ନିହିମିୟା ଗରିବ୍ରେକେ ସାଇଜ ଡିଂକେ
1 ଏନ୍ ଇଡ଼ିଙ୍ଗ୍ ଯିହୁଦି ବୟାଁଇଂନେ ବିରଦ୍ରେ ରେମୁଆଁଇଂନେ ଆରି ମେଇଂନେ ସେଲାମ୍ବୁଏଃଇଂ ନିନ୍ଦା ଡିଙ୍ଗ୍ଆର୍କେ । 2 ମେଙ୍ଗ୍ନେ ବିତ୍ରେ ଉଡ଼ିରୁଆ ବାସଙ୍ଗ୍ ଆର୍କେ, "ନେନେ ଗୁଲେ ଗଡ଼େଙ୍ଗ୍ଇଂ ବାରି ସେଲାଇଂ ଲେଃକେ, ଏଲାପା ବ୍ରୁଆନ୍ସା ରୁକଃବାଃତିଙ୍ଗ୍ ନେଃବିଆର୍ପା ।" 3 ବିନ୍ରେ ବାସଙ୍ଗ୍ଆର୍କେ, "ଆକେନ୍ ମୁର୍ଡି ବେଲା, ଆନେକେ କାଦି ବିଃଲା ଣ୍ଡୁଲା ନେନେ ଲିଜ, ଅଙ୍ଗୁର୍ ଲିଜ, ଡୁଆ ସାପା ବାନ୍ଦା ସାଃଚେ ଡୁଂୱେଲାପା ।" 4 ବାରି ବିନ୍ରେ ବାସଙ୍ଗ୍ ଆର୍କେ, "ନେ ରାଜାକେ ସିସ୍ତୁ ଗାଗ୍ନେସା ନେନେ ଲିଜ ବାରି ଅଙ୍ଗୁର୍ ଲିଜ ବାନ୍ଦା ଡିଂଚେ ଡାବୁ ରୁନ୍ ଡିଂନେବକେ । 5 ସାକାର୍ ରେମୁଆଁଇଂକେ କେଲାପା ! ନେ ଟିକ୍ ମେଙ୍ଗ୍ ରକମ୍ ନେଲେକେ । ନେନେ ନେଉଙ୍ଗ୍ଇଂ ଟିକ୍ ମେଇଂନେ ଉଂଡେଇଂ ରକମ୍ । ମାତର୍ ନେ ନେନେ ନେଉଙ୍ଗ୍କେ ବାରି ସେଲାଇଂକେ ଚାକର୍ ବାବ୍ରେ ଲେଃଚେ ସ୍ଲେନ୍ସା ସନେବକେ । ନେ ବିତ୍ରେ ଗୁଲେରୁଆ ମେଇଂନେ ସେଲାଇଂକେ ଚାକର୍ ବାବ୍ରେ ଲେଃଚେ ସ୍ଲେନ୍ସା ସ ଆଃଡାଗ୍ବେ । ଦେକ୍ରକମ୍ ଆରି ମେଃଡିଗ୍ ଣ୍ଡୁ ମେଃନେ ନେ ଡିଂନେୟାଏ । ନେ ନେନେ ଜାଗା, ଲିଜ ବାରି ଅଙ୍ଗୁର୍ ଲିଜ ସାପା ସନେବକେ, ମେଃନେ କି ଏବେ ବିନ୍ରେନେ ଅଦିକାର୍ରେ ଲେଃକେ ।"
6 ଉଡ଼ିବେଲା ନେଙ୍ଗ୍ ମେଙ୍ଗ୍ନେ ଆକେନ୍ ନିନ୍ଦା ସାପା ଦ୍ରିଗ୍କେ, ନେଙ୍ଗ୍ ଜାବର୍ ରିସା ଣ୍ଡିଙ୍ଗ୍କେ । 