ଯିରୂଶାଲମ କାନ୍ଥି ବାର୍ମୁଇଂତର୍ ତିଆର୍ ଡିଙ୍ଗ୍ନେ
1 ଇଲୀୟାଶୀବ୍ ମ୍ନା ପୁଜାରି ଲେଃଗେ ବାରି ମେଁନେ ତ୍ରଙ୍ଗ୍ ପୁଜାରିଇଂ ମେଣ୍ଡା କାପାଟ୍ ଆଃରେନ୍ସା ୱେକେ । ମେଇଂ ଆତେନ୍ କାପାଟ୍କେ ବିଃଆର୍କେ ବାରି ଆକ୍ମେନେ ପ୍ଲେଡ଼ିଆ ଆଃରେ ଆର୍କେ । ମେଇଂ ହମ୍ମେୟା ତିଆର୍ ଡୁଆନେ ବାରି ହନନେଲ ତିଆର୍ ଡୁଆ ଜାକ ମେଇଂ ପବିତ୍ର ଡିଂଆର୍କେ । 2 ଯିରୀହୋନେ ରେମୁଆଁଇଂ ମେଙ୍ଗ୍ନେ ଇଡ଼ିଙ୍ଗ୍ ସ୍ଲେ ଆର୍କେ । ଇମ୍ରିନେ ଉଂଡେ ସକ୍କୂର ଯିରିହୋନେ ରେମୁଆଁଇଂ ତିଆର୍ ଡିଙ୍ଗ୍ ଆର୍କେ । 3 ହସନାୟାନେ ଉଂଡେଇଂ ଆଃଡ଼ କାପାଟ୍ ଆଃରେ ଆର୍କେ । ମେଇଂ ମେଁନେ କାଡ଼ୁ ଆଃରେଚେ ବଆର୍କେ, ମେଁନି କାପାଟ୍, ହୁଡ଼ୁକା ବାରି ଗାଡ଼ା ତ୍ଲାଗ୍ଆର୍କେ । 4 ମେଙ୍ଗ୍ନେ ଇଡ଼ିଙ୍ଗ୍ ହକ୍କୋସନେ ଉଂଡେ ଊରୀୟ, ଊରୀୟନେ ଉଂଡେ ମରେମୋତ୍ ବାକି ଲାଏଃକ୍ନେ କାମ୍ ଆଃରେକେ, ବାରି ମେଙ୍ଗ୍ନେ ଇଡ଼ିଂ ମଶେଷବେଲନେ ଉଂଡେ ବେରିଖୀୟ ବାରି ବେରିଖୀୟନେ ଉଂଡେ ମଶୁଲ୍ଲମ୍ ତେନ୍ଇଡ଼ିଂ ଲେକ୍ନେ କାମ୍କେ ଆଃରେକେ । ବାରି ମେଙ୍ଗ୍ନେ ପରେ ବାନାନେ ଉଂଡେ ସାଦୋକ ତେନ୍ଇଡ଼ିଂ ବାକି ଲେଃକ୍ନେ କାମ୍କେ ଆଃରେକେ । 5 ତକୋୟୀୟ ରେମୁଆଁଇଂ ଆଃରେ ଆର୍କେ । କୁଲିବୁତି ଡିଙ୍ଗ୍ନେ ରେମୁଆଁଇଂ ମେଙ୍ଗ୍ନେ ନେତାନେ କାମ୍ଅରିଆ ସଙ୍ଗ୍ତୁଡ଼୍ ଆଡିଂଆର୍କେ ଣ୍ଡୁ । 6 ପାସେହନେ ଉଂଡେ ଯିହୋୟାଦା ବାରି ବଷୋଦିୟାନେ ଉଂଡେ ମଶୁଲ୍ଲମ୍, ବାଉଇର୍କ୍ନେ କାପାଟ୍ ତ୍ଲାଗ୍ଆର୍କେ । ମେଇଂ ଆତେନ୍ କଡ଼ି, କାପାଟ୍, କାବ୍ଜା ବାରି ଗାଡ଼ା ତ୍ଲାଗ୍ଆର୍କେ । 