ଇନିନିଆ ଆନେଙ୍ଗ୍‌ ବେନ୍‌ସା ବିଏ । ନେଙ୍ଗ୍‌ ଆତ୍‌ଅରିଆ ୱେନ୍‌ସା ଚାଏଁ ଣ୍ଡିଂକେ । ବାରି ଆତ୍‌ଅରିଆ ନେଙ୍ଗ୍‌ ଇନିକେ ବାର୍‌ମୁଇଂତର୍‌ ପ୍ରତିସ୍ଟା ଡିଂନେସା ଚାଏଁ ଣ୍ଡିଂକେ ।" 6 ରାଣି ଡିଗ୍‌ ଇଃସାଙ୍ଗ୍‌ ଡାଗ୍‌ରା କଲାଏଃଗେ । ଇଃସାଙ୍ଗ୍‌ ଆରି ରାଣି ଆନେଙ୍ଗ୍‌କେ ସାଲିଆକୁକେ, "ନା ୱେନେ ଗାଲି ଉଡ଼ିଦିନା ଲାଗେଏ ? ନା ଆକ୍‌ ଅରିଆ ଅଃନା ନାପାଙ୍ଗ୍‌ଏ ?" ଇଃସାଙ୍ଗ୍‌ ଆନେଙ୍ଗ୍‌କେ ବେନ୍‌ସା ରାଜି ଡିଂଲା ନେଙ୍ଗ୍‌ ଆମେକେ ଉଃଡ଼ି ସମୟ୍‌ ମ୍ୱିଃକେ । 7 ନେଙ୍ଗ୍‌ ଡିଗ୍‌ ଇସାଙ୍ଗ୍‌କେ ମ୍ୱାସଙ୍ଗ୍‌କେ, "ଜଦି ମ୍ନାଃ ଇଃସାଙ୍ଗ୍‌ ରାଜି ଡିଂଏ, ତେଲା ଲଣ୍ଡିଆ ଇନୁମେତା ଲେଃକ୍ନେ ଦେସ୍‌ନେ ନେତାଇଂ ଜେନ୍ତିକି ଯିହୁଦା ଦେସ୍‌ନିଆ ୱେଚା ଜାକ ୱେନ୍‌ସା ଆନେଙ୍ଗ୍‌ ଆନ୍ତାର୍‌ ବିଃ । ଆତେନ୍‌ସା ମେଇଂ ଡାଗ୍ରା ନେଙ୍ଗ୍‌ ନ୍ତିବାନ୍‌ ଚିଟି ବେ । 8 ଇଃସାଙ୍ଗ୍‌ ଆସଫନେ ଆତ୍‌ଲା ଆନେଙ୍ଗ୍‌ ମୁଇଂ ଚିଟି ବିଃକେ । ଆସଫ ଏବେ ଇଃସାଙ୍ଗ୍‌ନେ କଣ୍ଡାକେ ରକ୍ୟା ଡିଂଣ୍ଡ୍ରେ ।" ମେଁ ଆସଫକେ ପାର୍‌ତନା ଡୁଆନେ କାପାଟ୍‌ନେ ବାଜାର୍‌, ଇନିନେ ତୁରାଃ ବାରି ପାର୍‌ତନା ଡୁଆନେ କାପାଟ୍‌ ଆତ୍‌ଲା ଆନେଙ୍ଗ୍‌ ଉଡ଼ି କ୍ଲିଗ୍‌ ସୁଆ ବିନ୍‌ସା ବାସଙ୍ଗ୍‌କେ । ଇଃସାଙ୍ଗ୍‌ ଦେତ୍‌ରକମ୍‌ ଡିଂବଗେ ମେଃଡାଗ୍‌ଲା ପର୍‌ମେସର୍‌ ନେଙ୍ଗ୍‌ ଆତ୍‌ଲା ମଙ୍ଗଲମୟ ଡିଂଚେ ଲେଃଗେ ।

9 ଆତେନ୍‌ସା ନେଙ୍ଗ୍‌ ଲଣ୍ଡିଆ ଇନୁମେତା ଲେଃକ୍ନେ ଦେସ୍‌ନେ ନେତାଇଂ ନିଆ ଉଁୱେକେ । ମେଁ ଡାଗ୍ରା ୱେଚାଚେ ଆମେକେ ଇଃସାଙ୍ଗ୍‌ ବିଃକ୍ନେ ଚିଟି ମ୍ୱିକେ । ଆତେନ୍‌ସା ଦେସ୍‌ନେ ନେତାଇଂ ନେଙ୍ଗ୍‌ ଏତେ ସେନାପତିଇଂ ଆରି ଗଡ଼ାଲେଃକ୍ନେ ରେମୁଆଁଇଂକେ ବେଃକେ । 10 ହୋରୋଣୀୟ ସନ୍‌ବଲ୍ଲଟ୍‌ ଆରି ଅମ୍ମୋନୀୟ ଟୋବୀୟ ଅଦିକାରି ରେମୁଆଁଇଂ ଜାବର୍‌ ଦୁକ୍‌ ଡିଂଆର୍‌କେ, ଉଡ଼ିବେଲା ମେଇଂ ଅଁଆର୍‌କେ ଜେ, ମୁଇଂ ରେମୁଆଁ ଇସ୍ରାଏଲ୍‌ନେ ଗଗିସିଆଃଇଂକେ ସାଇଜ ଡିଂ ନ୍‌ସା ପାଙ୍ଗ୍‌ଲାଏଃଗେ ।

