ኢዮባ 14

1 "ማጫ አሳፐ የለቴዳ አሳ ላይይ ቃን፤ ሄዋ ኬሻካ መቱዋን ኩም ኡቴዳ። 2 እ ጪሻዳን ጪሺደ፥ ኤለካ ቆቆፈት አጌ፤ ቃይ ጋምኤናን ኩዋዳን ኤለካ አ ክቼ። 3 ያትና ኔን፥ ጾሳይ፥ ሄዋ ማላ አሳካ ጼላይ? ቃይ አ ፕርዳናዉ ነ ስን ሺሻይ? 4 ቱናባፐ ጌሻባ ከሳናዉ ዳንዳይያዌ ኦኔ? ኦንነ ባዋ። 5 አሳይ ደአና ላይቱ ዛዋት ኡቴድኖ፤ እ ደአና አግናካ ኔን ፓይዳ ዎዳ፤ ኔን ዎዳ ዛዋፐ አያዌ ባዋ። 6 ሄዋ ድራዉ፥ ከራ ኦያ አሳይ ባረ ኦሱዋ ፖሊደ ሸምፕያዋዳን፥ አሳይ ባረ ዳቡራ ላይ ፖሊደ ሸምፓናዳን፥ አ አጋ።

7 "ምዉካ ህዶታይ ደኤ፤ ምይ ቃንጾፐ አጬ፤ አጫይካ ሄዋዳን ሀኒደ፥ ደእ ባሼ። 8 ሄ ም ጻጱ ቢታ ጋርሳን ኤጭንቶካ፥ አ ዱሩማይካ ቢታን ዎቆፐካ፥ 9 ሃ ፔኑዋ ደሚደ አጬ፤ ፑትያዳን ኦራ ልጩዋ ከሴ።

10 "ሽን አሳይ ሀይቂና፥ አ ዎልቃይ ዉሬ፤ አ ሸምፑ ከሶዋፐ ህን ባጋን፥ እ ሀቃን ደኢ? 11 አባፐ ሃይ መልያዋዳን፥ ቃይ ሻፋ ሃይካ ቶእያዋዳን፥ 12 ሄዋዳን አሳይካ ሀይቄ፤ ሄ ሳኣፐ ደንደና። ሳሎቱ አና ጋካናዉካ አሳይ ቤጎተና፤ ባረ ገምእሹዋፐካ ደንደና።

13 "አቤት ጾሳዉ፥ ኔን ታና ዱፎ ግዶን ገንደ፥ ነ ሀንቁ አና ጋካናዉ ቆሴዳዋ ግዳርኪሻ! ኔን ታዉ ኬሩዋ እማደ፥ ሄ ጋላስ ታና ሀሳዬዳዋ ግዳርኪሻ! 14 እት አሳይ ሀይቆፐ፥ ስሚደ ፓጻኔ? ታ ላሚ ያና ጋካናዉ፥ ሀ ቱጋ ዎድያ ኡባ ዳንዳያን ናጋና። 15 ኔን መዳ ታናካ በአናዉ ኔን ላሞትያ ዎደ፥ ኔን ታና ጼሳና፤ ታን ነዉ ኮያና። 16 ሄ ዎድያን፥ ኔን ቱሙዋፐ ታ ታንጉዋ ዎቻና፤ ሽን ታ ናጋራ ታ ቦላ ፓይዳካ። 17 ታ ባይዙ ቃርጪታ ግዶን ዪጨታና፤ ታ ናጋራካ ኔን ካማና።

18 "ደሪ ኩንድያነ መኤረትያዋዳን፥ ዛላይካ ቆለትያዋዳን፥ 19 ሃይካ ሹቻ ቦክያዋዳንነ ድኡካ ቢታ ሜጪደ አፍያዋዳን፥ ሄዋዳን ኔንካ አሳ ህዶታ ይሳሳ። 20 ኔን አ መናዉ ጾናሳ፤ ያቶፐ እ ብ አጌ። አ ማላ ላማደ፥ ነ ስንፐ የዳሳ። 21 አ ናናቱ ቦንቼቶፐ፥ ሄዋ እ ኤረና፤ ኡንቱንቱ ቶሸቶፐካ በኤና። 22 ሽን አ ቦላ ሴላይ አ ጻላላዉ ስሰቴ፤ እ ባረ ጻላላዉ ዬኬ" ያጌዳ።