1 ଆତେନ୍‌ ଆର୍କେନେ ଚବିଶ୍‌ ଦିନ୍‌କେଲା ଇସ୍ରାଏଲ୍‌ନେ ଉଂଡେଇଂ ମୁଇଂନ୍ନିଆ ରିସିଙ୍ଗ୍‌ଚେ ଉପାସ୍‌ ଡିଙ୍ଗ୍‌ଚେ, ବାସ୍ତା ସଚେ ବାରି ନିଜର୍‌ ନିଜର୍‌ ବାଃଆ ଆରାତ୍ରା ଦୁଲି ଲାଗେ ଆର୍‌କେ । 2 ଆରି, ଇସ୍ରାଏଲ୍‌ ବଁସ୍‌ ବିଦେଶ୍‌ରେଇଂନେ ବାନ୍‌ ଆନେକେ ଅଲ୍‌ଗା ଆଃଡିଂକେ, ବାରି ତୁଆଁଚେ ନିଜର୍‌ ନିଜର୍‌ ପାପ୍‌ ବାରି ନିଜର୍‌ ନିଜର୍‌ ଅଃସେନେ ନ୍ତାଞ୍ଜାଃଇଂନେ ପାପ୍‌ ସାପା ମାନେଃଆର୍‌କେ । 3 ବାରି, ମେଇଂ ନିଜର୍‌ ନିଜର୍‌ ଜାଗାନ୍ନିଆ ତୁଆଁଚେ ଆତେନ୍‌ ଦିନାନେ ଞ୍ଜି ଗଣ୍ଟା ଜାକ ମାପ୍‌ରୁ ପେନି ପର୍‌ମେସର୍‌ନେ ନିଅମ୍‌ ବଇବାନ୍‌ ପଡ଼େଆର୍‌କେ ବାରି ବାକି ଞ୍ଜି ଗଣ୍ଟା ଜାକ ମେଇଂ ପାପ୍‌ ମାନେଃଚେ ମାପ୍‌ରୁ ପର୍‌ମେସର୍‌କେ ବ୍ରିଙ୍ଗ୍‌ଚେ ସାର୍‌ଲ ଆର୍‌କେ ।

4 ଆରି, ଲେବୀୟଇଂ, ଯେଶୂୟ ବାରି ବାନି, କଦ୍‌ମୀୟେଲ, ଶବନୀୟ, ବୁନ୍ନି, ଶେରେବୀୟ, ବାନି ଆରି କନାନି ପାଉଁଚ୍‌ନିଆ ତୁଆଁଚେ ମାପ୍‌ରୁ ପର୍‌ମେସର୍‌ ଡାଗ୍ରା ୱାସାର୍‌ଚେ ଅଃଆର୍‌କେ ।

5 ଯେଶୂୟ ବାରି କଦ୍‌ମୀୟେଲ, ବାନି, ହଶବନୀୟ, ଶେରେବୀୟ, ହୋଦୀୟ, ଶବନୀୟ ବାରି ପଥାହୀୟ, ବାରି ଲେବୀୟଇଂ ବାସଙ୍ଗ୍‌ ଆର୍‌କେ, ତଃଡ଼ିଆପା, ମାଡାନେ କାଲ୍‌ବାନ୍‌ ଜୁଗ୍‌ ଜୁଗ୍‌ ଜାକ ଲେଃନେ ମାପ୍‌ରୁ ପେନି ପର୍‌ମେସର୍‌କେ ଦନ୍ୟବାଦ୍‌ ଡିଂପା । ବାରି, ସାପା ଦନ୍ୟବାଦ୍‌ ବାରି ପ୍ରଶଂସାବାନ୍‌ ବାରି ଅଦିକ୍‌ ଉନ୍ନତ୍‌ ଡିଂନେ ନାନେ ମହିମା ବାନେ ମ୍ନି ଦନ୍ୟ ଡିଂଲେଃ । 