1 Mu iyemo Iso ɛlɛ iyi mɔmɔ; Iso ɛlɛ i yi mbala Ukpo, Iso ɛlɛ akwu Ukpo. 2 Iso ɛlɛ i yi mbala Ukpo ngbaa mu iyemo.

3 Akwu i zɛ mawu gba Ukpo e wo apula iyinayina le. Kiya ingyi bɔkɔ o wo ngyi ba akwu mawu mo, ki yi mo. 4 Iso ɛlɛ gba akwu undu uwu kwunyɔ le, akwɛyi kwunyɔ kwɔlɛ kwu ka la enzu ɛbɛ. 5 Ɛbɛ ɛlɛ i lemo mu ipwu, ipwu ba i do yi inyima mo.

6 Ukpo a lɔ ɔlɔgbulɔ wu ma, onzu awu o ya wu te Ɔzhɔnu. 7 E bo te kaa le so enzu iso iyi ɛbɛ ɛnyi, kaa enzu lɛɛbi lo pwa ɛlɔgbulɔ ɛlɛ kaa lo mbwalu. 8 Akwu Ɔzhɔnu mafyi wu gba akwu ɛbɛ ɛnyi le mo; uwu e bo te kaa le so enzu iso iyi ɛbɛ ɛnyi le. 9 Ɛlɛ gba akwu ɛbɛ shɛ le - ɛbɛ iyi bɔkɔ i lemo mu onzu uwunawuna i yi mu inyɔma mu kwudu kwɔlɛ.

10 E yi mu kwudu kwɔlɛ ungwu bɔkɔ mbala wu gba Ukpo e wo ngwu le, tetete enzu umba kwudu kwɔlɛ ɔ zɔngɔma wu ma mo. 11 E bo mu ɛzhi wu, enzu umba ɛzhi wu ba ɔ na wu mo. 12 Tetete, enzu lɛɛbi umba bɔkɔ na wu akwɛyi o mbwalu wu e shi mbo ekpasu kaa lɔ kwu ɛmɛ umba Ukpo. 13 Umba o kwu ɛmɛ umba Ukpo mu ɔgwuzɛ uwu inɔma iyi ɔnu mbala oko mo. Akwu onzu gba akwu ete mbo le mo. Ukpo mafyiwu gba akwu Ete mbo le.

14 Iso ɛlɛ i vindɔ onzu uwu bɔkɔ esheshi mbala ongbulolo i nyɔlɔ wu ma duduu akwɛyi a ŋɔ mbala nzu. Kinzu ki ma inzumbɛku wu, inzumbɛku iyi bɔkɔ a na kwuwongu akwu Umɛ Uwɛnyi uwu Ada.

15 Ɔzhɔnu e so iso mu reshi wu akwɛyi a ta anu te, <<Ele gba akwu onzu uwu mi za yi te, <Onzu uwu e yi mu inyɔma mizhikembo mi awu a ka mi ma, moo e yi ngbaa mu iyemo dɛ gba o bo mba mi le.> >> 16 Mu esheshi wu iyi bɔkɔ i yi gyɔɔ awu gba ki fya rɛshi ingyi apula ikikɔ ikikɔ le. 17 Moo ɛrama iyi Ukpo i zɛ mu kwuwo ungwu Omosisi, esheshi mbala ongbulolo ba i zɛ mu Ɔzhizɔsi Okrasi 18 Onzu uwunawuna a da ma Ukpo dɛ mo; Umɛ Ukpɛnyi uwu Ukpo, uwu bɔkɔ e yi mbala Ukpo, uwu bɔkɔ akwu Ukpo awu gba a zɔ nzu Ukpo le.

19 Kwuye ngwu bɔkɔ Azhu umba Ɔzhɛrusalɛ o lɔ ebwoshi umba Ukpo mbala Olevi ma te lo so lo yo Ɔzhɔnu te uwu akwu uwe, 20 Ɔzhɔnu e nvye yi mbo mo mo. Uwu ba e so mbo gedegede te, <<Akwu Imi gba mi kwu Okrasi le mo.>> 21 Akwɛyi o yo wu te, <<Ba ŋɔ kwu uwe? Ŋɔ kwu Elazha re?>>

