1 Tabɔkɔ odumudumu uwu ikalama a ndafo, Ɔzhizɔsi e yitu te kwuyengwu a lafya la kwudu kwɔlɛ kaa la gba le so mbaa ete wu kwu bo o, uwu e pwu idɛnyi iyi enzu wu umba bɔkɔ o yi mu kwudu kwɔlɛ awu, e koko e pwu idɛnyi mba nzhii ba mu imbwama.

2 Bɔkɔ o yi mu kiya irimo ingyi onoyo, onzu uwoyi ba e shi Ozhuda umɛ uwu Ɔsamɔ uwu Isikariyɔ egbo iyi ka la ya kwoya ungwu Ɔzhizɔsi ma-a. 3 Ɔzhizɔsi e yitu te Ete wu e shi wu ekpasu mu ingyinangyina, a gba e yitu te uwu e ngyi mbaa Ukpo, aa gba e rimo mbaa Ukpo. 4 Akwɛyi e yimo a lafya la mba bɔkɔ e yi mu kiya irimo awu, akwɛyi a lu origa wu uwu kwudu ma akwɛyi a ma kwotawele muzhi wu. 5 Akwɛyi e fu embyi mu kwɔbulɛ akwɛyi e le mu alɛ iyi Wavɔngɔkiya wu igbɔma, akwɛyi a nwu yi ma mu kwotawele ungwu bɔkɔ a ma muzhi wu awu. 6 Kwuye ugu e bo mbaa Ɔsamɔ Opita, a za wu te, <<Ɔkwu, uŋɔ mafyi ŋɔ gba ŋɔ gbɔ mi alɛ ma le?>>

7 Ɔzhizɔsi a gba wu opwu te, <<Iyi bɔkɔ mi yi mu iwomo kekelele ŋɔ di zɔngɔma yi ma mo, ɔnɔnuwa ba ŋɔ zɔngɔma yi ma.>>

8 Opita a za wu te <<Imi mii nyama te kaa gbɔ alɛ mi ma gbee mo.>>

Ɔzhizɔsi a gba wu opwu te, <<Gba ŋɔ nyama te la mi gbɔ ŋɔ alɛ ma mo, ŋɔ kwu uwa mi mo.>>

9 Akwɛyi Opita a gba opwu te, <<Ɔkwu, akwu alɛ mi kɛɛkyi mo, ewo mbala reshi mi kyo ka gbɔ yi ma tete!>>

10 Ɔzhizɔsi a gba Ɔsamɔ Opita opwu te, <Onzu uwu bɔkɔ e womo-o, alɛ wu kɛɛkyi gba ee wo te ka la gbɔ yi ma le; ɛnwu wu ngyɔɔ i yi sɛsɛ. Lunyi ba lu yi sɛsɛ-ɛ, ukpɛnyi mekeka yi ba e yi sɛsɛ mo.>> 11 Moo e yi onzu uwu bɔkɔ a ba ya kwoya wu, gba i shi a zɔ te, akwu lɛɛbi yi gba lu yi sɛsɛ le mo.

12 Tabɔkɔ Ɔzhizɔsi a mbwa Wavɔngɔkiya wu alɛ igbɔma, akwɛyi a gba la origa wu ilomo akwɛyi a gba a ka ŋɔma mu riyi wu. Akwɛyi e yo mbo te, <<Iyi bɔkɔ mi wo yi kekelele le, lu zɔngɔma yi ma?>> 13 <<Lunyi lu ya mi te, <U zɔ kiya> mbala <Ɔkwu,> ee lu ya yi kyaa, moo te gba mi kwu le. 14 Moo gba Imi, Ɔkwu mbala U zɔ kiya yi a gbɔ alɛ yi ma, lunyi tete la lu gbɔ alɛ iyi esu ma. 15 Kwuwongwu Imi mi zɔ yi kiya ingyi lu vɔngɔ munyi mi, tee la lu wo kyamate bɔkɔ mi wo yi awu. 16 Imi mi so yi ongbulolo, Umɛgba aa ka adakwogba wu ma mo, nana ɔlɔgbulɔ a ka onzu uwu a lɔ wu ma mo. 17 Bɔkɔ lu yitu iyi ɛlɛ lɛɛbi ele, Ukpo ee shi yi esheshi wu gba lu mbwalu yi.