6 ମାତର୍ ନା ଆଃ ମାପ୍‌ରୁ ନାଲେକେ । ନା କିତଙ୍ଗ୍‌, କିତଙ୍ଗ୍‌ନେ କିତଙ୍ଗ୍‌ ବାରି ଆତ୍‌ଅରିଆ ଲେଃକ୍ନେ ସାପା ଦୁତ୍‌, ଦର୍‌ତନି ଆରି ଆତ୍‌ଅରିଆ ଲେକ୍ନେ ସାପା ଜିନିସ୍‌, କେଣ୍ଡିଆ ଆରି ଆତ୍‌ଅରିଆ ଲେଃକ୍ନେ ସାପା ଜିନିସ୍‌କେ ଆଃରେନାବ ବାରି ଆତେନ୍‌ ସାପାକେ ନା ଆଃ ଜିବନ୍‌ ବିଃନାଡିଂକେ ବାରି କିତଙ୍ଗ୍‌ନେ ସାପା ଦୁତ୍‌ ଆନାକେ ସାର୍‌ଲ ମ୍ୟାଃଆର୍‌କେ । 7 ନା ଆଃ ମାପ୍‌ରୁ ପର୍‌ମେସର୍‌, ନା ଅବ୍ରାମକେ ନାବାଚେକେ ବାରି କଲଦୀୟଇଂନେ ଊର୍‌ ଦେସ୍‌ବାନ୍‌ ଆମେକେ ଆଃତାର୍‌ ଡୁଙ୍ଗ୍‌ପାଂଚେ ଅବ୍ରହାମ୍‌ ମିନି ନାବିକେ । 8 ନା ନାନେ ସାମ୍‌ନା ମେଁନେ ରୁଦୟ୍‌ନିଆ ବିସ୍‌ବାସ୍‌ ଡିଂନେ ନାକେକେ, ବାରି କିଣାନୀୟ, ହିତ୍ତୀୟ, ଇମୋରୀୟ ବାରି ପରିଷୀୟ ବାରି ଯିବୂଷୀୟ ବାରି ଗିର୍ଗାଶୀୟ ରେମୁଆଁଇଂନେ ଦେସ୍‌ ବିନ୍‌ସା, ବାରି, ମେଁନେ ବଂଶକେ ବିନ୍‌ସା ମେଁ ଏଃତେ ନିଅମ୍‌ ନାଡିଂକେ, ବାରି ନାନେ ବ୍ନାଲିର୍‌ ପୁରନ୍‌ ଆଃଡିଙ୍ଗ୍‌ନାବ । ମେଃଡାଗ୍‌ଲା ନା ଦରମ୍‌ ମାପ୍‌ରୁ । 9 ବାରି, ନା ମିସର୍‌ ଦେଶ୍‌ନିଆ ନେନେ ଅଃସେନେ ନ୍ତାଇଂନେ ଦୁକ୍‌ ନାକେକେ ବାରି ସୂପ କେଣ୍ଡିଆଃ ଡାଗ୍ରା ମେଙ୍ଗ୍‌ନେ ଅଃନେ ନାଅଁକେ । 10 ବାରି, ଫାରୋ ଆରି ମେଁନେ ସାପା ବାରି ମେଁନି ଦେଶ୍‌ନେ ସାପା ରେମୁଆଁଇଂନେ ଆଡ଼ାତ୍ରା ବିନ୍ ବିନ୍‌ ରକମ୍‌ନେ ଚିନ୍‌ ବାରି ଇରିୟାଃତୁଗ୍‌ ଡିଂନେ କାମ୍‌ ଆଃକେକେ । ଡାଗ୍‌ଲା ମିସ୍ରିୟରେଇଂ ମେଙ୍ଗ୍‌ନେ ବିରୁଦ୍‌ରେ କରାପ୍‌ କାମ୍‌ ଡିଂନେ ନା ମ୍ୟାଃନାଲେକେ । ଆତେନ୍‌ସା ପେ ଏଃ ଜାକ ନାନେ ମିନିକେ ଆମ୍ନା ନାବକେ । 11 ବାରି, ପେ ମେଙ୍ଗ୍‌ନେ ସାମ୍‌ନାରେ କେଣ୍ଡିଆକେ ମ୍ୱାର୍‌ ବାଗ୍‌ ନାରାଡିଂକେ, ତେଲା ମେଇଂ ନ୍‌ସୁଆର୍‌ ଲେଃକ୍ନେ ଗାଲି ବିଚେ ୱେକ୍ନେ ରକମ୍‌ କେଣ୍ଡିଆ ବିତ୍‌ରେ ଅଲେଙ୍ଗ୍‌ଆର୍‌କେ । ମାତର୍‌ ସ୍ରିଡ଼୍ୟାଃନ୍ନିଆ ବ୍ରି ରକମ୍‌ ନା ମେଙ୍ଗ୍‌ନେ ପ୍ଲା ପ୍ଲା ନୁଆଁଡିଂକ୍ନେ ରେମୁଆଁଇଂକେ ସ୍ରିଡ଼୍ୟାଃ ବିତ୍‌ରେ ଆଲଗ୍‌ଡିଆ ନାବିକେ । 