7 ନେଙ୍ଗ୍ ଆକେନ୍ ବିସଏରେ ଚିନ୍ତା ଣ୍ଡିଂକେ, ଇଡ଼ିଂ ନେଙ୍ଗ୍ ମ୍ନା ମ୍ନାରେକେ ଆରି ସାସନ୍ ଡିଂଣ୍ଡ୍ରେଇଂନେ ବିରଦ୍ରେ ମୁଇଂ ନିଅମ୍ ଇସାବ୍ରେ ମ୍ୱାଃଇର୍ମ୍ୱାଃତାକେ । ନେଙ୍ଗ୍ ଆମେଇଂକେ ମ୍ୱାସଙ୍ଗ୍କେ, "ପେ ପେବୟାଇଂନେ ବାନ୍ କଲନ୍ତର୍ ଡୁଂୱେପେଡିଂକେ, ଆପେକେ ଆତେନ୍ ବନ୍ଦ୍ ଆଃଡିଂପଡ଼େଏ । ଆକେନ୍ ଇଡ଼ିଂ ନେଙ୍ଗ୍ ମୁଇଂ ମ୍ନା କୁକପାର୍ ନ୍ନାଃକଏ । 8 ଆରି ନେଙ୍ଗ୍ ଆତାନ୍ ରେମୁଆଁଇଂକେ ମ୍ୱାସଙ୍ଗ୍କେ, ନେନେ ଯିହୁଦି ବୟାଁଇଂ ବିନ୍ ଦେଶ୍ନେ ରେମୁଆଁଇଂ ଡାଗ୍ରା ସବଆର୍ଗେ, ନେ ଆମେଇଂକେ ଉଡ଼ି ଡିଂନେ ଇସାବ୍ ଅଃତେନ୍ ବିଃଚେଃ ଆଃମୁକ୍ଲେଚେଃ ଡୁଙ୍ଗ୍ପାଙ୍ଗ୍ ନେବକେ ? ଏବେ ପେ ପେବୟାଁଇଂକେ ବାର୍ମୁଇଂତର୍ ସନେଡିଙ୍ଗ୍କେ ? ଏନ୍ଇଡ଼ିଂ ମେଇଂ ବୁଙ୍ଗ୍ ଲେଃଆର୍କେ । ମେଇଂ ମେଃଡିଗ୍ ଉତର୍ ବିଃ ଆୟାଆର୍କେ ଣ୍ଡୁ ।"
9 ନେଙ୍ଗ୍ ଆମେକେ ବାରି ମ୍ୱାସଙ୍ଗ୍କେ, "ପେ କିଚି ବଲ୍ ଡିଂ ପେଡିଂକେ । ପେ ଆକାନ୍ ମ୍ୟାପା ଯେ ପେନି ପର୍ମେସର୍କେ ସନ୍ମାନ୍ ବିଃପଡ଼େଏ ବାରି ବୁଟ ପଡ଼େଏ । ପେ ନେନେ ସତ୍ରୁ ଆନେକେ ଏଃଲିୟାନ୍ସା ସୁଜଗ୍ ବିଃନେ ଉଚିତ୍ ଣ୍ଡୁ ? 10 ନେଙ୍ଗ୍, ନେଙ୍ଗ୍ନେ ନିଜର୍ କୁଟୁମ୍ ରେମୁଆଁକେ ବାରି ନେଙ୍ଗ୍ନେ ଚାକର୍ଇଂ ବିନ୍ରେକେ ଡାବୁ ଆରି କିଆଉଁଆଃ ଉଦାର୍ ବିଃନେଡିଂ । ମାତର୍ ଏଃଲାପା ମେଙ୍ଗ୍ନେ ବାନ୍ କଲନ୍ତର୍ ଆଦାୟ୍ ନେଃଡିଂପା । 11 ପେ ଏଃକେ ଡିଲାଡିଗ୍ ମେଙ୍ଗ୍ନେ ଲିଜ, ଅଙ୍ଗୁର୍ ଲିଜ, ଜୀତ ଲିଜ, ବାରି ଡୁଆକେ ଆଃଆଣ୍ଡେ ପେବିଏ । ଆକେନ୍ ଏବେ ଆଃଆଣ୍ଡେ ବିଃପା ବାରି ପେ ମେଙ୍ଗ୍ନେ ଡାବୁ, କିଆଉଁଆଃ, ଅଙ୍ଗୁର୍ ରସ୍ ବାରି ଜୀତ ଞ୍ଚୁ ଜା ସାପା ପେ ମେଙ୍ଗ୍ନେ ବାନ୍ କଲନ୍ତର୍ ଇସାବ୍ରେ ଡୁଂୱେପେବଗେ ।"
