ኢዮባ 31

1 "ማላንቻ ማጫውኖ ጼላደ አሞተናዳን፥ ታን ታ ዎዛና አይፍያና ጫቁዋ ጫቀታድ። 2 ቦላን ደእያ ጾሳይ ታዉ አያ ካጫ እማንዴሻ? ሳሉዋን ደእያ ኡባ ዳንዳይያ ጾሳይ አሳዉ እምያ ዎይቱ አያ ግዳንዴሻ? 3 ኢታቱዋ ቦላ ቦሻይ፥ ባይዙዋ ኦያዋንቱ ቦላ ባሻይ ጋካናዌ ኤረቴዳዋ ግደኔየ? 4 ጾሳይ ታ ሄመታ ኡባ በኤ፤ ታ ታንጉዋ ኡባካ ፓይዴ።

5 "ታን ዎርዱዋ ሙለካ ኦበይከ፤ አሳካ ጭማናዉ ካጄላበይከ። 6 ጾሳይ ታና ልከ ሚዛናን ማዛኖ፤ ያቲደ ታን ጽሉዋ ግድያዋ ኤሮ። 7 ታ ሀመታይ ኦግያፐ ሸርኤዳባ ግዶፐ፥ ታ ዎዛናይካ ታ አይፊ ጼሌዳዋ አሞቴዳዋ ግዶፐነ፥ ቃይ ታ ኩሺካ ናጋራን ቱኔዳዋ ግዶፐ፥ 8 ታ ጫርሻይ ኡባይ ሾደት ዮ፤ ታን ዘሬዳዋካ ሀራይ ሞ።

9 "ታ ዎዛናይ ታ ሾሩዋ ማጫ አሳ አሞቴዳዋ ግዶፐ፥ ዎይ ታን እዝ ፐንገን ዙጋደ ናጌዳዋ ግዶፐ፥ 10 ታ ማቻታ ሀራ አሳዉ ጋጩ፤ ቃይ ሀራ አቱማ አሳቱ ኢናና ግስኖ። 11 አያዉ ጎፐ፥ ሻርሙጽያዌ ሎይ ፖካነ ፕርዳን ሙርስያ ናጋራ። 12 ሀ ናጋራይ ታማዳን ጹጊደ፥ ታ ማጹዋ ኡባ ይስያዋ።

13 "ታን ታ አቱማ ዎይ ታ ማጫ ቆማቱ ታና ሞትና፥ ኡንቱንቱ ሞቱዋ ካዳዋ ግዶፐ፥ 14 ጾሳይ ታና ብድያ ዎደ፥ ታን ዋናኔ? ቃይ እ ታና ኦችያ ዎደ፥ ታን ዋጋ ዛራኔ? 15 ታና መዳ ጾሳይ ታ ቆማቱዋካ እ መዳ። ኑና ኡባካ ኑ አት ኑ አት ኡሉዋን መዳዌ እት አ ጻላላ።

16 "ታን ህዬሳቱ ዎሴዳዋ ድጋድታንቶ፥ ዎይ አምኤቱዋ ምንናን አጋድታንቶ፥ 17 አዉ አታ ባይና ናናቱ መላ አቅያ ዎደ፥ ታን ታ ቁማ ታረካ ማበይከ። 18 ታን ኡንቱንታ ታ ያላጋተፐ ዶማደ፥ ኡንቱንቱ አዉዋዳን ድቻድ፤ ታ አት ኡሉዋፐ የለቶደፐ ዶማደ፥ አምኤቱዋ ማዳድ። 19 ማዩ ይና፥ ሜጉ ዎያ ኡራ፥ ዎይ ካሎ ደእያ መቶታንቻ ደምያ ዎደ፥ 20 ታ ዶርሳቱዋ እክስያፐ ኦሰቴዳ ማዩዋ ታን ኡንቱንታ ሆኤዳዋፐ አትን፥ ኡንቱንቱካ ባረንቱ ፖሎ ዎዛናን ታና ጋላታነንቶፐ አትን፥ 21 ታን ሞቱዋን ኡንቱንታ ሻትማናዋ ኤራደ፥ አዉ ባይና ናናቱዋ ናቄዳዋ ግዶፐ፥ 22 ታ ቄሲ ኩርያፐ መኦ፤ ታ ኩሺካ ሀሽያፐ ካረት ዎ። 23 ሄዋ ታን ኦናዌ ጾሳ ሙሮ ያይያ ድራሳነ አ አንጋይ ታና ዳጋንያ ድራሳ።

