ኢዮባ 33

1 "ኢዮባ፥ ሀእ ታን ኦድያዋ ስሳ፤ ታ ግያዋ ኡባ ሀይዛ። 2 ሃሳያናዉ ጊጋድ፤ ታ ቃላቱካ ታ እንጻርሳ ጼራን ደኢኖ። 3 ታ ሃሳይያ ቃላቱ ታ ዎዛና ሱረተ ቆንጭሲኖ፤ ታን ኤርያዋ ታ እንጻርሳይ ቱማተን ሃሳዬ። 4 ታና ጾሳ አያናይ መዳ፤ ኡባ ዳንዳይያ ጾሳ ሸምፑ ታዉ ደኡዋ እሜዳ። 5 ኔን ዳንዳይያዋ ግዶፐ፥ ታዉ ዛሩዋ እማ፤ ኔና ጊግሳደ፥ ታናና ጋከታ።

6 "በአ፥ ታን ጾሳ ስንን ነ ማላ፤ ቃይ ታንካ ኡርቃፐ መታድ። 7 ኔን ታዉ ያይያ ጋሱ ባዋ፤ ታን ኔና ናቂከ።

8 "ነ ሃሳያ ኡባ ታን ሀይዛደ ታካድ፤ ኔን ሀዋዳን ያግሽን ስሳድ፤ 9 ‘ታን ጌሻነ ቶሺ ባይና አሳ፤ ታን ጽሉዋነ ናጋራ ኦቤና አሳ። 10 ሽን ጾሳይ ታና ሙራናዉ ጋሱዋ ኮዬ፤ እ ታና ባረ ሞርክያዳን ፓይዴ። 11 ታ ገድያ ገድያ ብራታን ቃቼ፤✝33:11 ኢዮባ 13:27 ታን ታንግያ ታንጉዋ ኡባካ እ ዎቼ’ ያጋዳ።

12 "ኢዮባ፥ ኔን ሀ ሃሳያን ልከ ግዳካ! አነ ታን ነዉ ኦዳይ፤ ጾሳይ አሳፐ አ። 13 ኔን፥ ‘ጾሳይ ታን ሃሳዬዳ ሃሳያዉ ዛሩዋ እመና’ ጋደ፥ አያዉ አናና ፓሉመታይ? 14 አሳይ አኬካናፐ አትና፥ ጾሳይ ሀ ዱማ ዱማ ኦግያን ሃሳዬ።

15 "አሳይ ቃማ ሂጻን ግሲደ፥✝33:15 ኢዮባ 4:13 ገምእሹዋ ፓኑሮ ዎደ፥ ጾሳይ አኩሙዋንነ ሳጻን ሃሳዬ። 16 ሄ ዎደ አሳይ ስሳናዳን ሀይ ዶዬ፤ ባረ ሴራንካ እ ኡንቱንታ ዳጋን። 17 ያቲደ አሳይ ናጋራ ኦናዳን ተኤ፤ ኦቶሩዋካ አሳፐ ድጌ። 18 ጾሳይ አሳ ባሻፐ አሼ፤ ሀይቁዋፐካ ናጌ።

19 "ጾሳይ አሳ ሳኩዋ ሂጻን ደኦደካ፥ ባረ ባላፐ ስማናዳን ሴሬ። 20 ሄዋዳን ሀኒደ፥ ሀርጌዳ ኡራይ ካ እጼ፤ ዳሮ ማልኦ ቁማይካ አ ሸነዬ። 21 አ አሹካ ግልቂደ ዉሬ፤ አ ቦላይካ መልና፥ መቀይ ፓይደቴ። 22 አ ሸምፓታ ዱፉዋኮ፥ አ ደኡዋካ ሀይቁዋ ኪታንቻቱዋኮ ማቴዳ።

23 "አሳዉ ሱረ ኦግያ በስያ፥ ሻአን ፓይደትያ ኪታንቻቱዋፐ እቱ አዉ ጋናታናዉ ይንቶ፥ 24 አዉ ቃረቲደ፥ ‘እ ዱፉዋ ገለናዳን አ አሻና። ታን አዉ ዎዝያዋ ደማድ’ ያግንቶ፥ 25 አ ቦላይ ያላጋና፤ አ ያላጋተ ዎልቃይካ አዉ ስማና። 26 ሄ ብታኒ ጾሳ ዎሳና፤ ጾሳይ አ ዎሳ ስሳና። ጾሳይ አዉ አ ጽሎተ ዛርያ ድራዉ፥ እ ናሸቻን ጾሳዉ ጎይናና። 27 ሄ ዎደ አሳ ስንን እ ሀዋዳን ያጋና፤ ‘ታን ናጋራ ኦድ፤ ሱረባካ ጌላያድ፤ ሽን ጾሳይ ታ ባይዙዋዳን ታዉ ጭግቤና። 28 ዱፉዋን ገለናዳን ታና አሼዳ፤ ሄኮ፥ ሀእ ፓጻ ደኣደ፥ ፖኡዋ በአይ’ ያጋና።

29 "በእተ፥ ጾሳይ አሳዉ ሀዋ ኡባ ዛር ዛሪደ ኦ፤ 30 አሳ ዱፉዋን ገልያዋፐ አሼ፤ ደኡዋን እ ናሸታናዳን ኦ።

31 "ስም ኢዮባ፥ ታን ኦድያዋ ሀይዛደ ስሳ። አነ ኔን ጮኡ ጊና፥ ታን ሃሳያይ። 32 ኔን ሃሳያናዉ ኮይያዌ ደኦፐ፥ ታዉ ሃሳያ። ታን ኔን ጽሉዋ ግድያዋ በሳናዉ ኮያይ። 33 ሄዌ ዮፐ፥ ጮኡ ጋደ፥ ታን ሃሳይያዋ ስሳ። ኔና ታን አዳ ኤራተ ታማርሳና" ያጌዳ።