7 ଗିବିୟୋନୀୟବାନ୍ ମଲାଟିୟ ବାରି ମରୋଣଥୀୟବାନ୍ ଯାଦୋନ ମେଙ୍ଗ୍ନେ ତୁରାଃକେ ତିଆର୍ ଡିଙ୍ଗ୍ଆର୍କେ । ଆତେନ୍ ରେମୁଆଁଇଂ ଗିବିୟୋନ୍ ବାରି ମିସ୍ପାନେ ଲେଃଗେ, ମେଇଂ ଲଣ୍ଡିଆଃନେ ଲଗ୍ସ୍ନି ଦିଗ୍ନେ ରାଜି ପାକା ଲେଃକ୍ନେ ଦେସ୍ ନେତାନେ ସାସନ୍ ଆଲ ଲେଃଆର୍ଗେ । 8 ହର୍ହୟୀନେ ଉଂଡେ ଉଷୀୟେଲ ଜା କି ମେଁ ସୁନାରି ଲେଃଗେ ମେଙ୍ଗ୍ନେ ଇଡ଼ିଂ ଲେଃକ୍ନେ ତୁରାଃନେ ବାକି କାମ୍ ଆଃରେକେ । ହନାନୀୟ ଜା କି ବାସ୍ନାଚୁ ସଣ୍ଡ୍ରେ ମେଁ ବାକି ବକ୍ନେ ତୁରାଃ କାମ୍ ଆଃରେକେ । ମେଇଂ ତୁରାଃ ଡା ଜାକ ଯିରୂଶାଲମକେ ଡାଟ୍ ଆଃଡିଂଆର୍କେ । 9 ମେଙ୍ଗ୍ ଡାଗ୍ରା ଯିରୂଶାଲମନିଆ ଲେଃକ୍ନେ ଦେସ୍ଇଂନେ ମେତାଃ ବାଗ୍ ଦାଇତ୍ରେ ଲେଃକ୍ନେ ମୁକିଆ ହୂରନେ ଉଂଡେ ରଫାୟ ପାକ୍ଚିକ୍ନେ ତୁରାଃକେ ଆଃରେକେ । 10 ହରୁମଫନେ ଉଂଡେ ଯିଦାୟ ମେଁନେ ଡୁଆ ସାମ୍ନେ ତୁରାଃ ଆଃରେକେ । ମେଁ ଡାଗ୍ରା ହଶ୍ବନିୟନେ ଉଂଡେ ହଟୂଶ୍ ତୁରାଃକେ ଆଃରେକେ । 11 ହାରୀମନେ ଉଂଡେ ମଲ୍କିୟ ବାରି ପହତ୍ ମୋୟାବନେ ଉଂଡେ ହଶୂବ ବାରିମୁଇଂ ବାକି ଲାଏକ୍ନେ ବାରି ତୁନ୍ଦୁରୁନେ ତୁରୁଗ୍ସ ଆଃରେକେ । 12 ମେଁ ଡାଗ୍ରା ଯିରୂଶାଲମ ପ୍ରଦେସ୍ନେ ଅଦା ବାଗ୍ ସାସନ୍ଡିଂଣ୍ଡ୍ରେ ନେତା ହଲୋହେଶନେ ଉଂଡେ, ଶଲ୍ଲୁମ୍ ବାରି ମେଁନେ ସେଲାଇଂ ପାକ୍ଚିକ୍ନେ ତୁରାଃକେ ଡାଟ୍ ଆଡିଙ୍ଗ୍ଚେ ବାର୍ମୁଇଂତର୍ ଆଃରେ ଆର୍କେ । 13 ହାନୁନ୍ ବାରି ସାନୋହନିଆ ବାସା ଲେଃକ୍ନେ ରେମୁଆଁଇଂ ଟିକ୍ରା ଗାଲିନେ ପାକ୍ଚି ଲେଃକ୍ନେ କାପାଟ୍ ଆଃରେ ଆର୍କେ । ମେଇଂ ଆତେନ୍ ଆଃରେଚେ ମେଃନେ କାପାଟ୍, କାବ୍ଜା, ଗାଡ଼ା ସାପା ତ୍ଲାଗ୍କେ । ବାରି କତ୍ଗାଦି ଲାଏକ୍ନେ କାପାଟ୍ ବାନ୍ ତୁରାଃକେ ମୁଇଂ ଅଜାର୍ ନ୍ତି ଜାକ ଡାଟ୍ ଆଡିଙ୍ଗ୍ଚେ ଆରେ ଆର୍କେ । 