ኢዮባ 21

ኢዮብ ዛሪደካ ሃሳዬ

1 ሄዋፐ ጉይያን፥ ኢዮብ ሀዋዳን ያጊደ ዛሬዳ፤ 2 "አነ ታ ሃሳያ አኬኪደ ሀይዝተ፤ ስስያዌ ህንተ ታና ምንያዋ ግድ ፓይደቶ። 3 ታን እት ገደነ ሃሳያናዉ ታዉ ካጫ እምተ። ታን ሃሳያ ስምና፥ ቅሊጭተ! 4 ታን ሞተትያዌ አሳና ግደና። ያትና፥ ታዉ ዳንዳያይ ዉሮፐ፥ ሄዌ ማላልስያዌ? 5 አነ ታና ጼልተ፤ ማላለትተ፤ ህንተ ኩሽያንካ ህንተ ዶና ኦይቂተ። 6 ታና ጋኬዳዋ ታን ቆፕያ ዎደካ፥ ታና ዳጋን፤ ታ ቦላይካ ኮኮሬ።

7 "ኢታ አሳቱ አያዉ ፓጻ ደእኖ? ኡንቱንቱ ላይይ አያዉ አዱቂ? ኡንቱንቱ ዎልቃይካ አያዉ ዳር ዳር ብ? 8 ኡንቱንቶ ናናቱነ ናናቱዋ ናናቱ ደኢኖ፤ ኡንቱንቱ ድጭሽና በአናዉ፥ ጋምኢደ ደኢኖ። 9 ኡንቱንቱ ሶያይ ህርግ ባይናን ሳሮ ደኤ፤ ጾሳይ ኡንቱንታ ባረ ጋትማን ሾጭ ኤረና። 10 ኡንቱንቱ ኮሩማ ቦራቱ ማጫ ሚዛና ጋከትያ ዎደ፥ ኮለናን ኦይኖ፤ ማጫ ሚዛቱካ ሳልኤሰናን የሊኖ። 11 ባረንቱ ናናቱዋ ዶርሳ ዉድያዳን ከሲኖ፤ ኡንቱንቱ ናናቱካ ያን ሃን ጉፒኖ። 12 ዳርቢያ ባቂደነ ዲ ዲጺደ፥ የ የጺኖ፤ ሎኩዋ ፑኒደካ ናሸቲኖ። 13 ኡንቱንቱ ባረንቱ ደኡዋ ላይ እሻሉዋን ፖሊደ፥ ባረንቱ ዱፉዋካ ሳሮ ቢኖ። 14 ኡንቱንቱ ጾሳ፥ ‘ኑፐ ሃካ! ኑን ነ ኦግያ ኤራናዉ ኮዮኮ! 15 ኑን አዉ ኦናዉ ኡባ ዳንዳይያ ጾሳይ ኦኔ? ኑን አ ዎሲደ፥ ጎኤታናባይ አዬ?’ ያጊኖ። 16 ኡንቱንቱ ባረንቱ እሻሎ ደኡዋ ባረንቱ ምኖተን ደሜዶ ጊኖ፤ ሽን ታን ኡንቱንቱ ቆፋ አክከ።

17 "ኢታ አሳቱዋ ደኡዋ ጾምፒ ቶእ ኤሪ? ኡንቱንቱ ቦላ ባሻይ ዎ ኤሪ? ጾሳይ ባረ ሀንቁዋን ኡንቱንታ ሙር ኤሪ? 18 ጫርኩዋ ስንን ኡንቱንቱ ሱላዳን ሀኔዳ ዎዲ ደኢ? ጎቱ ፕት አፍያ ባናዳን ኡንቱንቱ ሀን ኤርኖ?

19 "ህንተ፥ ‘ጾሳይ አዎቱዋ ባይዙዋን ኡንቱንቱ ናናቱዋ ሙሬ’ ያጊታ። አነ ጾሳይ ናጋራንቻቱዋ ኡንቱንቱ ሁጲያን ሙሮ! ያትንቶ ኡንቱንቱ ባረንቱ ባይዙዋ ኤራና። 20 ኡንቱንቱ ባረንቱ ሙሩዋ ባረንቶ አክኖ። ኡባ ዳንዳይያ ጾሳ ሀንቁዋ ጹኣካ ኡንቱንቱ ባረንቱ ሁጲያን ኡሽኖ። 21 አያዉ ጎፐ፥ ኡንቱንቱ ሀይቂ ክቼዳዋፐ ጉይያን፥ ኡንቱንቱ ናናቱዋ አያይ ጋክንቶነ ኮይክኖ።

22 "ቦላ ቃን ደእያዋንታ ፕርድያ ጾሳ ኤራ ታማርሳናዉ ዳንዳይያ አሳይ ደኢ? 23 እት አሳይ ኩመን ዎልቃይነ ኩመን ሳሩ ደእሺና፥ እሻሉዋን ደኢድ ሀይቄ። 24 አ ቦላይ ኦርድ ደእሽን፥ አ መቀ ኮልዚካ ሽጭ ደእሺና ሀይቄ። 25 ሽን ሀራ አሳይ አ ሸምፑዋን ካዩ ፓጨናን፥ ባረ ደኡዋን ሙለካ ሎኦባ ደመናን ሀይቄ። 26 ኡንቱንቱ ላኡካ እት ማላ ቢታን ሞገቲኖ፤ ኡንቱንታ ላኡዋካ ጉጹነቱ ካሚኖ።

27 "ህንተ ታና ናቃናዉ ቆፒደ፥ ህንተ ዎዛናን ሀልቼዳ ሀልቹዋ ሙልያ ታን ሎይደ ኤራይ። 28 ህንተ፥ ‘ሄ ኢታ ኦያ፥ ዎልቃማ ብታንያ ጎሊ ሀእ ሀቃኔ?’ ያጊታ። 29 ኦግያና ሀመትያ አሳቱዋ ኦችበይክቴ? ኡንቱንቱ ኦድያዋ አማንክቴ? 30 ኡንቱንቱ፥ ‘ኢታ አሳቱ ባየ ጋላስ ቦሸተናን አቲኖ፤ ጾሳ ሀንቁ ቆንጭያ ጋላስካ ኡንቱንቱ ከስ አካና’ ያጊኖ። 31 ኢታ አሳ አ ኢታተዉ ኦኔ ዋላሳናዌ? እ ኦዳ ኢታባዉካ አ ሙራናዌ ኦኔ? 32 እ ሀይቂና፥ አ አሃ ዱፉዋ አፍያ ዎደ፥ አ ዱፉ ናገታና። 33 አሳይ ኡባይ አ ካሌ፤ ፓይዱ ባይና አሳይ አ ባልያን ፔሼ፤ አ ዱፉዋ ቢታይካ ኡቱላዳን አዉ ካዉሼ። 34 ያትና፥ ህንተ ታና ዎት መላ ኦዱዋን ምንቴ? ህንተ ታ ኦሻዉ ዛሬዳ ዛሩ ኡባይ ዎርዱዋ!" ያጌዳ።