1 ସନ୍‌ବଲ୍ଲଟ୍‌ ଉଡ଼ିବେଲା ଅଁକେ ଜେ, ତୁରାଃ ତେବଆର୍‌କେ ଡାଗ୍‌ଚେ, ମେଁ ଜାବର୍‌ ରିସା ଡିଂଚେ ଯିହୁଦି ରେମୁଆଁଇଂକେ ଏଃଲିୟା ଆର୍‌କେ । 2 ମେଁ ମେଁନେ ବୟାଁଇଂ ବାରି ଶମରୀୟା ସନ୍ୟ ଦଲ୍‌ନେ ସାମ୍‌ନେ ଆକେନ୍‌ ସାମୁଆଁ ବାସଙ୍ଗ୍‌କେ, "ଆକେନ୍‌ ଅଲ୍‌ସୁଆ ଯିହୁଦିଇଂ ମେଁ ଡିଂଆର୍‌ଡିଂକେ ? ମେଇଂ ମେଁନି ଞ୍ଚକେ ଗାଗ୍‌ଚେ ବଆର୍‌ଏ ? ମେଇଂ ମେଁସା ପସୁକେ ସିଆର୍‌ଏ ? ମେଇଂ ମେଁନେ ମେଃସୁଆକେ ଆଃଡାଆର୍‌ଏ ? ମେଇଂ ମେଁନି ଗିଃଲେଃକ୍ନେ ତୁରାଃ ପାକ୍‌ଚିକ୍ନେ ଗାଦିବାନ୍‌ କାମ୍‌ରେ ଲାଗେନେ ବ୍ରିକେ ସ୍ରିୟାଆର୍‌ଏ ?"

3 ଆକେନ୍‌ ବେଲା ଅମ୍ମୋନୀୟ ଟୋବୀୟ ମେଁ ଡାଗ୍ରା ଲେଃଗେ, ବାରି ମେଁ ବାସଙ୍ଗ୍‌କେ, "ମେଇଂ ମେଁନେ ଆଃରେ ଆର୍‌ଡିଂକେ, ନାକା ଡେଃଲା ମେଙ୍ଗ୍‌ନେ ବ୍ରି ଏତେ ଆଃରେ ବକ୍ନେ କାନ୍ତି ପାକ୍‌ଚି ବିଃଏ ।" 4 ନେଙ୍ଗ୍‌ ପାର୍‌ତନା ଣ୍ଡିଂକେ, "ଏ ନେଙ୍ଗ୍‌ନେ ପର୍‌ମେସର୍‌, ନେଃନେ ପାର୍‌ତନା ଅଁ, ଆତେନ୍‌ ରେମୁଆଁଇଂ ଆନେକେ ଇଙ୍ଗ୍‌ଚେଃ ଡିଂଆର୍‌ଡିଂକେ । ମେଙ୍ଗ୍‌ନେ ଏଃଲିୟା ଡିଙ୍ଗ୍‌ନେ ବାନ୍‌ ଆମେଇଂକେ ଆଃଆଣ୍ଡେ ବିଃ । ଆମେଙ୍ଗ୍‌ଇଂକେ ବିଦେସ୍‌ନିଆ ବନ୍ଦି ଆଡିଂଚେ ମେଙ୍ଗ୍‌ନେ ଦନ୍‌ସମ୍ପତି ଆଡଙ୍ଗା ଆର୍‌କେ । 5 ମେଙ୍ଗ୍‌ନେ ଅଦରମ୍‌ କାମ୍‌ ସାପାକେ ଆସାଗ୍‌ପା ବାରି ନାଁ ସାମ୍‌ନାରେ ମେଙ୍ଗ୍‌ନେ ପାପ୍‌ କେମା ଆଡିଂଗେ ନାବ । ମେଃଡାଗ୍‌ଲା ଆଃରେଣ୍ଡ୍ରେକେ ମେଇଂ ଅପମାନ୍‌ ଆଡିଂବ ଆର୍‌କେ ।" 6 ନେ ଯିରୂଶାଲମନେ କାନ୍ତି ନେରାଃରେକେ । ନେ ସହର୍‌ନେ ପିତୁର୍‌ପାକା କାନ୍ତି ନେରାଃରେକେ । ମାତର୍‌ କାନ୍ତିନେ ତିଆର୍‌ବାନ୍‌ ମଜେ ଜାକ ସାପା କାନ୍ତି ମୁଇଂନୁଗ୍‌ ଆମିସୁ ଆର୍‌କେ । ମାତର୍‌ ସ୍ଲେ ନ୍‌ସା ରେମୁଆଁଇଂନେ ମନ୍‌ ଲେଃଗେ ।