14 ବୈଥ୍ହକ୍କେରମ୍ ପ୍ରଦେଶ୍ନେ ମୁକିଆ ରେଖବନେ ଉଂଡେ ମଲ୍କିୟ କତ୍ଗାଦିନେ କାପାଟ୍ନେ ପାକ୍ଚି ଲେଃକ୍ନେ ବାଗ୍କେ ଆଃରେକେ ବାରି ଆତ୍ଅରିଆନେ କାପାଟ୍, କାବ୍ଜା ବାରି ଗାଡ଼ା ତ୍ଲାଗ୍କେ । 15 ମିସ୍ପା ପ୍ରଦେଶ୍ନେ ମୁକିଆ କଲ୍ହୋଷିର୍ନେ ଉଂଡେ ଶଲ୍ଲୁନ୍ ଜଲାଡ଼୍ୟାଃନେ ଗାଲି ଅରିଆ ପାକ୍ଚି ଲେକ୍ନେ ଆଃରେକେ । ବାରି ମେଁନେ କାବ୍ଜା, କୁଚି, ଗାଡ଼ା ସାପା ତ୍ଲାଗ୍ଆର୍କେ । ଦାଉଦ୍ ଇନିବାନ୍ ଆଲ ୱେନେ ପାଉଚ୍ ଜାକ ମେଁ ରାଜାନେ ଡୁଗ୍ଡି ବାରି ଶେଲା କୁଣ୍ଡ୍ନେ କାଗ୍ବଃକେ ବାର୍ମୁଇଂତର୍ ଆଃରେକେ । 16 ବୈଥ୍ସୁର ପ୍ରଦେଶ୍ନେ ମେତାଃ ବାଗ୍ ମେଁ କବ୍ଜାରେ ଲେଃକ୍ନେ ମୁକିଆ ଅସ୍ବୂକନେ ଉଂଡେ ନିହିମୀୟା ଦାଉଦ୍କେ ଆତିବକ୍ନେ ଜାଗା ଜାକ ବାରି ରେମୁଆଁ ଆଃରେବକ୍ନେ କୁଣ୍ଡ୍ ଜାକ ବାରି ବପୁ ଲେକ୍ନେ ରେମୁଆଁଇଂନେ ଡୁଆ ଜାକ ବାର୍ମୁଇଂତର୍ ଆଃରେ ଆର୍କେ ।
ତୁରାଃ ତିଆର୍ ଡିଙ୍ଗ୍ନେ କାମ୍ ଡିଙ୍ଗ୍କ୍ନେ ଲେବୀୟଇଂ
17 ମେଁ ଡାଗ୍ରା ଲେବୀୟ ଡୁଆଣ୍ଡ୍ରେନେ, ବାନିନେ ଉଂଡେ ରହୂମ୍ ପାକ୍ଚି ଲେଃକ୍ନେ ବାକି ଲେକ୍ନେ କାମ୍କେ ଆରେକେ । ଇଡ଼ିଂ କିୟୀଲା ପ୍ରଦେଶ୍ନେ ମୁକିଆ ହଶବିୟ ଆଃରେକେ । ମେଁନେ ପ୍ରଦେଶ୍ ସାପଟ୍ ଡିଂଚେଃ ମେଁ ଆଃରେକେ । 18 ମେଙ୍ଗ୍ନେ ବୟାଁଇଂ କିୟୀଲା ପ୍ରଦେଶ୍ନେ ମେତାଃ ବାଗ୍ ମୁକିଆ ହେନାଦଦା ଉଂଡେ ବବୟ ମେଁ ଡାଗ୍ରା ପାକ୍ଚି ଲେଃକ୍ନେ ତୁରାଃକେ ଆରେକେ । 19 ମେଁ ଡାଗ୍ରା ମିସ୍ପାନେ ମୁକିଆ ଯେଶୂୟନେ ଉଂଡେ ଏସର୍ ତୁରାଃନେ ମଲ୍କାନି ଡାଗ୍ରା ଜୁଦ୍ ଜିନିସ୍ ଲେଃନେ ଡୁଆ ଡିନ୍ଣ୍ଡେଃ ଗାଲି ସାମ୍ନେ ବିନ୍ ମୁଇଂ ପାକ୍ଚିକ୍ନେ ବାଗ୍ ବାର୍ମୁଇଂତର୍ ଆଃରେକେ । 