Êxodo 11

ባይራ የለቴዳዋንቱ ቦላ ዬዳ ቦሻ

1 ሙሴዉ መና ጎዳይ፥ "ታን ግብጼ ካትያ ቦላነ አ አሳ ቦላ እት ሀራ ቦሻ የዳና፤ ሄዋፐ ጉይያን እ ህንተንታ ሀ ጋድያፐ ከስ የዳናዋ፤ እ ህንተንታ እቱነ አተናን ኡባካ የደርሳናዋ። 2 እስራኤልያ አሳይ፥ ማጫዌ አቱማዌ ባረ ሾሮቱዋፐ ብራፐነ ዎርቃፐ መቴዳ ሚሻቱዋ ኦቻና ማላ፥ ኡንቱንቶ ኦዳ" ያጌዳ። 3 መና ጎዳይ እስራኤልያ አሳቱ ግብጼቱዋ ስንን ናሸታናዳን ኦዳ። ቃይ ሙሴ ባረ ሁጲያዉካ ግብጼ ጋድያን ካትያ ኦሳንቻቱዋንነ አሳን ሎይ ዳሮ ቦንቼቴዳ አሳዳን ጼለቴዳ።

4 ሙሴ ካትያ ሀዋዳን ያጌዳ፤ "መና ጎዳይ ሀዋዳን ያጌ፤ ‘ቃማ ግዶ ብላህያን ታን ግብጼ ግዱዋና አና፤ 5 ግብጼ ጋድያን ደእያ ባይራ አቱማ ናናይ ኡባይ፥ ካዉተ ኦይድያን ኡትያ ካትያ ባይራ ናኣፐ ዶሚደ፥ ዎጻን ጋጭያ ቆማት ባይራ ናኣ ጋካናዉ ባይራ የለቴዳ መሂካ አተናን ኡባይ ሀይቃናዋ። 6 ግብጼ ቢታ ኡባን ሀዋፐ ካሰ ባጋን ሀንቤናነ ስንፐካ ሀነና ዎልቃማ ዬኩ ዬከታናዋ። 7 ሽን እስራኤላቱ ግዱዋን፥ አሳ ቦላ ዎይ መህያ ቦላ ካናይነ ቦጨና’ ያጌ። ሄ ዎደ መና ጎዳይ ግብጼቱዋንነ እስራኤልያ ግዱዋን ሻኮታ መያዋ ኔን ኤራናሳ። 8 ሀ ነ ኦሳንቻቱ ኡባይ ታኮ ዪደ፥ ታ ስንን ጉፋን ጎይኒደ፥ ‘ከሳደ ባርኪ! ኔና ካልያ አሳይ ኡባይካ ቦ!’ ጋናዋንታ። ሄዋፐ ጉይያን ታን ባና" ያጌዳ። ሄዋፐ ጉይያን ሙሴ ሀንቁዋን ኤጸቲደ፥ ካትያ ስንፐ ከሲደ ቤዳ።

9 ሙሴዉ መና ጎዳይ ኮይሮ፥ "ታ ማላልስያ ማላታይ ግብጼ ጋድያን ዳራና ማላ፥ ካቲ ህንተንቱ ኦድያዋ ስሰናን እጻናዋ" ያግ ዎዳ። 10 ሙሴነ አሮነ ሀ ማላልስያ ማላታ ኡባ ካትያ ስንን ኦድኖ፤ ሽን መና ጎዳይ ካትያ ዎዛና ዶንጭልሴዳ፤ ያትና እ እስራኤላቱዋ ባረ ጋድያፐ የደናን እጼዳ።