18 <<Akwu lɛɛbi yi gba mi so yi le mo, Imi mi yitu iyi enzu umba bɔkɔ mi ŋa mba. Ɛlɛ ba i wo te kaa iso iyi Ukpo lakwu nyɔlɔma le te: <Onzu uwu bɔkɔ e ri kiya ingyirimo mbala mi, a gba e kwu mami.>

19 Imi mi so yi ɛlɛ keyi dɛ ishi i bi wo le, kaa kwuyengwu bɔkɔ i bi wo akwɛyi lu yitu te <Imi mi kwu uwu bɔkɔ mi kwu.> 20 Mi so yi ongbulolo, onzu uwunawuna uwu bɔkɔ a na ɔlɔgbulɔ mi onzu awu a na mi; onzu uwu a na onzu uwu bɔkɔ mi lɔ wu ma, awu a na onzu uwu bɔkɔ a lɔ mi ma.>>

21 Mizhikembo iyi a mbwa iso ɛlɛ isomo, Ɔzhizɔsi e wo ubugyi gyɔɔ mu kwundu akwɛyi a zɔ te, <<Imi mi so yi ongbulolo, onzu ukpɛnyi meka yi e to mi a yama.>>

22 Akwɛyi Wavɔngɔkiya wu o yese esu, ba o zɔngɔma onzu uwu bɔkɔ Ɔzhizɔsi e yi mu iso isomo meka wu mo. 23 U vɔngɔ kiya uwu O Ɔzhizɔsi bɔkɔ a gyi awu a ŋɔ kɛlɛɛ mbala wu mɔmɔ. 24 Akwɛyi Ɔsamɔ Opita e wo u vɔngɔ kiya awu kwuwo tee, <<Yo wu kwuyo te iso ɛlɛ e so mu reshi ingyi uwe.>>

25 Uwu ba a wɛlɛ mu Ɔzhizɔsi, akwɛyi e yo kwuyo te, <<Ɔkwu, akwu uwe ngyɔ?>>

26 Ɔzhizɔsi a gba wu Opwu te, <<Mizhikembo iyi mi kpa kwoburedi mu ɔsɔ, mii shi ngwu onzu awu.>> Akwɛyi a kpa kiya ingyirimo ngyɛgyi mu ɔsɔ, akwɛyi e shi ngwu Ozhudasi Isikariyɔ, umɛ uwu Ɔsamɔ. 27 Tabɔkɔ Ozhudasi e ri kiya ingyirimo ngyɛgyi ma, akwɛyi onzu uwoyi e fye mu egbo wu.

Akwɛyi Ɔzhizɔsi a za wu te, <<Iyi bɔkɔ ŋɔ yi egbo iyi iwomo awu, gyakpɔɔ mu iwomo,>> 28 Onzu uwunawuna te meka iyi umba bɔkɔ o ŋɔma mba kiya irimo awu a zɔngɔma iyi bɔkɔ Ɔzhizɔsi e yi mu isomo mo. 29 Enzu umbafo mbo o zɔ mu egbo mbo te, kwuwongu Ozhudasi a ra la kakyɔ mba gba Ɔzhizɔsi e ye wu mu isomo te la ya ewiri iyi enzu umba o yi ugɔ mu odumudumu, nana le to eduwo le shi ayirewa le. 30 Ozhudasi a na kwoburedi mo, akwɛyi a wɔ kwudu iyawu kɛlɛlɛ. Kwuye kwɔngu aku utu.

31 Kwuye ungwu bɔkɔ Ozhudasi a kama, akwɛyi Ɔzhizɔsi a zɔ te, <<Kekelele gba akwu kwuyengwu bɔkɔ Umɛ uwu Onzu aa fya inzumbɛku ma le; akwɛyi meka wu gba inzumbɛku iyi Ukpo ii ta pee le. 32 Akwiyi gba Ukpo a fya iduma kwuwongu Umɛ, Ukpo mafyi wu ee shi Umɛ uwu Onzu inzumbɛku, ɛlɛ ba Ukpo ee wo yi kekelele.

33 <<Ɛmɛ mi, mi ŋɔ mbala yi ngbɛɛ fo. Lunyi luu gagyi mi, mate bɔkɔ mi so Azhu awu gba mi so yi le te: Mba bɔkɔ mi sheyimo, lunyi lu domo te lu re mɔmɔ mo.

34 Ɛrama iyepo gba mii shi yi le tee: la lu gyesu. Kyamate bɔkɔ imi mi gyi yi awu, lunyi la lu gyesu mega. 35 Ɔgwuzɛ ɔlɛ gba u zɔ te lu kwu Wavɔngɔkiya mi le, akwiyi gba lu gyesu.>>

36 Ɔsamɔ Opita e yo wu kwuyo tee, <<Ɔkwu, ŋɔ sheye muna?>>

Ɔzhizɔsi a gba wu opwu te, <<Mba bɔkɔ mi sheyi ele, uŋɔ ŋɔ do te ŋɔ mbwalu mi kekelele mo, kwuye kwowa ba ŋɔ mbwalu mi.>>

37 Opita e yo wu te, <<Ɔkwu, kimbe ki shi bɔkɔ mi domo te mi rimo mbala ŋa kekelele mo? Moo imi mi nyama te mi kpomo kwuwo ŋɔ.>>

38 Akwɛyi Ɔzhizɔsi a gba wu opwu te, <<Ŋɔ nyama te ŋɔ kpomo kwuwo mi? Mi so ŋɔ ongbulolo, ŋɔ zɔ kwu zɔ mi izhɛla dɛ gba okwuru e tɛyi le!