7 ମାତର୍‌ ଯିରୂଶାଲମନେ କାନ୍ତି ପାକ୍‌ଚି ଲେଃକ୍ନେ କାମ୍‌ ଚାଲେ ଲାଏକେ ବାରି ପାକ୍‌ଚି ଲେଃକ୍ନେ ଜାଗା ସାପା ସମ୍‌ ଆଃଡିଂଡିଂକେ, ଆକେନ୍‌ ଅଁଚେ ସନ୍‌ବଲ୍ଲଟ୍‌ ବାରି ଟୋବୀୟ, ବାରି ଆରବୀୟ ରେମୁଆଁଇଂ ବାରି ଅମ୍ମୋନୀୟ ରେମୁଆଁଇଂ ବାରି ଅସ୍‌ଦୋଦନେ ରେମୁଆଁଇଂ ଜାବର୍‌ ରିସା ଡିଙ୍ଗ୍‌ ଆର୍‌କେ । 8 ବାରି ସାପାରେ ଯିରୂଶାଲମ ୱେଚେ ମେଙ୍ଗ୍‌ନେ ବିରୁଦ୍‌ରେ ଯୁଦ୍‌ ଡିଂ ନ୍‌ସା ବାରି ମେଙ୍ଗ୍‌ନେ ବିତ୍‌ରେ କିରମର ଆଃଡିଂ ନ୍‌ସାଃ କୁଡ଼େଃଚେଃ ଉପାୟ୍ ପାଞ୍ଚେଃଆର୍‌କେ । 9 ମାତର୍‌ ନେ ମେଇଂନେ ଆତ୍‌ଲା ନେନେ ପର୍‌ମେସର୍‌ ଡାଗ୍ରା ପ୍ରାତନା ନେଡିଂକେ ବାରି ସ୍ମିମିଡିଗ୍‌ ମେଙ୍ଗ୍‌ନେ ବିରୁଦ୍‌ରେ ଜାଗୁଆଲ୍‌ଇଂକେ ନେବକେ । 10 ଆତେନ୍‌ ବେଲା ଯିହୁଦା ବାସଙ୍ଗ୍‌କେ, "ଅଜନ୍‌ ଡୁଙ୍ଗ୍‌ଲାଏଃକ୍ନେ ରେମୁଆଁଇଂନେ ବପୁ ଡାଲାଏଃକେ, ଆରି ଆତ୍‌ଅରିଆ ଏନ୍ତି ଦଂସ ଡିଂଲାଏଃକେ ଜେ, ନେ କାନ୍ତି ତିଆର୍‌ ଡିଙ୍ଗ୍‌ ନ୍‌ସା ଇକ୍‌ଚା ଣ୍ଡୁ ।"

11 ବାରି ନେନେ ବିରଦିଇଂ ବାସଙ୍ଗ୍‌କେ, "ନେ ମେଇଂନେ ଡାଗ୍ରା ୱେଚେ ଆମେଇଂକେ ନେଃବାଗୁଏ ବାରି ମେଙ୍ଗ୍‌ନେ ସ୍ଲେ ବନ୍ଦ୍‌ ଆଡିଂ ଜାକ ମେଇଂ ଆମ୍ୟାଃଆର୍‌ କି ଆକେଆର୍‌ ଣ୍ଡୁ ।" 12 ଆରି ମେଙ୍ଗ୍‌ ଡାଗ୍ରା ବାସା ଲେଃକ୍ନେ ଯିହୁଦି ରେମୁଆଁଇଂ ପାଙ୍ଗ୍‌ଚେ ଆନେକେ ଗୁଆତର୍‌ ବାସଙ୍ଗ୍‌କେ, "ପେ ନେଡାଗ୍ରା ପାଙ୍ଗ୍‌ପଡ଼େଏ ।" 