1 ጾሳ ቆማይ ሙሴ ሀይቄዳዋፐ ጉይያን፥ ጾሳይ ሙሳ ማድያ ነዌ ናኣ ኢያሳ፥ ሀዋዳን ያጌዳ፤ 2 "ታ ቆማይ ሙሴ ሀይቄዳ። ሄዋ ድራዉ ኔንነ ሀ አሳይ ኡባይ ደንዲደ ታን እስራኤልያ አሳዉ እምያ ጋድያ ገላናዉ ሀዋ ዮርዳኖሳ ሻፋ ፕንተ። 3 ታን ሙሴዉ ኦዴዳዋዳን፥ ህንተንቱ ገዲ የያ ሳኣ ኡባ ታን ህንተንቶ እማድ።✝ 4 ህንተንቱ ዛዋይ ኔጌባ ባዙዋፐ ደንዲደ፥ ሊባኖሳ ደርያ ጋካናሳ፤ ኤፍራጺሳ ጌተትያ ዎጋ ሻፋፐ ደንዲደ፥ ሂተቱዋ ጋድያ ኡባና ጉጂደ፥ አዋይ ዉልያ ባጋና ደእያ ሜድትራነ አባ ጋካናሳ። 5 ኔን ደኤዳ ላይ ኡባን አይ አሳይነ ኔና ኦለቲደ ተኤና። ታን ሙሴና ግዴዳዋዳን፥ ኔናናካ ግዳና፤ ታን ኔና ኡባካ የግከነ አግከ።✝ 6 ምና፤ ጻላ! አያዉ ጎፐ፥ ታን ኡንቱንቱ ማይዛ አዋቶ እማና ጋደ ጫቄዳ ጋድያ ኔን ሀ አሳ ላትሳናሳ።✝ 7 ምና፤ ሎይ ጻላ! ታ ቆማይ ሙሴ ኔና አዛዜዳ ዎጋ ኡባ ምንሳደ ናጋ። ኔን ብያሳኣ ኡባን ነዉ ሱራና ማላ፥ አፐ ኡሸቻ ዎይ ሀድርሳ ቦፓ። 8 ሀ ዎጋ ማጻፋይ ነ ዶናፐ ሻከቶፖ፤ አን ጻፈቴዳዋ ኡባ ምንሳደ ናጋናዉ፥ ጋላስነ ቃማ አ ቆፓ። ያቶፐ፥ ነዉ ኡባባይካ እንጀታናነ ጊጋና። 9 ምና፤ ጻላ! ነ ብያሳኣ ኡባን ታን ጎዳይ ነ ጾሳይ ኔናና ደእያ ድራዉ፥ ያዮፓ! ህርጎፓ! ጋደ ታን ኔና አዛዛድ" ያጌዳ።

10 ሄዋፐ ጉየ ኢያሱ አሳ ካፓቱዋ ሀዋዳን ያጌዳ፤ 11 "ቢተ፤ አሳይ ዱንካኖ ሳና አ ቢደ፥ አሳ፥ ‘ህንተ ሽንቃ ጊግስተ፤ ሄዙ ጋላሳ ግዶን፥ ጾሳይ ህንተንቱ ጾሳይ ህንተንቶ እምያ ጋድያ ላታናዉ ዮርዳኖሳ ሻፋ ፕኒታ’ ያጊደ ኦድተ" ያጌዳ።

12 ኢያሱ፥ ሮቤላ ዘረ፥ ጋደ ዛራቱዋነ ምናሰ ዛራቱዋፐ ባጋቱዋ ሀዋዳን ያጌዳ፤✝ 13 "ጾሳ ቆማይ ሙሴ ህንተንታ አዛዜዳዋ ሀሳይተ። እ ህንተንታ፥ ‘ጾሳይ ህንተንቱ ጎዳይ ህንተንታ ሸምፕሳና፤ ሀ ቢታካ ህንተንቶ እማና’ ያጌዳ። 14,15 ህንተንቱ ማቻቱ፥ ህንተንቱ ናናይነ ህንተንቱ መሂ ዮርዳኖሳ ሻፋፐ ሀፍንና ሙሴ ህንተንቶ እሜዳ ጋድያን ደእሽኖ። ሽን ህንተንቱ ኦላንቻቱ ባረንቱ ኦላ ሚሻ ኦይቂደ፥ ህንተንቱ ዳባቱዋፐ ስን ጼራን ኦለታናዉ ዮርዳኖሳ ሻፋ ፕንኖ። ጾሳይ ህንተንታ ሸምፕሴዳዋዳን፥ ኡንቱንታካ ሸምፕሳና ጋካናስነ ጾሳይ ህንተንቱ ጾሳይ ኡንቱንቱዉካ እምያ ጋድያ ኡንቱንቱ ላታና ጋካናዉ፥ ኡንቱንታ ማድተ። ሄዋፐ ጉይያን ስም ቢደ፥ ጾሳ ቆማይ ሙሴ ዮርዳኖሳ ሻፋፐ ሀፍንን አዋይ ዶልያ ባጋና እሜዳ ህንተንቱ ጋድያን ደእተ" ያጌዳ።

16 ሄዋፐ ኡንቱንቱ ኢያሳ፥ "ኔን ኑና አዛዜዳዋ ኡባ ኑን ኦና፤ ኔን ኪትያ ሳኣ ሀቃነ ባና። 17 ሙሴዉ ኡባባን አዛዘቴዳዋዳን፥ ነዉካ አዛዘታና። ጾሳይ ነ ጾሳይ ሙሴና እትፐ ግዴዳዋዳን፥ ኔናናካ እትፐ ግዶ። 18 ነ አዛዞ ማካልያዌነ ነ አዛዜዳዋ አያነ አዛዘተናን እጽያዌ ሀይቆ። ኔን ምና፤ ጻላ!" ያጌድኖ።