12 ବାରି, ନା ସ୍ମି କେଲା ତ୍ରିଗ୍‌ଡିଆ ଏତେ ଆରି ମିଡିଗ୍‌ କେଲା ମେଇଂନେ ଅଲେଙ୍ଗ୍‌ନେ ଗାଲିନିଆ ତାରାସ୍‌ ବିନ୍‌ସା ସୁଆନେ ତ୍ରିଗ୍‌ଡ଼ିଆ ଏତେ ଆମେଇଂକେ ନାରାଃଅଲେଙ୍ଗ୍‌କେ । 13 ଏଲେଡିଗ୍‌ ନା ସୀନୟ କଣ୍ଡାନିଆ ଜାର୍‌ଚେଃ କିତଙ୍ଗ୍‌ବାନ୍‌ ମେଇଙ୍ଗ୍‌ ଏତେ ବାଃଲିର୍‌ବାତା ନାଡିଙ୍ଗ୍‌କେ ବାରି ଆମେଇଂକେ ସମାନ୍‌ ବାବ୍‌ରେ ସାସନ୍‌ ଡିଂନେ ଆରି ସତ୍‌ ନିଅମ୍‌, ନିମାଣ୍ଡାଃ ନିଅମ୍‌ ଆରି ଆଦେସ୍‌ ବିଃକେ । 14 ଆରି, ଆମେଇଂକେ ନାନେ ପବିତ୍ର ପୁଣ୍ଡେନେ ଦିନ୍‌ ନେରାମ୍ୟାଃକେ ବାରି ନାନେ ଚାକର୍‌ ମୋଶାନେ ନ୍ତିବାନ୍‌ ଆମେଇଂକେ ଆଦେସ୍‌ ଆରି ରିତିନିତି ଆରି ନିଅମ୍‌ ନାବିକେ । 15 ବାରି, ଆମେଇଂକେ କିଡ଼େସଃ ଆଃଲାଗେ ନ୍‌ସାଃ ଆମେଇଂକେ କିତଙ୍ଗ୍‌ବାନ୍‌ କାଦି ବିଃକେ ଆରି ଆମେଇଂକେ ଉଗ୍‌ଡିଆ ଡଲା ମ୍ନାଃନେ ବ୍ରିବାନ୍‌ ଣ୍ଡିଆ ଆଃତାର୍‌କେ, ଆରି ନା ଆମେଇଂକେ ଆଣ୍ଡିନେ ଦେସ୍‌ ବିନ୍‌ସା ପାର୍‌ମାନ୍‌ ଡିଂବଗେ, ଆତେନ୍‌ ଦେସ୍‌ ଅଦିକାର୍‌ ଡିଂନେସା ବାରି ଆତ୍‌ଅରିଆ ୱେ ନ୍‌ସାଃ ଆଦେସ୍‌ ବିଃକେ । 16 ମାତର୍‌ ମେଇଂ ବାରି ନେନେ ଅଃସେ ନ୍ତା ଞ୍ଜାଇଂ ଗର୍ବ ଆଃସୁଏଃବଗେ ଆରି ନିଜେ ନିଜ୍‌କେ ଆଲାଜୁ ଡିଙ୍ଗ୍‌ଚେ ଲେଆର୍‌ଗେ ଆରି ନାନେ ଆଦେସ୍‍କେ ମାନେଃ ଆଲେଃଆର୍‌ଗେ । 