ኮይሮ ሃሳያቱዋን ኢዮብ ባረ የለቴዳ ጋላሳ ሸቄዳ
1,2 ሄዋፐ ጉይያን፥ ኢዮብ ባረ ዶና ዶዪደ፥ ባረ የለቴዳ ጋላሳ ሀዋዳን ያጊደ ሸቄዳ፤3:1-19 ኤር. 20:14-18 3 "ታን ሻሃረቴዳ ቃማይነ ታን የለቴዳ ጋላሳይ ጮ ይኖ! 4 ሄ ጋላሳይ ማ ግዶ፤ ቦላ ጾሳይ ሄ ጋላሳ ሸነኮ ጎ፤ አ ቦላን ፖኡካ ፖኦፖ። 5 ሌሌዳ ማይነ ሻኖቹ አ ጎዞ፤ አ ሻሪ ካሞ፤ አ ፖኡዋካ ማይ ገን። 6 ሄ ጋላሳ ቃማ ጵ ጎ ማይ ኦይቆ። ላይ ግዶን ደእያ ጋላሳቱዋን እ ፓይደቶፖ፤ አግናቱዋ ፓይዱዋንካ ገሎፖ። 7 ሄ ጋላሳ ቃማይ ቃሚደ ዎንቶፖ፤ ናሸቻ እልልሳይካ አን ስሰቶፖ። 8 ሌዋታና ግያ ዳዊያ ደንናዉ ሎሄዳ ሻሬቾቱ ሄ ጋላሳ ሸቂኖ። 9 ሄ ቃማዉ ባካልያ ጾልንቲ ፖኦፖ፤ ፖኡዋ ናጊደካ ደሞፖ፤ ዎንታ ጻልቂካ አዉ ጻልቀቶፖ። 10 ሄ ቃማይ ታን ታ አት ኡሉዋን ሻሃረተናዳንነ ሀ መቱዋ በኤናዳን ተእቤና ድራዉ፥ ሸቀቴዳዋ ግዶ።
11 "ታን ታ አት ኡሉዋን ሃ ከሳርክታሻ! ታ አት ኡሉዋፐ የለታ ዎነ ሀይቃርክታሻ! 12 ታ አታ ታና አያዉ ባረ ክዉዋን እድማዴሻ? ባረ ንካ ታና አያዉ ንዴሻ? 13 ሄ ዎደ ታን ሀይቄዳዋ ግድንቶ፥ ሀእ ሸምፓደ ገምእሻድ ሽን! 14 ኮለቴዳ ሳአቱዋ ባረንቶ ዛረ ኬጼዳ ሳኣ ካተቱዋናነ ኡንቱንታ ዞርያዋንቱና፥ 15 ዎርቃይ ደእያነ ባረንቱ ጎልያን ብራ ኩንዳ ሞድያዋንቱና እትፐ ዱፉዋን ግሳድ ሽን! 16 ዎይ አት ኡሉዋፐ ቦሸቲደ የለቴዳ ናኣዳን፥ ዎይ ጋላሳ ፖኡዋ አይነ በእቤና ቦሸቶዋዳን፥ ታን ቢታ ግዶን ቆሰታ ድጋርክታሻ! 17 ዱፉዋን ኢታቱ ባረንቱ ኢታ ኦሱዋ አጊኖ፤ ያን ዳቡራንቻቱካ ሸምፒኖ። 18 ሄ ሳኣን ቃሸቶ አሳቱካ ሸምፒደ ናሸቲኖ፤ ኦሱዋ ኦስስያዋንቱ ዋሱዋ ኡንቱንቱ ሄዋን ስስክኖ። 19 ጉይ ዳሩካ ያን ደኤ፤ አይሊካ ባረ ጎዳዉ አይለትያሳፐ ከሴ።
20 "መቱዋን ደእያዋንቶ ፖኡ አያዉ እመቴዴ? ደኡ ጫምያዋንቶ፥ 21 ሀይቁ ያንዴሻ ጊደ አሞትና፥ ዬናን እጽያዋንቶ፥ ቆስ ዎዳ ዱረታ ኮይያዋፐ አደ፥ ሀይቁዋ ኮይያዋንቶ፥3:21 ሳፃ 9:6 22 ዱፉዋ ቢደ ጋክያ ዎደ፥ ናሸቻንነ እልልሳን ፖጩምያዋንቶ ደኡ አያዉ እመቴዴ? 23 ኦጊ ባይ ክቼዳ ኡራዉ፥ ጾሳይ አ ዩሹዋ ድር ድጌዳ ኡራዉ ፖኡ አያዉ እመቴዴ? 24 ካዩ ታዉ ቁማ ግዴዳ፤ ታ ኦሊ አገናን ጎግያ ሃ ማላ። 25 ታን ያዬዳዌ ታ ቦላ ጋኬዳ፤ ታን ዳጋሜዳዌካ ታናን ሀኔዳ። 26 ታዉ መቶፐ አትና፥ ሳሩ፥ ዎፓይነ ሸምፑ ባዋ" ያጌዳ።