11 ନେଙ୍ଗ୍‌ ଯିରୂଶାଲମନିଆ ଉଁୱେକେ ବାରି ଆତ୍‌ଅରିଆ ଜିର୍‌ସି ଦିନା ନ୍ଲେଗେ । 12 ଆକେନ୍‌ ପରେ ମିଡିଗ୍‌ବ କେଲା ଉଡ଼ିକ୍ଲିଗ୍‌ ରେମୁଆଁଇଂ ଏତେ ଅଲେଙ୍ଗ୍‌ସାର୍‌ ଉଁୱେକେ । ପର୍‌ମେସର୍‌ ଯିରୂଶାଲମ ଆତ୍‌ଲା ମେଃ ଡିଂନ୍‌ସାଃ ଆନେଙ୍ଗ୍‌ ବାସଙ୍ଗ୍‌ବଗେ, ଆତେନ୍‌ ନେଙ୍ଗ୍‌ ଜା ଡାଗ୍ରା ଡିଗ୍‌ ନ୍ନାବାସଙ୍ଗ୍‌କେ ଣ୍ଡୁ । ନେଙ୍ଗ୍‌ ଆଣ୍ଡିନେ ଗଡ଼ାନିଆ ଡେଃନ୍ଲେକେ ଆତେନ୍‌ ଗଡ଼ାକେ ଆନ୍ତାର୍‌ ବିଃଲା ନେଙ୍ଗ୍‌ ଡାଗ୍ରା ଆରି ଗଡ଼ା ଆଲେଗେ ଣ୍ଡୁ । 13 ତାଂକିଗ୍‌ଲା ନେଙ୍ଗ୍‌ ଟିକ୍‌ରା ଗାଲି ବିଃଚେ ମାଃଲାଃ ବଃ ଡୁଲେଗ୍‌ଲେଃକ୍ନେ କୁଇଁସାଲ୍‌ ଆରି କତ୍‌ଗାଦି ଡିଙ୍ଗ୍‌ଲେକ୍ନେ ର୍ଣ୍ଣସାଙ୍ଗ୍‌ ଜାକ ଉଁୱେକେ ଆରି ଯିରୂଶାଲମନେ ପାକ୍‌ଚିକ୍ନେ ତୁରାଃ ଆରି ଆତ୍‌ଅରିଆ ଲେଃକ୍ନେ ଗିଃଡିଙ୍ଗ୍‌କ୍ନେ ର୍ଣ୍ଣସାଙ୍ଗ୍‌ ସାପା ଙ୍କେକେ । 14 ଇଡ଼ିଂ ନେଙ୍ଗ୍‌ ଜଲାଡ଼୍ୟାଃ ଜାର୍‌ନେ ର୍ଣ୍ଣସାଙ୍ଗ୍‌ ଆରି ଇଃସାଙ୍ଗ୍‌ନେ କୁଣ୍ଡ୍‌ ଜାକ ଉଁୱେକେ । ମାତର୍‌ ଆତ୍‌ଅରିଆ ନେଙ୍ଗ୍‌ନେ ଗଡ଼ା ୱେନେ ଜାଗା ଆଲେଗେ । 15 ଆତେନ୍‌ସା ନେଙ୍ଗ୍‌ ଟିକ୍‌ରା ଆରାତ୍ରା ତାଙ୍ଗ୍‌କିଗ୍‌ ବେଲା ଣ୍ଡେଃକେ ଆରି ତୁରାଃକେ ନିମାଣ୍ଡା ବାବ୍‌ରେ ଙ୍କେକେ ଆରି ପାଦାନେ ର୍ଣ୍ଣସାଙ୍ଗ୍‌ ବିଃଚେ ଆଣ୍ଡେ ମ୍ପାଙ୍ଗ୍‌କେ । 16 ନେଙ୍ଗ୍‌ ଆଣ୍ଡିକେର ଙ୍ଗୁଏଃକେ ଆରି ମେଃନେ ଣ୍ଡିଂକେ ସାସନ୍‌ ଡିଂଣ୍ଡ୍ରେ ଆତେନ୍‌ ମ୍ୟା ଆୟା ଆର୍‌କେ । ଆରି ନେଙ୍ଗ୍ ଡିଗ୍‌ ଯିହୁଦିଇଂକେ, ପୁଜାରିଇଂକେ, ମ୍ନାଃରେକେ ଅଦିକାରିଇଂକେ କି ବିନ୍‌ନେ ଆଜାକେ ଡିଗ୍‌ ଆତାନ୍‌ ଆମ୍ୟାଃ ନ୍ନାବଗେ । 