Hebreus 8

Yesu wudi Mfumu Nganga-Nzambi eto

1 Dyambu di ngudi di tuna ta ni edi: tuu na Mfumu Nganga-Nzambi yibobobo yizakadi ku kooko ku lubakala lu kyandu ki kintinu ki Nzambi*8.1 Lulendi tanga mpe muMik 110.1 yizangama mu mazulu. 2 Yandi wuna sala kisalu kyandi mu kihinga kilongo, mpila mosi mu nzo yi kikapu yikedika, yitungu ku Mfumu, kansi ka ku muntu ko.

3 Mu dyambu ti, kadi mfumu nganga-Nzambi bamubyeka mu haananga makabu na minkayulu. Ni hahoho, yandi mpe fweti banga na kima kye haana. 4 Kansi tala ti wuba ha luse lu butoto, nganunu kaketi ba nakani nganga-Nzambi ko, mu dyambu ti kudi na zihiika zikwe haananga makabu bonso buna tumina Misiku mi Mose. 5 Kisalu kikwe salanga zinganga-Nzambi bezizi, kifwani hoti kinsinsya ki bima bii ku mazulu. Kifwanakani na misamu Nzambi mi kateela ku Mose mu tunga nzo yi kikapu. Nzambi wumuteela ti: «Toma tala na hidika mimvimba bonso kifwani ki nakulonka ha yulu mulandu*8.5 Lulendi tanga mpe muNdu 25.40.» 6 Kansi bwabu, Yesu bamuheeni kisalu kivudidi bunene, kye ba muwawisi wu luwawanu luhyokidi kitezo na lusikamani mu zinsilulu zihyokidi kitezo.

7 Tala ti luwawanu*8.7 Lulendi tanga mpe muNdu 24.3-8 luntete luba lulunga, nganunu kubandi mfunu ko mu hingisa lunzole. 8 Kansi, bonso masembo Nzambi kedi haana ku mukangu bu kata ti:

«Bilumbu bina kwiza, Mfumu teedi,

bi naatunga ha kimosi na nzo yi Isaeli,

mpe na nzo yi Yuda, luwawanu lumoona.

9 Lwaaba bonso luwawanu lu natunga na matata mawu ko,

kilumbu ki nabasimba mu kooko mu baduukisa mu nsi yi Ngipiti.

Mu dyambu ti baa bakangama mu luwawanu belolo ko,

meno mpe ni nabateka manima, Mfumu teedi.

10 Kansi tala bwedi bwabela luwawanu lu naatunga ha kimosi na nzo yi Isaeli,

ku manima ma bilumbu bebyobyo, Mfumu teedi:

Naatuula Misiku myani mu mayindu mawu,

naasonika myo mu mitima myawu,

mpe naaba Nzambi awu,

na yawu baaba mukangu ani.

11 Kunaani muntu waahaana dyaka ndongosolo ku munandi,

hoti ku mpangi andi,

mu ta ti: "Zaba Mfumu!"

Mu dyambu ti bamvimba baanzaba,

kutonina ku mwana wufyoti natee ku kihunda.

12 Mu dyambu ti naabalemvokila mambi mawu,

mpe naabwesa bambukila moyo masumu mawu ko*8.12 Lulendi tanga mpe mu Yel 31.31-34.»

13 Luwawanu, bu batumisini lo ti lumoona, Nzambi kitudi bwabu luntete luntama. Tuzebi ti, kima kintama na kinunini, kyeka bela-bela mu zimbala.