17 ଆରି, ମେଇଙ୍ଗ୍‌ ନାନେ ଆଦେସ୍‍କେ ପାଲେନ୍‌ସା ରାଜି ଆଡିଂଆର୍‌କେ ଣ୍ଡୁ, ବାରି ନା ମେଙ୍ଗ୍‌ନେ ବିତ୍‌ରେ ଆଣ୍ଡିନେ ଇରିୟାଃତୁଗ୍‌ କାମ୍‌ ଡିଂନାବଗେ, ଆତେନ୍‌ ମନେ ଆବଆର୍‌କେ ଣ୍ଡୁ । ମାତର୍‌ ନିଜେ ନିଜର୍‌ ମନ୍‌କେ ଆଲାଜୁ ଡିଙ୍ଗ୍‌ଚେ ଲେଃଆର୍‌ଗେ ବାରି ଚାକର୍‌ ଡିଂଚେଃ କାମ୍‌ ପେଡିଂକ୍ନେନିଆ ଆଣ୍ଡେ ୱେନ୍‌ସାଃ ୱିଙ୍ଗ୍‌ଆଃରିଙ୍ଗ୍‌ଆଃଚେ ମୁଇଂଜାକେ ମ୍ନାରେ ଆଃଡିଂଚେ ନାବାଚେକେ । ଏଲେଡିଗ୍‌ ନା କେମା ଡିଂନ୍‌ସାଃ ରାଜି ନାଡିଂକେ, ଦୟାଡିଂଣ୍ଡ୍ରେ ଆରି ଦୟା ଆଃସୁଏଣ୍ଡ୍ରେ, ଦିରେ ରିସା ଡିଂଣ୍ଡ୍ରେ, ବାରି ଦୟାନେ ପର୍‌ମେସର୍‌, ଆତେନ୍‌ସା ଆମେଇଂକେ ନା ନାଆନ୍ତାର୍‌କେ ଣ୍ଡୁ । 18 ଆରି ଦେକ୍‌ରକମ୍‌ ମେଇଙ୍ଗ୍‌ ଚଞ୍ଚ୍‌ନିଆ କିଗ୍‌ଚେ ମୁଇଂ ଉଂତ୍ୟା ଆଃରେଚେ ବାସଙ୍ଗ୍‌କେ, "ମୁଡ଼ି ଦେବ୍‌ତା ମିସର୍‌ ଦେସ୍‌ବାନ୍‌ ଆଃତାର୍‌ଚେ ଡୁଂପାଙ୍ଗ୍‌କେ, ମେଁ କିମେ," ଆକେନ୍‌ ବାସଙ୍ଗ୍‌ଚେ ମାପ୍‌ରୁକେ ଜାବର୍‌ ମ୍ନାଃ ଅପମାନ୍‌ ଡିଂକେ । 19 ଆତେନ୍‌ ବେଲା ନା ନାନେ ଜାବର୍‌ ଦୟାରେ ଆମେଇଂକେ କଣ୍ଡା ଆଡ଼ାନିଆ ଡିଗ୍‌ ନାଆନ୍ତାର୍‌କେ ଣ୍ଡୁ । ଗାଲି ଆଅଲେଙ୍ଗ୍‌ ରାଙ୍ଗ୍‌ୱେ ନ୍‌ସାଃ ସ୍ମିକେଲା ତ୍ରିଗ୍‌ଡିଆ ଆଡିଂଚେ, ବାରି ଆମେଇଂକେ ତାର୍କିଗ୍‌ ବାରି ସିଦା ଗାଲି ଆଃସୁଏନ୍‌ସା ମିଡିଗ୍‌ ବେଲା ସୁଆନେ ତ୍ରିଗ୍‌ଡିଆ ମେଙ୍ଗ୍‌ନେ ସିସେ ସିସେ ଆୱେକେ ଣ୍ଡୁ । 20 ଆରି, ନା ଆମେଇଂକେ ସିକ୍ୟା ବିଃନ୍‌ସାଃ ନାନେ ମଙ୍ଗଲମୟ ଆତ୍ମା ନାବିଃକେ ଆରି ମେଙ୍ଗ୍‌ନେ ତୁମୁଆଃବାନ୍‌ ନାନେ ଚଙ୍ଗ୍‌ନେ ମାନ୍ନା ନାରାଃଅଟ୍‌କେ ଣ୍ଡୁ ବାରି ମେଙ୍ଗ୍‌ନେ ଉଗ୍‌ଡିଆ ଲାଗ୍‌ଡନ୍‌ସା ଆମେଇଂକେ ଣ୍ଡିଆ ନାବିକେ । 21 ନା ଚାଲିଶ୍‌ ମୁଆଁ ଜାକ କଣ୍ଡା ଆଃଡ଼ାଃ ଆମେଇଂକେ ଲାଲନ୍‌ ପାଲନ୍‌ ନାଡିଂକେ, ମେଙ୍ଗ୍‌ନେ ମେଃଡିଗ୍‌ ଅବାବ୍‌ ଆଡିଂକେ ଣ୍ଡୁ । ମେଙ୍ଗ୍‌ନେ ସକାପାଟାଇ ଆସ୍ୟାଃକେ ଣ୍ଡୁ କି ମେଙ୍ଗ୍‌ନେ ଞ୍ଚ ଆପଙ୍ଗ୍‌କେ ଣ୍ଡୁ । 