20 ମେଁ ଡାଗ୍ରା ସବ୍ବୟନେ ଉଂଡେ ବାରୁକ୍ ଜତନ୍ ଡିଂଚେ ତୁରାଃନେ ମଲ୍କାନିବାନ୍ ଇଲୀୟାଶୀବ୍ ମ୍ନା ପୁଜାରିନେ ଡୁଆନେ ର୍ଣ୍ଣସାଂ ଜାକ ବାରି ମୁଇଂ ପାକ୍ଚି ଲେଃକ୍ନେ ବାଗ୍ ବାର୍ମୁଇଂତର୍ ଆଃରେକେ । 21 ତେନ୍ଇଡ଼ିଂ ହକ୍କୋସନେ ଏଗ୍ଲେ ଊରୀୟନେ ଉଂଡେ ମରେମୋତ୍ ଇଲୀୟାଶୀବ୍ନେ ଡୁଆନେ ର୍ଣ୍ଣସାଂବାନ୍ ଇଲିୟାଶୀବନେ ଡୁଆ ଆଡ଼ା ଜାକ ବାରି ମୁଇଂ ପାକ୍ଚି ଲେଃକ୍ନେ ବାଗ୍ ବାର୍ମୁଇଂତର୍ ଆଃରେକେ ।
କାନ୍ଥି ତିଆର୍ ଡିଙ୍ଗ୍କ୍ନେ ପୁଜାରିଇଂ
22 ଯିରୂଶାଲମ ଡାଗ୍ରା ବାସାଲେକ୍ନେ ପୁଜାରିଇଂ ପାକ୍ଚିକ୍ନେ ଜିନିସ୍କେ ଆଃରେ ଆର୍କେ । 23 ମେଙ୍ଗ୍ନେ ଇଡ଼ିଂ ବିନ୍ୟାମୀନ୍ ବାରି ହଶୂବ ମେଙ୍ଗ୍ନେ ଡୁଆ ଆଣ୍ଡେଙ୍ଗ୍ନେ ସାମ୍ନାନିଆ ପାକ୍ଚି ଲେଃକ୍ନେ ଜିନିସ୍କେ ଆଃରେ ଆର୍କେ । ମେଙ୍ଗ୍ନେ ଇଡ଼ିଂ ଅନନିୟନେ ଏଗ୍ଲେଣ୍ଡେ ମାସେୟ୍, ମାସେୟ୍ନେ ଉଂଡେ ଅସରୀୟ ମେଁ ଡୁଆ ଡାଗ୍ରା ପାକ୍ଚି ଲେଃକ୍ନେ କାନ୍ତିକେ ଆଃରେକେ । 24 ଇଡ଼ିଂ ହେନାଦଦନେ ଉଂଡେ ବିନ୍ନୁୟି ଅସରୀୟନେ ଡୁଆବାନ୍ ତୁରାଃନେ କନେ ଜାକ ବାରି ଆଡ଼ା ଯାକୁ ବାରି ମୁଇଂ ପାକ୍ଚି ଲେଃକ୍ନେ ବାଗ୍ ବାର୍ମୁଇଂତର୍ ଆଃରେ ଆର୍କେ । 25 ଉଷୟନେ ଉଂଡେ ପାଲାଲ୍ ତୁରାଃନେ ମଲ୍କାନି ସାମ୍ନାରେ ରେମୁଆଁ ଉର୍ନେ ତାନାଃ ଡାଗ୍ରା ସାପାବାନ୍ ତିଆର୍କ୍ନେ ଇଃସାଙ୍ଗ୍ନେ ଡୁଆ ଡାଗ୍ରା ବାଜାର୍ନେ ତିଆର୍ ଡୁଆ ଡାଗ୍ରା ପାକ୍ଚିକ୍ନେ ତୁରାଃ ବାର୍ମୁଇଂତର୍ ଆଃରେ ଆର୍କେ ଇଡ଼ିଂ ପରିୟୋଶନେ ଉଂଡେ ପଦାୟ ପାକ୍ଚି କ୍ନେ ତୁରାଃ ବାର୍ମୁଇଂତର୍ ଆଃରେକେ । 26 ଆକେନ୍ ବେଲା ଓଫଲନିଆ ବାସା ଲେଃକ୍ନେ ପାର୍ତନା ଡୁଆନିଆ ସେବା ଡିଙ୍ଗ୍ନେ ରେମୁଆଁଇଂ ଣ୍ଡିଆ ଜାର୍ନେ ଗାଲିପାକା ପୂର୍ବ ଦିଗ୍ନେ ସାମ୍ନା ଜାକ ବାରି ବାଜାର୍ ଲେଃକ୍ନେ ତିଆର୍ ଡୁଆ ଜାକ ବାରି ମୁଇଂତର୍ ଆଃରେ ଆର୍କେ ।