12 ଆକେନ୍ ଇଡ଼ିଂ ସାକାର୍ ରେମୁଆଁଇଂ ବାରି ମୁକିଆ ରେମୁଆଁଇଂ ଆମେକେ ବାସଙ୍ଗ୍କେ, "ନେ ଆକେନ୍ ସାପା ଆଃଆଣ୍ଡେ ନେବିଏ, ଆମେଇଂକେ ମେଃଡିଗ୍ ନେସାଲ୍ୟାଃ ଣ୍ଡୁ; ନା ଡିରକମ୍ ବାସଙ୍ଗ୍ ନାଡିଂକେ ନେ ଦେତ୍ରକମ୍ ନେଡିଂଏ ।" ଆକେନ୍ ପରେ ନେଙ୍ଗ୍ ପୁଜାରିଇଂକେ ୱାଚେ ଆକେନ୍ ପାର୍ମାନ୍ ଇସାବ୍ରେ ମେଇଂ ଯେନ୍ତିକି ସ୍ଲେ ଆର୍ଏ, ଆତେନ୍ସା ଆମେଇଂକେ ପାର୍ମାନ୍ ନ୍ନାଃଡିଂକେ । 13 ନେଙ୍ଗ୍ ନେଙ୍ଗ୍ନେ ପାଞ୍ଚ୍ୟାକେ ତାଞ୍ଜୁର୍ ମ୍ୱିକେ ବାରି ମ୍ୱାସଙ୍ଗ୍କେ, "ମୁଃଡ଼ି ରେମୁଆଁ ଆକେନ୍ ପାର୍ମାନ୍ ଡିଂବକ୍ନେ ପାଲନ୍ ଆଡିଂ, ପର୍ମେସର୍ ମେଁନେ ଡୁଆକେ ବାରି ସ୍ଲେପେବକ୍ନେ ପଲ୍ବାନ୍ ଆମେକେ ଦେକ୍ରକମ୍ ତାଣ୍ଡି ବିଲେ । ମେଁ ଦେକ୍ରକମ୍ ଜୁଜୁର୍ଲେ ବାରି ସରାଃ ନ୍ତି ସାଃଚେ କଲେଃଲେଃ ।" ଇଡ଼ିଂ ସାପାରେ ମୁଇଂତୁଗ୍ ରିସିଂଚେ ବାସଙ୍ଗ୍ଆର୍କେ "ଆମେନ୍" ଆରି ମାପ୍ରୁକେ ପ୍ରଶଂସା ଡିଂଆର୍କେ । ଆକେନ୍ ପରେ ରେମୁଆଁଇଂ ଆକେନ୍ ପାର୍ମାନ୍ ଇସାବ୍ରେ ସ୍ଲେ ଆର୍କେ ।
ବିନ୍ରେ ଆତ୍ଲା ନିହିମିୟାନେ ଚିନ୍ତା
14 ନେଙ୍ଗ୍ ଯିହୁଦା ଦେଶ୍ନିଆ ମେଙ୍ଗ୍ନେ ନେତା ପଦ୍ ବାଲେଃକ୍ନେ ବେଲା ବାନ୍ ବା ଅର୍ତ୍ତକ୍ଷସ୍ତ ରାଜାନେ ଅଦିକାର୍ ଡିଂନେ କୁଡ଼ିଏ ମୁଆଁବାନ୍ ବତିଶ୍ ମୁଆଁ ଜାକ ଗମ୍ୱାର୍ ମୁଆଁ ନେଙ୍ଗ୍ ବାରି ନେଙ୍ଗ୍ନେ ବୟାଁଇଂ ଦେଶ୍ନେ ରାଜ୍ୟପାଲ୍ନେ କାଦି ନେଚଙ୍ଗ୍କେ ଣ୍ଡୁ । 