ኢዮብ ዛሪደካ ሃሳዬ
1 ኢዮብ ሀዋዳን ያጊደ ዛሬዳ፤ 2 "ሀዋ ማላ ሃሳያ ዳሩዋ ስሳድ፤ ህንተ ምንቶ ጊደ፥ ታና መትያዋንታ። 3 ሀ ጎአይ ባይና ህንተ ሃሳያዉ ዉርሰ ባዌ? ታናና ህንተና ሀዋ ኬሻ ፓሉምስያ ጋሱ አዬ? 4 ህንተ ታ ሳኣን ደእና፥ ታን ህንተ ሳኣን ደኤዳዋ ግድንቶ፥ ታንካ ታ ሁጲያ ካያን ቃደ፥ ሀእ ህንተ ግያዋ ኡባ ህንተ ቦላ ሎይደ ሃሳያና ሽን! 5 ሄዋዳንካ፥ ታ ዞርያን ታን ህንተና ምንና ሽን! ታ ዶናፐ ከስያ ሃሳያይካ ህንተና ምንና ሽን!
6 "ሽን ታን ሃሳይንቶካ፥ ታ ሳኩ ኬከና፤ ታን ጮኡ ጋደ ዳንዳይንቶካ፥ ታፐ ክቼና። 7 አቤት ጾሳዉ፥ ኔን ታና ድፕ ኦዳ፤ ታ ጎልያ አሳ ኡባካ ይሳዳ። 8 ኔን ታ ጋልባ መልሳዳነ ጉንድሳዳ፤ ታ ቦላካ ግልቂሳዳ። ሄዋ ድራዉ፥ አሳይ ታና በኢደ፥ ‘ሀዌ እ ናጋራንቻ ግድያዎ ማርካ’ ያጌ። 9 ጾሳይ ባረ ሀንቁዋን ታና ዱሰረ የጌዳ፤ ባረ አቻካ ታ ቦላ ጋርጬዳ፤ እ ታ ሞርኪ ታና ደረቄ። 10 አሳቱ ታ ዩሹዋን ሺቄድኖ፤ ታ ቦላ ቅሊጪደ፥ ታ ቅንጻልያ ባቄድኖ። 11 ጾሳይ ኢታ ኦያ አሳቶ ታና አደ እሜዳ፤ ጌላቱዋ ኩሽያንካ እ ታና ኦሌዳ።
12 "ታን ካሰ ዎፑ ጋደ ደኣድ፤ ሽን ጾሳይ ታና ክንቼሬዳ፤ ታ ሙርጋጭያ ኦይቂደ፥ እ ታና መንሬዳ። ቃይ እ ታና ጾንግ ደቻናዉ ማላ ኦዳ፤ 13 አ ዎንዳፍያ ፖይ ታና ያና ሃና ሙዴድኖ። ቃረት ባይናን እ ታ ክላሁዋ ጫዲደ፥ ታ ጭሽያ ታ ትርያፐ ሳኣን ጉሴ። 14 ኦላናዉ ዎጽያ ኦላንቻዳን፥ እ ታና ዛር ዛሪደ ማዱ። 15 ታን ካዮታደ፥ ማቃ ማያድ፤ ታ ዎልቃይካ ባናን ኦለቴዳ። 16 ታን ዬክያ ዬኩዋ ዳሩዋን ታ አይፊ ጋልጄዳ፤ አፎፐ ደንዶዋን ታ አይፊካ ዞኤዳ። 17 ሽን ሀ ኡባንካ ታን ባይዜዳዌ ባዋ፤ ታ ዎሳይካ ጌሻ።
18 "ቢታዉ፥ ቢታዉ፥ ታ ሱ ካሞፓ፤ ታን ዋሳናዋ ድጎፓ። 19 ሀእካ ታ ማርካይ ሳሉዋና፤16:19 ኢዮባ 19:25 ታዉ ጻባቃትያዌ ቦላ ቃና። 20 ታ ላገቱ ታና ካደ ጼሊኖ፤ ታ አይፊ ጾሳ ስንን አፎ ትጌ። 21 አሳይ ባረ ላገዉ ጋናትያዋዳን፥ ታና ጾሳና ስገያ አሳይ ደኤዳ ግዴረኔሻ! 22 አያዉ ጎፐ፥ አማሬዳ ላይቱ አዳዋፐ ጉይያን፥ ታን ስመናሳ ባና።