Êxodo 24

ጾሳይ ባረ አሳዉ ገሌዳ ቃላ ጫቁዋ ምንሴዳ

1 ሄዋፐ ጉየ መና ጎዳይ ሙሳ፥ "ኔን፥ አሮነ፥ ናዳበ፥ አቢህነ እስራኤልያፐ ላፑን ታሙ ጭማ አሳቱ መና ጎዳኮ ደርያ ሁጲያ ፑደ ከሲደ ሃኩዋን ጎይንተ። 2 ሽን ሙሴ፥ ኔን ኔረካ መና ጎዳኮ ሺቃ፤ ሀራ ጭማቱ ታ ማታ ዮፕኖ። ቃይ አሳይካ ኔናና ፑደ ከሶፖ" ያጌዳ።

3 ሙሴ ዪደ፥ መና ጎዳ ቃላ ኡባነ አ ዎጋ ኡባ አሳዉ ኦድና አሳይ ኡባይ እት ቃላን፥ "መና ጎዳይ ኦዴዳዋ ኡባ ኑን ኦና" ያጌድኖ። 4 ሙሴ መና ጎዳይ ኦዴዳዋ ኡባ ጻፌዳ።

ዎንተ ጋላስ ዎንታ ጉራን ደንዲደ፥ ደርያ ጻጱዋን ያርሽያ ሳኣ ግምቢደ እስራኤልያ አሳ ያራ ታማነ ላኡዋ ሱንን፥ ታማነ ላኡ ሹቻ ቱሳ ኤሴዳ። 5 እ እስራኤላቱዋፐ ያላጋ አቱማ አሳ ኪትና፥ ኡንቱንቱ ቢደ ጹግያ ያርሹዋ ሺሼድኖ፤ ቃይ እትፐተ ያርሾ ኮሩማቱዋ መና ጎዳዉ ያርሼድኖ። 6 ሙሴ ሱፐ ባጋ አኪደ ከርያን ትጌዳ፤ አቴዳ ባካ ሱ እ ያርሽያ ሳኣን ጫጫፌዳ። 7 ሄዋፐ ጉይያን ቃላ ጫቁዋ ማጻፋ አኪደ፥ አሳዉ ናባቤዳ፤ ኡንቱንቱ፥ "መና ጎዳይ ኦዴዳዋ ኡባ ኑን ኦና፤ ኑን አዛዘታና" ያጌድኖ።

8 ሄዋፐ ጉይያን ሙሴ ሄ ሱ አኪደ፥ አሳ ቦላ ጫጫፊደ ኡንቱንታ፥ "በእተ፥ መና ጎዳይ ሀ ቃላ ኡባን ህንተናና ዎዳ ቃላ ጫቁዋ ሱይ ሀዋ" ያጌዳ።✝24:8 ማቶሳ 26:28፤ ማር. 14:24፤ ሉቃሳ 22:20፤ 1 ቆሮ. 11:25፤ እብራ. 9:19-20፤ 10:29

9 ሙሴ፥ አሮነ፥ ናዳበ፥ አቢህነ እስራኤልያ ጭማቱዋፐ ላፑን ታሙ ፑደ ከሴድኖ። 10 እስራኤልያ ጾሳ በኤድኖ፤ አ ገድያፐ ጋርሳና ሳሉዋዳን ጌዬዳ ሳምፔርያ ጌተትያ ጶልያ ሹቻፐ ኦሰቴዳዋ ማላትያ ዉይግያ ማላባይ ደኤ። 11 ሽን ጾሳይ እስራኤልያ አሳ ካፓቱዋ ዎቤና። ኡንቱንቱ ጾሳ በኤድኖ፤ አ ስንን ሜድኖነ ኡሼድኖ።

ሙሴ ሲና ደርያ ሁጲያ ቦላ

12 መና ጎዳይ ሙሳ፥ "ኔን ደርያ ፑደ ሃ ታኮ ከሳደ፥ ሀዋን ጋምአ፤ ያቶፐ ኔን ኡንቱንታ ታማርሳና ማላ፥ ታን ዎጋነ አዛዙዋ ጻፌዳ ሹቻ ነዉ እማና" ያጌዳ።

13 ሄዋፐ ጉይያን ሙሴ ባረ ቆማ ኢያሱና ባናዉ ደንዴዳ፤ ሙሴ ጾሳ ደርያ ፑደ ከሴዳ። 14 እስራኤልያ አሳ ጭማቱዋ እ፥ "ኑን ህንተንቱኮ ስማናዉ ሀዋን ደእሽተ፤ አሮነነ ሁር ሀዋን ህንተናና ደኢኖ፤ የዉ ደእያ ኦንነ ኡንቱንቱኮ ቦ" ያጌዳ።

15 ሙሴ ደርያ ፑደ ከሴዳ ዎደ፥ ሻሪ ደርያ ካሜዳ። 16 ቃይ መና ጎዳ ቦንቹ ሲና ደርያ ቦላን ኡቴዳ፤ ሄ ሻሪ ኡሱፑን ጋላሳ ማዬዳ፤ ላፑን ጋላሳን ሄ ሻርያ ግዶፐ መና ጎዳይ ሙሳ ጼሴዳ። 17 እስራኤላቶ መና ጎዳ ቦንቹ ደርያ ሁጲያን ጹግያ ታማ ማላቲደ ቤቴዳ። 18 ሄዋፐ ጉይያን ሙሴ ሄ ሻርያ ግዶ ገሊደ፥ ደርያ ፑደ ከሲደ ደርያ ሁጲያን ኦይታሙ ጋላሳነ ኦይታሙ ቃማ ጋምኤዳ።✝24:18 ዛረ. 9:9