22 ଆରି ନା ଆମେଇଂକେ ଗୁଲେ ରାଜ୍ୟ ଆରି କୁଟୁମ୍‌ ନାବିକେ ବାରି ଆତେନ୍‌ ମେଇଂ ବାଟା ବିଃନେ ଇସାବ୍‌ରେ ତିଆର୍‌ ନାଡିଂକେ । ତେଲା ମେଇଂ ସୀହୋନ ଦେସ୍‌, ବାରି ହିଷ୍‌ବୋନ୍‌ ରାଜାନେ ଦେସ୍‌ ବାରି ବାଶନନେ ଓଗ୍‌ ରାଜାନେ ଦେସ୍‌ ଅଦିକାର୍‌ ଡିଂଆର୍‌କେ । 23 ଆରି, ନା ମେଇଂନେ ଉଂଡେଇଂକେ କିତଙ୍ଗ୍‌ଇନିନେ ଚାଙ୍କୁଆଇଂ ରକମ୍‌ ଜାବର୍‌ ରେମୁଆଁ ନାରାଡିଂକେ ବାରି ଆଣ୍ଡିନେ ଦେସ୍‌ ମେଇଂ ଅଦିକାର୍‌ ଡିଂନ୍‌ସାଃ ୱେଆର୍‌ଏ ଡାଗ୍‌ଚେ ନା ମେଇଂନେ ନ୍ତାଇଂକେ ବାସଙ୍ଗ୍‌ନାବଗେ, ଆତେନ୍‌ ଦେସ୍‌ଅରିଆ ଆମେଇଂକେ ରାଙ୍ଗ୍‌ନାପାଂକେ । 24 ଦେକ୍‌ରକମ୍‌ ଆତେନ୍‌ ଉଂଡେଇଂ ଦେଶ୍‌ନିଆ ୱେଚେ ଅଦିକାର୍‌ ଡିଂଆର୍‌କେ, ଆରି ନା ମେଇଂନେ ସାମ୍‌ନା ଆତେନ୍‌ ଦେଶ୍‌ନିଆ ବାସାଲେଃଆର୍‌କ୍ନେ କିଣାନ୍‌ନେ ରେମୁଆଁଇଂକେ ନାଜିତେକେ ଆରି ମେଇଂ ଡିରକମ୍‌ ମେଙ୍ଗ୍‌ନେ ଇକ୍‌ଚାରେ ବେପାର୍‌ ଡିଂଆର୍‌ଏ, ଆତେନ୍‌ସା ଆମେଇଂକେ ଆରି ମେଙ୍ଗ୍‌ନେ ରାଜାଇଂକେ ଆରି ଦେଶ୍‌ନେ ସାପା କୁଟୁମ୍‌କେ ମେଙ୍ଗ୍‌ନେ ନ୍ତିନିଆ ବିଃ ନାବିକେ । 25 ତେଲା ମେଇଂ ପିତୁର୍‌ ପାକା କୁଗ୍‌ଡାସାଃ ଗେରେଲେଃକ୍ନେ ଇନି ସାପା ଆରି କତ୍‌ଲେକ୍ନେ ତୁବଃ ରାଙ୍ଗ୍‌ଡ ଆର୍‌କେ, ସାପା ରକମ୍‌ନେ ମାଣ୍ଡାଃ ମାଣ୍ଡାଃ ଜିନିସ୍‌ଇଂ ତ୍ନଲାଏଃକ୍ନେ ଡୁଆ, ଗଃବକ୍ନେ କୁଇଁସାଲ୍‌, ଅଙ୍ଗୁର୍‌ ଲିଜ ଆରି ଜୀତ ଲିଜ ଆରି ଗୁଲେ ଚୁ ବ୍ଲେ ଲେକ୍ନେ ଜାଗା ଅଦିକାର୍‌ ଡିଂଆର୍‌କେ । ତେଲା ମେଇଂ ଚଙ୍ଗ୍‌ଚେ ପାସେଃଆର୍‌କେ ଆରି ମଟାସଟା ଡିଂଆର୍କେ ଆରି ନାନେ ମ୍ନା ଦୟା ବିଃନାବକ୍ନେ ଦାନ୍‌ ଆତ୍‌ଲା ସାର୍‌ଦା ଡିଂଆର୍‌କେ । 