ኢዮብ ላኤንዋ ሃሳዬ
1 ኢዮብ ዛሪደ፥ 2 "ታ ዋዪነ ታ ካዩ ኡባይ ሚዛናን ልከቴረነ! 3 ያትንቶ አባ ዶና ሻፍያፐካ አ ዴጻናዋ። ሄዋ ድራዉ፥ ታ ቃላይ ጻላ ግዴዳ። 4 ኡባ ዳንዳይያ ጾሳ ዎንዳፍያ ፖይ ታና ጫዴድኖ፤ ታ ቦላይካ ኡንቱንቱ ይሻ ኡሼ። ጾሳ ዳጋንያ ቦሻይ ታ ዩሹዋ ዶዴዳ። 5 ሀሪ ማታይ አ ስንን ደእሺና ዋሲየ? ዎይ ቦራይ ዳላ ደሚደ ጻጊየ? 6 ማልኤናባይ ማጽኒ ገለናን ሜተቲየ? ዎይ ቁቁልያ ግዶ ሃይ ሎቅሎቅየ? 7 ሄዋ ማላ ቁማ ታን ሸነታይ፤ ሄዋ ማላ ቁማ ሞፐ፥ ታና ሳኬ።
8 "ታን ዎሴዳ ዎሳይ ጋኬረኔ! ጾሳይካ ታ ዎዛና አሙዋ እሜረኔ! 9 ጾሳይ ታና መንሬረኔ! እ ባረ ኩሽያ የዲደ፥ ታ ደኡዋ ቱራ ዱረኔሻ! 10 ጌሻ ጾሳ ቃላ ካዳቤና ድራዉ፥ ታዉ ሳኩ ዳሮፐነ፥ ምንዋ ግዴረነሻ። 11 ታን ደኡዋን ደአናዉ ታዉ አይ ዎልቃይ ደኢ? ታን ዳንዳያናዉ፥ ታ ዉርሰይ አዬ? 12 ታ ዎልቃይ ሹቻ ዎልቃ ማሌ? ዎይ ታ አሹ ናሃስያ ብራታ ማሌ? 13 ታና ማዳናዉ አይ ዎልቃይነ ታዉ ባዋ፤ ማዱዋ ደማናዉ ታን ብያ ሳአይካ ደኤና።
14 "መቱዋን ደእያ ኡራይ ኡባ ዳንዳይያ ጾሳዉ ያይያዋ አግንቶካ፥ አ ላገቱ አዉ ኬካተ በሳናዉ ኮሼ። 15 ታ እሻቶ፥ ህንተ እራይ ቡከና ዎደ መልያ ሻፋ ማላ፥ ታና ጭሚታ። 16 ባልጉዋ አግናቱዋን ሄ ሻፋይ ኦርዶ ሻቻን ኩሚደ ካመቴ። 17 ሽን ቦኒ ጋክያ ዎደ፥ ሄ ሻቻይ ሙሺደ፥ ሃ ከሴ፤ ሃይካ ሄ ሳኣፐ ዬ። 18 ጫና መህያ ላጊደ ብያ ዛልአንቻቱ ሃ ኮያናዉ ባረንቱ ኦግያፐ ጋጻ ከሲደ፥ መላ ቢታን ቶይላካቲደ፥ ሀይቂ ዪኖ። 19 ቴማ ቢታ ዛልአንቻቱነ ሳባ ቢታ ኦግያዋንቱ ሃ ደማና ጊደ፥ ህዶታ ዎኖ። 20 ሽን ኡንቱንቱ አማነቲደ ኮይና ዬዳ ድራዉ፥ ዬላቴድኖነ ህዶታ ቃንጼድኖ። 21 ህንተካ ታዉ ሄ ሻፋቱዋ ማላ ግዴድታ፤ ታና ጋኬዳ መቱዋ በኢደ ያዬድታ። 22 ታን ህንተና፥ ‘ታዉ እትባ እምተ’ ዎይ፥ ‘ህንተ አቁዋፐ ታ ድራዉ አሳዉ ማታይያ እምተ’ ጋድታ? 23 ዎይ፥ ‘ታና ታ ሞርክያ ኩሽያፐ አሽተ’ ዎይ፥ ‘ኡቅንያዋንቱ ኩሽያፐ ታና ዎዝተ’ ጋድታ?
24 "ህንተ ታና ታማርስተ፤ ታን ጮኡ ጋና። አያ ባይዛድታንቶ፥ አነ ታና በስተ። 25 ቱማ ግዴዳ ቃላይ አይ ኬና ዎልቃሜ! ሽን ህንተ ፓሉማይ ኡባይ ታና አያነ ሴረና። 26 ህንተ ታን ሃሳይያ ሃሳያ ጫርኩዋ ማላ ጊደ ቆፒታ። ያትና፥ ታን ህዶታ ቃንጻደ ሃሳይያ ሃሳያ አያዉ ቆሪቴ? 27 አዉ ባይናዋንታ ሻክ አካናዉ ህንተ ሳማ የጊታ፤ ህንተ ላግያካ ዛልአናዉ ዋሽሲታ። 28 አነ ትሽ ኦደ፥ ታና ጼልተ። ታን ህንተ ስንን ዎርዱዋ ሃሳይከ። 29 ሀያና፥ አነ ዛረደ ቆፕተ፤ ታን ጽሉዋ ግድያ ድራዉ፥ ታ ቦላ ጮ ፕርዶፕተ። 30 ታን ታ እንጻርሳን ዎርዶቴዳዋ ማላቲ? ታ ዶናይ ልክያ ልከ ግደናዋፐ ሻኪደ ሃሳያናዉ ዳንዳየኔ?