ኢዮባ 36

1 ኤልሁ ጉጂደካ ሀዋዳን ያጌዳ፤ 2 "ጾሳ ዶና ግዳደ ታን ነዉ ኦድያዌ ብሮ ደእያ ድራዉ፥ ጉ ዳንዳያደ ስሳ። 3 ታን ታ ኤራ ሃኩዋፐ አሃድ፤ ታና መዳዌ ጽሎ ፕርዳ እምያዋ ግድያዋ ታን ኔና ኤርሳና። 4 ታን ዎርዱዋ ሃሳይከ፤ ኩመን ኤራይ ደእያ ኡራይ ኔናና ደእያዋ አማና።

5 "በአ፥ ጾሳይ ዎልቃማ፤ ሽን እ ኦናነ ካና። እ አኬካንካ ምና። 6 ኢታቱዋ እ ፓጻ ዎና፤ ሽን ኡቁነቴዳዋንቱ ማታ እ ናግሴ። 7 ጾሳይ ባረ አይፍያ ጽሎቱዋፐ ደንና። እ ኡንቱንታ ካተቱዋና ኡትሲደ፥ መናዉ ቁ ቁ ኦ። 8 ሽን አሳይ ሳንሳላታን ቃሸቶፐ፥ ዎይ ቱጋ ዎዶሩዋን ኦይቀቶፐ፥ 9 እ ኡንቱንቱ ኦሱዋነ ኦቶሩዋን ኡንቱንቱ ኦዳ ናጋራ ቆንጭሴ። 10 ሴራ ስሳናዳን ኡንቱንቱ ሀይ ዶዬ፤ ናጋራፐ ስማናዳንካ እ ኡንቱንታ አዛዜ። 11 ኡንቱንቱ ስሲደ፥ አዉ ኦፐ፥ ባረንቱ ላይ እሻሉዋንነ ዎፓን ዉርሳና። 12 ሽን ኡንቱንቱ ስሰናን እጾፐ፥ ማሻን ዉራና፤ ኡንቱንቱ ኤራ ዬዳ ድራዉ ሀይቃና።

13 "ጾሳ አማነና አሳቱ ባረንቱ ዎዛናን ሀንቁዋ ዳጋዪኖ፤ እ ኡንቱንታ ሙርያ ዎደካ፥ ማዳ ጊደ ዎስክኖ። 14 ኡንቱንቱ ባረንቱ ያላጋተን ሀይቂኖ፤ ኡንቱንቱ ደኡካ ዬላን ዉሬ። 15 ጾሳይ ቱጋትያዋንታ ኡንቱንቱ ቱጋን ታማርሴ፤ እ ኡንቱንቱ መቱዋ ባጋና ኡንቱንታ ስሴ።

16 "ጾሳይ ኔና መቱዋፐ ከሲደ መቱ ባይና አኮ ሳኣ አፌዳ፤ ነ ምያ ማሶፍያንካ ሞዋ ጉፔዳ። 17 ሽን ሀእ ኢታቱዋ ፕርዳ አካዳ፤ በስያ ሙራካ አካደ ደኣሳ። 18 ኔና ኦንነ ዱረተ በሲደ ጭመናዳን፥ ዳሮ ማታይያንካ ባለናዳን ናገታ። 19 ነ ማጹዋ ዳሩ ዎይ ነ ምኖተይ ኔና መቱዋፐ አሻኔ? 20 አሳቱ ባረንቱ ሳኣፐ ይያ ቃማይ ያናዳን አሞቶፓ። 21 ሀ መቱ ኡባይ ኔና ጋኬዳዌ፥ ኔና ኢታፐ አሻናሳ። ሄዋ ድራዉ፥ ኢታተዉ ጉየ ስመናዳን ኔና አኬካ።

22 "ጾሳይ ባረ ዎልቃን ቁ ቁ ጌዳ! አ ማላ አስታማሪ ኦኔ? 23 ‘ሀዋ ኦ’ ጊደ ጾሳ አዛዝያ አሳይ፥ ዎይ፥ ‘ኔን ኢታ ኦሱዋ ኦዳ’ ያጋናዉ ዳንዳይያ አሳይ ባዋ። 24 አሳይ ማዛሙርያን ሳቤዳ አ ኦሱዋ ኔንካ ሳባናዉ ሀሳያ። 25 አሳይ ኡባይ ጾሳ ኦሱዋ በኤዳ፤ ሽን በኢደ፥ ሃኩዋን በኤዳ። 26 በእተ፥ ጾሳይ ዎልቃማ! አ ግታተ ኑን አኬክቦኮ፤ አ ላይ ጮራተይካ ፓይድና ጋከተና።

27 "ጾሳይ ሃ ሳኣፐ ፑደ ሳሉዋ አፌ፤ ያን እራ ከሴ። 28 ሄ እራይ ሻርያፐ ከሲደ፥ አሳዉ ዳሮ ቡካናዳን ኦ። 29 ሻሪ ዋን ዩይንቶ፥ ዋልቃንይካ ጾሳይ ደእያ ሳሉዋን ዋን ጉምንቶ፥ ኦንነ ኤረና። 30 እ ባረ ዩሹዋን ዋልቃን ፖኡዋ ላሌ፤ ሽን አባ ጪማ እ ማን ካሜ። 31 እራ ቡክስያዋን ባረ አሳዉ ዳሮ ካካ ሞክሴ፤ ሀዋዳን ኦደ ጾሳይ አሳ ኡባ አይሴ። 32 እ ዋልቃን ባረ ኩሽያን ኦይቄ፤ ባረ ሀልቼዳ ሳኣ ሾጫናዉ አዛዜ። 33 ጉጉንይ ጉምያዌ ኡሹ ኡሾታናዋ አዋዬ፤ መሂካ ኡሹ ይያዋ ኤሬ።