Ɔzhɔnu a za mba te, <<Mi kwu Elazha mo.>>

<<Nana uŋɔ gba ŋɔ kwu anukenzu uwu ki yi mu eyi wu ifulomo le ŋa?>>

A gba mba opwu te, <<Ayimo.>>

22 Mizhikembo iyi ɛlɛ lɛɛbi akwɛyi ɔ mbwa o yo wu te, <<Ba ŋɔ kwu uwe ŋa? So nzu nɛ kaa la ki gba la ki ka la umba bɔkɔ ɔ lɔ nzu. So nzu onzu uwu bɔkɔ ŋɔ kwu?>>

23 Akwɛyi Ɔzhɔnu a gba mba opwu mu iyi bɔkɔ anukenzu Azaya a ka te, <<Akwu Imi gba Azaya e so le te, uwu a pwa opwu uwu onzu mu ɛzhi ɛngbarara u ta anu te, <la lu ngbɛ ɔgwuzɛ la Ɔkwu.> >>

24 Akwɛyi Afarisi umba bɔkɔ ɔ lɔ mba ma awu, 25 o yo wu te, <<Ŋɔ zɔ te ŋɔ kwu Okrasi mo, ŋɔ kwu Elazha mo, ba ŋɔ kwu anukenzu awu mo, kimbe ki shi bɔkɔ ŋɔɔ wo obatisima?>>

26 Ɔzhɔnu ba a gba mba opwu te, <<Obatisima mi, mi wo mu embyi,>> <<onzu uwufo ba e yi meka yi mu nɛ uwu lu yi wu mo. 27 U wu gba e yi mu inyɔma mizhikembo mi le, uwu bɔkɔ ekyikyi iyi ekpoyata wu lala mi do te mi vuvu yi ma mo.>>

28 Ɛlɛ lɛɛbi i wo mu Ɔbɛtani mu ɛsɛnyi iyi ɔkwu uwu Ɔzhɔda mbaa bɔkɔ Ɔzhɔnu e yi mu obatisima iwomo awu.

29 Tabɔkɔ eyi i lama akwɛyi Ɔzhɔnu a ma Ɔzhizɔsi te e yi mu inyɔma munyi wu akwɛyi a ta opwu kpaa te, <<la lu yese Ilɔ uwu Ukpo. Uwu gba akwuu ingbomo iyi kwudu kwɔlɛ ma lɛɛbi le! 30 U wu gba mi so le kwuye ngwu bɔkɔ mi za yi te, <Onzu uwufo uwu bɔkɔ e yi mu inyɔma mu izhikembo mi awu a ka mi ma moo e yi dɛ gba o bo mba mi le.> 31 Mu iyemo, Imi mafyi mi lala mi zɔngɔma wu ma mo. Kelele mi zɔngɔma wu ma-a, gba mi bo mi wo enzu obatisima mu embyi kaa lɔ wa wu lɔ zɔ ɛmɛ umba Izirɛ kaa lo yi wu.>>

32 Akwɛyi Ɔzhɔnu e so iyi bɔkɔ e yitu tee: <<Mi ma Kwundu uwu Ukpo a wɔ moshi kyamate ogarikwokwo tayi akwɛyi e kwu mawu. 33 Mu kwuye ngwɔlɛ lala, mi yitu wu mo kpɔ. Ukpo uwu bɔkɔ a lɔ mi te la mi wo obatisima mu embyi awu gba a zɔ mi wu le te, <<Onzu uwu ŋɔ ma Kwundu uwu Ukpo a wɔ moshi e bo mɛzhi akwɛyi e kwu mawu, uwu gba akwu u wo enzu obatisima mu Kwundu Ɔkɛrikɛri le.> 34 Imi mi ma mu eyi mi gba mi gyite la mi so yi le te onzu ele gba akwu Umɛ uwu Ukpo le.>>

35 Mu eyi i lama, Ɔzhɔnu mbala Wavɔngɔkiya wu wepo ɔ gba ɔ ka mu riyi ngyɛngyi kpɔ. 36 Kwuye ngwu Ɔzhɔnu a ma Ɔzhizɔsi te e yi mu ikakama, akwɛyi a ta anu tee, <<la lu yese Ilɔ uwu Ukpo a kaawu!>>

37 Tabɔkɔ Wavɔngɔkiya wu wepo mbamba o pwa tayi, akwɛyi o le mu Ɔzhizɔsi imbwaluma. 38 Tabɔkɔ Ɔzhizɔsi e gele eyi akwɛyi a ma mba te o ye wu mu imbwaluma, akwɛyi e yo mbo te, <<Lu gagyi kwuwongumbe?>>

