ኢዮባ 39

1 "ደርያን ደእያ ገንኤቱ አዉደ የሊኖንቶ፥ ኔን ኤራይ? ጋራቱ ባንኪደ፥ ባረንቱ ማራቱዋ የልያ ዎደ በኣድ? 2 ኡንቱንቱ ኩንደ፥ ዎይሳ ኬሻ አግና ጋምኢኖንቶነ ቃይ አዉደ የሊኖንቶ ኤራይ? 3 ኡንቱንቱ ጉልባቲደ፥ ባረንቱ ማራቱዋ የልያዌ አዉደንቶ ኤራይ? 4 ኡንቱንቱ ማራቱ ባዙዋን ድጪደ ምኒኖ፤ ባረንቱ አየቱዋ ማታፐ ቢኖ፤ ላኤን ጉየ ስምክኖ።

5 "ደንባ ሃረቱ የዳ ደአናዳን ኦዳዌ ኦኔ? ቃሹዋፐ ኡንቱንታ ብል የዴዳዌ ኦኔ? 6 ኡንቱንቶ ታን ባዙዋ ደኢያሳ ኦደ እማድ፤ አሳይ ባይና ላዳ ቢታ ኡንቱንቱ ደአናዳን ኦድ። 7 ካታማ ጫቡዋፐ ኡንቱንቱ ሃኪደ ደኢኖ፤ ላግያዋንቱ ዋሱዋካ ስስክኖ። 8 ኡንቱንቱ ደረቱዋ ባረንቶ ሄመትያ ሳኣ ኦኖ፤ ሄዋን ምያ ሙልኦ ማታ ቆሪኖ።

9 "መንይ ነዉ ኦናዉ ኤኖ ጋንዴ? ዎይ ነ ጋጻታን ቃማ አቃንዴ? 10 ጎሻና ማላ፥ ኔን አ ዋጻይ? ዎይ ግንዳ ጎቻናዳን አ ኦናዉ ዳንዳያይ? 11 ኔን አ ዎልቃ ምኖተን አማነታይ? ነ ዳቡርስያ ኦሱዋ እ ኦናዳን፥ አዉ የጋ አጋይ? 12 እ ስሚደ ዪደ፥ ነ ካ ቆጽያ ነ ኡዱማዉ ሺሼ ጋደ ኔን አን አማነታይ?

13 "ሶጎናታ ባረ ቀፍያ ኤለካ ቃዉ፤ ሽን ሶጎናት ቀፈቱ ሳንጋኑዋ ቀፈቱዋነ ባለቱዋ ማላ ግድክኖ። 14 ሶጎናታ ባረ ቁቁልያ ቢታን ቁቁላዉ፤ ባናይ ሆኤናዳን አጋዉ። 15 ገዲ መንና ዎይ፥ ‘ባዙዋ ዶአቱ የና’ ጋደ ቆፑኩ። 16 ማራቱ ባረዋ ግደናዋዳን ፓይዳደ፥ ኡንቱንቶ መቀ ኢታዉ። እ ዳቡራይ ኡባይ መላ አትያዌ እዉ አያነ ማላተና። 17 አያዉ ጎፐ፥ ታን ጾሳይ እዞ አዳ ኤራተ ድጋድ፤ ታን አኬካካ እዉ እማበይከ። 18 ሽን ደንዳደ እዛ ዎጽያ ዎደ፥ ባረናና ናሰትያ ፓራ ቦላነ ፓራዉ ቦላ ሚጫዉ።

19 "ኢዮባ፥ ፓራቶ ዎልቃ እሜዳዌ፥ ዎይ ፓራቱዋ ሞርግያ ጎቶሾ ጋማ ማይዜዳዌ ኔኔ? 20 ፓራቱ ቦልያዳን ጉፓናዳንነ ያሽያ ዳረ ኡንቱንቱ ዳራናዳን ኦዳዌ ኔኔ? 21 ፓራቱ ዛንጋራን ቢታ ቦዲኖ፤ ባረንቱ ዎልቃንካ ናሸቲኖ፤ ያቲደ ኦላ ሚሻቱዋ ዳንጬዳዋንቱና ጋከታናዉ ኦላ ደምባ ፕሪጺኖ። 22 ያሻ ግያዋ ኡንቱንቱ ሙለካ ኤርክኖ፤ ኡንቱንታ አያይነ ዳጋንና፤ ኡንቱንቱ ቦላ ማሻ ዛረፐነ ጉየ ስምክኖ። 23 ኡንቱንቱ ቶግያ ኦላንቻቱ ኦይቄዳ ኦላ ሚሻቱ ጶሊደ፥ እቱ እቱዋና ጋከቲደ ጊረቲኖ። 24 ፓራቱ ፓቹሪደ ያሽሲደ፥ ኦላዉ ስንዉ ፕሪጺኖ። ማላካታ ፑኑሳ ኮሻ ስስያ ዎደ፥ ጮኡ ጊደ ኤቃናዉ ዳንዳይክኖ፤ 25 ማላካታ ፑንያ ዎደ፥ ‘ሀያሾ!’ ያጊኖ። ኦላ ፔኑዋ ሃኩዋን አኪኖ፤ ኦላ ጋዳዋቱ አዛዝያ አዛዙዋነ ኦላንቻቱዋ ጬቁዋ ስሲኖ።

26 "ጋጪ ባረ ቀፍያ ገድሳ ምጪደ ፓላናዉ ዳንዳያናዳን፥ አዳ ኤራተ አዉ እሜዳዌ ኔኔ? 27 አርጋንይ ፑደ ከሲደ፥ ባረ ጎልያ ቃ ደረቱዋን ኬጻናዉ ነ አዛዙዋ ናጊ? 28 አርጋንይ አፉዋ ዶናን ባረ ጎልያ ኬጺደ ደኤ፤ ዛላቱዋ ዛኦቱካ አዉ ጌሱዋ ግዴድኖ። 29 ሄዋን ኡቲደ፥ ባረዉ ምያዋ ዎቼ፤ አ አይፊ ሃኩዋፐ ደሜ። 30 አርጋን ማራቱ ሱ ኡሺኖ፤ ባኩታይ ደእያ ሳን ሀቃንካ እ ሺቄ" ያጌዳ።✝39:30 ማቶሳ 24:28፤ ሉቃሳ 17:37