ኢዮባ 5

1 "ኢዮባ፥ አነ ጼሳ! ሽን ኦኔ ነዉ ኮያናዌ? ኪታንቻቱዋፐ ኦኮ ስማኒ? 2 ኤያ ኡራ ላንጪ ዎ፤ አኬካይ ፓጬዳ ኡራካ ቃናቲ ይሴ። 3 ኤያ ኡራይ ምኒደ ደእያዋ ታን ታ ሁጲያን በኣድ፤ ሽን ኤለካ ታን አ ጎልያ ሸቃድ። 4 አ ናናቱ ሳሩ ባይና ሳን ደኢኖ፤ ኡንቱንቱ ችሎታን፥ ማዲደ ሃሳይያዌ ባይና ሳን ፕርዳ ዬድኖ። 5 እ ሺሼዳ ካ ኮሻቴዳዋንቱ ማና፤ አጉን ግዶን ሞኬዳዋካ ኡንቱንቱ አዉ አግክኖ። ሳመቴዳዋንቱ አ ማጹዋ አካናዉ ያረቲኖ። 6 ቱጋይ ባናፐ ከሰና፤ መቱካ ቢታፐ ሞከና። 7 ታማይ ፑደ ፕርያዋዳን፥ አሳይ መቶ የለቴዳ።

8 "ታና ግድንቶ፥ ታን ጾሳኮ ሺቃና፤ ታ ሞቱዋካ አ ስንን ዎና። 9 ፕልጊደ ኤራናዉ ዳንዳየተና ዎልቃማባቱዋነ ፓይዱ ባይና ኦራባቱዋ ጾሳይ ኦ። 10 እራ ቢታን ቡክሴ፤ ጋድያዉካ ሃ የዴ። 11 ቶሸቴዳዋንታ ቦንቼ፤ ካዮትያዋንታካ ምንደ ናሸቼ። 12 ገናንቻቱዋ ሀልቹዋካ ሀልሴ፤ ሄዋ ድራዉ፥ ኡንቱንቱ ኩሽያ ኦሱ ፖለተና። 13 አዳ ኤራንቻቱዋ እ ኡንቱንቱ ገንያን ኦይቄ፤ ጌላቱዋ ማቁዋካ አ የጌ።✝5:13 1 ቆሮ. 3:19 14 ኡንቱንቶ ጋላሳይ ማና፤ ጋላሳ ሴታንካ ኡንቱንቱ ሄካ ብላህያዳን ታታፋና። 15 ህዬሳቱዋ እ ኡንቱንቱ ሞርከቱ ማሻፐ አሼ፤ እ ኡንቱንታ ዎልቃማቱዋ ኩሽያፐካ ዎ አኬ። 16 ሄዋ ድራዉ፥ ህዬሳቶ ህዶታይ ደኤ፤ ኢታ አሳቱዋ እ ጮኡ ኦ።

17 "ጾሳይ ሴርያ ኡራይ አንጀቴዳዋ፤ ሄዋ ድራዉ፥ ኡባ ዳንዳይያ ጾሳ ሴራ ካፓ።✝5:17 ሌም. 3:11፤ እብራ. 12:5-6 18 እ ማዱ፥ ሽን ማዱ ቃቼ። እ ደቼ፥ ሽን አ ኩሺ ሌ።✝5:18 ሆሰ 6:1 19 ኡሱፑን ቆሞ መቶባፐ እ ኔና አሻና፤ ላፑንካ ኔና ቦቼና። 20 ኮሻ ዎደ ሀይቁዋፐ፥ ኦላ ዎደካ ማሻ ቃራፐ እ ኔና አሻና። 21 እ ኔና እንጻርሳ ልሱዋፐ ገንና፤ ባሻይ ጋክያ ዎደካ ያያካ። 22 ባሻ ቦላነ ኮሻ ቦላ ኔን ሚጫና፤ ባዞ ዶአቶካ ያያካ። 23 ነ ጎሽያ ጎሻን ሹቻይ ደኤና፤ ባዞ ዶአቱካ ኔናና ሳሮ ግዳናዋንታ። 24 ነ ዱንካኒ ሳሮ ግድያዋ ኔን ጌሻደ ኤራና፤ ነ ዶርሳቱዋ አቁዋካ ኔን ጾሞስያ ዎደ፥ ኡንቱንቱፐ እቱነ ፓጨና። 25 ነ የለታይ ጮራታናዋነ ነ ዘረቱካ ደምባ ማታ ኬሻ ግዳናዋ ኔን ኤራና። 26 ዛርጋ ቱኩ ባረ ዎድያን ኡዱማ ይያዋዳን፥ ኔን አዱሳ ላይ ደኣደ፥ ዱፉዋ ባና። 27 ኢዮባ፥ ኑን ሀዋ ኡባ ፕልግ ጼሌዶ። ሄዌ ቱማ ግድያ ድራዉ፥ ሄዋ ስሳደ፥ ነዉ አካ" ያጌዳ።