13 ଆତେନ୍‌ସା ନେଙ୍ଗ୍‌ କାନ୍ତିନେ ପ୍ଲା ପାକା ମେଲା ଜାଗାନ୍ନିଆ ରେମୁଆଁଇଂକେ ମେଙ୍ଗ୍‌ନେ ଡୁଆଣ୍ଡ୍ରେ ଇସାବ୍‌ରେ ଆମେଇଂକେ କାଣ୍ଡା ବାରି ଚାବୁକ୍‌ ବାରି ଆଁୟାଃ ଏଃତେ ଉଁୱାକେ ।

14 ଉଡ଼ିବେଲା ନେଙ୍ଗ୍‌ ଆକେନ୍‌ ଅବସ୍ତା ଙ୍କେକେ, ନେଙ୍ଗ୍‌ ନ୍ତଡ଼ିଆକେ ବାରି ମ୍ନା ମ୍ନା ରେମୁଆଁଇଂକେ, ସାସନ୍‌ ଡିଂଣ୍ଡ୍ରେକେ ବାରି ବିନ୍‌ ରେମୁଆଁଇଂକେ ମ୍ୱାସଂକେ, "ପେ ଆମେଇଂକେ ଆବ୍‌ଟଗେପା । ମାପ୍‌ରୁକେ ମନେ ତ୍ଲାଗ୍‌ପା । ମାପ୍‌ରୁ ମ୍ନା ବାରି ମେଁ ବଏଙ୍କାର୍‌ । ବାରି ପେ ପେନି ବୟାଁଇଂ, ଉଂଡେଇଂ ବାରି ସେଲାଇଂ ବାରି ପେ କୁନେଃଇଂ ପେନେ ଡୁଆ ଆତ୍‌ଲା ଜୁଜ୍‌ ଡିଂପା ।"

15 ଆକେନ୍‌ ପରେ ନେନେ ସତ୍ରୁଇଂନେ ଜଜ୍‌ନା ପାଞ୍ଚେଃନେ ନେ ମ୍ୟାନେଲେକେ ବାରି ପର୍‌ମେସର୍‌ ଆତେନ୍‌ ସରା ଆଃଡିଙ୍ଗ୍‌ବିକେ । ଆକେନ୍‌ ମେଇଂ ଅଁଲା ନେ ସାପାରେ କାନ୍ତିନ୍ୟା ନିଜର୍‌ ନିଜର୍‌ କାମ୍‌ ଡିଙ୍ଗ୍‌ ନ୍‌ସାଃ ଆଣ୍ଡେ ନେୱେକେ । 16 ଆରି ଆତେନ୍‌ ଦିନ୍‌ ବାନ୍‌ ନେ ଦାସଇଂନେ ବାକି ଲେକ୍ନେ କାମ୍‌ ସ୍ଲେ ଆର୍‌କେ ବାରି ମେଙ୍ଗ୍‌ନେ ବାଃଗା ଚାବୁକ୍‌, ଗ୍ରି ପାଟା, ଆଁୟାଃ, ସାଞ୍ଚୁଆ* ସାଚେ ଲେଃଆର୍‌ଗେ । ବାରି ନେତାଇଂ ଯିହୁଦାନେ ସାପା ଡୁଆଣ୍ଡ୍ରେନେ ପ୍ଲା ପାକା ଲେଃଆର୍‌ଗେ । 17 ଜାଣ୍ଡେଇଂ କାନ୍ତିକେ ଆଃରେଆର୍‌କେ ବାରି ଜାଣ୍ଡେଇଂ ଅଜନ୍‌ ଡୁଂଆର୍‌କେ, ସାପାରେ ମୁଇଂ ନ୍ତିଏତେ ସ୍ଲେ ଆର୍‌କେ ବାରି ବିନ୍‌ ନ୍ତି ପାକା ଜୁଜ୍‌ ଡିଙ୍ଗ୍‌ନେ ଜିନିସ୍‌ ସାଃଆର୍‌କେ । 