Números 6

ናዝራዌተ ህግያ

1 መና ጎዳይ ሙሳ ሀዋዳን ያጌዳ፥ 2 "ኔን እስራኤልያ አሳዉ ሀዋዳን ያጋደ ኦዳ፤ ‘አቱማ አሳይ ዎይ ማጫ አሳይ ናዝራዌ ግዲደ፥ ባረና መና ጎዳዉ ዱማያናዉ ገፖፐ፥ 3 ዎይንያ ኤሳነ ሀራ ማይያ ኡሻ ኡሾፖ፤ ዎይንያ አይፍያፐ አገትያ ጫላባነ ማይያባ ኡሾፖ፤ ዎይንያ ቴራ ጉምኤዳዋ ኡሾፖ። ዎይ ዎይንያ ቴራ ሹጉዋ ግድና፥ መላ ግድናካ ሞፖ፤✝6:3 ሉቃሳ 1:15 4 እ ባረና ዱማዬዳ ዎድያን ኡባን፥ ዎይንያ ቱራፐ ቤትያዋ ኡባ፥ ዎይንያ ዘረ ግድና፥ ዎይ ዎይንያ ፖቁዋ ግድናካ ሞፖ።

5 " ‘እ ባረና መና ጎዳዉ ዱማያናዉ ገፔዳ ዎድያን ኡባን፥ አ ሁጲ ሜደቶፖ ዎይ ቃንጸቶፖ። እ ባረ ሁጲያ ብናናካ አዱሲደ ድቾ። እ ባረና መና ጎዳዉ ዱማዬዳ ዎዲ ፖለታና ጋካናዉ፥ ጌሻ ግዳናዉ ኮሼ።

6 " ‘እ ባረና መና ጎዳዉ ዱማዬዳ ዎድያን ኡባን አሃኮ ሺቆፖ። 7 ሀራይ አትና አ አዉ፥ ዎይ አ ዳያ፥ ዎይ አ እሻይ፥ ዎይ አ ምቻታ ሀይቆፐካ፥ እ ባረና ቱንሶፖ። አያዉ ጎፐ፥ እ ባረና ጾሳዉ ዱማዬዳዋ ኤርስያዌ ባረ ሁጲያና። 8 እ ባረና ጾሳዉ ዱማዬዳ ዎድያን ኡባን እ መና ጎዳዉ ጌሻ።

9 " ‘አሳይ አ ማታን አኬከናን ሀይቂና፥ ጾሳዉ ዱማዬዳ አ ሁጲ ቱኖፐ፥ ላፑን ጋላሳ ጋምኢደ፥ ባረ ጌይያ ሄ ላፑን ጋላስ ባረ ሁጲያ ሜደቶ። 10 ሆስፑን ጋላሳን ላኡ ሀራጰቱዋ ዎይ ላኡ ማራ ሀራጰቱዋ ጾሳ ዱንካንያ ፐንገ ቄስያዉ አሆ። 11 ቄሲ ሀራጰቱዋፐ እቱዋ ናጋራ ያርሾ፥ እቱዋ ቃይ ጹግያ ያርሾ ያርሾ። አያዉ ጎፐ፥ አሃይ አ ማታ ሺቄዳ ባይዙዋ ድራዉ፥ አዉ አቶ ጊሳናሳ። ሄ ጋላስ እ ባረ ሁጲያ ዎጋዳን ጌሾ፤ 12 እ ባረና ካሰ ገፔዳ ዎድያ ኬና ባረና ጾሳዉ ዱማያናዉ ኮሼ። ያቲደ የለቶደፐ እት ላይ ግድያ አቱማ ዶርሳ ናቆ እምያ ያርሹዋ ኦደ ያርሾ። ሽን ሄዋፐ ካሰ እ ባረና ጾሳዉ ዱማዬዳ ጋላሳቱ ፓይደትክኖ፤ አያዉ ጎፐ፥ እ ባረና ዱማዬዳ ሄ ዎደቱዋ ግዶን ባረና ቱንስ ድጌዳ።

