ኢዮባ 8

ብልዳደ ሃሳዬዳ ሃሳያ

1 ሄዋፐ ጉይያን፥ ሹሀ ቢታፐ ዬዳ ብልዳደ ዛሪደ፥ ሀዋዳን ያጌዳ፤ 2 "ኔን ሀዋ ማላባ አዉደ ጋካናዉ ሃሳያይ? ነ ዶናፐ ከስያ ቃላይ ዎልቃማ ጎትያ ማላ። 3 ኡባ ዳንዳይያ ጾሳይ ፕርዳነ ጽሎባ ጌላዪ? 4 ነ ናናቱ ጾሳ ቦላ ናጋራ ኦዳ ድራዉ፥ እ ኡንቱንታ ኡንቱንቶ በስያዋዳን ሙሬ። 5 ሽን ኔን ጾሳኮ ስሞፐ፥ ኡባ ዳንዳይያ ጾሳ ዎሶፐ፥ 6 ኔን ጌሻነ ሱረ ግዶፐ፥ እ ነ ድራዉ ደንዲደ፥ ኔና ማዳና፤ እ ካሰ ነ ደኦ ዛሪደ ዎይታና። 7 ነ ዶመይ ጉ ማላቶፐነ፥ ነ ዉርሰይ ሎይ ዳራና።

8 "ካሰ የለታ አነ ኦቻ፤ ኑ ማይዛ አዎቱ አያ አያ ታማሬደንቶ፥ ኮያደ ደማ። 9 አያዉ ጎፐ፥ ኑን ዝኖ የለቴዳዋንታ፤ ኑን አያነ ኤሮኮ። ኑን ሀ ሳኣን ደእያ ላይይ ኩዋ ማላ። 10 ኡንቱንቱ ኔና ታማርስኖ፥ ነዉ ኦድኖነ ባረንቱ አኬኬዳዋፐ ሃሳይኖ።

11 "ጫሪ ጫርያ ሃይ ባይና ሳን ድጫናዉ ዳንዳየና፤ ማቃይካ ሃ ባይና ሳን ሞካናዉ ዳንዳየና። 12 ብሮ ድጪደ፥ ቃንጸተናን ደኢድ፥ ማታፐካ ኤለ ሹላና። 13 ጾሳ ዶግያ አሳ ኡባ ዉርሰይ ሄዋ ማላ፤ ጾሳይ ባይና ኡራ ህዶታይካ ያና። 14 እ አማነትያዌ መእ ክችያዋ፤ እ ጬቀትያባይካ ሻራሮታ ጎልያ ማላ። 15 እ ባረ ሻራሮታት ጎልያን ዘምፔ፥ ሽን ኤቀና፤ እ አ ኦይቃና፥ ሽን አ ዳንዳየና። 16 እ አዋን ሃ ኡሼዳ አታክልትያ ማላ፤ አታክልትያ ሳኣ ፕን ከሳና ጋካናዉ ዳሼ። 17 ኬላ ሹቻ ዩሹዋን ባረ ጻጱዋ የዴ፤ ሹቻቱዋ ግዶንካ ባረዉ ሳኣ ኮዬ። 18 ሽን እ ባረ ሳኣፐ ሾደት ይንቶ፥ ሄ ሳአይ አ፥ ‘ታን ኔና በአበይከ’ ያጋና። 19 በአ፥ ኢታ አሳቱዋ ናሸቻይ ሀዋ ማላ። ሀራ አሳቱካ ዪደ፥ ኡንቱንቱ ሳኣ ኦይቂኖ።

20 "ጾሳይ ቱሙዋፐ ቶሺ ባይና አሳ ኦል ኤረና፤ ኢታ ኦያዋንታ ቃይ ማደና። 21 እ ዛሪደ፥ ኔና ሚጭሳናነ እልልሳና። 22 ኔና እጽያዋንቱ ዬላ ማያና፤ ኢታቱዋ ጎሊ ያና" ያጌዳ።