26 ଏଲେଡିଗ୍‌ ମେଇଂ ଆଦେସ୍‌ ଆମାନେଃଆର୍‌କେ ଆରି ନା ବିରଦ୍‌ରେ ୱିଙ୍ଗ୍‌ଆଃରିଙ୍ଗ୍‌ଆଃ ଡିଙ୍ଗ୍‌ଆର୍‌କେ ଆରି ନାନେ ନିଅମ୍‌ ମେଇଂନେ ପ୍ଲାପାକା ଆଡିଂବିକେ, ଆରି ନାନେ ମୁଡ଼ି ବବିସତ୍‌ ବକ୍ତାଇଂ ଆମେଇଂକେ ନା ଡାଗ୍ରା ବାର୍‌ମୁଇଂତର୍‌ ବେନ୍‌ସା ଆମେଇଂକେ ଆଃଚେତା ଆର୍‌କେ, ଆତେନ୍‌ସା ଆମେଇଂକେ ବାଗୁଏଆର୍‌କେ ଆରି ଅପମାନ୍‌ ରକମ୍‌ନେ କାମ୍‌ ଡିଂଆର୍‌କେ । 27 ଆତେନ୍‌ସା ନା ଆମେଇଂକେ ଶତ୍ରୁଇଂନେ ନ୍ତିନିଆ ସର୍ପେନାବିକେ, ମେଇଂ ଆମେଇଂକେ ଦୁକ୍‌ ବିଃକେ । ମାତର୍‌ କସ୍‌ଟ ପାଙ୍ଗ୍‌ନେ ଦିନା ମେଇଂ ନା ଡାଗ୍ରା ଅଃଆର୍‌ଏ, ନା କିତଙ୍ଗ୍‌ଇନିବାନ୍‌ ଆତେନ୍‌ ନାଦ୍ରିଗ୍‌କେ । ଆରି, ନାନେ ମ୍ନାଦୟାରେ ଆମେଇଂକେ ମେଙ୍ଗ୍‌ନେ ଶତ୍ରୁଇଂନେ ନ୍ତିବାନ୍‌ ଆମେଇଂକେ ଉଦାର୍‌ ନାଡିଂକେ । 28 ମାତର୍‌ ମେଇଂ ପୁଣ୍ଡେକ୍ନେ ଇଡ଼ିଂ ବାର୍‌ମୁଇଂତର୍‌ ନା ସାମ୍‌ନା ଦଦିଆ କାମ୍‌ ଡିଂଆର୍‌କେ । ଆତେନ୍‌ସା ନା ଆମେଇଂକେ ସତ୍ରୁନେ ନ୍ତିନିଆ ଆଃସାଃ ନାବିକେ, ମେଇଂ ମେଙ୍ଗ୍‌ନେ ଆରାତ୍ରା ଅଦିକାର୍‌ ଡିଂଆର୍‌କେ, ଏଲେଡିଗ୍‌ ଉଃଡ଼ିବେଲା ମେଇଂ ଆଣ୍ଡେ ପାଙ୍ଗ୍‌ଚେ ନା ଡାଗ୍ରା ଅଃଆର୍‌କେ, ଆତେନ୍‌ ବେଲା ନା କିତଙ୍ଗ୍‌ଇନିବାନ୍‌ ଆତେନ୍‌ ନାଦ୍ରିଗ୍‌କେ । ଜାବର୍‌ ତର୍‌ ନା ନାନେ ଦୟାରେ ଆମେଇଂକେ ଉଦାର୍‌ ନାଡିଂକେ । 29 ବାରି, ଆମେଇଂକେ ବାର୍‌ମୁଇଂତର୍‌ ନାନେ ନିଅମ୍‌ନେ ଗାଲିଅରିଆ ରାଙ୍ଗ୍‌ପାଂନେସା ଆମେଇଂକେ ଆଃଚେତା ନାବିଃକେ । ଏଲେଡିଗ୍‌ ମେଇଂ ଗର୍ବ ଆଃସୁଏ ଆର୍‌କେ ଆରି ନାନେ ଆଦେସ୍‌କେ ଆଦ୍ରିକ୍‌ଆର୍‌କେ ଣ୍ଡୁ, ମାତର୍‌ ମେଃନେ ପାଲନ୍‌ ଡିଂଲା ରେମୁଆଁ ବ୍ରୁଆଏ, ନାନେ ଆତେନ୍‌ ସାସନ୍‌ ବିରୁଦ୍‌ରେ ପାପ୍‌ ଡିଂଆର୍‌କେ, ବାରି ମନ୍‌ଦିଆନ୍‌ ଆବିଃଆର୍‌କେ ଣ୍ଡୁ ଆରି ନିଜର୍‌ ନିଜର୍‌ନେ ମନ୍‌କେ ଡାଟ୍‌ ଆଃଡିଂଆର୍‌କେ ଆରି ଦ୍ରିଗ୍‌ନ୍‌ସା ରାଜି ଆଡିଂଆର୍‌କେ । 30 ଏଲେଡିଗ୍‌ ଜାବର୍‌ ମୁଆଁ ଜାକ ନା ଆମେଇଂକେ ନାସମ୍ୱାଲେକେ ଆରି ନାନେ ଆତ୍ମା ଏତେ ନାନେ ବବିସତ୍‌ ବକ୍ତାଇଂ ବିଃଚେ ଆମେଇଂକେ ନାରାଃଚେତାକେ । ମାତ୍ରମ୍‌ ମେଇଂ ଦ୍ରିଗ୍‌ନ୍‌ସା ରାଜି ଆଡିଙ୍ଗ୍‌ ଆର୍‌କେ ଣ୍ଡୁ । ମାତର୍‌ ନା ଆମେଇଂକେ ବିନ୍‌ ଦେଶ୍‌ନେ କୁଟୁମ୍‌ଇଂନେ ନ୍ତିନିଆ ଆଃସାଃନାବିଃକେ । 31 ନାଁ ମେଇଂନେ ସାମୁଆଁ ନାସମ୍ବାଲେକେ, ଏଲେଡିଗ୍‌ ନା ନାନେ ଜାବର୍‌ ଦୟାରେ ଆମେଇଂକେ ବିନାସ୍‌ ନାରାଃଡିଂକେ ଣ୍ଡୁ, କି ଆମେଇଂକେ ନାଆନ୍ତାର୍‌କେ ଣ୍ଡୁ । ମାତର୍‌ ନା ଦୟାଡିଂଣ୍ଡ୍ରେ ଆରି ଦୟା ଆଃସୁଏନେ ପର୍‌ମେସର୍‌ । 32 ଆତେନ୍‌ସା ଅ ନେନେ ପର୍‌ମେସର୍‌ ମ୍ନାଃ, ସକ୍‌ତିସାଲି ଆରି ବୟଙ୍କାର୍‌ ପର୍‌ମେସର୍‌, ନା ନିଅମ୍‌ ଆରି ଦୟାକେ ପାଲନ୍‌ ଡିଂନାମ୍ୟାଃ, ଅଶୂରୀୟ ରାଜାଇଂନେ ବେଲାବାନ୍‌ ଏଃ ଜାକ ନେ ଆଡ଼ାତ୍ରା, ନେନେ ଇଃସାଙ୍ଗ୍‌ଇଂନେ ଆଡ଼ାତ୍ରା, ନେନେ ନେତାଇଂ ଆଡ଼ାତ୍ରା ଆରି ନେନେ ପୁଜାରିଇଂନେ ଆଡ଼ାତ୍ରା ଆରି ନେନେ ବବିସତ୍‌ ବକ୍ତାଇଂନେ ଆଡ଼ାତ୍ରା ଆରି ନେନେ ନ୍ତାଇଂନେ ଆଡ଼ାତ୍ରା ଆରି ନାନେ ସାପା ରେମୁଆଁଇଂନେ ଆଡ଼ାତ୍ରା ମେଁ ମେଃନେ ଦୁକ୍‌ ଗଟେଲେକେ, ଆତେନ୍‌ ସାପା ନା ସାମ୍‌ନାରେ ଡାଆଁ ରକମ୍‌ ଆଃତ୍ନାଲେଃ । 33 ଏଲେଡିଗ୍‌ ନେ ଆଡ଼ାତ୍ରା ମେଁ ମେଁନେ ଗଟେଲେକେ, ଆତେନ୍‌ ସାପାନିଆ ନା ଦରମ୍‌ ଆସୁଏନେ ମାପ୍‌ରୁ । ମାତର୍‌ ନା ସତ୍‌ରେ ବେବଆର୍‌ ଡିଂନାବ, ମାତର୍‌ ନେ କରାପ୍‌ କାମ୍‌ ଡିଂନେବକେ । 