ኢዮባ 24

1 "ኡባ ዳንዳይያ ጾሳይ ፕርድያ ዎድያ አያዉ ኬረኔ? አ ኤርያዋንቱ ሄ ዎድያ አያዉ በእክኖ? 2 ኢታ አሳቱ ባረንቱ ጋድያ አሳናዉ፥ ዛዋን ደእያ ሹቻ ቆሊኖ። ዶርሳካ ዉእ አሂደ፥ ባረንቱ ዶርሳ ዉድያን ጋደ ሄሚኖ። 3 አዉ ባይና ናናቱዋ ሀረቱዋ ላጊደ፥ አክ ቢኖ፤ አምአቲ ቦራካ አጮ ኦይቂደ፥ ባረንቶ አኪኖ። 4 ህዬሳቱዋ ባረ ማታ ደመናዳን ድጊኖ፤ ቢታን ደእያ ህዬሳቱዋ ኡባ ባረንቱ ስንፐ ቆሰኖ። 5 ባዙዋን ደእያ ዎራ ሀረቱዋዳን፥ ህዬሳቱ ምያዋ ኮዪደ ዎጸረቲኖ፥ ባረንቱ ናናቶካ ባዙዋፐ ቁማ ኮዪኖ። 6 ኡንቱንቱ ደምባን ሀራ አሳዉ ካ ጫኪኖ፤ ኢታ አሳቱዋ ዎይንያ ቴራ ዉርጩዋካ ቃርሚኖ። 7 ኡንቱንቱ ቃማ ካሎ አቂኖ፤ ሜጉዋ ዎደካ ቦላን ማይያዌ ኡንቱንቶ ባዋ። 8 ደረቱዋን ቡክያ እራን ኡንቱንቱ ጽርክኪኖ፤ ገልያሳ ዪደ፥ ሹቻ ቆሚኖ።

9 "ኢታ አሳቱ አዉ ባይና ናኣ አት ን ምያሳፐ ዳፍ አኪኖ፤ ህዬሳቱዋ ጉ ናናቱዋካ አጮ ኦይቂኖ። 10 ህዬሳቱ ማዩዋ ዪደ፥ ካሎ ሀመቲኖ፤ ኡንቱንቱ ቱኩዋ ኬዚደ ኮሻቲኖ። 11 ኡንቱንቱ ዛይትያ ከሳናዉ ዎጋራ ቴራ ፑርጺኖ፤ ዎይንያ ቴራካ ጉምኢደ ሳመቲኖ። 12 ካታማን ሀይቃና ሀንያ አሳቱ ኦሊኖ፤ ደሸቴዳ አሳቱካ ማዱዋ ኮዪደ ዋሲኖ፤ ሽን ጾሳይ ኡንቱንቱ መቱዋ ጼለና።

13 "ፖኡዋ እጽያ አሳቱ ደኢኖ፤ ኡንቱንቱ ፖኡ አየንቶ ኤርክኖ፤ አ ኦግያፐካ ዎራ ቢኖ። 14 ሸምፑዋ ዎያዌ ዎንቱማ ደንዲደ፥ ህዬሳቱዋነ መቶታንቻቱዋ ዎ፤ ቃማ ቃይ ካይሱዋዳን ዉኤ። 15 ሻርሙጽያዌ ሳአይ ማናዋ ናጌ፤ እ፥ ‘ኦንነ ታና በኦፖ’ ጊደ፥ ባረ ሶምኡዋ ካሜ። 16 ካይሳቱ ቃማ ጎልያ ቦኪደ፥ ዉአናዉ ገሊኖ፤ ሽን ጋላስ ፖኡዋ እጺደ፥ ቆሰት ፔሺኖ። 17 ኡንቱንታ ጋላሳ ፖኡ ያሼ፤ ሽን ቃማ ማይ ኡንቱንታ ዳጋንና።

18 "ኢታ አሳቱዋ ድኡዋ ሃይ ቁጪደ አፌ፤ ኡንቱንታ ጋኬዳ ጋዲ ሸቀቴዳዋ ግዴ። ኦንነ ኡንቱንቱ ዎይንያ ቱራ ሳኣ ቤና። 19 ሻቻይ ሆምቢያን ሙሽና፥ አዋይ አ መልስ ይስያዋዳን፥ ሄዋዳንካ፥ ናጋራንቻቱ ሀይቂደ ዪኖ። 20 ሀራይ አትና፥ የሌዳ አየቱካ ኡንቱንታ ሀሳይክኖ። ጉጹኒ ኡንቱንቱ አሹዋ ማልእና ሜ። ኡንቱንቱ ኢታ ኦሱካ ኩንዴዳ ምዳን መአና። 21 አያዉ ጎፐ፥ ኡንቱንቱ ናአይ ባይና ማይነ ማጫ አሳ ናቄድኖ፤ አምኤ ማጫ ምሽራትዉካ ማደናን እጼድኖ።

22 "ጾሳይ ባረ ዎልቃን ምኖቱዋ ይሴ፤ ኡንቱንቶ ሳአይ እንጀቶዋ ማላቶፐካ ደኡዋ ህዶታይ ባዋ። 23 ጾሳይ ኡንቱንቱ ሳሮ ደአናዳን ኦፐካ፥ ኡንቱንቱ ኦግያ ዎቼ። 24 ኢታ አሳቱ ጉ ዎድያዉ ቁ ቁ ጊኖ፤ ሽን ኤለካ ሻራፋዳን ሹል ዪኖ፤ ካዳን ጫከቲኖ።

25 "ሄዌ ሀነና ጊደ፥ ካድያ አሳይ ደኢ? ታን ኦዴዳ ቃላካ ዎርዱዋ ጊደ፥ አማንያ አሳይ ደኢ?" ያጌዳ።