1 ናእማ ቢታፐ ዬዳ ጾፋር ዛሪደ፥ ሀዋዳን ያጌዳ፤ 2 "ሀ ሃሳየቴዳ ቃላዉ ኡባዉ ዛሩዋ እምያ አሳይ ባዌ? ዎይ ሀዋ ሃሳዬዳ ብታኒ ቱማንቻ ግዳናዉ ዳንዳዪ? 3 ነ መላ ሃሳያይ አሳ ጮኡ ኦ? ኔን ቅሊጭያ ዎደ፥ ኔና ሴርያዌ ባዋ ጋድየ? 4 ኔን ኦዳደ፥ ‘ታ ትምርቲ ቱማ፤ ታን ጾሳ ስንን ጌሻ’ ያጋሳ። 5 ጾሳይ ነ ቦላ ባረ ዶና ዶዪደ ሃሳዬረኔሻ! 6 እ ነዉ አዳ ኤራተ ጹራ ቆንጭሴረኔሻ! አያዉ ጎፐ፥ ቱሙ አዳ ኤራተዉ ላኡ ክፍለቱ ደኢኖ። ጾሳይ ኔና ነ ኦዳ ናጋራ ኬሻ ሙርቤናዋ ኤራ።

7 "ኔን ጾሳ ጪማ ጹራ ቆራደ ኤራናዉ ዳንዳያይ? ዎይ ኡባ ዳንዳይያ ጾሳ ዛዋቱዋ ኮያደ ደማናዉ ዳንዳያይ? 8 ኡንቱንቱ ሳሎቱዋፐካ ቃ፤ ኔን አይነ ኦናዉ ዳንዳያካ። ኡንቱንቱ ስኦልያፐካ አዳ ጪማ፤ ኔን ኤራናዉ ዳንዳያካ። 9 ጾሳ አዳ ኤራተይ ቢታ አዱሳተፐ አዱቄ፤ አባ ጎምፓፐካ አኬ። 10 እ ዪደ፥ ኔና ቃሾ ጎልያን የግንቶነ ፕርዳ ጎለ ሺሽንቶ፥ አ ድጋናዉ ዳንዳይያዌ ኦኔ? 11 ጾሳይ ፓና አሳቱዋ ኤሬ፤ ኢታባ በእያ ዎደ፥ እ ጮ አገና። 12 ኤያ አሳይ አዳ ኤራንቻ ግድያዋፐ ደንባ ሃሪ አሳ ግዲ የለትያዌ ማቴ።

13 "ኢዮባ፥ ኔን ነ ዎዛና ሱረ ኦፐ፥ ነ ኩሽያካ አኮ ምጫደ ዎሶፐ፥ 14 ናጋራ ኔፐ ሃሶፐ፥ ነ ጎለንካ ኢታባይ ደኤናዳን ኦፐ፥ 15 ያቶፐ፥ ኔን ቁ ጋደ ዬላይ ባይናን ኡባባ ጼላና፤ ያሽያዌ ባይናንካ ምናደ ኤቃና። 16 ነ መቱዋ ኡባካ ኔን ዶጋና፤ ጉኬዳ ሃዳን፥ ኔን አ ላኤን ሀሳያካ። 17 ነ ደኡ ሴታ ጋላሳ አዋፐካ አደ ፖአና፤ ነ ደኡዋ ማይካ ዎንታ ፖኡዋ ማላ ግዳናዋ። 18 ነዉ ህዶታይ ደእያ ድራዉ፥ ኔን ህርገናን ደአና። ጾሳይ ኔና ናግያ ድራዉ፥ ኔን ዎፑ ጋናነ ሸምፓና። 19 ኔን ገምእሽያ ዎደ፥ ኔና ያሽሳና ኡራይ ባዋ፤ ዳሮቱ ኔና አዉዳሻና። 20 ሽን ኢታቱዋ አይፊ ቆቃና፤ አፐ ባቃት አታናዉካ ዳንዳይክኖ። ኡንቱንቱ ህዶታይ ሀይቁዋ" ያጌዳ።