1 መና ጎዳይ ግብጼ ጋድያን ሙሳነ አሮና ሀዋዳን ያጌዳ፤✝ 2 "ሀ አግናይ ህንተንቶ ላይዉ ኮይሮ አግና ግዶ፤ 3 እስራኤልያ አሳዉ ኡባዉ ሀዋ ኦድተ፤ ሀ አግናይ ገሌዳ ታማን ጋላሳን፥ እት አሳይ ባረ ሶይ አሳዉ እት ኮልያ ዶርሳ ዎይ እት ኮልያ ዴሻ አሆ። 4 ሄ ጎለ አሳ ፓይዱ ሄ ዶርሳ ዉርስ ማናዉ ጉጾፐ፥ እነ አዉ ኡባፐ ማታትያ ሾሩ ባረንቱ ሶ አሳ ፓይዲደ እት እት አሳይ ማናዉ ዳንዳይያ ኬሻ አኬኪደ፥ ሄ መህያ ሹኪደ እትፐ ሚኖ። 5 ህንተንቱ ዶር አክያ መሂ የለቶደፐ እት ላይ ግዴዳዋ፥ አ ቦላን አይ ፓጫይነ ባይና አቱማዋ ግዶ። ህንተንቱ ዶርሳፐ ዎይ ዴሻፐ አካናዉ ዳንዳዪታ። 6 ሀ አግናዉ ታማነ ኦይደን ጋላሳ ጋካናዉ ኡንቱንታ ሄምተ፤ ሄ ጋላስ ኦማርስ እስራኤልያ አሳይ ኡባይ ኡንቱንታ ሹካናዉ ኮሼ። 7 ያቲደ ሱፐ አማሬዳዋ አኪደ፥ ኡንቱንቱ ምያ ጎለዉ ላኡ ማቃንያነ ጉባንያ ኦክኖ፤ 8 አሹዋ ሄ ጋላስ ቃማ ታማን ጺጽ ጺጺደ፥ ጫምያ ቦንጭያናነ ኡኬዳ ኡክና ሚኖ። 9 አሹዋ ቃይያ ዎይ ዶይሲደ ሞፕተ፤ ሁጲያካ ገደቱዋካ ቃን ግዶ አሹዋካ ኡባ ቃንጸናን ሙምያ ጺጽተ፤ 10 ሄ አሹዋፐ ሳአይ ዎንታና ጋካናዉ አይነ አሾፕተ፤ ሽን አማሬዳዌ አቶፐ፥ ሄዋ ጹጋናዉ ኮሼ። 11 ሙሳ ሚደ፥ ኦግያዉ ጊግያ ማዩዋ ማዪደ፥ ህንተንቱ ጫማ ህንተንቱ ገድያን ዎደ፥ ህንተንቱ ጋትማ ህንተንቱ ኩሽያን ኦይቂደ ሚታ። ኤሌል ኤሌል ሚተ፤ ሀዌ መና ጎዳ ፓስጋ።

12 "ታን ሄ ጋላስ ቃማና ግብጼን አደ ባይራ የለቴዳ ኡባ፥ አሳካ፥ መህያካ ዎና፤ ግብጼ ኤቃቱዋ ኡባ ቦላካ ታን ፕርዳና፤ ታን መና ጎዳቴ። 13 ሄ ሱይ ህንተንቱ ደእያ ጎልያ ኤርስያ ማላ ግዳናዋ። ታን ሄ ሱ በኦ ዎደ፥ ህንተንታ አጋደ አና፤ ታን ግብጼ ጋድያ ቦሻን ሾጭያ ዎደ፥ ህንተንታ አይ ቦሻይካ ቦቼና።

14 "ሀ ጋላሳይ ህንተንቶ ቆፕ ቆፕ ቦንችያ ጋላሳ ግዶ፤ ህንተንቱ የለታይ ኡባይ መና ጎዳ ባላ ቦንችተ፤ ሀዋ ዎጋ ኦደ ኡባ ዎደ ቦንችተ።✝

15 "ላፑን ጋላሳይ ጋካናዉ እርሹዋ የግቤና ኡክ ሚተ፤ ሽን ኮይሮ ጋላስ እርሹዋ ህንተንቱ ሶፐ ድግተ። ሄ ኮይሮ ጋላሳፐ ዶሚደ ላፑን ጋላስ ጋካናዉ፥ እርሹዋና ደእያ ኡክ ምያ አሳይ እስራኤልያ አሳ ግዶፐ ቦሄቶ።* 16 ኮይሮ ጋላስ ጌሻ ሽቁዋ ሺቅተ፤ ሀራ ጌሻ ሽቁዋ ቃይ ላፑን ጋላሳን ሺቅተ፤ አሳይ ማናዉ ቁማ ካናዋፐ አትና፥ ሀ ጋላሳ ኡባን አይነ ኦፕተ፤ ህንተንቱ ኦናባይ ሄዋ ጻላላ።

