ኢዮባ 38

መና ጎዳይ ኢዮባዉ እሜዳ ዛሩዋ

1 ሄዋፐ ጉይያን፥ መና ጎዳይ ጎትያ ግዶፐ ኢዮባዉ ሀዋዳን ያጊደ ዛሬዳ፤ 2 "ኤር ባይና ሃሳያን ታ ዞርያ ቶችያዌ እ ሀዌ ኦኔ? 3 አነ ኔን አሳዳን ነ ጼሳ ዳንጫ ደንዳደ፥ ታን ኦችያዋ ታዉ ኦዳ።

4 "ታን ሳኣ መያ ዎደ፥ ኔን ሀቃን ደአይ? አነ ነዉ አኬካይ ደኦፐ፥ ታዉ ኦዳ። 5 ሀ ሳአይ አይ ኬሻ ግዳናዉ በስንቶ፥ ሄ ቆፋ ቃቼዳዌ ኦኔ? ልክያ ዎዶሩዋካ ሳኣ ቦላ የጌዳዌ ኦኔ? ሄዋ ዛሩዋ ኡባ ኤራይ? 6 ሳኣ ቱቀቱዋ ኩንደናዳን ምን ኦይቄዳዌ አዬ? ሳኣ ባሶ ኮይሮ ሹቻ ዎዳዌ ኦኔ? 7 ሄ ጋላስ ዎንታ ጾልንተቱ እትፐ የጼዳዋነ ኪታንቻቱ ኡባይ ናሸቻዉ እልሌዳዋ ኔን ኤራይ?

8 "አባ ሃይ፥ ቢታ ጎምፓፐ ቂደ ከስያ ጋላስ፥ አ ፐንገቱዋ ጎርዴዳዌ ኦኔ?✝38:8-11 ኤር. 5:22 9 አባ ሻርያ ማይዜዳዌ፥ ቃይ ማንካ ጻጻ ዎዳዌ ታና። 10 አባዉ አና ዛዋ መዳዌ፥ አ ፐንግያነ አ ኩልቡዋ ሳኣን ዎዳዌ ታና። 11 ታን፥ ‘ሀዋ ጋካ፤ ሽን ሀዋፐ አፓ፤ ነ ዎልቃማ ቤታይካ ሄዋን ኤቆ’ ያጋድ።

12 "ኢዮባ፥ ኔን የለቶደፐ አዋይ ዎንታ ጉራና ከሳናዳን አዛዛ ኤራይ? 13 ቢታ ጋጻን ፖኡዋ በሳና ማላነ ኢታ አሳቱዋካ ኡንቱንቱ ቆሰቴዳ ሳፐ ቆንጭያ ከሳና ማላ፥ ኔን ዎንታ አዛዛ ኤራይ? 14 ጋላሳ ፖኡ ዞዛቱዋነ ዛንጋራቱዋ ዳኮዪደ ዎዳ ማዩ ኤቄዳዋዳን ቤታናዳን ኦ፤ ቃይ ኡርቃ ሚሻ ቦላ ዎዳ ማታፋዳን ጌሺደ በሴ። 15 ኢታቱ ባረንቶ ፖኦ ግ ዎዳ ማይ ዬ፤ ኡንቱንቱ ማካላዉ ደንያ ኩሺካ መኤ።

16 "ጪማ አባ ግዶ ገላደ፥ ፑልቱዋ በኣድ? ዎይ አሳይ ጋክ ኤረና አባ ግዱዋ ፓጫ ጼላ ኤራይ? 17 ሀይቁዋ ፐንገቱዋ ኔና ኦነንቶ በሴዴ? ዎይ ጵ ጎ ማ ፐንገቱዋ በኣድ? 18 ሳአይ አይ ኬሻ ዎልቃመንቶ ኤራይ? ሄዋ ኡባ ኔን ኤርያዋ ግዶፐ፥ ታዉ ኦዳ።

19 "ፖኡ ደኢያሳ አፍያ ኦጊ ሀቃን ደኢ? ቃይ ማይ ደእያ ሳአይ ሀቄ? 20 ኡንቱንታ ኔን ኡንቱንቱ ጎለ ጎለ አፋናዉ ዳንዳያይ? ኡንቱንቱ ደኢያሳ አፍያ ኦገቱዋ ኔን ኤራይ? 21 ኔን ሳአይ መትያ ዎደ የለቴዳ ድራዉነ ዳሮ ላይካ ደኤዳ ድራዉ፥ ሄዋ ኤረናን አጋካ!

