ኢዮባ 27

ኢዮብ ዛሪደካ ሃሳዬ

1 ኢዮብ ሀዋዳን ያጌዳ፤ 2 "ታ ሱረ ፕርዳ ታና ድጊደ፥ ታ ደኡዋ ጫማ ከሴዳ፥ ኡባ ዳንዳይያ ደኡዋ ጾሳን ታን ጫቃይ። 3 ጾሳይ ታዉ ደኡዋ ሸምፑዋ እሜዳ ኬናን፥ 4 ታ ዶናይ ዎርዱዋ ሃሳየና፤ ታ እንጻርሳይካ ጭሙዋ ኦደና። 5 ህንተ ሃሳዬዳዌ ልከ ጋደ ታን አክከ፤ ሀይቃና ጋካናዉካ ታን ታ ሱረተ አግከ። 6 ታ ጽሎተ ምንሳ ኦይቃናፐ አትና፥ ጽሎተ አግከ፤ ታን ደኤዳ ላይ ኡባን ታ ዎዛናይ ካሀይ ታና ቁምኤና።

7 "ታ ሞርከቱነ ታናና ኤቀትያዋንቱ ኡባይ ኢታነ ባይዛንቻ አሳዳን ሙረትኖ። 8 ጾሳይ ኡንቱንቱ ሸምፑዋ ኡንቱንቱ አሹዋፐ ሻኪደ፥ ኡንቱንቱ ላይ ቃምስያ ዎደ፥ ኢታቶ ስንፐ ህዶታይ አዬ? 9 ኡንቱንቱ ቦላ መቱ ጋክያ ዎደ፥ ጾሳይ ኡንቱንቱ ዋሱዋ ስሲ? 10 ኡባ ዳንዳይያ ጾሳን ኡንቱንቱ ናሸታኔ? ኡንቱንቱ ኡባ ዎደ ጾሳ ጼሳኔ?

11 "ታን ህንተና ጾሳ ዎልቃባ ታማርሳና፤ ኡባ ዳንዳይያ ጾሳ ሀልቹዋ ታን ህንተፐ ቆስከ። 12 ህንተ ኡባይ ሀዋ ህንተ ሁጲያን በኤድታ። ያትና፥ ሀ ሜላ ሃሳያ አያዉ ሃሳዪቴ?

13 "ጾሳይ ኢታ አሳቶ እሜዳ ካጫይነ ኡቁንያ አሳቱ ኡባ ዳንዳይያ ጾሳፐ አክያ ዎይቱ ሀዋፐ ካልያዋ። 14 ኡንቱንቱ ናናቱ አይ ኬሻ ዳሮፐነ፥ ኡንቱንቱ ኦላን ዉሪኖ፤ ኡንቱንቱ ዛራቱካ ምያዋ ዪደ ኮሻቲኖ። 15 ሄዋፐ አቴዳዋንቱ ቦሻን ዉሪኖ፤ ኡንቱንቱ አምኤቱካ ኡንቱንቶ ዬክክኖ።

16,17 "ኢታ አሳቱ፥ ፓይድና ዉረና ብራ ሺሽናካ፥ ኡንቱንቱ ብራ ሱረ አሳቱ ሻክ አካና፤ ቃይ ማዩዋ ዳርሲደ ሺሽናካ፥ ኡንቱንቱ ሺሽያዋ ጽሎቱ ማያና። 18 ኡንቱንቱ ኬጽያ ጎለቱ ሻራሮታ ጎልያ ማላ፤ ናግያዋንቱ ኬጼዳ ጋባ ማላ።

19 "ኡንቱንቱ ዱረ ግዲደ፥ ባረንቱ ሂጻን ግሳና፤ ሽን ኡንቱንቱ ገምእሹዋፐ ቤጎትያ ዎደ፥ አያይነ ይና መላ አታናዋንታ። 20 ዳጋማይ ድኡዋዳን ቆፐናን ኡንቱንቱ ቦላ ያና፤ ቃማንካ ጎቲ ኡንቱንታ ደንደ አፋና። 21 አዋይ ዶልያ ባጋ ጫርኩ ኡንቱንታ ደኢያሳፐ ፕቲደ አፋና። 22 ኡንቱንቱ ከስ አካናዉ ባቃትሽና፥ ቃረት ባይናን ኡንቱንቱ ቦላ ዎና። 23 ዎልቃማ ኮሻ ስሲደ፥ ኡንቱንታ የደርሳና።