17 ଆକେନ୍‌ ପରେ ନେଙ୍ଗ୍‌ ଆମେଇଂକେ ମ୍ୱାସଙ୍ଗ୍‌କେ, "ପେଇଂ କେ ପେଡିଙ୍ଗ୍‌କେ ନେ କଲ୍‌ବଲ୍ ଅବସ୍ତାରେ ନେଲେକେ । ଯିରୂଶାଲମ ଡିରକମ୍ ପାକ୍‌ଚିଚେ ଲଃଲେକେ ଆରି କାପାଟ୍‌ ସାପା ସୁଆନିଆ ଗିଃଚାର୍‌ ୱେଲାଏଃକେ । ଯେନ୍ତିକି ନେ ନିନ୍ଦା ନେଃବା ଆତେନ୍‌ସା ଏଲାପା, ଏଲାପା ବାର୍‌ମୁଇଂତର୍‌ ଯିରୂଶାଲମନେ ତୁରାଃକେ ନେରାଃରେପା ।" 18 ନେଙ୍ଗ୍ ଡିଗ୍ ଆତେନ୍ ରେମୁଆଁଇଂକେ ଆମ୍ୟା ମ୍ୱିକେ ଜେ, ପର୍‌ମେସର୍‌ ନେଙ୍ଗ୍ ଆରାତ୍ରା ଦୟା ଡିଂବକେ ଆରି ମେଃ ସାପା ଆନେଙ୍ଗ୍‌ ଇଃସାଙ୍ଗ୍‌ ବାସଙ୍ଗ୍‌ ବକେ, ନେଙ୍ଗ୍‌ ଆମେଇଂକେ ମ୍ୱାସଙ୍ଗ୍‌କେ । ଇଡ଼ିଂ ଆତେନ୍‌ ରେମୁଆଁଇଂ ଉତର୍‌ ବିଃକେ, "ତେଲା ଦୁବାପା, ଏବେ ନେ ସ୍ଲେ ଆରାମ୍‌ ନେଃଡିଂପା ।" ଆତେନ୍‌ସା ମେଇଂ ନିଜ୍‌କେ ନିମାଣ୍ଡା କାମ୍‌ନ୍ନିଆ କାମ୍‌ ଡିଙ୍ଗ୍‌ ନ୍‌ସାଃ ଲାଗେ ପଡ଼େଆର୍‌କେ । 19 ମାତର୍‌ ହୋରୋଣୀୟ ସନ୍‌ବଲ୍ଲଟ୍‌ ଆରି ଅମ୍ମୋନୀୟ ଟୋବୀୟ ଆରି ଆରବୀୟ ଗେଶମ୍‌ ଆକେନ୍‌ ଅଁଚେ ଆନେକେ ଏଃଲିୟା ଡିଂଆର୍‌କେ ଆରି ଗୁର୍‌ନା ଡିଂଆର୍‌କେ । ମେଇଂ ବାସଙ୍ଗ୍‌ ଆର୍‌କେ, ପେ ମେଃନେ ଆକେନ୍‌ କାମ୍‌ ଡିଂପେଡିଙ୍ଗ୍‌କେ ? "ପେ ମେଃନେ ରାଜାନେ ବିରଦ୍‌ ଡିଙ୍ଗ୍‌ନେ କାମ୍‌ ଡିଂପେଡିଂକେ ?" 20 ମାତର୍‌ ନେଙ୍ଗ୍ ଦେକ୍‌ରକମ୍‌ ମ୍ୱାସଙ୍ଗ୍‌କେ, "ସର୍‌ଗନେ ପର୍‌ମେସର୍‌ ନେନେ କାମ୍‌ ପୁରନ୍‌ ଆଃଡିଂଏ । ନେ ଡିଂନେଡିଂକେ ପର୍‌ମେସର୍‌ନେ ଦାସ । ନେ ଆକେନ୍ ଇନିକେ ବାର୍‌ମୁଇଂତର୍‌ ନେରାଃରେଏ । ମାତର୍‌ ଯିରୂଶାଲମନିଆ ପେନେ ମେଃଡିଗ୍‌ କାମ୍‌ ଣ୍ଡୁ କି ଦେକ୍‌ରକମ୍‌ ମନେ ବଃନେ ମେଃଡିଗ୍‌ ଜିନିସ୍‌ ଣ୍ଡୁ ।"