34 ଆରି, ନେନେ ରାଜାଇଂ, ନେନେ ନେତାଇଂ, ନେନେ ପୁଜାରିଇଂ ବାରି ନେନେ ଆବାଇଂ ନାନେ ନିଅମ୍‌ ପାଲନ୍‌ ଆଡିଂଆର୍‌କେ, କି ନା ନାନେ ଆଣ୍ଡିନେ ଆଦେସ୍‌ ଆରି ସାକି ଏତେ ଆମେଇଂକେ ଆଃଚେତା ନାବଗେ, ଆତେନ୍‌ ମେଇଂ ଦିଆନ୍‌ ଆଃବିଆର୍‌କେ । 35 ଆତେନ୍‌ସା ମେଇଂ ମେଙ୍ଗ୍‌ନେ ରାଇଜ୍‌ନିଆ, ଆମେଇଂକେ ନା ବିଃନାବକ୍ନେ ମ୍ନାଃ ଦୟାରେ ଆରି ମେଙ୍ଗ୍‌ନେ ସାମ୍‌ନାରେ ନା ବିଃନାବକ୍ନେ ଚ୍ଲେକ୍ନେ ଜାଗା ଆରି କତ୍‌ଲେକ୍ନେ ଦେଶ୍‌ନିଆ ନାନେ ସେବା ଆଃଡିଂଆର୍‌କେ ଣ୍ଡୁ । କି ନିଜର୍‌ ନିଜର୍‌ନେ କରାପ୍‌ କାମ୍‌ବାନ୍‌ ମନ୍‌ ଆବଦ୍‌ଲେ ଆର୍‌କେ ଣ୍ଡୁ । 36 କେଲା, ଏଃକେ ନେ ଚାକର୍‌ ଡିଂନେଲାଏଃକେ ! ବାରି ନା ନେନେ ଅସେନେ ନ୍ତାଇଂକେ ଆଣ୍ଡିନେ ଦେଶ୍‌ନେ ଚୁ ଆରି ନିମାଣ୍ଡା ନିମାଣ୍ଡା ଜିନିସ୍‌ ବାନ୍‌ସାଃ ବିଃନାବଗେ, କେଲା, ଆତେନ୍‌ ଦେଶ୍‌ନିଆ ନେ ଚାକର୍‌ ଡିଂନେଲାଏକେ । 37 ଆରି ନେନେ ପାପ୍‌ ଆତ୍‌ଲା ନା ଆଣ୍ଡିନେ ରାଜାଇଂକେ ନେ ଆରାତ୍ରା ବାଚେ ନାବକେ, ମେଇଂ ଆତେନ୍‌ ଦେଶ୍‌ନିଆ ଜାବର୍‌ ଚୁ ଆଃବ୍ଲେଚେ ସାର୍‌ଦା ଡିଂଆର୍‌ଙ୍କେ । ଏଲେଡିଗ୍‌ ନେନେ ଗାଗ୍‌ଡ଼େ ଆରାତ୍ରା ଆରି ନେନେ ପସୁଇଂନେ ଆରାତ୍ରା ମେଙ୍ଗ୍‌ନେ ନିଜର୍‌ ନିଜର୍‌ନେ ଇକ୍‌ଚାରେ ଅଦିକାର୍‌ ଲେଃକେ, ଆରି ନେ ମ୍ନାଃ ଦୁକ୍‌ଅରିଆ ନେଲାଏଃକେ । 38 ଆକେନ୍‌ ସାପା ଗଟେଲା ଆଃ ନେ ମୁଇଂ ସତ୍‌ ନିଅମ୍‌ ଡିଂଚେ ଆତେନ୍‌ ଗୁଆର୍‌ନେଡିଂକେ । ନେନେ ନେତାଇଂ, ନେଃନେ ଲେବୀୟଇଂ ଆରି ନେଃନେ ପୁଜାରିଇଂ ଆତେନ୍‌କେ ସିଲ୍‌ ବଗ୍‌ଚେ ବଆର୍‌କେ ।