17 "እርሹ ገልቤና ኡክ ባላ ቦንችተ፤ አያዉ ጎፐ፥ ታን ህንተንቱ ጩጉዋ ግብጼ ጋድያፐ ከሴዳዌ ሄ ጋላሳና። ሄ ጋላሳ፥ የለታፐ የለታይ ጋካናዉ ፕን ከስያ ዎጋ ኦደ ቦንችተ። 18 ኮይሮ አግናን፥ ሄ አግናዉ ታማነ ኦይደን ጋላሳ ኦማርሳፐ ዶሚደ፥ ላታማነ እተንዋ ኦማርስ ጋካናዉ እርሹ ገልቤና ኡክ ሚተ። 19 ላፑን ጋላሳይ ጋካናዉ እርሹ ህንተንቱ ሶን ቤቶፖ፤ እርሹ ገሌዳዋ ምያ አሳይ በተ ግድና ዎይ ሄ ቢታ አሳ ግድና፥ እስራኤልያ ግዶፐ ቦሄቶ። 20 እርሹ ገሌዳዋ አያነ ሞፕተ፤ ህንተንቱ ደእያ ሳኣን ሀቃንካ እርሹ ገልቤና ኡክ ማናዉ ኮሼ" ያጌዳ።

21 ሄዋፐ ጉይያን ሙሴ እስራኤልያ ጭማቱዋ ኡባ ጼስሲደ ኡንቱንታ ሀዋዳን ያጌዳ፤ "ህንተንቱ ኤለካ ቢደ፥ ህንተንቱ ሶ አሳዉ ፓስጋዉ ኮልያ፥ ዶርሳ ዎይ ዴሻ ሹክተ። 22 ህሶጵያ ጌተትያ ሀይፐ ዳንክ አኪደ፥ ከርያን ደእያ ሱን ናቂ ከሲደ፥ ሄ ሱ ላኡ ማቃንያንነ ጉባንያ ኦክተ፤ ህንተንቱፐ እት አሳይነ ሳአይ ዎንታና ጋካናዉ ባረ ጎልያ ፐንግያፐ ካረ ከሶፖ። 23 መና ጎዳይ ግብጼቱዋ ሾጭ ዎናዉ ሄ ቢታና አያ ዎደ፥ ሱ ጉባንያንነ ላኡ ማቃንያን በአና፤ ያቲደ ካረና አና፤ ዎያዌ ህንተንቱ ሶ ገሊደ፥ ህንተንታ ዎናዳን አ ህንተንቱ ሶ ገልሰና።✝ ህሶጲያ

24 "ህንተንቱ ሀ አዛዙዋ ህንተንቶነ ህንተንቱ ዘረዉ ኡባ ዎደ ዎጋ ኦደ አዛዘትተ። 25 መና ጎዳይ ካሰ እማና ጌዳዋዳን እ እምያ ቢታ ህንተንቱ ገልያ ዎደ፥ ሀ ዎጋ ናግተ። 26 ህንተንቱ ናናይ ህንተንታ፥ ‘ሀ ቦንቾ ባላ ብርሸይ አዬ?’ ያጊደ ኦችያ ዎደ፥ 27 ህንተንቱ ኡንቱንታ፥ ‘ሀዌ ጾሳ ቦንቻናዉ ያርሽያ ፓስጋ ያርሹዋ፤ አያዉ ጎፐ፥ መና ጎዳይ ግብጼ ጋድያን እስራኤልያ አሳ ጎልያ አግ አ ቢደ፥ ግብጼቱዋ ዎደ፥ ኑና አሼዳ ድራሳ’ ያግተ" ያጌዳ።

ሄዋፐ ጉይያን አሳይ ጉልባቲደ ጎይኔዳ። 28 እስራኤላቱ መና ጎዳይ ሙሳነ አሮና አዛዜዳዋዳን ኦድኖ።

29 ቃማ ግዶ ብላህያን መና ጎዳይ ግብጼን ባይራ የለቴዳ ኡባ፥ ካዉተ ኦይድያን ኡቴዳ ካትያ ባይራ ናኣፐ ዶሚደ፥ ቃሾ ጎለን ደእያ ኦሞደቴዳዋንቱ ባይራ ናኣ ጋካናዉ፥ ቃይ ባይራ የለቴዳ መህያ ኡባ ድፕ ኦዳ።✝ 30 ካቲ፥ አ ኦሳንቻቱ ኡባይነ ግብጼ ጋድያ አሳይ ኡባይ ቃማ ደንዴድኖ። ግብጼ ጋድያን አሳይ ሀይቂቤና ጎሊ ኡባካ ባይና ድራዉ፥ አሳይ ኮሻ ቁ ኦደ ዎልቃማ ዬኩዋ ዬኬዳ። 31 ሄ ጋላስ ቃማ ካቲ ሙሳነ አሮና ጼሲደ፥ "ደንድተ! ህንተካ እስራኤልያ አሳይካ ታ አሳ ግዱዋፐ ከስ ቢደ ህንተንቱ ኦቼዳዋዳንካ መና ጎዳዉ ጎይንተ! 32 ህንተንቱ ጌዳዋዳንካ ህንተንቱ ዶርሳ ዉድያነ ህንተንቱ መህያ ዉድያ አኪደ ቢተ! ቃይ ታዉካ ዎስተ" ያጌዳ።