ବିନ୍ରେ ତିଆର୍ଡିଙ୍ଗ୍ଣ୍ଡ୍ରେ
27 ଇଡ଼ିଂ ତକୋୟୀୟନେ ରେମୁଆଁଇଂ ବାଏରେ ଲାଏଃକ୍ନେ ମ୍ନାଃ ତିଆର୍ ଡୁଆ ସେଃମଁବାନ୍ ଓଫଲନେ କାନ୍ଥି ଜାକ ବାରିମୁଇଂ ବାଗ୍ନେ ପାକ୍ଚିକ୍ନେ ବାଗ୍କେ ବାର୍ମୁଇଂତର୍ ଆଃରେଆର୍କେ । 28 ପୁଜାରିଇଂ ସାପା ନିଜର୍ ନିଜର୍ନେ ସାପା ଡୁଆ ସାମ୍ନାନିଆ ଗଡ଼ା ର୍ଣ୍ଣସାଂନେ ଆଡ଼ାତ୍ରା ବାଗ୍ନିଆ ପାକ୍ଚିକ୍ନେ ବାଗ୍ ବାର୍ମୁଇଂତର୍ ଆଃରେ ଆଃରେକେ । 29 ମେଙ୍ଗ୍ନେ ଇଡ଼ିଂ ଇମ୍ମେରନେ ଉଂଡେ ସାଦୋକ ନିଜର୍ ଡୁଆ ସାମ୍ନା ପାକ୍ଚି ଲେଃକ୍ନେ ବାଗ୍କେ ବାର୍ମୁଇଂତର୍ ଆଃରେକେ । ଇଡ଼ିଂ ସ୍ନିତାର୍ନେ ଗାଲିପାକା ଲେକ୍ନେ ଜିଲାପାଲ୍ ଶକନିୟନେ ଉଂଡେ ଶମୟୀୟ ପାକ୍ଚି ଲେଃକ୍ନେ ତୁରାଃକେ ବାରି ମୁଇଂତର୍ ଆଃରେ ଆଃରେକେ । 30 ଶେଲିମୀୟନେ ଉଂଡେ ହନାନୀୟ ଆରି ସାଲଫନେ ତୁର୍କିଲିଗ୍ ଉଂଡେ ହାନୁନ୍ ବାରିମୁଇଂ ପାକ୍ଚି ଲେଃକ୍ନେ ତୁରାଃକେ ବାର୍ମୁଇଂତର୍ ଆଃରେକେ । ଇଡ଼ିଂ ବେରିଖୀୟନେ ଉଂଡେ ମଶୁଲ୍ଲମ୍ ନିଜର୍ ବାକ୍ରା ସାମ୍ନାନିଆ ପାକ୍ଚି ଲେଃକ୍ନେ ତୁରାଃକେ ବାରି ମୁଇଂତର୍ ଆଃରେକେ । 31 ଇଡ଼ିଂ ମଲ୍କିୟ ମ୍ନିନେ ମୁଇଂ ସୁନାଆଃରେଣ୍ଡ୍ରେ ହମିପ୍କଦ୍ ର୍ଣ୍ଣସାଂନେ ସାମ୍ନେ ପାର୍ତନା ଡୁଆ ନିଆ ସେବା ଡିଙ୍ଗ୍ନେ ରେମୁଆଁଇଂନେ ବାରି ବେପାରି ରେମୁଆଁଇଂନେ ଡୁଆ ଜାକ, ବାରି କନ୍ନେ ଡିନ୍ଣ୍ଡେଃ ଜାକ ପାକ୍ଚି ଲେଃକ୍ନେ ବାଗ୍ ଆଃରେ ଆର୍କେ । 32 କନ୍ନେ ଡିନ୍ଣ୍ଡେଃ ବାରି ମେଣ୍ଡା ର୍ଣ୍ଣସାଂ ବିତ୍ରେ ସୁନାରି ବାରି ବେପାରିଇଂ ପାକ୍ଚି ଲେଃକ୍ନେ ବାକି କାମ୍କେ ବାର୍ମୁଇଂତର୍ ଆଃରେ ଆର୍କେ ।
/images/a/Tcg2NiV7ce24OT6kCIQGR)
/images/a/WG5FS9VaSWVnVmV3VI8yP)