13 " ‘ባረ ገፋ ዎድያ ዉርሴዳ ዎደ ባረና ጾሳዉ ዱማዬዳ ናዝራዊያ ዎጋይ ሀዋ: ጾሳ ዱንካንያ ፐንገ እ ሺቆ፤✝6:13 ኪታ 21:23-24 14 መና ጎዳዉ ትላ ቦላና ደእያ እት ላይ አቱማ ዶርሳ ጹግያ ያርሾ፥ ትላ ቦላና ደእያ እት ላይ ዶርሳቶ ናጋራ ያርሾነ ትላ ቦላና ደእያ ዶርሳ ኦርግያ እትፐተ ያርሾ ሄ ሳኣ አሆ። 15 ቃይ ካ ያርሹዋነ ኡሻ ያርሹዋ ኡንቱንቱና እትፐ ያርሻናዉ አሆ፤ ሄ ካ ያርሹ እርሹ ገልቤናዋ ግዶ፤ ቃይ ዛይትያን ሙናቄዳ ሊቆ ልያ ኮምፖቱዋነ ዛይትያ ኦከቴዳ ሌኦ ኡክቱዋ ማሶፍያን አሆ።

16 " ‘ቄሲ ሄዋ ኡባ ሺሺደ፥ ናጋራ ያርሹዋነ ጹግያ ያርሾ ኦደ፥ መና ጎዳዉ አ ድራዉ ያርሾ። 17 ቄሲ ዶርሳ ኦርግያ፥ እርሹ ገልቤና ኮምፖቱዋነ ኡክቱዋ እትፐተ ያርሹዋ ኦደ፥ መና ጎዳዉ ያርሾ። ቃይ ሄዋና እትፐ ካ ያርሹዋነ ኡሻ ያርሹዋ ያርሾ። 18 ሄዋፐ ጉይያን፥ ናዝራዊ ጾሳዉ ዱማዬዳ ባረ ሁጲያ ጾሳ ዱንካንያ ፐንግያን ሜደቶ፤ ሜደቴዳ ብናና አፊደ፥ እትፐተ ያርሹዋፐ ጋርሳ ባጋና ደእያ ታማን የጎ።

19 " ‘ባረና ጾሳዉ ዱማዬዳ ናዝራዊ ባረ ሁጲያ ሜደቴዳዋፐ ጉይያን፥ ቄሲ ዶይሰቴዳ ዶርሳ ኦርግያ ምሳ፥ እርሹ ገልቤና እት ኮምፑዋነ እት ሌኦ ኡክ አኪደ፥ ሀ ናዝራውያ ኩሽያን ዎ። 20 ቄሲ ኡንቱንታ ቃያ ያርሹዋ ኦደ፥ መና ጎዳ ስንን ቃ። ያቶፐ ሄዋንቱ ዉጻኬዳ አንጎሱዋናነ ያርሼዳ ገድያና ጌሻነ ቄስያሳ። ሄዋፐ ጉይያን፥ መና ጎዳዉ ባረና ዱማዬዳ ናዝራዊ ዎይንያ ኤሳ ኡሻና ጎፐ ኡሾ።

21 " ‘ስም ጾሳዉ ባረና ዱማያናዉ ገፔዳ ናዝራውያዉ ዎ ዎጋይ ሀዋ: ባረና መና ጎዳዉ ያርሻናዉ ኮሽያ ያርሾቱዋፐ አያዋ እማናዉ ገፔዳዋ ግዶፐ፥ እ ባረ ገፔዳ ገፋ ኬና ጋናዉ ኮሼ’ ያጋ" ያጌዳ።

ቄሳቱ አንጃና አንጁዋ

22 መና ጎዳይ ሙሳ ሀዋዳን ያጌዳ፤ 23 "አሮናዉነ አ አቱማ ናናቶ ሀዋ ኦዳ፤ ‘እስራኤልያ አሳ ህንተ ሀዋዳን ያጊደ አንጅተ፦

24 "መና ጎዳይ ህንተና አንጆነ

ህንተና ናጎ፤

25 መና ጎዳይ ህንተንቶ ባረ ሶምኡዋ

ፖእሶነ ህንተንቶ ቃረቶ፤

26 መና ጎዳይ ህንተና ባረ ኬካ አይፍያን

ጼሎነ ህንተንቶ ሳሮተ እሞ"

ያጊደ አንጅተ’ ያጋ።

27 "ሀዋዳን ኡንቱንቱ እስራኤልያ አሳ ቦላ ታ ሱን ዎና፥ ታን ኡንቱንታ አንጃና" ያጌዳ።