18 ଆରି ଗିଗାଗ୍‌ଣ୍ଡ୍ରେଇଂ ସାପାରେ ନିଜର୍‌ ନିଜର୍‌ନେ ନ୍ସାନିଆ କାଣ୍ଡା ଗାଗ୍‌ଆର୍‌କେ । ବାରି ପ୍ନିଃ ପିଃଣ୍ଡ୍ରେ ନେ ଡାଗ୍ରା ଲେଃଗେ । 19 ଆକେନ୍‌ ପରେ ନେ ମ୍ନା ମ୍ନାରେକେ ବାରି ସାସନ୍‌ ଡିଂଣ୍ଡ୍ରେଇଂକେ ଆରି ବିନ୍ ବିନ୍‌ରେକେ ନେବାସଙ୍ଗ୍‌କେ, "ଲିଗିଙ୍ଗ୍‌ କାମ୍‌ ଡିଂଣ୍ଡ୍ରେ ଆରି ଆଙ୍କ୍‌ ଆନ୍ତ୍ ଡିଙ୍ଗ୍‌ଲାଏକ୍ନେ ରେମୁଆଁଇଂ, ବାରି ନେ କାନ୍ତି ଆରାତ୍ରା ଅଲ୍‌ଗା ଡିଂଚେ ମୁଇଂ ମୁଇଂଜା ବାନ୍‌ ସ୍ଲ ନେଲାଏଃକେ । 20 ଆତେନ୍‌ସା ଆଣ୍ଡିନେ ଜାଗା ଡିଗ୍‌ ପିନିଃନେ ଇଲ୍‌ଏଁ ପେଅଁଏ, ଆତେନ୍‌ ଜାଗାବାନ୍‌ ନେ ଡାଗ୍ରା ପେପାଙ୍ଗ୍‌ଏ । ନେନେ ପର୍‌ମେସର୍‌ ନେ ଆତ୍‌ଲା ଯୁଦ୍‌ ଡିଂଏ ।" 21 ଦେକ୍‌ରକମ୍‌ ନେ ଆତେନ୍‌ କାମ୍‌ନ୍ନିଆ ନେସ୍ଲେକେ । ବାରି ସ୍ନି ତାର୍‌ନେ ବାନ୍‌ ଚାଙ୍କୁଆ ତାର୍‌ନେ ବେଲା ଜାକ ମେଙ୍ଗ୍‌ନେ ଉଡ଼ି ରେମୁଆଁ ଚାବୁକ୍‌ ସାଃଆର୍‌କେ । 22 ଆତେନ୍‌ ବେଲା ନେ ରେମୁଆଁଇଂକେ ବାରି ନେବାସଙ୍ଗ୍‌କେ, "ସାପାରେ ମିଡିଗ୍‌ଲା ପେ ପେନି ଦାସ ଏଃତେ ଯିରୂଶାଲମ ବିତ୍‌ରେ ଲେଃଆର୍‌ଲେ । ତେଲା ମେଇଂ ମିଡିଗ୍‌ ବେଲା ଆନେକେ ଉର୍‌ଚେ ଲେଃଆର୍‌ଏ ବାରି ସ୍ମିକେଲା କାମ୍‌ ଡିଂୟାଆର୍‌ଏ ।" 23 ଦେକ୍‌ରକମ୍‌ ନେଙ୍ଗ୍‌ କି ନେଙ୍ଗ୍‌ନେ ବୟାଁଇଂ ବାରି ନେଙ୍ଗ୍‌ନେ ଚାକର୍‌ଇଂ ଣ୍ଡୁଲା ନେଙ୍ଗ୍‌ନେ ପିତୁର୍ ପାକା ଉ‌ର୍‌ଲେକ୍ନେ ଜାଗୁଆଲ୍‌ଇଂ ଜା ଡିଗ୍ ନେନେ ଗାଗ୍‌ଡ଼େ ବାନ୍‌ ସକା ନେତଃକେ ଣ୍ଡୁ । ସାପାରେ ନିଜର୍‌ ନିଜର୍‌ ଜୁଜ୍‌ ଡିଙ୍ଗ୍‌ନେ ଜିନିସ୍‌ ସାଃଚେ ଣ୍ଡିଆ ଡାଗ୍ରା ନେୱେକେ ।