24 "ታን ዎርቃን አማነቴዳዋ ግድንቶ፥ ሙሩታ ዎርቃካ፥ ‘ታን ኔናን ጬቀታይ’ ጋድታንቶ፥ 25 ታ ዱረተ ዳሩዋን፥ ታ ኩሺ ደሜዳ ዎያን ታን ናሸታድታንቶ፥ 26 አዋ ጶለ ዎይ አግና ሎኦተ በኣደ፥ 27 ታ ዎዛናን ጌማን ኡንቱንታ ቦንቻድታንቶ፥ ዎይ ታ ኩሽያ ፕድ ኦ የራደ፥ ኡንቱንታ ቦንቻድታንቶ፥ 28 ቃን ደእያ ጾሳ ካዳድ ሽን። ሄ ናጋራይካ ፕርዳን ሙርስያ ናጋራ ግዴ ሽን።

29 "ታ ሞርከቱዋ ጋኬዳ ኢታ ካጫን ታን ናሸታበይከ፤ ኡንቱንታ ጋኬዳ መቱዋንካ ሆምቦጫበይከ። 30 ‘ታ ሞርኪ ዮ’ ያጋ ሸቃደ፥ ናጋራ ኦበይከ። 31 ታን ኡባ ገደ እማ ሞክያዋ ታ ቆማቱ ታዉ ማርካቲኖ። 32 ሳአይ ቃሜዳ አሳ ካረን አይሳበይከ፤ ታን ታ ጎልያ ፐንግያ ኦግያና ብያዎ ኡባዉ ዶያ ዎድ። 33 አሳይ ቆስያዋዳን፥ ታን ታ ናጋራ ታ ሾጵያን ቆሳበይከ። 34 ታን አሳ ሃሳያደ ዳጋማበይከ፤ ኡንቱንቱ ቦርያዉ ያያደ፥ ታን ጮኡ ጌዳ ዎዲነ ካረ ከሰናን አጌዳ ዎዲ ባዋ።

35 "ታን ሃሳይያዋ ስስያዌ ደኤረኔሻ! ታን ሃሳዬዳዌ ኡባይ ቱማ ግድያዎ ታን ፓራማይ፤ ኡባ ዳንዳይያ ጾሳይ ታዉ ዛሩዋ እሞ። ታ ባልጋራይ ታና ሞቴዳ ፓይሊ ደእና፥ በኣርክታሻ! 36 ዎይቱዋዳን ታን ታ ሀሽያን ዎና ሽን! ካላቻዳን ታ ሁጲያን ቶካናሽን! 37 ታን ካፑዋዳን አኮ ሺቃደ፥ ታ ኦዳዋ ኡባ አዉ ኦዳና ሽን!

38 "ታ ጎሻ ቢታይ፥ ‘ታና ቦንቃ አካዳ!’ ጊደ፥ ታ ቦላ ዋሴዳዋ ግዶፐ፥ ታ ያፋራቱካ ታ ቦላ ዬኬዳዋ ግዶፐ፥ 39 ሄ ቢታን ሞኬዳ ሚሻ ቃንጸናን ጮ ሜዳዋ ግዶፐ፥ ዎይ ሄ ቢታ ኦያዋንታ ኮሻን ዎዳዋ ግዶፐ፥ 40 ታዉ ዛርጋ ድራዉ አጉንይ፥ ባንጋ ድራዉካ ሻራፋይ ሄ ቢታን ሞኮ" ያጌዳ።

ኢዮባ ሃሳያይ ሀዋን ፖለቴዳ።