22 "ሱፓ ሻቻይ ምንጀትያሳ ገላዲ? ኦርዶ ሻቻይ ዶረቴዳሳካ በኣድ? 23 ታን ኡንቱንታ መቶ ዎድያዉ፥ ኦላ ዎድያዉነ ቶራ ጋላሳዉ ምንጃ ዎድ። 24 ዋልቃንይ ከስያ ሳኣ አፍያ ኦጊ ሀቃን ደኢ? ዎይ አዋይ ዉልያ ባጋ ጫርኩ ሀቃፐ ከሲደ ጫርኪ?

25 "ዎልቃማ እራይ ዎያ ሎሱዋ ጊግሴዳዌ፥ ጉጉንዉ ኦግያ ከሴዳዌ ኦኔ? 26 አስ ደኤና ባዙዋን እራ ቡክስያዌ ኦኔ? 27 መላ ባዙ እራ ሃን ሹጊደ፥ ሎኦ ማታ ሞካናዳን ኦዳዌ ኦኔ?

28 "እራዉ ዎይ ከተርሳዉ አዉ ደኢ? 29 ኦርዶ ሻቻዉነ ቡርጨ ሻቻዉ አታ ደአይ? 30 ዳሮ እርጻተይ ሃ ሹቻዳን ምንሴ፤ አባ ሃዉ ቦላ ባጋካ ሻቻ ከሴ።

31 "ፕልያድሳ ጌተትያ ጾልንተቱዋ ጭታ እትፐ ጋደ ቃቻናዉ ዳንዳያይ?✝38:31 ኢዮባ 9:9፤ አሞጻ 5:8 ኦርዮና ጌተትያ ጾልንተቱዋ ጭታይ ቃሸቴዳ ዎዶሩዋ ብላናዉ ዳንዳያይ? 32 ጭታን ጭታን ደእያ ጾልንተቱዋ ኡንቱንቱ ዎድያን ዎድያን ከሳናዉ ዳንዳያይ? ዎጋ ቤርያነ ቄር ቤርያ ጌተትያ ጾልንተቱዋ ጭታቱዋ እትፐ ካለናዉ ዳንዳያይ? 33 ሳሎቱ አቅያ ህግያ ኔን ኤራይ? ዎይ ሄ ህጊ ሳኣን ሞዳናዳን ኦናዉ ዳንዳያይ?

34 "ድኡ ኔና ሙካናዳን እራ ቡክሳናዉ፥ ነ ቃላ ቁ ኦደ፥ ሻራቱዋ አዛዛይ? 35 ዋልቃንቱ ቢደ ዪደ፥ ‘ሄኮ፥ ሀእ አይ ኦኖ’ ጋና ማላ፥ ኔን ኡንቱንታ አዛዛናዉ ዳንዳያይ? 36 ሃ ካፎ አዳ ኤራ፥ ኩቱዋ አዉርያዉካ አኬካ እሜዳዌ ኦኔ? 37,38 ባረ ኤራን ሻረቱዋ ፓይዳናዉ ዳንዳይያዌ ኦኔ? ባና ሙናቂደ፥ ኡርቃ ከሲደ፥ ምንሳናዉ ሳሉዋ ሻረቱዋ ገደ ኦደ፥ ሃ ዱገ ትግያዌ ኦኔ?

39,40 "ጋሞቱ ኡባይ ባረንቱ ጌሱዋን ጌሱዋን ግስ ደእሽን ዎይ ዙጊደ ናግሽን፥ ኔን ኡንቱንቶ ምያዋ ሻንካታደ እማናዉ ዳንዳያይ? ዎይ ኮሻት ኡቴዳ ኡንቱንቱ ማራቱዋ ካልሳናዉ ዳንዳያይ? 41 ቁሮቱ ኮሻት ብቻርያ ዎደ፥ ኡንቱንቱ ማራቱካ ምያዋ ደማናዉ ታዉ፥ ጾሳዉ፥ ዋስያ ዎደ፥ ኡንቱንቶ ምያዋ እምያዌ ኦኔ?