15 ମାତର୍ ନେଙ୍ଗ୍ନେ ସିସେ ଲେଃକ୍ନେ ଦେସ୍ନେ ନେତା ବିଃବକ୍ନେ ଜିନିସ୍ ରେମୁଆଁଇଂକେ ଡୁଂନେ ପଡ଼େକେ । ଆରି ମେଇଂ ଚାଲିଶ୍ କେଜି ରୁପା ଡାବୁ ରେମୁଆଁଇଂନେ ବାନ୍ କାଦି ବାରି ଅଙ୍ଗୁର୍ ରସ୍ ରାଙ୍ଗ୍ୱେଆର୍କେ, ମୁଇଂ ଆତେନ୍ ଣ୍ଡୁ, ମେଙ୍ଗ୍ନେ ଚାକର୍ଇଂ ରେମୁଆଁଇଂନେ ଆରାତ୍ରା ସାସନ୍ ଡିଂକେ । ମାତର୍ ପର୍ମେସର୍କେ ବୁଟଚେ ନେଙ୍ଗ୍ ଦେତ୍ରକମ୍ ନ୍ନାଡିଂକେ ଣ୍ଡୁ । 16 ନେଙ୍ଗ୍ ଯିରୂଶାଲମନେ କାନ୍ତି ସ୍ଲେନିଆ ସ୍ଲେ ଣ୍ଡିଙ୍ଗ୍ଗେ । ନେଙ୍ଗ୍ ମେଃଡିଗ୍ ଜାଗା ନେବିଆର୍କେ ଣ୍ଡୁ ବାରି ନେଙ୍ଗ୍ନେ ଚାକର୍ ସାପାରେ ଆତେନ୍ ସ୍ଲେନିଆ ସ୍ଲେକେ ବେମର୍ ଡିଙ୍ଗ୍ଲେଃଆର୍ଗେ । 17 ଏଲେଡିଗ୍ ନେନେ ପିତୁର୍ପାକା ଲେଃକ୍ନେ ବିନ୍ ଦେଶ୍ନେ ରେମୁଆଁଇଂବାନ୍ ନେ ଡାଗ୍ରା ପାଙ୍ଗ୍ଆର୍ଲେଃକ୍ନେ ରେମୁଆଁଇଂକେ ଆନ୍ତାର୍ଚେ ଯିହୁଦି ବାରି ରାଜ୍ୟପାଲ୍ ମିସୁଚେ ମୁଇଂ ଶହ ପଚାସ୍ ରେମୁଆଁ ନେଙ୍ଗ୍ ଚଙ୍ଗ୍ନେ କୁର୍ଚି ନିଆ କଆର୍କେ । 18 ଆତେନ୍ ବେଲା କାଲାଆଃ ମୁଇଂ ଅରେଃ ବାରି ତୁର୍କିଲିଗ୍ଟା ସ୍ରିବକ୍ନେ ମେଣ୍ଡା ଡୁଏ ଆର୍କେ । ନେଙ୍ଗ୍ ଆତ୍ଲା ଉଃଡ଼ିକ୍ଲିଗ୍ ପ୍ଲିଗ୍କେ ଡୁଏ ଆର୍କେ ବାରି ଗୁଆ ଦିନ୍କେ ମୁଇଂଦିନା ସାପା ରକମ୍ନେ ଅଙ୍ଗୁର୍ ରସ୍ ଡୁଏସାଚେ ଡୁଙ୍ଗ୍ପାଙ୍ଗ୍ ଆର୍କେ । ଏଲେଡିଗ୍ ନେଙ୍ଗ୍ ଆକେନ୍ ସାପା ଆତ୍ଲା ଦେସ୍ନେ ନେତାନେ କାଦି ନାଚାଏଁକେ ଣ୍ଡୁ । ମେଃଡାଗ୍ଲା ଆକେନ୍ ରେମୁଆଁଇଂନେ ଆରାତ୍ରା ଗୁତିରେ ବାବ୍ରେ ଲେଃଚେ ସ୍ଲେନେ ଜାବର୍ କସ୍ଟ ଲେଃଗେ । 19 ଏ ନେଙ୍ଗ୍ନେ ପର୍ମେସର୍, ନେଙ୍ଗ୍ ଆକେନ୍ ରେମୁଆଁଇଂ ଆତ୍ଲା ମେଁ ମେଁ ନିମାଣ୍ଡା କାମ୍ ଡିଂମ୍ୱକେ, ନେଙ୍ଗ୍ନେ ଆତେନ୍ ସାପା ମନେ ତ୍ଲାଗ୍ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)