Akwɛyi o yo wu te, <<Orabayi>> (iyi bɔkɔ iluma yi akwu, U zɔ kiya awu) <<muna bɔkɔ ŋɔ kpo?>>

39 Akwɛyi a za mba te, <<la lu bo kaa lu ma mbaa bɔkɔ mi kpo>>

Akwɛyi ɔ ka ɔ ma mbaa e kpo akwɛyi ɔ na mbala wu mɔmɔ. Kwuye ngwu bɔkɔ ɔ ka munyi wu awu ɔnu u bo-o.

40 Anduru, umanyiwu Ɔsamɔ Opita e yi mɛmi iyi enzu wepo umba bɔkɔ ɔ pwa iso iyi bɔkɔ Ɔzhɔnu e so akwɛyi o le mu Ɔzhizɔsi imbwaluma awu. 41 Kiya ingyi kwonze ingyi bɔkɔ Anduru e wo gba akwu te a gagyi Ɔsamɔ umanyiwu dɛ, akwɛyi a za wu te, <<Ki ma Usama awu-o>> (uwu bɔkɔ o ya wu te Okrasi awu.) 42 Akwɛyi Anduru e bo wu mbaa Ɔzhizɔsi.

Ɔzhizɔsi a bɔ wu eyi shii akwɛyi a za wu te, <<Uŋɔ gba ŋɔ kwu Ɔsamɔ umɛ uwu Ɔzhɔnu le. O ya ŋa te Okefasi ŋa>> (iyi ɔ lunyi te Opita awu).

43 Tabɔkɔ eyi i lama akwɛyi Ɔzhizɔsi a wɔ e sheye mu Ogalili akwɛyi a ma Ofilipu akwɛyi a za wu te, <<Mbwalu mi.>>

44 Ofilipu a wɔ mu kwuse ungwu Ɔbɛsayida kyaa mbala Anduru mbala Opita. 45 Ofilipu a ma Ɔnataniyɛ akwɛyi a za wu te, <<Ki fye onzu uwu bɔkɔ o ka iso wu mu ɛrama iyi Omosisi awu, uwu bɔkɔ anukenzu umba Ukpo tete ɔ ka iso meka wu awu, uwu o ya wu te Ɔzhizɔsi uwu Ɔnazarɛti, umɛ uwu Ɔzhɔsɛfu awu-o.>>

46 Akwɛyi Ɔnataniyɛ e yo tee, <<Ɔnazarɛti! Kiya ingyi esheshi ki do te ki wɔ mɔmɔ?>>

Akwɛyi Ofilipu a za wu te, <<Bo kaa ma.>>

47 Tabɔkɔ Ɔzhizɔsi a ma Ɔnataniyɛ te e yi mu inyɔma munyi wu, akwɛyi a zɔ te, <<Ele gba akwu umɛ uwu Izirɛ shɛ le. Imwilo i yi mawu mo.>>

48 Ɔnataniyɛ e yo Ɔzhizɔsi tee, <<Ŋɔ wo la bɔkɔ ŋɔ yi mi?>>

Akwɛyi Ɔzhizɔsi a gba wu opwu tee, <<Mi ma ŋa ngba kwuye ngwu ŋɔ yi mu undu uwu uwɛyi uwu oboriyo dɛ ishi Ofilipu a ya ŋa ma.>>

49 Akwɛyi Ɔnataniyɛ a gba opwu te, <<U zɔ kiya, uŋɔ gba ŋɔ kwu Umɛ uwu Ukpo le; uŋɔ gba ŋɔ kwu Ɔsu uwu Izirɛ le.>>

50 Akwɛyi Ɔzhizɔsi a za wu te, <<Ŋɔ nyama la mi kwuwongu mi za ŋa te mi ma ŋa mu undu uwu uwɛyi uwu oboriyo le? Ŋɔ ma apula iyi bɔkɔ i ka ɛlɛ ma memowu.>> 51 Ɔzhizɔsi e kyo a za mba tee, <<Mi so yi ongbulolo mɛɛ, lu ma oshi u wuma gboo akwɛyi lu ma alɔgbulɔ umba Ukpo te o yama, o kalama mami, Umɛ uwu Onzu.>>