33 ግብጼ አሳይ እስራኤላቱ ጋድያፐ ኤለካ ከሳና ማላ ድርቢሴድኖ። አያዉ ጎፐ፥ ኡንቱንቱ፥ "ሄዌ ዮፐ፥ ኑን ኡባይካ ዉሬቶ" ያጌድኖ። 34 ሄዋ ድራዉ፥ እስራኤልያ አሳቱ ባረንቱ እርሹ ገልቤና ሙናቃ ከርያን ኩንደ፥ ባረንቱ ማዩዋን ጻጺደ፥ ሀሽያን ቶኬድኖ። 35 እስራኤለቱ ሙሴ ኡንቱንታ አዛዜዳዋዳን፥ ግብጼቱዋ ብራ ሚሻቱዋ፥ ዎርቃ ሚሻቱዋነ ማዩዋ፥ "እምተ" ጊደ ኦቼድኖ።✝ 36 መና ጎዳይ ግብጼቱዋ ስንን ሄ አሳይ ሳበታናዳን ኦና፥ ግብጼቱ ኡንቱንቱ ኦቼዳዋ እሜድኖ። ሄዋዳን ያቲደ ኡንቱንቱ ግብጼ አሳቱዋ ማጹዋ ቦንቂ አኪደ ቤድኖ።

37 እስራኤላቱ ራምሳ ጌተትያ ካታማፐ ደንዲደ ሱኮታ ጌተትያ ሳኣ ገድያን ሀመቲደ ቤድኖ። አሳይ ናናነ ማጫዋንታ ጉጀናን ፓይድና፥ ኡሱፑን ጼቱ ሻአ። 38 ቃይ ኡንቱንቱና ሀራ ዳሮ አሳይ፥ ዳሮ መሂነ ዶርሳ ዴሻ ዉዲ ላገቲደ ቤዳ። 39 ግብጼፐ ኡንቱንቱ አኪደ ከሴዳ ሙናቃ እርሹ ገልቤና ኡክ ኡኬድኖ፤ አያዉ ጎፐ፥ ኡንቱንቱ ግብጼፐ ድርባን ከሴድኖ፤ ባረንቶ ሽንቃ ካናዉካ፥ ሙናቃይ ደንድና ኡካናዉካ ኡንቱንታ ጋቤና።

40 እስራኤላቱ ግብጼ ጋድያን ደኤዳ ላይይ ኦይዱ ጼታነ ሀታማ።✝ 41 ሄ ኦይዱ ጼታነ ሀታሙ ላይይ ዉርያ ሄ ዉርሰ ጋላሳን፥ መና ጎዳ ጩጉ ኡባይ ግብጼ ጋድያፐ ከሴዳ። 42 መና ጎዳይ ባረ አሳ ናጊደ፥ ግብጼ ጋድያፐ ከስያ ዎደ ሳአይ ቃማ፤ ሄ ቃማይ የለታፐ የለታ ጋካናዉ፥ እስራኤልያ አሳይ ቤጎቲደ ናጊደ አቅያ፥ መና ጎዳዉ ዱማቴዳ ቃማ።

43 መና ጎዳይ ሙሳነ አሮና፥ "ፓስጋ ጋላሳ ቦንችያ ዎጋይ ሀዋ፤ በተ አሳይ አፐ ኡባካ ሞፖ። 44 ህንተንቱ ሻሉዋን ሻሜዳ አይሊ ህንተንቱ አ ቃጻሮዋፐ ጉይያን አፐ ሞ። 45 ሽን እማተን ህንተናና ጋምእያ እማይነ ከራ ኦያ እማይ አፐ ኡባካ ሞፖ።

46 "ሀ ፓስጋ ህንተንቱ እት ጎለን ሚተ፤ ህንተንቱ ሄ አሹዋፐ አያነ ካረ ከሶፕተ። መቀቱዋፐ እቱዋነ መንፕተ።✝ 47 እስራኤልያ ማባራይ ኡባይ ፓስጋ ቦንቻናዉ ኮሼ።

48 "በቲ ዪደ ህንተንቱ ግዶን ደእያ አሳይ መና ጎዳ ፓስጋ ቦንቻናዉ ኮዮፐ፥ ኮይሮ ሄ አቱማ አሳይ ኡባይ ቃጻረቶ። ሄዋፐ ጉይያን እ ሄ ቢታን የለቴዳ አሳዳን ሺቂደ፥ ፓስጋ ቦንቻናዉ ዳንዳዬ። ሽን ቃጻረትቤና አሳይ ኡባካ አፐ ሞፖ። 49 ህንተንቱ ቢታን የለቴዳዎካ ህንተንቱ ግዶን በተ ግዲደ ደእያዋዉካ ሄ ዎጋይ እቱዋ" ያጌዳ።

50 እስራኤላቱ ኡባይ መና ጎዳይ ሙሳነ አሮና አዛዜዳዋዳንካ ኦድኖ። 51 ሄ ጋላስካ መና ጎዳይ እስራኤላቱዋ ኡንቱንቱ ጩጉዋን ጩጉዋን ግብጼ ጋድያፐ ከሴዳ።